Ba Mbanua Niha Keriso ba Nefeso
5 Börö daʼö, miʼoʼö khö Lowalangi+ simane iraono omasiö, 2 böi miböhöli wamalua faʼomasi+ simane fangomasiʼö Keriso yaʼita,*+ sameʼe faʼaurinia salahida* tobali sumange somuhua khö Lowalangi.+
3 Böi mifadunö-dunö gamuata wohorö* ba fefu ngawalö zi raʼiö mazui fakhögusa,+ börö me tenga sinangea daʼa ba niha niʼamoniʼö,+ 4 simanö göi gamuata saila ita, fehede si lö eluaha, mazui bude-bude hokha,+ börö me tenga sinangea fefu daʼa. Si sökhinia, miʼandrö saohagölö.+ 5 Miʼila samösa wa niha samalua amuata wohorö,*+ faʼaraʼiö, mazui fakhögusa,+ fagölö ira zanömba adu. Tebai latema gondröita ba Wamatörö Lowalangi,+ nifatörö Keriso.
6 Böi so zamaelungu yaʼami ba huhuo si lö eluaha, daʼö mbörö wa mofönu Lowalangi ba niha si lö moloʼö. 7 Andrö, böi mifariawö khöra. 8 Me mböröta, ba zogömi-gömi so ami, iadaʼa no so ami ba haga+ börö me tana khö Zoʼaya ami.+ Böi miböhöli wanörö lala haga, 9 börö me daʼö zangaʼasogö ngawalö zi sökhi, faʼatulö, ba sindruhu.+ 10 Mitimba tödömi hadia zomasi Zoʼaya,+ 11 ba böi mifao khöra ba wamalua amuata waʼogömi-gömi andrö+ si tobali zaya-zaya gölö. Si sökhinia, miʼombakhaʼö fefu gamuatara andrö. 12 Nifaluara ba zi tobini andrö, ba no saila ita wanutunö. 13 Haga zangoromaʼö fefu hadia ia, irege lö si tobini saʼae. 14 So ba zura, ”Faoso yaʼugö si mörö, ba fazawaʼö moroi ba gotalua zi mate+ enaʼö ihagaini ami Keriso.”+
15 Mifaigi sibai hewisa wanörömi lala andrö, böi sambö fangera-ngera, hizaʼi enaʼö simane niha satua-tua. 16 Haogö wangogunaʼö inötö*+ börö me so ita ba ngaluo si lö sökhi. 17 Böi sambö fangera-ngera ami. Tobali, yaʼaboto ba dödömi hadia zomasi Yehowa.*+ 18 Böi mabu ami agu,+ börö me daʼö zamakiko* faʼaurimi. Yafahöna khömi geheha niʼamoniʼö. 19 Mifarou dödö nawömi* faoma sinunö, fanuno khö Lowalangi, ba sinunö wamati. Miʼanunö+ ba misuno+ Yehowa* ba dödömi.+ 20 Böi mifamalö-malö wangandrö saohagölö+ khö Lowalangi, Amada, ba döi Zoʼaya yaʼita Yesu Keriso.+
21 Faoma mifosumange nawömi+ ba wangataʼufi Keriso. 22 Yaʼami foʼomo ira alawe, miʼoʼö li ndra matuami+ hulö na khö Zoʼaya, 23 me no högö ndra alawe woʼomonia ira matua,+ simane Keriso göi me no högö mbanua niha Keriso ia,+ sangorifi boto andrö. 24 Sindruhunia, simane foloʼö mbanua niha Keriso li Keriso, simanö göi ndra alawe, yamuʼoʼö li ndra matuara ba ngawalö hadia ia. 25 Yaʼami ira matua, miʼomasiʼö woʼomomi ira alawe,+ simane fangomasiʼö Keriso mbanuania andrö, itehegö mate ia salahira,+ 26 enaʼö tola iʼamoniʼö ira, isasai faoma idanö yaʼia daʼö taromali Lowalangi,+ 27 irege tola molakhömi mbanua niha Keriso andrö fönania, lö taʼunö mazui raʼiö,+ teʼamoniʼö ba lö mosinegu.+
28 Simanö göi woʼomo ira matua, enaʼö iʼomasiʼö woʼomonia simane botonia samösa. Niha sangomasiʼö foʼomonia, no iʼomasiʼö mbotonia. 29 Lö hadöi niha si fatuwu ba mbotonia, hizaʼi iʼomasiʼö ba ibeʼe mbalazo simane nifalua Keriso ba mbanuania, 30 börö me ndroto-ndrotonia ita.+ 31 ”Andrö wa iröi dania namania niha awö ninania, ba falemba dödönia* khö ngambatönia ba ha sambua boto ira.”+ 32 Moguna sibai zi tobini niʼamoniʼö andre.+ Iadaʼa, fahuhuo ndraʼo sanandrösa khö Keriso hegöi banuania.+ 33 Lö tola löʼö miʼomasiʼö woʼomomi ira alawe+ simane fangomasiʼömi yaʼami, ba foʼomo ira alawe göi enaʼö sindruhu-ndruhu miʼoʼö li ndra matuami.+