Baŵa si Sara

’Ahakhö dödö’ Yesu me no iʼila zi samösa ina sabu tödö. (Luk. 7:13) Hizaʼi, tenga ha asala irasoi waʼahakhö dödö Yesu. So göi nifaluania ba wanolo zi samösa ina andrö. Si fao faʼasökhi dödö, imane wangumaʼö khönia, ’Böi eʼe saʼae.’ Aefa daʼö, isusugi nono andrö Yesu ba ”itouʼö ba danga ninania”. (Luk. 7:​14, 15) Hadia wamahaʼö nihalöda ba dandra sahöli-höli dödö nifalua Yesu? Tafahaʼö ita wa moguna so khöda waʼahakhö dödö ba niha sabu tödö. Simane Yesu, tola taforomaʼö khöra waʼahakhö dödö na taʼameʼegö tödö ira. Tola taʼalui lala ba wangumaʼö mazui ba wamalua hadia ia si tola möi fanolo ba sondrara tödöra. (Amd. 17:17; 2 Ko. 1:​3, 4; 1 Fe. 3:8) Moguna itörö tödöda, fehede mazui fondrege zide-ide nifaluada khöra tola möi fangabölöra. w23.04 5-6 ¶13-15

Hewaʼae no iʼila Yesu wa no mate zi fahuwu khönia sotöi Lazaro, toröi nasa Yesu ba daʼö dua hari tö. Me no aefa daʼö, awena numalö ia ba Mbetania. Omasi Yesu ba wamalua hadia ia ba wanolo si fahuwu khönia hegöi ba wamolakhömi Lowalangi. (Yoh. 11:​6, 11, 17) Moroi ba zalua andre, tola tafahaʼö ita sanandrösa ba wahuwusa. Angeragö atö: Me lafaʼoheʼö goroisa khö Yesu ira Maria hegöi Marata, lö laʼandrö khönia weʼamöi ba Mbetania. Ha daʼö niwaʼöra khö Yesu wa mofökhö zi fahuwu khöu niʼomasiʼöu. (Yoh. 11:3) Me no mate Lazaro, tola manö isusugi ia Yesu moroi ba zaröu. Hizaʼi, ihalö gangetula Yesu weʼamöi ba Mbetania enaʼö tola fao ia khö zi fahuwu khönia, Maria hegöi Marata. Hadia so zi fahuwu khöu si tola manolo yaʼugö hewaʼae na lö niʼandrömö khönia wanolo? Na so, eluahania yaʼia andrö si fahuwu si tola muʼodaligö na alua khöu wangabu dödö. (Amd. 17:17) Dataforege woloʼö duma-duma Yesu enaʼö tobali ita si fahuwu simane daʼö. w23.04 10 ¶10-11

Na göna ita fanandraigö, tola manö tarasoi wa lö duhu tola tohare gulidanö si bohou. Hadia daʼö geluahania wa no awuwu wamatida? Tatu manö löʼö. Nehegö atö duma-duma andre. Na so ita ba mbaŵa deu mato hauga migu, tola manö tarasoi wa lö saʼae tohare mbaŵa lökhö. Hizaʼi sindruhunia, hasambalö tohare mbaŵa lökhö. Simanö göi, na so khöda waʼide-ide dödö, tola manö tarasoi wa lö irai tohare gulidanö si bohou. Hizaʼi na aro wamatida, aboto ba dödöda wa hasambalö alua nifabuʼu Lowalangi. (Si. 94:​3, 14, 15; Heb. 6:​17-19) Na so khöda waʼafaduhu dödö simane daʼö, lö tebulö taʼofönaiʼö wamosumange Yehowa ba waʼaurida. Moguna göi khöda wamati saro ba wamalua halöwö fanuriaigö. Ato niha, lö faduhu dödöra wa tola alua ’duria somuso dödö’ sanandrösa ba gulidanö si bohou nifabuʼu Lowalangi. (Mat. 24:14; Hez. 33:32) Na lö mangelama ita, tola manö taʼaombösi tödö nifabuʼu Yehowa simane nifaluara. Enaʼö lö alua daʼö, moguna lö taböhöli ba wangaʼaroʼö famatida. w23.04 27 ¶6-7; 28 ¶14

