Ogunaʼö Fefu zi No Ihenaigö Yehowa

1, 2. (a) Hewisa dödö ndra Samaduhuʼö Yehowa sanandrösa ba Zura Niʼamoniʼö? (b) Hadia mbuku sabölö öʼomasiʼö ba Zura Niʼamoniʼö?

YAʼITA Samaduhuʼö Yehowa, tatu manö taʼomasiʼö Zura Niʼamoniʼö. Ibeʼe khöda wondrara dödö, fanötöna, ba fanuturu lala si tola tafaduhusi tödö. (Roma 15:4) Tenga moroi ba wangera-ngera niha gulidanö nösinia, hizaʼi no ”Taromali Lowalangi”.​—I Tesalonika 2:13.

² Fefu ita oi so mbuku sabölö taʼomasiʼö ba Zura Niʼamoniʼö. So zomasi mombaso Injil börö me oroma ba waʼauri Yesu gamuata Yehowa sadöni dödöda. (Yohane 14:9) So ösa zomasi mombaso buku sanandrösa ba wamaʼeleʼö simane zura Famaʼeleʼö, börö daʼa zangoromaʼö ”hewisa dania, si lö ara tö”. (Famaʼeleʼö 1:1) So zi terara tödö ba wombaso mbuku Zinunö ba so göi zomasi mombaso mene-mene si no tesura ba mbuku Gamaedola. Sindruhu wa Sura Niʼamoniʼö buku ba niha fefu.

3, 4. (a) Hewisa dödöda sanandrösa ba publikasida? (b) Haʼökhö manö tehenaigö publikasida?

³ Börö me taʼomasiʼö Zura Niʼamoniʼö, taʼomasiʼö göi publikasida börö me teʼodane-dane ia ba Daromali Lowalangi. No ihenaigö khöda Yehowa mbuku, buku side-ide, majalah hegöi lektur tanö böʼö. Daʼa zanolo yaʼita enaʼö ahatö khönia ba aro wamatida.​—Tito 2:2.

⁴ Oya publikasida si no muhenaigö khö ndra Samaduhuʼö Yehowa fefu. So publikasi nifaʼanö moloʼö faʼalawa ndröfi, simane ba zi bohou ebua mazui ba zatua. Oya duho-tuho hegöi video ba situs Web khöda nifaʼanö ba niha si tenga Samaduhuʼö Yehowa. Moroi ba ngawalö zi no muhenaigö andrö, oroma wa ifalua Yehowa zi no ifabuʼu ba wameʼe fanuturu lala ba niha fefu.​—Yesaya 25:6.

5. Hadia zi faduhu dödöda sanandrösa khö Yehowa?

⁵ Ato moroi ba gotaluada zameʼe inötöra ba wombaso Sura Niʼamoniʼö hegöi publikasi. Hizaʼi, lö fagölö-gölö ginötö niʼogunaʼöda ba wamahaʼö yaʼita ba publikasi si no tatema. Faduhu dödöda wa omuso dödö Yehowa na atua-tua ita wangogunaʼö inötö ba wombaso hegöi ba wamahaʼö yaʼita. (Efeso 5:15, 16) Hewaʼae simanö, so zinangea taʼangenanöi. Hadia daʼö?

6. Hadia mbörö wa lö taʼila tahalö wamahaʼö moroi ba zi no ihenaigö Yehowa?

⁶ Na lö mangelama ita, tola manö so ba wangera-ngerada wangumaʼö wa so ösa moroi ba Zura Niʼamoniʼö mazui publikasi si lö moguna khöda. Duma-dumania, hewisa na so nösi Zura Niʼamoniʼö si lö tefaudu ba zalua khöda? Mazui, hewisa na tenga khöda manandrösa publikasi andrö? Hadia ha asala no tabaso ia mazui lö tabaso? Na tafalua daʼö, tola manö lö taʼila hadia gunania khöda. Hewisa enaʼö tatimbagö wamaʼala simane daʼö? Böi olifu ita wa moroi khö Yehowa fefu nibasoda andrö. Imane Sura Niʼamoniʼö, ”Yaʼo, Yehowa, Lowalangiu zamahaö yaʼugö ba zoguna khöu.” (Yesaya 48:17) Ba duho daʼa, so tölu wanuturu lala si tola manolo yaʼita ba wangogunaʼö fefu zi no ihenaigö Yehowa khöda.

