Si Tola Öfalua Na Fawuka Wangera-ngeramö

Böi Busi Dödöu ba zi Lö Nasa Alua

”Böi mibusi tödö ngaluo mahemolu, börö me mahemolu so zui waʼaombö dödö.”—MATAIʼO 6:34.

Eluahania: Ero maʼökhö hasambalö so waʼaombö dödö salua. Börö daʼö, böi angeragö zi lö nasa alua enaʼö böi monönö waʼaombö dödöu. Ibönö angeragö waʼauriu ba zi maʼö-maʼökhö daʼö.

• Tola fawuka wangera-ngera zi samösa niha na talafo so khönia waʼaombö-aombö dödö. Börö daʼö tandraigö falua daʼa: Si oföna, moguna faduhu dödöu wa hasambalö so gabula dödö si tebai mutimbagö. Na talafo öʼangeragö sibai gabula dödö andrö, tola itugu fawuka wangera-ngeramö. Si dua, moguna aboto ba dödöda wa sasese niʼaombösida tödö lö tatu na alua ia.

Lö Fatandro

”Faʼatua-tua si otarai moroi yawa . . . lö fatandro.”—YAKOBO 3:17.

Eluahania: Böi faso ndraʼugö enaʼö moʼahonoa fefu nifaluamö hegöi niha böʼö.

• Moguna aboto ba dödöu wa so zoʼamböta ndraʼugö hegöi niha böʼö. Tatugöi gohitö dödö si tefaudu. Na öfalua daʼö, lö talafo fawuka wangera-ngerau hegöi niha böʼö. Tola manö itugu sökhi lua-luania. Baero daʼö, okhögö rasa humor ba boho mbawa hewaʼae na so gabula dödö. Tola örasoi wa itugu aoha gabula dödömö ba owua-wua dödöu.

Alui Hadia Mbörö Wa Tola Fawuka Wangera-ngeramö

”Ba niha si so faʼatua-tua ihonogö ia.”—AMAEDOLA 17:27.

Eluahania: Lö taʼokhögö wangera-ngera si sökhi na mofönu ita, aombö dödöda, mazui abao dödöda. Börö daʼö, tandraigö enaʼö öʼokhögö waʼahono dödö.

• Alui hadia mbörö wa tola fawuka wangera-ngeramö, ba nehegö hadia zalua khöu me alua daʼö. Duma-dumania, fareso hadia niʼangeragömö, nirasoimö ba nifaluamö. Tola ösura daʼö na moguna. Na no anehe ndraʼugö ba zalua khöu, te tola aoha khöu ba wanaögö faʼafawuka wangera-ngera. Baero daʼö, alösi halöwö si tola mameʼe khöu faʼafawuka wangera-ngera. Na tebai, fuli tatugöi nifaluamö hegöi inötöu enaʼö lö talafo fawuka wangera-ngeramö.

• Bulöʼö lala wangera-ngerau ba wamaigi abula dödö salua khöu. Tola faböʼö nirasoimö hegöi nirasoi niha böʼö hewaʼae fagölö-gölö gabula dödö salua khömi. Fefu daʼö teʼodaligö ba lala wangera-ngerau ba wamaigi abula dödö salua. Tandraigö falua wanuturu lala si tölu ngawalö andre:

  1. Böi alio manahö-nahö dödöu. Duma-dumania, so niha si fahulö tanö fönau ba ginötö so antrian. Na iʼanemaiʼö tumbu ba gera-erau wa lö iʼila wetahögö niha daʼö, tatu aukhu dödömö. Enaʼö lö aukhu dödöu, moguna so ba wangera-ngerau wa ifalua daʼö, te so zaösö-aösö ia sinangea ifalua. Tola manö atulö wangera-ngeramö andrö!

  2. Falua halöwö tanö böʼö si tola mangaʼasogö bua si sökhi khöu. Na so zinangea öbaloi ba rumah sakit mazui ba bandara, tola öʼogunaʼö ginötö daʼö ba wombaso, ba wohalöwögöigö halöwö ba kantor mazui ba wamareso email.

  3. Böi so ba dödöu ba wangebuaʼö abula dödö salua. Angeragö, ’Hadia itugu ebua gabula dödö andrö mahemolu mazui ba zi samigu tö?’ Moguna aboto ba dödöu hezo gabula dödö side-ide hegöi sebua.

Forege Enaʼö Toföfö ba Wamalua Hadia Ia

”Fefu hadia ia enaʼö oi sökhi ba toföfö.”—1 KORINDRO 14:40.

Eluahania: Tandraigö enaʼö itugu toföfö wamaluau hadia ia.

• Sindruhunia, omasi ita na toföfö fefu hadia ia. Sambua mbörö wa tola fawuka wangera-ngerada ba lö toföfö halöwöda yaʼia daʼö foradö-radö. Daʼa göi mbörö wa itugu oya halöwö si lö teʼasiwai. Tandraigö falua zi dombua fanuturu lala andre:

  1. Fazökhi jadwal si tefaudu ba falua daʼö.

  2. Alui hadia mbörö wa so khöu woradö-radö, ba bulöʼö daʼö.

Moguna Seimbang Ita

”Sökhi zi sagokhö faʼahono dödö moroi na dua gokhö waʼerege dödö ba famorege ba wolohi angi.”—SANGOMBAKHA 4:6.

Eluahania: Niha si lö tebato-bato ba wohalöwö, si toʼölönia lö itema mbua ba waʼerege dödönia.