Hadia no irai so khöu waʼaombö dödö alai na lö ibeʼe wanema li ba wangandrömö Yehowa? Na noa, tenga ha yaʼugö zorasoi daʼö. Ato ndra talifusöda zorasoi simane daʼö, mendrua manö na so gabula dödö. Na so gabula dödöda, abua khöda ba wangiʼila hewisa wameʼe Yehowa fanema li ba wangandröda. Hana wa faduhu dödöda wa ibeʼe wanema li ba wangandrö genoninia Yehowa? Ifaduhuʼö khöda Sura Niʼamoniʼö wa iʼomasiʼö sibai ita Yehowa, ba ebua sibai mbölida khönia. (Hag. 2:7; 1 Yo. 4:10) Daʼö mbörö wa ikaoni ita enaʼö mangandrö khönia ba taʼodaligö ia. (1 Fe. 5:​6, 7) Omasi ia wanolo yaʼita enaʼö lö tebulö ahatö khönia ba anau gölöda ba wanaögö faʼabasaki. Asese itutunö Sura Niʼamoniʼö hewisa wameʼe Yehowa fanema li ba wangandrö genoninia. w23.05 8 ¶1-4

Fahuwu sibai Maria khö Yehowa, ba lö teʼodaligö wamatinia khö Yosefo. Oya zaboto ba dödönia sanandrösa ba Mbuku Niʼamoniʼö. Ibeʼe ginötönia ba woʼangerönusi hadia zi no ifahaʼö yaʼia. (Luk. 2:​19, 51) Börö wamati Maria wa tobali ia foʼomo si sökhi. Ba götöda andre, ato ndra alawe zamorege ba woloʼö duma-duma Maria. Duma-dumania, samösa dalifusöda ira alawe sotöi Emiko, imane wangumaʼö, ”Fatua lö mangowaludo, lö tebulö ufalua halöwö ba wamati ba ginötö si no utatugöi. Hizaʼi, me no aefa mangowaludo, foʼomogu zondröniaʼö fangandrö hegöi famosumange Lowalangi. Famatigu teʼodaligö khö woʼomogu ira matua. Ba gafuriata, aboto ba dödögu wa yaʼo samösa zoʼonorogö tödö ba wondrorogö gamakhaitagu khö Yehowa. Börö daʼö, ubeʼe ginötögu samösa ba wangandrö, ba wombaso Sura Niʼamoniʼö, hegöi ba woʼangerönusi yaʼia.” (Gal. 6:5) Yaʼami foʼomo ira alawe, na lö tebulö miʼaroʼö wahuwusami khö Yehowa, oya dane-dane khö woʼomomi ira matua ba wanuno hegöi ba wangomasiʼö yaʼami.—Amd. 31:30. w23.05 21 ¶6

Tenga iʼotarai me tumbu ita so khöda wangataʼufi Yehowa. Moguna taforege wangokhögö yaʼia. Sambua lala si tola tafalua yaʼia daʼö na tanehegö niwöwöinia. Na itugu taʼila waʼatua-tua Lowalangi, faʼabölönia, hegöi faʼomasinia khöda soroma moroi ba nifazökhinia, itugu tafosumange ba taʼomasiʼö ia. (Rom. 1:20) Lala tanö böʼö si tola tafalua ba wangokhögö faʼataʼu khö Lowalangi yaʼia daʼö fangandrö ero maʼökhö. Na asese mangandrö ita, itugu aboto ba dödöda Yehowa. Ero na taʼandrö waʼabölö khönia ba wanaögö fanandraigö, tefasugi ba dödöda waʼabölönia sahöli-höli dödö. Ba ginötö taʼandrö saohagölö börö me no iʼamualagö Nononia khöda, itörö tödöda wa iʼomasiʼö sibai ita Yehowa. Ba na taʼandrö wanolo khö Yehowa ba wangasiwai abula dödö, itörö tödöda waʼatua-tua sibai ia. Fangandrö simane daʼö zanolo yaʼita ba wangataʼufi Yehowa soroi ba dödö. Daʼö göi zangaroʼö angetulada ba wanimbagö ngawalö hadia ia zamakiko fahuwusada khönia. w23.06 15 ¶6-7

