Hadia ”Öʼomasiʼö Zahatö Khöu Simane Faʼomasiu Ndraʼugö”?

1, 2. Hewisa wangoromaʼö Zura Niʼamoniʼö wa moguna sibai nifotöi faʼomasi?

FAʼOMASI no sambua amuata Yehowa fondrege zebua. (I Yoh. 4:16) Si oföna niwöwöi Lowalangi yaʼia daʼö Yesu. No ara fao ia khö Yehowa ba zorugo ba no ifahaʼö ia ba gamuata Namania. (Kol. 1:15) No iforomaʼö Yesu waʼomasi me so ia ba zorugo hegöi ba gulidanö. Faduhu dödöda wa famatörö Yehowa hegöi Yesu si fao faʼomasi.

² Samuza inötö samösa niha sanofu khö Yesu sanandrösa ba goroisa sebua. Imane Yesu, ”’Omasiʼö Zoʼaya yaʼugö, Lowalangiu andrö, moroi siʼaikö ba dödöu, nosou maʼasambua zangomasiʼö yaʼia, ba öhorigö gera-erau, wangomasiʼö yaʼia.’ Daʼö zebua goroisa, daʼö zi föföna. Ba sambua tö, si fakhili-khili khönia: ’Omasiʼö zahatö khöu simane faʼomasiu ndraʼugö.’”—Mat. 22:37-39.

3. Haniha nifotöi ’sahatö’ khöda?

³ Moguna sibai nifotöi faʼomasi ba nawöda niha. Imane Yesu wa moguna taʼomasiʼö Yehowa hegöi niha böʼö. Tobali, haniha nifotöi ’sahatö’ khöda? Na no mangowalu ndraʼugö, tatu manö niha sabölö ahatö khöu yaʼia daʼö foʼomou. Aefa daʼö, talifusöda ba wamati hegöi niha si falukha khöda ba ginötö möi manuriaigö, lafotöi ira niha si fahatö khöda. Ba duho daʼa, tafahaʼö ita hewisa lala wangoromaʼö faʼomasi ba niha si fahatö khöda.

OMASIʼÖ NGAMBATÖU

4. Hewaʼae lö moʼahonoa niha, hewisa enaʼö tola lasöndra waʼohahau dödö ba wongambatö?

⁴ Iwöwöi Gadamo ba Khawa Yehowa ba ifaogö ira. Daʼa wangowalu si föföna. Omasi Yehowa enaʼö lasöndra waʼohahau dödö ba wongambatö ba lafönui gulidanö. (I Moz. 1:27, 28) Börö me lö laʼoʼö niwaʼö Yehowa, lua-luania lö lasöndra waʼomuso dödö ba wongambatö, ba aekhu ira ba horö ba faʼamate irugi khöda iadaʼa. (Rom. 5:12) Hewaʼae simanö, tola tesöndra waʼohahau dödö ba zi sambua ngambatö ba ginötö andre. Itutunö khöda Sura Niʼamoniʼö wa Yehowa Zamobörö fongambatö ba ibeʼe mene-mene ba niha si no mongambatö.—Baso II Timoteo 3:16, 17.

5. Hana wa moguna so waʼomasi ba wongambatö?

⁵ Itutunö khöda Sura Niʼamoniʼö wa moguna sibai faʼomasi ba zi sambua fongambatö enaʼö lasöndra waʼomuso dödö. Itutunö Waulo sanandrösa ba waʼomasi soroi ba dödö, ”Faʼomasi andrö, ba no sebolo tödö, no sebua tödö; faʼomasi andrö, ba lö iʼafökhöi tödö nawönia, lö isuno ia, lö mohokha. Lö ilau zi lö moadu, lö iʼalui dana khönia; lö mofönu ia; lö itanö ba dödönia zi lö sökhi; lö omuso dödönia ba zi lö atulö, ba omuso dödönia awö zi duhu. Fefu hadia ia zi falukha ia, ba itaha dödönia; fefu hadia ia, ba faduhu dödönia; fefu hadia ia, ba idöna-döna, fefu hadia ia, ba itaögö. Si lö mamalö-malö waʼomasi andrö.” (I Kor. 13:4-8) Na taʼangerönusi ba tafalua wehede Waulo andre, tola tasöndra waʼomuso dödö ba wongambatö.

6, 7. (a) Hadia niwaʼö Zura Niʼamoniʼö khö woʼomo ira matua? (b) Yaʼita niha Keriso, hewisa zinangeania woʼomo ira matua khö ngambatönia?

