Nisura Yohane

6 Aefa daʼö, mofanö Yesu yefo Nasi Galilaia, mazui Tiberia.+ 2 Ato sibai niha soloʼö yaʼia+ börö me laʼila dandra sahöli-höli dödö nifaluania me ifadöhö zofökhö.+ 3 Möi Yesu ba hili, modadao ia ba daʼö si fao ira nifahaʼönia. 4 Me luo daʼö, no ahatö Gowasa Fasa+ niha Yahudi. 5 Me iʼila Yesu ato niha si möi khönia, imane khö Wilifo, ”Hezo tola taʼöli roti enaʼö manga niha andre fefu?”+ 6 Sindruhunia, no iʼila Yesu hadia zedöna ifalua, hizaʼi wa iwaʼö daʼö ba wamareso hewisa dödö Wilifo. 7 Imane Filifo, ”Hewaʼae ha maʼifu tabeʼe ero samösa, lö ibönö roti si ha 200 dinar* fowöli.” 8 Samösa nifahaʼönia sotöi Andrea talifusö Zimoni Fetero zangumaʼö khönia, 9 ”Yaʼe ba daʼa nono side-ide, so khönia lima ngawua roti barli ba dua rozi giʼa side-ide. Hizaʼi, hawaʼaröu daʼö ba niha sato daʼa?”+

10 Imane Yesu, ”Waʼö ba niha sato andre enaʼö modadao ira.” Oya ndruʼu ba nahia daʼö ba modadao ira. Ba gotaluara so mato 5.000 niha ndra matua.+ 11 Ihalö roti daʼö Yesu, iʼaohasi gölö Lowalangi ba idozigö ira. Simanö göi nifaluania ba giʼa side-ide andrö, ba manga ira irege abuso. 12 Me no abuso ira, imane khö ndra nifahaʼönia, ”Miʼowuloi zi törania enaʼö böi latiboʼö.” 13 Ba laʼowuloi gakhökhöla roti andrö, tesöndra 12 raga-raga zi töra me no awai manga niha sato moroi ba zi lima ngawua roti barli daʼö.

14 Me laʼila dandra sahöli-höli dödö andrö nifaluania, lamane niha sato, ”Sindruhu-ndruhu wa Samaʼeleʼö si no tefabuʼu ia, si möi ba gulidanö.”+ 15 Börö me iʼila Yesu wa lafaso ia tobali razo, andrö mofanö+ ia zui ba hili, ha yaʼia.+

16 Me arakhagö bongi, mofanö ndra nifahaʼönia ba nasi,+ 17 ba laʼötö nasi latörö dundraha numalö ba Gafanauma. Me luo daʼö, no ogömi saʼae ba lö nasa si möi Yesu ba wamalukhaisi yaʼira.+ 18 Ibörögö mobade nasi börö nangi sabölö-bölö.+ 19 Me no aefa laʼalukhaini mato lima irugi önö kilometer,* laʼila wa mowaö-waö Yesu ba dete nasi ba ifahatö ia ba dundraha andrö. Oi so waʼataʼura. 20 Imane khöra, ”Böi miʼataʼufi, yaʼo daʼa!”+ 21 Omuso dödöra wanemaʼö Yesu yawa ba dundraha. Lö ara aefa daʼö, ofeta dundraha andrö ba mbanua si möi ira.+

22 Mahemolunia, laʼila niha sato yefo nasi andrö wa ha sara dundraha side-ide ba daʼö, ba lö si fao Yesu khö ndra nifahaʼönia ba dundraha. 23 Hizaʼi, tohare dundraha moroi ba Diberia larugi nahia sahatö me ibeʼe gö niha sato Soʼaya me no aefa iʼaohasi gölö Lowalangi. 24 Me laʼila lö hadöi Yesu hegöi ira nifahaʼönia ba daʼö, möi ira yawa ba dundraha numalö ba Gafanauma ba wangalui Yesu.