Lö tebulö ihaogö wamaʼema oroisania Yehowa ba nono mbanuania. Duma-dumania, iʼogunaʼö ndra mboto solohe me abad siföföna, ba wangombakha ba niha Keriso wa moguna aro ira ba zi tölu ngawalö andre: (1) ba wanimbagö famosumange adu, ba ha Yehowa zinangea mufosumange, (2) ba woloʼö oroisa Yehowa ba wangamoniʼö do, ba (3) ba woloʼö goi-goi Yehowa salawa sanandrösa ba gamuata si teʼodane-dane ba Zura Niʼamoniʼö. (Hal. 15:​28, 29) Hewisa ita iadaʼa enaʼö lö tebulö aro ba woloʼö si tölu ngawalö andre? Yaʼia daʼö Yehowa nifosumangeda ba taʼoʼö niwaʼönia. Ibeʼe fareta ba ndraono Gizaraʼeli Yehowa enaʼö ha yaʼia nifosumange. (5 Mo. 5:​6-10) Me itandraigö Yesu Afökha, ifatunö Yesu wa Yehowa zinangea mufosumange. (Mat. 4:​8-10) Daʼö mbörö wa lö tafosumange nadu. Lö göi tahöni-höni niha gulidanö. Duma-dumania, lö tasuno-suno ndra sondröniaʼö ba agama, sondröniaʼö ba politik, atlet, hegöi ira artis. Hizaʼi, ha Yehowa nifosumangeda, ”samazökhi fefu hadia ia” ba lö faröi ita khönia.—Fam. 4:11. w23.07 14-15 ¶3-4

Omasi sibai gulidanö Zatana andre ba wamalua amuata fohorö hegöi pornografi. (Ef. 4:19) Börö daʼö, moguna taforege ba wamosumange Lowalangi ba taʼaröuʼö ita moroi ba zi lö sökhi. Ba Gamaedola faza 9, faʼatua-tua hegöi faʼabodo, muʼamaedolagö ia simane ira alawe si darua. Ira alawe si darua andrö faoma lakaoni niha ”si lö tödö”, mazui niha si lö faʼatua-tua. Hulö lamane wangumaʼö, ’Aine, ba lau manga ba nomogu.’ (Amd. 9:​1, 4-6) Hizaʼi, faböʼö ba gafuriata lua-lua wogaoni ndra alawe si darua andrö. Nehegö wogaoni moroi ba ndra alawe si oföna niʼamaedolagö simane ’ira alawe si bodo’. (Amd. 9:​13-18) Lö aila ia ba wogaoni niha si lö faʼatua-tua weʼamöi ba nomonia ba fao wemanga khönia. Hadia zalua ba niha sotemaʼö fogaoni andrö? Möi ira ba ”Lewatö sabakha”. Mufangelama ita sanandrösa ba ”ndra alawe si lö sökhi” hegöi ’ira alawe sohorö-horö’. Lafatunö göi khöda wa ’na möi ita ba nomonia, hulö na möi ba waʼamate’. (Amd. 2:​11-19) Ba Gamaedola 5:​3-10, ifangelama göi ita sanandrösa khö ”ndra alawe si lö sökhi” tanö böʼö ”ahenia numalö ba waʼamate”. w23.06 22 ¶6-7

Moguna tobali duma-duma ndra satua sokubaloi ba wangoromaʼö amuata faʼalöfatandro. (1 Ti. 3:​2, 3) Lö itötöna si samösa satua sokubaloi wa latema mbua gera-erania ha börö me abölö atua ia moroi khö ndra satua sokubaloi tanö böʼö. Aboto ba dödönia wa faʼabölö geheha niʼamoniʼö moroi khö Yehowa zamarou gofu haniha manö. Tola ifarou zatua sokubaloi tanö böʼö ba wamaʼema hadia ia ba wanolo boto zatua sokubaloi ba wangai angetula si sökhi. Na ato ndra satua sokubaloi si fao tödö ba zi sambua angetula, ba lö fatimba daʼö ba goi-goi Zura Niʼamoniʼö, satua sokubaloi si lö fatandro ituhini gangetula andrö hewaʼae na dali zindruhunia abölö omasi ia ba gangetula tanö böʼö. Oya howu-howu nitema niha Keriso börö me laʼokhögö gamuata faʼalöfatandro. Tola taʼokhögö gamakhaita si sökhi khö ndra talifusöda ba tarasoi waʼatulö ba mbanua niha Keriso. Hewaʼae na faböʼö-böʼö lagu hegöi si toʼölö mufalua ba gotalua nono mbanua Yehowa, tola tarasoi waʼomuso dödö börö me faoma tafosumange Yehowa. Ba sabölö tohudenia, tarasoi waʼohahau dödö börö me taʼoʼö Lowalangida si lö fatandro yaʼia daʼö Yehowa. w23.07 25 ¶16-17