⁶ No itatugöi Yehowa haniha zinangea mondröniaʼö ba zi sambua omo. Imane Faulo, ”Ba omasido na miʼila; högö ndra matua fefu, ba yaʼia Keriso, ba högö ndra alawe ndra matua, ba högö Keriso Lowalangi.” (I Kor. 11:3) Itötöna Yehowa khö ndra matua enaʼö laʼomasiʼö nösi nomora. Hewaʼae Yehowa no Sebua kuaso, iʼomasi ita ba lö khönia fakhögusa. Börö daʼö, ifosumange ia Yesu. Imane, ”Omasido Nama.” (Yoh. 14:31) Lö irai so ba dödö Yesu wa lö iʼomasiʼö ia Yehowa.

⁷ Hewaʼae högö ndra alawe ndra matua, imane Sura Niʼamoniʼö wa moguna lafosumange ndra alawera. (I Fet. 3:7) Hadia manö zinangea ifalua? Moguna aboto ba dödönia nösi dödö hegöi zoguna khö woʼomonia. Imane Sura Niʼamoniʼö, ”Yaʼami, ira matua, miʼomasiʼö ndra alawemi, simane Keriso, me no iʼomasiʼö mbanua, ba me no ibeʼe salahira ia.” (Ef. 5:25) Si ndruhu-ndruhu wa no itehegö Yesu waʼaurinia ba niha soloʼö khönia. Na so waʼomasi khö ndra matua simane niʼokhögö Yesu, aoha khö woʼomonia ira alawe ba wangomasiʼö yaʼia, ba wamosumange hegöi ba wotuhini angetula woʼomonia.—Baso Tito 2:3-5.

OMASIʼÖ NDRA TALIFUSÖDA

8. Hewisa dödöda khö ndra talifusöda?

⁸ Ba ginötö andre, ato niha samosumange Yehowa. Yaʼira andre no talifusöda. Hewisa dödöda khöra? Imane Sura Niʼamoniʼö, ”Ba talau saʼae zi sökhi, me no mbaŵania khöda, ba niha fefu, ba oföna ba zi ha sara lala wamati, awöda.” (Gal. 6:10; baso Roma 12:10.) Imane Fetero na so khöda ”woloʼö si duhu” lua-luania so ”wangomasiʼö talifusö”. Itohugö wangumaʼö, ”Ba si föföna, ba faoma moroi siʼaikö ba dödömi miʼomasiʼö nawömi.”—I Fet. 1:22; 4:8.

9, 10. Hana wa tola teʼosambuaʼö nono mbanua Lowalangi?

⁹ Angowuloa khö Yehowa faehu moroi ba gangowuloa böʼö. Hadia mbörö? Börö me so khöda waʼomasi soroi ba dödö khö ndra talifusöda. Hizaʼi, sabölö moguna börö me no taʼomasiʼö Yehowa ba tafalua goi-goinia, ibeʼe gehehania ba wanolo yaʼita. Geheha Lowalangi zanolo yaʼita irege tasöndra wahasara dödö ba zi sagörö ulidanö.—Baso I Yohane 4:20, 21.

¹⁰ Ifarou Waulo enaʼö so waʼomasi ba gotalua niha Keriso. Imane, ”Ba miʼonukha waʼahakhö dödö, ba faʼebua dödö, ba fa lö fayaŵa, ba faʼebolo dödö, ba fanaha tödö. Faoma mibologö dödömi khö nawömi, ba faoma miʼefaʼö zala nawömi khömi, na so zinegu zamösana khö nawönia; simane fangefaʼö Keriso, simanö göi ami. Ba baero daʼö fefu, ba faʼomasi; daʼö wamaböbö faʼamoʼahonoa.” (Kol. 3:12-14) Taʼandrö sibai saohagölö börö me faʼomasi ”daʼö wamaböbö faʼamoʼahonoa” ba gotalua niha Keriso gofu hezo moroi ita!