FANUTURU LALA BA WANÖNDRA FAMAHAʼÖ BA WOMBASO SURA NIʼAMONIʼÖ

7. Hana wa moguna tabokai gera-erada ba wombaso Sura Niʼamoniʼö?

⁷ Tabokai gera-erada ba wombaso yaʼia. Sindruhu sa wa so ösa nösi Zura Niʼamoniʼö si no mutatugöi haʼökhö manandrösa ia. Hewaʼae simanö, iwaʼö Sura Niʼamoniʼö wa ”fefu nösi zura andrö, ba eheha Lowalangi zameʼe ba dödö niha, ba moguna ia”. (II Timoteo 3:16) Andrö wa moguna tabokai gera-erada ba wombaso Sura Niʼamoniʼö. Lö olifu samösa dalifusöda ira matua wa oya wamahaʼö nihalönia me ibaso sambua waö-waö si so ba Daromali. Daʼa zanolo yaʼia ba wangai famahaʼö hewaʼae lö hauga oroma. Börö daʼö, fatua lö tabaso Zura Niʼamoniʼö, taʼandrö khö Yehowa enaʼö ibokai wangera-ngerada ba ibeʼe khöda waʼatua-tua enaʼö taʼila hadia wamahaʼö somasi ia tahalö.​—Gesera 7:10; baso Yakobo 1:5.

8, 9. (a) Hadia zinangea tasofu khöda ba ginötö tabaso Zura Niʼamoniʼö? (b) Moroi ba goi-goinia sanandrösa khö ndra satua sokubaloi niha Keriso, hadia niʼilada sanandrösa khö Yehowa?

⁸ Beʼe wanofu. Ba ginötö öbaso Zura Niʼamoniʼö, batogö ba sofu khöu samösa: ʼHadia wamahaʼönia khögu sanandrösa khö Yehowa? Hewisa enaʼö tola uʼogunaʼö ia ba waʼaurigu? Hewisa enaʼö uʼogunaʼö ia ba wanolo niha böʼö?’ Na taʼangerönusi wanofu andre, tola tasöndra wamahaʼö moroi ba wombaso Sura Niʼamoniʼö. Datafaigi sambua duma-duma. Itutunö khöda Sura Niʼamoniʼö hadia niʼandrö khö ndra satua sokubaloi niha Keriso. (Baso I Timoteo 3:2-7.) Tola manö imane tödöda wa lö moguna khöda goi-goi andrö börö me lö fefu ita tobali satua sokubaloi. Hewaʼae simanö, dataʼogunaʼö wanofu si tölu ngawua andre si no mututunö moroi yawa enaʼö taʼila hewisa wa tola tetolo ita ba goi-goi andrö.

⁹ ”Hadia wamahaʼönia khögu sanandrösa khö Yehowa?” No izara-zara wanutunö khöda Yehowa hadia manö niʼandrö khö ndra satua sokubaloi. So goi-goi salawa niʼandrönia ba ndra matua sangai halöwö ba mbanua niha Keriso. Daʼa zangoromaʼö wa moguna sibai mbanua niha Keriso khö Yehowa. Imane Sura Niʼamoniʼö wa no ihöli ira ”faoma do Nononia samösa”. (Halöwö Zinenge 20:28, NW) Tobali, itötöna Yehowa khö ndra satua sokubaloi enaʼö tobali ira duma-duma si sökhi, labuʼa föna Lowalangi hewisa wolohera ono mbanuania. Omasi ia na ohahau dödöda börö me laʼameʼegö tödö ita ira satua sokubaloi. (Yesaya 32:1, 2) Na tabaso goi-goi andrö, taʼila hawaʼebua waʼomasi Yehowa khöda.

10, 11. (a) Hadia gunania ba waʼaurida na tabaso goi-goi sanandrösa khö ndra satua sokubaloi? (b) Hewisa enaʼö taʼogunaʼö ia ba wanolo niha böʼö?

¹⁰ ”Hewisa enaʼö tola uʼogunaʼö ia ba waʼaurigu?” Na no tobali ndraʼugö satua sokubaloi, moguna öfuli öfaigi goi-goi andrö ba douʼö zi lö nifaluau. Na omasi ndraʼugö ’wangalui halöwö satua niha Keriso’, odödögö wamalua goi-goi andrö. (I Timoteo 3:1) Fefu niha Keriso tola lahalö wamahaʼö moroi ba goi-goi andrö. Duma-dumania, itötöna khöda Yehowa enaʼö so khöda waʼaboto ba dödö hegöi fangera-ngera si sökhi. (Filifi 4:5; I Fetero 4:7) Na ”tobali duma-duma ami [ira satua sokubaloi], ba nikubaloi andrö”, tola tafahaʼö ita khöra ba ’taʼohiaʼö wamatira andrö’.​—I Fetero 5:3; Heberaiʼo 13:7.