Sökhi gohitö dödö Danieli ba wamahaʼö yaʼia sanandrösa ba wamaʼeleʼö, ba omasi ia enaʼö aboto ba dödönia zindruhu. So göi khönia wangide-ngideʼö. Iʼila wa hasambalö ibeʼe Yehowa waʼaboto ba dödö ba niha soloʼö goi-goinia ba somasi mamahaʼö yaʼira sanandrösa khönia. (Dan. 2:​27, 28) Iforomaʼö göi Danieli wangide-ngideʼö yaʼia me iʼodaligö wanolo moroi khö Yehowa. (Dan. 2:18) Ihaogö ifahaʼö ia Danieli. Iʼalui wanema li moroi ba gölu-gölu Zura si so me luo daʼö. (Yer. 25:​11, 12; Dan. 9:2) Hewisa woloʼömö duma-duma Danieli? Angeragö hadia gohitö dödöu ba ginötö öfahaʼö ndraʼugö. Na daʼö gohitö dödömö enaʼö aboto ba dödöu zindruhu, hasambalö itoloʼö Yehowa. (Yoh. 4:​23, 24; 14:​16, 17) Hizaʼi, so niha sangokhögö ohitö dödö si fasala ba ginötö ifahaʼö ia ba Zura Niʼamoniʼö Duma-dumania, omasi ia ba wangalui tandra wa Sura Niʼamoniʼö andrö tenga niʼehehaini Lowalangi irege tola itatugöi samösa hadia zatulö mazui si fasala moloʼö somasi-masi dödönia. Moguna sökhi gohitö dödöda ba ginötö tafahaʼö ita. w23.08 9-10 ¶7-8

Na tafaedo-faedogö ita ba niha böʼö, tola manö taforege wamalua si tebai takhamö, ba daʼö zi tobali noro sabua khöda. (Gal. 6:4) Na tafalua daʼö, tola manö so khöda wahindrisa ba afökhö dödöda ba niha. (Gal. 5:26) Möi famaʼala waʼaurida na taforege wamalua hadia zi no ikhamö niha böʼö si tebai tafalua. Iwaʼö Sura Niʼamoniʼö wa ’fanötöna si no tetaha manö möi fangafökhö dödö’ mendrua manö na tebai tafalua nitötönada andrö. Sindruhu-ndruhu wa afökhö sibai daʼö! (Amd. 13:12) Na tafalua daʼö, hasambalö marase ita ba arara manö awuwu ita ba watandrisa waʼauri andre. Böi faso wamalua zi töra moroi ba niʼandrö Yehowa. Lö irai itötöna Yehowa enaʼö öbeʼe khönia zi tebai öfalua. (2 Ko. 8:12) Yafaduhu dödöu wa lö ifaedo-faedogö ndraʼugö ba niha böʼö. (Mat. 25:​20-23) Iʼameʼegö tödö sibai wamosumange nifaluamö soroi ba dödö, faʼalöfaröimö, hegöi faʼanau gölömö. w23.08 29 ¶10-11

Me muʼao Zimesono ba wangandrö fanolo khö Yehowa, ifalua dandra sahöli-höli dödö Yehowa ba wangaʼasogö idanö. Me ibadu nidanö andrö Simesono, ”mangawuli waʼabölönia ba ohahau dödönia”. (Sangu. 15:19) Lö tebulö so gumbu nidanö daʼa irugi me isura mbuku Sanguhuku andre Samueli samaʼeleʼö. Na laʼila iraono Gizaraʼeli gumbu nidanö andrö, daʼö zamasugi ba dödöra wa na laʼodaligö Yehowa hasambalö itolo ira ba ginötö si tefaudu. Moguna göi taʼodaligö Yehowa ba wanolo yaʼita, gofu hadia nekhe-nekhe danga mazui faʼabölöda ba wangai halöwö khönia. Moguna so khöda wangide-ngideʼö ba tafaduhuʼö wa tola tafalua fefu niʼandrö Yehowa ha börö me taʼodaligö ia. Ifuli teʼabölöʼö Zimesono me ibadu nidanö nihenaigö Yehowa. Simanö göi ita, moguna tatemaʼö fefu nihenaigö Yehowa khöda enaʼö tola tarorogö waʼalöfaröida khönia.—Mat. 11:28. w23.09 4 ¶8-10

