Satua​—Mitolo Ndraonomi Enaʼö ’Atua-tua ba Teʼorifi’

1, 2. Hana wa so zatua saombö tödö na so ndraonora somasi molulu faʼauri khö Yehowa ba tebayagö idanö?

SO NGAHÖNÖ niha samahaʼö yaʼira ba Zura Niʼamoniʼö si no molulu faʼaurira khö Yehowa ba tebayagö idanö. Ato ba gotaluara zi bohou ebua si no mamahaʼö yaʼira ba zindruhu iʼotarai me ide-ide ba no lafili lala waʼauri si sökhi. (Zinunö 1:1-3) Na yaʼugö niha Keriso si no tobali satua, tatu öbalo-baloi ginötö na tebayagö idanö ndraonomö.​—Fatimbaisi 3 Yohane 4.

² Hizaʼi, te so khömö waʼaombö dödö. Te no öʼila so ösa ndra si bohou si no mubayagö idanö, hizaʼi ba gafuriata aombö dödöra hadia no si sökhi khöra na laʼaurifagö goi-goi Lowalangi. So ösa zi no mondröi sindruhu. Andrö wa tola manö aombö dödömö na so ndraonomö samörögö mamosumange Yehowa hizaʼi ba gafuriatania taya waʼomasira ba zindruhu. Tola manö tobali ira simane niha Keriso siföföna ba Efeso. Imane khöra Yesu, ”No öböhöli waʼomasiu ba mböröta andrö.” (Famaʼeleʼö 2:4) Hewisa wanolomö ndraonomö enaʼö lö mamalö aro waʼomasinia ba ’tedou ia ba wangorifi’? (1 Fetero 2:2) Datafahaʼö ita ba duma-duma Dimoteo.

”NO ÖʼILA ZURA NIʼAMONIʼÖ ANDRÖ”

3. (a) Hewisa wa tola tobali niha Keriso Timoteo, ba hadia nifaluania ba zi no ifahaʼö ia? (b) Hadia zi tölu ngawalö nitandrösaigö Waulo khö Dimoteo?

³ Si oföna sibai möi zinenge sotöi Faulo ba Lisitera me döfi 47 M. Te ba ginötö daʼö göi ifahaʼö ia Timoteo, si bohou ebua sanandrösa ba wamahaʼö Yesu. Ifalua hadia zi no ifahaʼö ia, ba dua fakhe aefa daʼö ibörötaigö fao ia khö Waulo. Te ba zi 16 fakhe aefa daʼö ibeʼe zura Faulo khö Dimoteo, ”Ba böi böhöli zi no örongo, awö zi no faduhu dödöu; me no öʼila, ha khö örongo ia, awö wa no öʼila zura niʼamoniʼö andrö [Mbuku Niʼamoniʼö Heberaiʼo], iʼotarai iraono ndraʼugö, sangila mangatua-tuaʼö yaʼugö, ba wangalui fangorifi ba mbanua furi andrö, soroi ba wamati andrö, khö Keriso Yesu.” (2 Timoteo 3:14, 15) Nehegö hadia niwaʼö Waulo khö Timoteo (1) iʼila zura niʼamoniʼö, (2) faduhu dödönia me no iʼila hadia zi no ifahaʼö ia, ba (3) atua-tua ba teʼorifi me mamati khö Yesu Keriso.

4. Hadia zi no irai öʼogunaʼö ba wamahaʼö iraonomö side-ide? (Faigi gambara ba wamobörö wamahaʼö.)

⁴ Na yaʼugö niha Keriso si no tobali satua, tatu omasiʼö na aboto ba dödö ndraonomö zura niʼamoniʼö, iadaʼa no mufarahugö ira Mbuku Niʼamoniʼö Heberaiʼo hegöi Mbuku Niʼamoniʼö Yunani Niha Keriso. Tola göi lafahaʼö ira iraono side-ide sanandrösa ba niha hegöi salua ba Zura Niʼamoniʼö. Oya mbuku, brosur hegöi video si no ihenaigö organisasi Yehowa, si tola laʼogunaʼö ira satua ba wanolo iraonora. Hadia manö zi no tehenaigö ba li niʼogunaʼömö? Moguna aboto ba dödö ndraonomö hadia nösi Zura Niʼamoniʼö enaʼö tola laʼokhögö wahuwusa saro khö Yehowa.

’FADUHU DÖDÖU ME NO ÖʼILA’

5. (a) Hadia geluahania ’faduhu dödö me no öʼila’? (b) Hezo tola taʼila wa faduhu dödö Timoteo sanandrösa khö Yesu me no iʼila?