• Okhögö wangera-ngera si sökhi sanandrösa ba halöwö hegöi kefe. Niha sangokhögö kefe sebua, lö tatu na abölö ohahau dödönia mazui lö irasoi waʼafawuka wangera-ngera. Tola manö faböʼö zalua. Imane Sangombakha 5:12, ”Lö iʼila mörö niha si kayo börö waʼoya haratonia.” Börö daʼö, fomaha ndraʼugö ba wangandrö saohagölö ba zi no öʼokhögö.

• Beʼe ginötöu wolombase. Tola alö waʼafawuka gera-eramö na öʼalui halöwö somasiʼö öfalua. Hizaʼi, halöwö sahono-hono manö simane famaigi TV, tola manö lö alö waʼafawuka gera-eramö.

• Böi talafo ara wangogunaʼöu perangkat elektronik. Böi aseseʼö wamaigi email, pesan singkat, mazui media sosial. Böi fareso email soʼamakhaita ba halöwöu na lö moguna sibai ia.

Rorogö Mbotomö

”Moguna wamahaʼö boto.”—1 TIMOTEO 4:8.

Eluahania: Na owölö-ölö ndraʼugö faʼolahraga, tatu lö alio göna ndraʼugö fökhö.

• So nifaluamö enaʼö lö alio göna ndraʼugö fökhö. Na asese öfageha mbotomö, tola owua-wua dödöu ba tola tefaʼanö mbotou ba wanaögö faʼafawuka wangera-ngera. A gö si so gizi ba tatugöi ginötö wemanga. Moguna göi molombase ndraʼugö.

• Böi alui lala sambö tefaudu ba wangasiwai faʼafawuka gera-eramö simane foroko, femabu-mabu, mazui fangogunaʼö narkoba. Ba wamaigida, tola alö waʼafawuka wangera-ngerada na tafalua zimane daʼö. Hizaʼi, sindruhunia itugu fawuka gera-geramö börö me möi famakiko mbotomö daʼö ba ahori nösi kandre-kandreu.

• Na itugu abölö-bölö waʼafawuka wangera-ngeramö, böi aila ndraʼugö ba wangandrö fanolo khö ndra doto.

Ofönaiʼö Zabölö Moguna

”Mitatugöi hadia zabölö moguna.”—FILIFI 1:10.

Eluahania: Haogö angeragö hadia zabölö moguna ba waʼauriu.

• Sura hadia manö halöwö sabölö moguna öfalua. Na öfalua daʼö, tola öʼila hadia halöwö si lö muʼanemaiʼö mufalua, si tola mubeʼe ba niha, mazui si lö moguna öfalua.

• Sura hewisa wangogunaʼöu inötömö ba zi samigu. Aefa daʼö, angeragö hewisa enaʼö itugu sökhi wangogunaʼöu inötö. Na öfalua daʼö hasambalö alö waʼafawuka wangera-ngeramö.

• Tatugöi ginötö wolombaseu mazui cuti ndraʼugö. Hewaʼae na lö arara molombaseʼö, tola ifuli abölö ndraʼugö ba alö waʼafawuka gera-eramö.

Tema Wanolo

”Faʼaombö dödö niha tobali fangabua gölönia, hizaʼi fehede si sökhi möi fangomuso dödö.”—AMAEDOLA 12:25.

Eluahania: Fehede si sökhi ba si fao foʼameʼegö tödö moroi khö zi fahuwu tola möi famarou dödöda.

• Tutunö nösi dödöu khö zi fahuwu khöu soʼameʼegö tödö yaʼugö. Tola itolo ndraʼugö ba wangokhögö lala wangera-ngera si tefaudu, mazui ibeʼe khöu wanuturu lala si lö irai tumbu ba dödömö ba wangasiwai abula dödöu. Na no ötutunö nösi dödöu, tola örasoi waʼahono dödö.

• Alui wanolo. Tandraigö beʼe ösa halöwöu ba niha böʼö mazui fao ami ba wombambaya halöwö andrö.

• Na fawuka gera-erau börö nawöu wohalöwö, alui lala ba wangasiwai salua andrö. Duma-dumania, hadia tola öʼandrö ginötönia ba wahuhuosa khönia? Tutunö khönia hadia nirasoimö. (Amaedola 17:27) Na lö mofozu zi no öfalua andrö, böi aseseʼö falukhaisi ia.

Alui Wanuturu Lala moroi khö Lowalangi

”Yaʼahowu niha soʼameʼegö tödö soguna ba wamati.”—MATAIʼO 5:3.

Eluahania: Baero gö, nukha hegöi nahia waʼatoröi, moguna göi ba niha wanuturu lala moroi khö Lowalangi. Na taʼalui ba taʼoʼö wanuturu lalania, tarasoi waʼomuso dödö.

• Angandrö. Iʼandrö khöu Lowalangi enaʼö ’ötouʼö ba dangania na so zabu dödöu gofu hadia ia, so so sa dödönia ndraʼugö’. (1 Fetero 5:7) Na mangandrö ndraʼugö ba öʼangeragö ngawalö zi sökhi, tola ösöndra waʼahono dödö.—Filifi 4:6, 7.

• Baso mbuku si tola mangahatöʼö yaʼugö khö Lowalangi. Fefu wanuturu lala si so ba majalah andre tehalö ia moroi ba Zura Niʼamoniʼö ba tola monönö waʼatua-tuamö ba öʼokhögö wangera-ngera si sökhi. (Amaedola 3:21) Musura Zura Niʼamoniʼö ba wanolo yaʼita enaʼö fahuwu khö Lowalangi. Hadia omasiʼö öbaso Zura Niʼamoniʼö? Oya mene-mene si tola öhalö si no tesura ba mbuku Gamaedola. Te tola öbörögö wombaso yaʼia.