11. Hadia niʼilada sanandrösa ba gangowuloa Lowalangi?

¹¹ Faʼomasi ba fahasara dödö ba gotalua nono mbanua Yehowa daʼö zangoromaʼö wa yaʼira agama si ndruhu. Imane Yesu, ”Ba daʼö aboto ba dödö niha fefu, wa no nifahaʼögu ami, na so khömi waʼomasimi nawömi.” (Yoh. 13:34, 35) Imane Yohane, ”Ba daʼö oroma, haniha nono Lowalangi, ba haniha nono Gafökha. Dozi si lö molau satulö, ba tenga moroi ba Lowalangi ira, awö zi lö mangomasiʼö talifusönia. Daʼö sa duria nirongomi, iʼotarai mböröta, fa faoma taʼomasiʼö nawöda.” (I Yoh. 3:10, 11) Faʼomasi ba fahasara dödö ba gotalua ndra Samaduhuʼö Yehowa daʼö zangoromaʼö wa yaʼira soloʼö khö Keriso, ba laturiaigö Mbanua Lowalangi ba zi sagörö ulidanö.—Mat. 24:14.

TEʼOWULOI ”ZATO SIBAI”

12, 13. Hadia nifalua ”zato sibai” ba ginötö andre, ba hadia zalua ba zi lö aratö?

¹² Arakhagö fefu nono mbanua Yehowa tefarahu ira ba ”zato sibai”, ba yaʼira moroi ba ngawalö soi ba zi sagörö ulidanö. Falulu fohalöwö ira ba wamaduhuʼö famatörö Yehowa. Yaʼira daʼö ”si otarai wamakao sabölö-bölö andrö; ba no lababago mbarura, ba no laʼafusiʼö, ba ndro Nono mbiri-mbiri andrö” mamati ira khö Yesu si tobali höli. Niha Keriso ’sato sibai’ laʼomasiʼö Yehowa hegöi Nononia, ba lafosumange ia ”bongi maʼökhö”.—Fam.7:9, 14, 15.

¹³ Ba zi lö aratö ihori Lowalangi ngawalö zi lö sökhi ba gulidanö ba ”wamakao sabölö-bölö”. (Mat. 24:21; baso Yeremia 25:32, 33.) Ilumöʼö Yehowa nono mbanuania irugi ba gulidanö si bohou börö me iʼomasiʼö ira. 2.000 fakhe ba zi lalö no ifabuʼu Lowalangi wa ”iʼosi dania daŵa hörö fefu, ba höröra, ba lö faʼamate saʼae, ba lö faʼabu dödö, ba lö fege-ege, ba lö faʼafökhö saʼae, me no numalö zi föföna andrö”. Hadia omasi ndraʼugö auri ba Waradaiso si lö hadöi faʼalösökhi, faʼabu dödö ba faʼamate?—Fam. 21:4.

14. Hewisa waʼatedou nono mbanua Yehowa?

¹⁴ Me tebörögö ngaluo safuria me döfi 1914, lö ato niha samosumange Yehowa. Börö waʼomasi ba fanolo moroi khö Yehowa, laturiaigö Mbanua Lowalangi niha Keriso nibayoini hewaʼae oya wamakao. Hadia lua-luania? Teʼowuloi niha sato sanöndra faʼauri si lö aetu ba gulidanö si bohou. Iadaʼa, töra ŵalu zuta Zamaduhuʼö Yehowa ba zi 115.400 banua niha Keriso ba zi sagörö ulidanö, itugu monönö nasa. Duma-dumania, töra 275.500 nibayagö idanö me döfi 2014. Si löʼö-löʼönia so 5.300 nibayagö idanö ero migu.

15. Hadia manö zi tedou ba halöwö fanuriaigö niʼilada iadaʼa?

¹⁵ Ahöli-höli dödöda me no taʼila waʼatedou halöwö fanuriaigö Banua Lowalangi. Iadaʼa, no lafoʼeluaha mbukuda ba zi töra 700 ngawalö li. Buku Manuriaigö Famatörö Yehowa daʼö zabölö oya labeʼe ba niha. Töra 52 zuta nifazökhi ero waŵa ba zi 247 ngawalö li.Buku niʼogunaʼöda ba wamahaʼö niha yaʼia daʼö Apa yang Sebenarnya Alkitab Ajarkan? no lafoʼeluaha ba zi töra 250 ngawalö li. Irugi iadaʼa, töra 200 zuta nifazökhi.

16. Hana wa itugu tedou gangowuloa khö Yehowa?

¹⁶ Itugu tedou gangowuloa khö Yehowa börö me mamati ita khönia ba taʼoʼö goi-goinia ba Daromali. (I Tes. 2:13) Hewaʼae oya wamakao nibeʼe Gafökha, hizaʼi lö aetu-aetu tasöndra howu-howu moroi khö Yehowa.—II Kor. 4:4.