⁵ Tenga ha asala öfahaʼö ndraonomö sanandrösa ba niha hegöi salua ba Zura Niʼamoniʼö. Törö tödömö wa Timoteo tola ’faduhu dödönia me no iʼila’. Ba li Yunani, eluaha ngawua wehede niʼogunaʼö Waulo andre yaʼia daʼö ”faduhu dödö” mazui ”aro dödö wa sindruhu daʼö”. No aboto ba dödö Timoteo Mbuku Niʼamoniʼö Heberaiʼo ’iʼotarai me iraono ia’. Ba gafuriata, sindruhu-ndruhu faduhu dödönia wa Yesu andrö Mesia. Itugu aro wamatinia irege tebayagö ia idanö ba fao ia khö Waulo tobali utusan injil.

6. Hadia zi tola öfalua ba wanolo iraonomö enaʼö mamati ira ba Daromali Lowalangi?

⁶ Hewisa wanolomö iraonomö enaʼö laʼokhögö wamati simane Timoteo irege tola ’faduhu dödöra me no laʼila’? Si oföna, moguna so khömö waʼebolo dödö. Moguna ginötö ba wangokhögö famati saro. Hewaʼae faduhu dödömö ba zi sambua ngawalö, tenga daʼö geluahania wa hasambalö göi faduhu dödö ndraonomö ba daʼö. Ero samösa iraono, moguna laʼogunaʼö ’dödöra’ enaʼö mamati ira ba Zura Niʼamoniʼö. (Baso Roma 12:1.) Oya zi tola öfalua ba wanolo iraonomö enaʼö itugu aro wamatira, mendrua manö na asese so wanofura. Datafaigi hadia wamahaʼö si tola tahalö moroi ba duma-duma zi samösa ama.

7, 8. (a) Hewisa wangoromaʼö zi samösa ama waʼebolo dödö ba ginötö ifahaʼö nononia? (b) Hawaʼara moguna so khömö waʼebolo dödö ba ndraonomö?

⁷ So nono Thomas ono alawe 11 fakhe ndröfinia, itaria ilau manofu imane, ”Hadia no iʼogunaʼö evolusi Yehowa ba womböwöi faʼauri ba gulidanö andre?” mazui ”Hana wa lö fao ita ba wanolo nono mbanua, duma-dumania fao ita ba pemilu enaʼö itugu sökhi zalua?” Itaria, moguna itaha dödönia Thomas ba wamatunö khö nononia hadia zinangea ifaduhusi tödö. Iʼila wa tola faduhu dödö zi samösa niha ba zindruhu tenga ha me no tafatunö khönia hadia zatulö. Hizaʼi, moguna tabeʼe khönia dandra si tola mamaduhuʼö tödönia.

⁸ Iʼila Thomas wa moguna so khönia waʼebolo dödö ba wamahaʼö ononia. Sindruhunia, fefu niha Keriso moguna so khöra waʼebolo dödö. (Kolose 3:12) Aboto göi ba dödönia wa moguna ginötö ba asese fahuhuo ia khö nononia enaʼö iʼokhögö wamati saro. Moguna göi itolo nononia enaʼö iʼangerönusi hadia zi no ifahaʼö ia ba Zura Niʼamoniʼö. Imane Thomas, ”Sabölö tohudenia, yaʼodo hegöi foʼomogu moguna maʼila hadia sindruhu faduhu dödö nonoma ba zi no ifahaʼö ia ba enaʼö ikhamö fangera-ngerania daʼö. Omuso dödöma na so wanofunia. Sindruhunia, so khögu waʼaombö dödö na lö manofu ia.”

9. Hewisa wanolomö iraonomö enaʼö faduhu dödöra ba Daromali Lowalangi?

⁹ Na so waʼebolo dödö khö zatua ba wamahaʼö iraonora, ba gafuriatania dania tola ibörögö aboto ba dödö ndraonora ”waʼebolo, faʼanau, faʼalawa, hegöi faʼabakha” zindruhu ba Zura Niʼamoniʼö. (Efeso 3:18) Moguna göi tafaudugö wamahaʼö nibeʼeda moloʼö ndröfira hegöi si tola aboto ba dödöra. Na itugu aro wamatira ba zi no lafahaʼö ira, tola aoha khöra wanutunö hadia nifaduhusira tödö föna niha sato, simane khö ndra awöra ba zekola. (1 Fetero 3:15) Duma-dumania, hadia tola latutunö iraonomö hadia zalua ba niha si no mate moloʼö Sura Niʼamoniʼö? Hadia ikhamö fangera-ngerara hadia nitutunö Zura Niʼamoniʼö sanandrösa ba daʼö?a (Faigi nisura ba gahe zura.) Törö tödömö wa moguna so khömö waʼebolo dödö ba wanolo iraonomö enaʼö mamati ira ba Daromali Lowalangi. Ba hasambalö so mbuania.​—5 Moze 6:6, 7.