25 Me falukha ira yefo nasi, lamane khönia, ”He Rabi,*+ hamega ofetaʼö ba daʼa?” 26 Imane Yesu, ”Sindruhu-ndruhu niwaʼögu khömi, miʼalui ndraʼo tenga börö me no miʼila dandra sahöli-höli dödö nifaluagu, hizaʼi börö me no abuso ami wemanga roti.+ 27 Böi miʼohalöwö ba wangalui ö si tola owoyu. Miʼohalöwö ba wangalui ö si lö irai owoyu ba solohe ba waʼauri si lö aetu,+ nibeʼe Nono niha andrö khömi. No sa ifotandro ia Ama, tandra wa omuso dödö Lowalangi khönia.”+

28 Börö daʼö manofu ira khönia, ”Hadia zi lö tola löʼö mafalua ba wangai halöwö Lowalangi andrö?” 29 Imane Yesu, ”Enaʼö tola mifalua halöwö Lowalangi, moguna mamati ami ba niha nifatengenia andrö.”+ 30 Aefa daʼö lamane, ”Hadia dandra sahöli-höli dödö nifaluamö+ enaʼö maʼila ba faduhu dödöma khöu? Hadia nifaluamö? 31 Me föna, no laʼa mana ira tuada ba danö si mate,+ simane si no tesura, ’Ibeʼe öra roti moroi ba zorugo.’”+ 32 Aefa daʼö imane khöra Yesu, ”Sindruhu-ndruhu niwaʼögu khömi, tenga Moze zameʼe khömi roti moroi ba zorugo, hizaʼi Ama andrö zameʼe roti sindruhu moroi ba zorugo. 33 Roti moroi khö Lowalangi yaʼia daʼö si tohare moroi ba zorugo ba ibeʼe waʼauri ba gulidanö.” 34 Andrö lamane, ”He Soʼaya, böi böhöli wameʼe öma roti daʼö.”

35 Imane Yesu, ”Yaʼodo roti fangorifi andrö. Gofu haniha zi möi khögu lö irai olofo ia, ba gofu haniha zamati khögu lö irai owökhi dödönia.+ 36 Simane niwaʼögu khömi, no miʼila ndraʼo ba lö faduhu dödömi.+ 37 Fefu niha nibeʼe Nama khögu laʼondrasi ndraʼo ba lö ufofanö niha si möi khögu.+ 38 Moroi ba zorugo uʼotarai,+ tenga ba wamalua somasi ndraʼo hizaʼi ba wamalua ohitö dödö zamatenge yaʼo.+ 39 Daʼö zomasi zamatenge yaʼo enaʼö lö taya fazamösa niha nibeʼenia khögu, ba omasi ia na ususugi+ ira zui ba ngaluo safuria. 40 Omasi Namagu enaʼö fefu niha samaduhuʼö ba samati khö Nono lasöndra waʼauri si lö aetu,+ ba ususugi+ niha andrö ba ngaluo safuria.”

41 Ibörögö fatuwu niha Yahudi khönia ba fangöngö-ngöngö ira,* börö me imane, ”Yaʼodo roti si otarai zorugo andrö.”+ 42 Ibörögö lamane, ”Yaʼia andrö ono Yosefo lö?+ Taʼila haniha namania faoma inania. Hewisa wa iwaʼö si otarai zorugo ia.” 43 Imane Yesu, ”Mibato fangöngö-ngöngö andrö. 44 Samösa lö si möi khögu na tenga nidöni Namagu+ samatenge yaʼo ba ususugi ia ba ngaluo safuria.+ 45 Imane Nisura Ndra Samaʼeleʼö, ’Ifahaʼö ira fefu dania Yehowa.’*+ Laʼondrasi ndraʼo dozi niha si no mamondrongo Ama ba samahaʼö yaʼira khönia. 46 Tenga daʼö geluahania so zi no irai mangila Ama.+ Ha si otarai moroi khö Lowalangi daʼö zi no mangila Ama.+ 47 Sindruhu-ndruhu uwaʼö khömi, dozi haniha zi faduhu tödö lasöndra dania waʼauri si lö aetu.+