Hadia nifaluada na so zanandrawaisi yaʼita, duma-dumania laböbögö zi lö duhu sanandrösa ba döi Lowalangi mazui laʼoʼaya Zura Niʼamoniʼö? Moguna taʼandrö geheha niʼamoniʼö hegöi faʼatua-tua moroi khö Yehowa enaʼö tola tahaogö-haogö manö ba wameʼe fanema li khöra. Hizaʼi, hewisa na ba gafuriata awena taʼila wa lö nihaogöda lida ba ginötö tatema lira? Moguna taʼohe ba wangandrö zalua andrö ba taʼangeragö hewisa enaʼö itugu sökhi wamaluada yaʼia ba ginötö tanö böʼö. Hasambalö ibeʼe khöda gehehania niʼamoniʼö Yehowa enaʼö tola tataha wönuda ba tahaogö wahuhuosa. Oya ayati ba Zura Niʼamoniʼö sanolo yaʼita ba ginötö abua khöda ba wohaogö-haogö fehededa na so zanandrawaisi yaʼita. Itolo ita eheha Lowalangi enaʼö itörö tödöda ngawalö ayati andrö. (Yoh. 14:26) Duma-dumania, goi-goi nisöndrada ba mbuku Gamaedola tola tobali fanoloda enaʼö lö alio mofönu. (Amd. 15:18) Ifatunö göi khöda hadia mbuania na taforomaʼö wanaha tödö na so zanandrawaisi yaʼita.—Amd. 10:19; 17:27; 21:23; 25:15. w23.09 15 ¶6-7

Lö faröi zinenge sotöi Fetero ba wangai halöwö sagötö zi ngafulu fakhe. Fao ia mangai halöwö khö Yesu, ibörögö wanuriaigö ba soi böʼö, ba tobali ia samösa boto solohe. Hizaʼi, ba gafuriata waʼaurinia, ibeʼe khönia halöwö tanö böʼö Yehowa. Te me döfi 62-64 M, iʼogunaʼö ia Yehowa ba wanura si dombua sura, yaʼia daʼö sura 1 Fetero hegöi 2 Fetero si so ba Zura Niʼamoniʼö. (2 Fe. 1:​13-15) Me isura Fetero zurania, oya ”ngawalö wamakao” si göna khö ndra talifusönia si sara lala wamati. (1 Fe. 1:6) So niha samorege wanaʼunöisi banua niha Keriso faoma famahaʼö faya hegöi amuata si raʼiö. (2 Fe. 2:​1, 2, 14) Baero daʼö, niha Keriso si toröi ba Yeruzalema me luo daʼö, lataögö ”gamozua fefu hadia ia”, yaʼia daʼö faʼadudu mbanua Yeruzalema hegöi osalinia börö me tohare zaradadu romawi ba wanuwö yaʼira. (1 Fe. 4:7) Na labaso zurania andrö ira niha Keriso, tola laʼila hadia zinangea lafalua enaʼö anau gölöra ba tefaʼanö ira ba wanaögö fanandraigö si lö ara tö alua. w23.09 26 ¶1-2