BÖI BÖHÖLI WANGOMASIʼÖ NIHA BÖʼÖ

17, 18. Hadia niʼandrö Yehowa khöda na falukha ita ba niha si lö omasi mamosumange yaʼia?

¹⁷ Faböʼö-böʼö niha ba wotema turia somuso dödö nifaʼemada. So niha somasi mamondrongo so göi zi löʼö. Hadia niʼandrö Yehowa khöda na falukha ita ba niha si lö omasi mamosumange yaʼia? Gofu hewisa wotema niha turia somuso dödö nifaʼemada, moguna taʼoʼö mene-mene ba Zura Niʼamoniʼö, ”Böi tebulö khömi ba wangehao fehedemi, nilau asio, fa miʼila, he miwisa wanema li zamösana.” (Kol. 4:6) Lö mamalö-malö ita wangombakha hadia zi no tafaduhusi tödö, ba tafalua ia si fao ”faʼebolo dödö” ba falöʼataʼu.—I Fet. 3:15.

¹⁸ Hewaʼae mofönu ira khöda ba lö omasi ira hadia niʼombakhaʼöda, no taʼoromaʼö waʼomasi ba niha ba no taʼoʼö duma-duma nibeʼe Yesu. ”Me lahede-hedeʼö ia, ba lö ifuli ihede-hedeʼö; me lafakao ia, ba lö ifangaha wolau balö.” Hizaʼi, faduhu dödönia khö Yehowa. (I Fet. 2:23) Lö mamalö-malö taforomaʼö wangide-ngideʼö ba taʼoʼö mene-mene, ”Böi misulöni zi lö sökhi awönia zi lö sökhi, ba böi misulöni walelesa awönia falelesa; böi manö daʼö; samahowuʼö ami.”—I Fet. 3:8, 9.

19. Hewisa ita ba niha si faʼudu khöda?

¹⁹ Na so khöda wangide-ngideʼö, aoha khöda ba woloʼö goi-goi nibeʼe Yesu. Itutunö Yesu, ”No mirongo, wa no muwaʼö: ’Omasiʼö zahatö khöu, ba yafatiu dödöu ba zi fatiu tödö khöu.’ Ba yaʼo, ba uwaʼö khömi: Miʼomasiʼö zi fatiu tödö khömi ba miʼangandrö, salahi zolohi yaʼami; enaʼö tobali ono Namami andrö, si so ba zorugö ami, me ifatumbuʼö luonia andrö ba zi lö sökhi ba ba zi sökhi, ba teu andrö khönia, ba ibeʼe ba zatulö ba ba zi lö atulö.” (Mat. 5:43-45) Yaʼita ono mbanua Lowalangi, moguna taʼomasiʼö nududa hewaʼae lafalua khöda zi lö sökhi.

20. Hezo taʼila wa afönu dania gulidanö andre faʼomasi Lowalangi hegöi khö zi fahatö khöda? (Faigi gambara ba ngaʼörö si 23.)

²⁰ Böi mamalö-malö taforomaʼö waʼomasi khö Yehowa hegöi ba niha. Hewaʼae so niha si fatuwu ba duria nifaʼemada, ba ginötö laʼandrö wanolo moguna tatolo ira. Imane Faulo, ”Böi moʼömö ami hadia ia, gofu ha ökhö, ha fa faoma miʼomasiʼö nawömi; sangomasiʼö awönia sa, ba no iʼoʼö goroisa. Oroisa andrö sa: ’Böi ohorö! böi angeʼe! böi anagö! böi angisö!’ ba hadia ia goroisa böʼö, ba no tefarahugö ba niwaʼö andrö: ’Omasiʼö zahatö khöu, simane faʼomasiu ndraʼugö.’ Faʼomasi andrö, ba lö ilau zi lö sökhi khö nawönia, andrö wa foloʼö oroisa waʼomasi andrö.” (Rom. 13:8-10) Lö lafalua ono mbanua Lowalangi zi lö sökhi ba faʼudusa ba gulidanö nifatörö Gafökha andre, börö me laʼomasiʼö nawöra niha. (I Yoh. 5:19) Afönu waʼomasi ba gulidanö na no tehori Gafökha awö zi fao khönia hegöi faʼalösökhi ba gulidanö andre. Sambua howu-howu daʼa ba niha sangomasiʼö Yehowa hegöi awönia!