48 ”Yaʼodo roti fangorifi.+ 49 No laʼa mana ira tuami ba danö si mate, hizaʼi no mate ira.+ 50 Tobali, daʼa roti sindruhu si otarai zorugo. Dozi haniha zi manga yaʼia ba lö mate. 51 Yaʼodo roti sauri si otarai zorugo. Dozi si manga roti daʼa auri sagötö faʼara. Sindruhunia roti nibeʼegu yaʼia daʼö nagolegu, enaʼö lasöndra waʼauri niha gulidanö.”+

52 Aefa daʼö, ibörögö fabuʼa-buʼa niha Yahudi, ”Hewisa wa tola ibeʼe öda nagolenia niha daʼa?” 53 Imane khöra Yesu, ”Sindruhu-ndruhu niwaʼögu khömi, na lö miʼa nagole Nono niha ba mibadu ndronia, lö misöndra waʼauri.+ 54 Haniha zi manga nagolegu ba samadu dogu, lasöndra waʼauri si lö aetu ba ususugi+ ia ba ngaluo safuria. 55 Nagolegu gö sindruhu, ba dogu nidanö sindruhu. 56 Haniha zi manga nagolegu ba samadu dogu, lö tebulö fao ia khögu ba fao göi ndraʼo khönia.+ 57 Simane Ama sameʼe khögu faʼauri ba samatenge yaʼo, ba börö Nama wa auri ndraʼo, niha si manga nagolegu auri ia börö ndraʼo.+ 58 Daʼa roti si otarai zorugo. Tenga simane niʼa ndra tuami, börö me no mate ira göi. Dozi si manga roti daʼa isöndra waʼauri si lö aetu.”+ 59 Iwaʼö fefu wehede daʼa me mamahaʼö ia ba nahia waʼowulo* ba Gafanauma.

60 Me larongo wehede daʼö, ato ndra nifahaʼönia zangumaʼö, ”Abeʼe sibai wehedenia andre. Haniha saʼae zomasi mamondrongo fehede simane daʼö?” 61 Hizaʼi aboto ba dödö Yesu wa lö omasi ndra nifahaʼönia ba ibörögö fangöngö-ngöngö ira ba daʼö. Börö daʼö imane, ”Hadia tobali fangala khömi daʼa? 62 Hewisa na miʼila dania möi yawa Nono niha ba zi so ia mböröta?+ 63 Eheha niʼamoniʼö zameʼe faʼauri,+ si lö eluaha sa waʼabölö niha. Hadia niwaʼögu khömi si otarai geheha niʼamoniʼö daʼö, ba sameʼe faʼauri.+ 64 Hizaʼi, so zi lö faduhu tödö ba gotaluami.” Iʼotarai wamobörö, aboto ba dödö Yesu haniha manö zi lö faduhu tödö ba si manga mbölinia.+ 65 Itohugö wangumaʼö, ”Daʼö mbörö wa uwaʼö mege, samösa lö si möi khögu na lö nitehegö Nama khönia.”+

66 Andrö wa laröi ia ira nifahaʼönia, mangawuli ira ba halöwö si no laböhöli mböröta.+ 67 Manofu Yesu khö ndra sinengenia si 12, ”Hadia mofanö göi ami?” 68 Itema linia Simoni Fetero, ”He Soʼaya, haʼökhö nasa möiga?+ Ba wehedemö so waʼauri si lö aetu.+ 69 No faduhu dödöma, ba maʼila wa yaʼugö andrö Niʼamoniʼö moroi khö Lowalangi.”+ 70 Imane Yesu, ”Ufili ami, yaʼami si felendrua,+ hizaʼi samösa ba gotaluami zamöbögö si lö duhu.”*+ 71 Sindruhunia, khö Yuda ono Zimoni Kariota manandrösa wehede Yesu. Daʼö zi manga mbölinia hewaʼae samösa ia moroi ba gotalua zinengenia si 12.+