Simane Yesu, tola tafahaʼö ita ba gamuata foloʼö na so gabula dödö salua khöda. Duma-dumania, me awena alua pandemi COVID-19, laʼandrö khöda enaʼö lö möi ita ba nahia gangowuloa ba taböhöli weʼamöi manuriaigö ba nomo-omo misa. Hadia abua khöda daʼö? Hewaʼae abua, hizaʼi telumöʼö waʼaurida borö me so khöda woloʼö, teʼosambuaʼö ita, ba no taʼomusoiʼö dödö Yehowa. Iadaʼa, no tefaʼanö ita ba woloʼö gofu hadia wanuturu lala nibeʼe dania sagötö alua wamakao sabölö-bölö. Tola teʼorifi ita na taʼoʼö wanuturu lala andrö dania! (Yob. 36:11) Taʼoʼö niwaʼö Yehowa börö waʼomasida khönia ba omasi ita taʼomusoiʼö dödönia. (1 Yo. 5:3) Tebai tasulöni fefu zi no ifalua khöda Yehowa. (Si. 116:12) Hizaʼi tola taʼoʼö niwaʼönia hegöi niha nifataronia tobali sondröniaʼö. Na so khöda gamuata foloʼö, no taforomaʼö waʼatua-tua. Niha satua-tua, iʼomusoiʼö dödö Yehowa.—Amd. 27:11. w23.10 11 ¶18-19

Na so malaʼika si fahuhuo khöu, hadia öfondrondrongo wehedenia? Ba götöda iadaʼa, so malaʼika si fahuhuo ”ba ngawalö soi, ba ngawalö mado, banua, hegöi li”. Hadia nifaʼemania? ”Miʼataʼufi Lowalangi ba mifolakhömi ia . . . Miʼangalulu khö Lowalangi Somböi banua si yawa [ba] tanö.” (Fam. 14:​6, 7) Ha Yehowa Lowalangi sindruhu, ba ha yaʼia zinangea lafosumange fefu niha. Tatu taʼandrö sibai saohagölö me no ibeʼe khöda ginötö ba wamosumange yaʼia ba gosali wamati andrö khönia solakhömi! Hadia gosali wamati andrö, ba hezo tasöndra gangombakhata sanandrösa ba daʼö? Osali wamati tenga sambua tomosa. Hizaʼi, daʼö gamakhoita nibeʼe Yehowa si teʼodane-dane ba höli nibeʼe Yesu enaʼö fefu niha gulidanö tola lafalua wamosumange satulö si fatema ba dödö Yehowa. Ihaogö wanutunö daʼa Faulo ba zura nifaʼoheʼönia khö ndra niha Keriso Heberaiʼo si toröi ba Yudea me abad siföföna. w23.10 24 ¶1-2

Me döfi 522 SM, no mofozu nudu ba wanaisi famazökhi osali Yehowa. Hizaʼi, ifaduhuʼö ba dödö ndra niha Yahudi Zakharia wa ha sambalö itolo ira Yehowa, iʼogunaʼö gehehania ba wanimbagö fanaisi andrö. Me döfi 520 SM, itehegö Razo Dario enaʼö latohugö ira niha Yahudi wamazökhi osali, ibeʼe gefe, aefa daʼö ifarou ndra gubernur enaʼö latuhini wamazökhi osali andrö. (Esr. 6:​1, 6-10) Ifabuʼu ba nono mbanuania Yehowa wa hasambalö itolo ira na laʼofönaiʼö halöwöra ba wamazökhi osali. (Hag. 1:​8, 13, 14; Zak. 1:​3, 16) Börö wamarou dödö moroi khö ndra samaʼeleʼö, lafuli zui latohugö halöwöra ira niha Yahudi ba wamazökhi osali andrö me döfi 520 SM, ba awai lafazökhi barö zi lima fakhe. Börö me laʼofönaiʼö wamalua somasi Lowalangi hewaʼae na oya gabula dödö salua khöra, andrö latema howu-howu moroi khö Yehowa, tenga ha tebönökhi zoguna ba mboto hizaʼi iʼasogö göi zoguna khöra ba wamati. Buania, omuso-muso dödöra ba wamosumange Yehowa.—Esr. 6:​14-16, 22. w23.11 15 ¶6-7