10. Hadia zabölö tohude si tola möi fanolo ba wamahaʼö iraonomö?

¹⁰ Tatu manö, duma-duma nibeʼemö moguna sibai daʼö ba wanolo iraonomö enaʼö tedou wamatira. So tölu nono Stephanie ono alawe. Imane, ”Iʼotarai me ide-ide ndraonogu, tumbu ba dödögu wanofu, ’Hadia ufatunö khö ndraonogu hana wa faduhu dödögu wa so Yehowa, iʼomasiʼö ita ba hasambalö atulö goi-goinia? Hadia laʼila iraonogu wa sindruhu-ndruhu uʼomasiʼö Yehowa?’ Na so khögu waʼaombö dödö sanandrösa ba daʼö, tebai utötöna enaʼö faduhu dödö ndraonogu.”

’ATUA-TUA BA TEʼORIFI’

11, 12. Hadia waʼatua-tua andrö, ba hewisa wa tola taʼila wa tenga moloʼö ndröfi wa tola taʼokhögö ia?

¹¹ No tafahaʼö ita wa iʼokhögö Timoteo (1) waʼaboto ba dödö sanandrösa ba Zura Niʼamoniʼö (2) aro dödönia ba nifaduhusinia tödö. Hizaʼi, hadia geluaha wehede Waulo me iwaʼö wa tola möi fanolo Timoteo zura niʼamoniʼö enaʼö ’atua-tua ba teʼorifi’?

¹² Itutunö Pemahaman Alkitab, Jilid 1, ba Zura Niʼamoniʼö faʼatua-tua eluahania ”faʼabölö ba wangogunaʼö faʼonekhe hegöi faʼaboto ba dödö enaʼö mofozu ba wangasiwaisi gabula dödö, ba wanimbagö deʼala, ba wogamö ngawalö gohitö dödö mazui ba wameʼe mene-mene ba niha ba wamalua daʼö. No faehu waʼatua-tua andre . . .  moroi ba waʼabodo”. Imane Sura Niʼamoniʼö, ”Ba dödö nono matua, ba no faböbö waʼowöhö mowa.” (Gamaedola 22:15) Faʼatua-tua andre no sambua tandra wa no atua wangera-ngera zi samösa niha ba wamati. Tola atua wangera-ngera zi samösa niha ba wamati na omasi ia iʼoʼö ba iʼataʼufi Yehowa. Tenga moloʼö ndröfi wa tola alua daʼö.​—Baso Zinunö 111:10.

13. Hewisa wangoromaʼö ndraono wa laʼokhögö waʼatua-tua ba teʼorifi?

¹³ Si bohou ebua si no atua fangera-ngera ba wamati lö ’tefaheu-heu ba tefangörö-ngörö ira’ börö gisö-isö dödöra mazui börö ndra si bohou ebua tanö böʼö. (Efeso 4:14) Hizaʼi, ’tefahaʼö wangera-ngerara ba wamaehusi si sökhi hegöi si lö sökhi’. (Heberaiʼo 5:14) Daʼö mbörö wa tola lahalö gangetula si sökhi hewaʼae lö hadöi satuara mazui niha si no alawa döfi tanö böʼö. (Filifi 2:12) Moguna sibai waʼatua-tua simane daʼö enaʼö tola teʼorifi ira. (Baso Gamaedola 24:14.) Hewisa wanolomö iraonomö enaʼö laʼokhögö waʼatua-tua? Moguna laʼila samösa hadia zabölö tohude ba waʼaurimö. Tola laʼila wa öfaudugö waʼaurimö ba goi-goi Zura Niʼamoniʼö ba wehede hegöi ba nifaluamö.​—Roma 2:21-23.

14, 15. (a) Hadia zinangea iʼangeraigö si samösa si bohou ebua somasi tebayagö idanö? (b) Hewisa wanolomö iraonomö enaʼö iʼangerönusi howu-howu nitemania na iʼoʼö huku Lowalangi?

¹⁴ Hizaʼi, enaʼö tola tedou wamati ndraonomö, tenga ha asala öfatunö khöra hadia zi sala ba hadia zatulö. Moguna ötolo ndraonomö enaʼö laʼangeraigö wanofu-nofu simane, ’Hadia dani wa lö itehegö Sura Niʼamoniʼö tafalua gofu hadia zomasi dödöda? Hana wa faduhu dödögu wa hasambalö si sökhi khögu goi-goi Zura Niʼamoniʼö?’​—Yesaya 48:17, 18.