¹¹ ”Hewisa enaʼö uʼogunaʼö ia ba wanolo niha böʼö?” Goi-goi si no muzara-zara khö ndra satua sokubaloi niha Keriso andrö, tola taʼogunaʼö ba wanolo niha nifahaʼöda hegöi niha sadöni dödö ba Zura Niʼamoniʼö, enaʼö aboto ba dödöra hadia gamaehuta zatua sokubaloi moroi khö ndra sondröniaʼö ba agama. Daʼö göi zanolo yaʼita enaʼö lö olifu ita halöwö niʼonorogö tödö ndra satua sokubaloi ba gangowuloa. Tetolo ita göi ba wamosumange yaʼira. (I Tesalonika 5:12) Itugu tafosumange ira, itugu omuso dödöra ba wamalua halöwöra.​—Heberaiʼo 13:17.

12, 13. (a) Moloʼö fakake si no tehenaigö khöda, hadia wanofu sinangea taʼalui wanema li? (b) Beʼe duma-duma hewisa wa tola tahalö wamahaʼö si lö taʼila me mböröta.

¹² Alui. Na tafahaʼö ita ba Zura Niʼamoniʼö, tola taʼalui wanema li moroi ba wanofu-nofu andre:

• Haniha zanura ösi Zura Niʼamoniʼö andre?

• Hezo ba hamega musura ia?

• Hadia zahöli-höli dödö salua me musura mbuku andre?

Daʼa zanolo yaʼia ba wangai famahaʼö si lö taʼila me mböröta.

¹³ Duma-dumania, imane Hezekieli 14:13, 14, ”Na mosala khögu niha ba danö, heza, na faröi ira khögu, ba na ubabaya ira, na ufufu wangabeʼera andrö, öra, na ufatörö khöra lofo ba na uhori ba danö niha, fabaya uriföra, ba na so ba danö andrö niha andrö si datölu: Noakhi ba Danieli ba Yobi, ba ha yaʼira zauri, ba waʼatulö dödöra andrö, iwaʼö Soʼaya, Yehowa.” Na tahaogö taʼalui, tola taʼila wa ngawua wehede daʼa isura Hezekieli mato 612 fakhe SM. No hauga ngaotu fakhe mate Noakhi hegöi Yobi me luo daʼö. Hizaʼi, lö olifu Yehowa waʼalöfaröira. Lö si mate nasa Danieli me luo daʼö. Te 20 fakhe ia me imane Yehowa wa yaʼia niha satulö tödö simane Noakhi hegöi Yobi. Hadia wamahaʼönia khöda? Ifaigi ba iʼameʼegö tödö Yehowa waʼalöfaröi nono mbanuania hegöi ndraono si bohou ebua.​—Zinunö 148:12-14.

OGUNAʼÖ NGAWALÖ PUBLIKASI

14. Hadia gunania lektur si no tehenaigö ba zi bohou ebua, ba hewisa göi enaʼö so gunania khöda? (Faigi gambara ba wamobörö wamahaʼö.)

¹⁴ Lektur ba zi bohou ebua. No tafahaʼö ita wa tola tahalö wamahaʼö moroi ba nösi Zura Niʼamoniʼö hegöi ba ngawalö publikasida. Datafaigi duma-dumania. Barö zi hauga fakhe andre, oya zi no ihenaigö Yehowa ba zi bohou ebua.^[1] (Faigi gonönöta.) Daʼa zanolo yaʼira ba wanaögö fanandraigö salua khöra ba zekola hegöi na tedou waʼebua-buara. Hizaʼi, hewisa wa tola tahalö wamahaʼö na tabaso duho-tuho hegöi mbuku andrö? Na tabaso zi no muhenaigö andrö, tola taʼila hadia gabula dödö zi bohou ebua ba tola tabeʼe wanolo hegöi famarou dödö khöra.