¹⁵ Na so ndraonomö somasi tebayagö idanö, tolo ia enaʼö ihaogö iʼangeraigö hadia noro dödö niʼokhögönia na no tebayagö idanö. Hewisa dödönia ba daʼö? Hadia manö gunania khönia? Hadia manö daha-tahania? Hana wa abölö oya mbua nitemania moroi ba daha-taha nitaögönia? (Mareko 10:29, 30) Moguna ihaogö iʼangeraigö daʼö fatua lö tebayagö ia idanö. Tolo ia enaʼö iʼangerönusi howu-howu nitemania na moloʼö ia ba hadia lua-luania na lö moloʼö göi ia. Buania, tola itugu faduhu dödönia wa lö mamalö itema mbua si sökhi na iʼoʼö goi-goi Zura Niʼamoniʼö.​—5 Moze 30:19, 20.

NA IBÖRÖGÖ SO WAʼAOMBÖ DÖDÖ KHÖ ZI BOHOU EBUA SI NO TEBAYAGÖ IDANÖ

16. Hadia zinangea ifalua satua na ibörötaigö awuwu wamati ndraonora?

¹⁶ Hadia zi tola öfalua na ibörötaigö aombö dödö ndraonomö sanandrösa ba zindruhu me no aefa tebayagö ia idanö? Duma-dumania, te ibörötaigö adöni dödönia ba ngawalö zi so ba gulidanö iadaʼa. Mazui ibörötaigö aombö dödönia, hadia sindruhu-ndruhu no lala sökhi ba waʼaurinia na iʼoʼö goi-goi Zura Niʼamoniʼö. (Zinunö 73:1-3, 12, 13) Hadia nifaluamö tola molua-lua ia ba ndraonomö, hadia iböhöli mazui lö mamalö ifosumange Yehowa. Böi fadaʼawa ndraʼugö khönia sanandrösa ba daʼö, hewaʼae na iraono ia nasa mazui no ebua-bua. Hizaʼi, tolo ia enaʼö iʼila wa öʼomasiʼö ia hegöi omasiʼö ötolo ia.

17, 18. Na so zi bohou ebua saombö tödö, hadia zi tola lafalua ira satua ba wanolo yaʼia?

¹⁷ Si bohou ebua si no tebayagö idanö, no ilulu waʼaurinia khö Yehowa. Ifabuʼu wa iʼomasiʼö ba iʼofönaiʼö wamosumange Yehowa moroi ba danö böʼö. (Baso Mareko 12:30.) Tenga si famai-mai mbuʼusa li ba wolulu faʼauri ba wamaigi Yehowa, moguna simanö göi ita. (Zangombakha 5:4, 5) Fasugi ba dödö ndraonomö daʼö. Hizaʼi si oföna, baso ba fahaʼö ndraʼugö ba ngawalö hadia ia zi no ihenaigö organisasi Yehowa khö zatua. Aefa daʼö, si fao fehede si sökhi hegöi ba ginötö si tefaudu, fatunö khönia wa tenga si famai-mai gangetula nihalönia ba wamayagö idanö hegöi ba wolulu faʼaurinia khö Yehowa, hizaʼi hasambalö oya howu-howu nitemania.

¹⁸ Oya mene-mene si tefaudu khö zatua. Duma-dumania, ba mbuku Pertanyaan Kaum Muda—Jawaban yang Praktis, Jilid 1 ba apendiks ”Pertanyaan Orang Tua” iwaʼö ba daʼö, böi alio-lio so ba wangera-ngera zatua wa no itimbagö zindruhu ononia. Hizaʼi, moguna laʼila hadia gabula dödönia. Tola manö laʼailasi ia ira awönia ba zekola mazui irasoi wa lö awö-awö. Te irasoi wa alio tedou ba wamati zi bohou ebua tanö böʼö moroi khönia. Itutunö göi apendiks daʼö wa lö hadöi gamakhaitania fefu daʼö ba nifaduhusimö tödö. Sindruhunia, daʼö ngawalö wanandraigö nitaögöra sameʼe abua khöra ba wangoromaʼö famati. So göi mene-mene si sökhi khö zatua hewisa wanolora iraonora saombö tödö ba zindruhu.

19. Hewisa wanolo zatua ndraonora enaʼö ’atua-tua ba teʼorifi’?

¹⁹ Yaʼami satua, miʼokhögö noro dödö si sökhi hegöi si tohude ba wangebuaʼö iraonomi si tefaudu ba ’wotu, ba mifarou dödöra, khö Yehowa’. (Efeso 6:4) Simane si no tatutunö, eluahania daʼö moguna öfahaʼö ndraonomö ba Zura Niʼamoniʼö ba ötolo ira enaʼö faduhu dödöra ba zi no lafahaʼö ira. Na itugu aro wamatira, tola tefarou dödöra ba wolulu faʼauri khö Yehowa hegöi ba wameʼe zabölö sökhi khönia. Tadöna-döna enaʼö Daromali Yehowa, ehehania niʼamoniʼö hegöi fanolo nibeʼemi tola möi fanolora enaʼö ’atua-tua ba teʼorifi’.