15. Hana wa moguna adöni dödö niha Keriso si no alawa döfi ba wombaso ngawalö zi no muhenaigö ba zi bohou ebua?

¹⁵ Böi so wayawasa ba niha Keriso si no alawa döfi na so nibasora sanandrösa ba zi bohou ebua. Oya gabula dödö nidunö-dunö ba duho andrö soguna ba niha Keriso fefu. Duma-dumania, fefu ita moguna tafaduhuʼö wamatida, tataha wönuda, tatimbagö wanandraigö moroi ba nawöda si fagölö yaʼita ba tatimbagö wahuwusa hegöi hiburan si lö sökhi. Tobali, hewaʼae ba ndraono si bohou ebua musura publikasi andrö, fefu nösinia teʼodane-dane ba Zura Niʼamoniʼö ba fefu niha Keriso tola lahalö khöra wamahaʼö.

16. Hadia manö nasa guna publikasi si no muhenaigö ba zi bohou ebua?

¹⁶ Publikasi nihenaigö ba zi bohou ebua, tola möi fanolora ba wangaʼaroʼö fahuwusara khö Yehowa. (Baso Zangombakha 12:1, 13.) Moguna göi ba niha si no alawa döfi. Duma-dumania, ba Sedarlah! mbaŵa si Öfa 2009, so duho ”Kaum Muda Bertanya . . . Bagaimana Aku Bisa Menikmati Pembacaan Alkitab?” So wanuturu lala ba duho andrö ba so göi kotak si tola laguti, laʼiröʼö ba laʼogunaʼö ba wamahaʼö. Hadia so gunania duho daʼa ba niha salawa döfi? Itutunö samösa woʼomo ira alawe si so iraono wa abua sibai khönia wombaso Sura Niʼamoniʼö. Hizaʼi, iʼogunaʼö wanuturu lala si so ba duho andrö ba omuso dödönia me iʼila wa oi moʼamakhaita nösi Zura Niʼamoniʼö andrö irege tola muʼehaogö gambara si sökhi. Imane, ”Iadaʼa adöni sibai dödögu wombaso Sura Niʼamoniʼö.”

17, 18. Hewisa wa tola tahalö wamahaʼö ba wombaso lektur nihenaigö ba niha sato? Beʼe duma-duma.

¹⁷ Lektur ba niha sato. Iʼotarai me döfi 2008, omuso dödöda me so mbuku Manuriaigö edisi wamahaʼö. Muhenaigö ia khö ndra Samaduhuʼö Yehowa. Hizaʼi, so göi majalah si tola tabeʼe ba niha sato. Hewisa wa tola tahalö wamahaʼö moroi ba majalah andrö? Datafaigi sambua duma-duma. Tatu manö, omuso dödöu na möi niha nikaoniu ba Balai Mbanua Lowalangi. Ba ginötö lafaʼema huhuo sebua, öʼangeraigö hewisa dödö niha nikaoniu ba zi no irongo andrö, ba hewisa enaʼö tola ibulöʼö waʼaurinia. Ba gafuriatania, fagöna ba dödöu ba öʼandrö saohagölö ba duho si no mufaʼema andrö.

¹⁸ Simanö göi ba ginötö tabaso lektur nihenaigö ba niha sato. Duma-dumania, edisi umum mbuku Manuriaigö hegöi duho-tuho si no muhenaigö ba jw.org, laʼogunaʼö ngawua wehede salio muʼila eluaha ba wanutunö ösi Zura Niʼamoniʼö. Na tabaso ia, itugu monönö waʼaboto ba dödöda hegöi faʼomasida ba zindruhu sanandrösa ba Zura Niʼamoniʼö si no ara taʼila. Tafahaʼö ita göi ba lala si bohou ba wanutunö famatida ba ginötö manuriaigö. Simanö göi, majalah Sadarlah! zameʼe khöda faʼafaduhu dödö wa so Zomböi faʼauri irege tetolo ita ba wamaduhuʼö famatida.​—Baso I Fetero 3:15.

19. Hewisa wangoromaʼöda wa taʼandrö saohagölö khö Yehowa ba zi no ihenaigö khöda?

¹⁹ Oya mene-mene ba fanuturu lala si no ihenaigö Yehowa khöda. (Mataiʼo 5:3) Böi tabato wombaso hegöi wamalua fefu zi no ihenaigö khöda. Na tafalua daʼö, tola tahalö wamahaʼö ba taforomaʼö khö Yehowa wa taʼandrö saohagölö ba zi no ihenaigö andrö.​—Yesaya 48:17.