Hewaʼae ato niha si no irai mamondrongo töi Gaberahamo, ha maʼifu niʼilara sanandrösa khönia. Hizaʼi, te oya niʼilamö sanandrösa khö Gaberahamo. Duma-dumania, öʼila wa tefotöi ia ”ama zamati ba niha fefu”. (Rom. 4:11) Hizaʼi, te manofu ndraʼugö, ’Hadia tola uʼoʼö nifalua Gaberahamo ba uʼokhögö wamati saro simane yaʼia?’ Hasambalö tola. Sambua lala enaʼö taʼokhögö wamati simane Aberahamo yaʼia daʼö tafahaʼö ita ba duma-dumania. Iʼoʼö wehede Lowalangi, findra ia ba soi saröu, toröi ia ba nose-ose ngafulu fakhe waʼara, ba itehegö nono niʼomasiʼönia sotöi Izaʼaki tobali sumange. Daʼö fefu zangoromaʼö wa mamati ia. Börö wamati hegöi bua-bua niforomaʼönia, omuso sibai dödö Lowalangi khönia ba omasi ia tobali si fahuwu khö Gaberahamo. (Yak. 2:​22, 23) Omasi göi Yehowa na fefu ita, farahu ndraʼugö ba daʼö, taʼomusoiʼö dödönia ba tobali si fahuwu khönia. Börö daʼö, ibeʼe gehehania khö Waulo hegöi Yakobo ba wanura duma-duma Gaberahamo ba Zura Niʼamoniʼö. w23.12 2 ¶1-2

Yaʼami talifusöma ira alawe, mifahaʼö ami enaʼö itugu sökhi lagu wahuhuosami. Moguna laforege wamalua daʼö ira niha Keriso. Ibeʼe khöda mene-mene si sökhi Yakobo ba ayati maʼökhö andre. Na öhaogö öfondrondrongo ba ginötö fahuhuo niha böʼö, eluahania no öʼameʼegö tödö ira mazui örasoi nirasoira. (1 Fe. 3:8) Na ambö aboto ba dödöu hadia geluaha wehede mazui nirasoi zi samösa niha, haogö wanofu khönia. Aefa daʼö, haogö era-era sabata fatua lö fahuhuo ndraʼugö. (Amd. 15:​28, nis.) Sofu khöu samösa, ’Hadia atulö ba möi famarou dödö wehedegu andre? Hadia sökhi ba lö möi fangoʼaya niha böʼö?’ Fahaʼö ndraʼugö moroi khö ndra talifusöda ira alawe sonekhe fahuhuo. (Amd. 31:26) Nehegö na fahuhuo ira. Na lö öböhöli wamahaʼö yaʼugö ba lagu wahuhuosa si sökhi, itugu sökhi gamakhaitamö ba niha böʼö. w23.12 21 ¶12

Iadaʼa, tola iʼogunaʼö nösi nomoda Yehowa, si fahuwu khöda hegöi ira satua sokubaloi ba wangabölöʼö yaʼita. Hizaʼi, ba ginötö fawuka gera-erada te abölö omasi ita na taʼoniagö ita. Lö fasala na itaria tafalua daʼö. Hadia zinangea tafalua enaʼö tatema wanolo moroi khö yehowa? Lawa gaoloma dödöu ba wangoniagö yaʼugö. Na taʼoniagö ita si toʼölönia teduhö wangera-ngerada ba abölö taʼosambuaʼö dödöda ba gabula dödö hegöi ba waʼaurida samösa. Daʼa dania mbörö wa tola manö tahalö gangetula si fasala. Sindruhu sa, itaria omasi ita na ha yaʼi-yaʼita, töra-töra na awena alua khöda gabula dödö sebua. Hizaʼi na talafo ara taʼoniagö ita, tola manö tatimbagö wanolo moroi khö Yehowa. Börö daʼö, temaʼö wanolo moroi ba nösi nomomö, si fahuwu khömö, hegöi moroi khö ndra satua sokubaloi hewaʼae na abua wamalua daʼö. Böi olifu ndraʼugö wa Yehowa zangogunaʼö yaʼira ba wangabeʼeʼö yaʼugö.—Amd. 17:17; Yes. 32:​1, 2. w24.01 24 ¶12-13

Fawuʼu li niha Naziri wa lö lataba mbura. Daʼö dandra wa soroi ba dödöra woloʼö nifakhoi Yehowa. Hizaʼi sindruhunia, lö fefu ndraono Gizaraʼeli laʼameʼegö tödö ba latuhini gangetula niha Naziri. Tobali, so ginötönia moguna barani niha Naziri ba wamalua buʼusa lira ba enaʼö faböʼö ira moroi ba niha böʼö. (Amo. 2:12) Tatu faböʼö ita moroi ba niha si so ba zi fasuida börö me tafili ba woloʼö Yehowa. Moguna barani ita ba wamatunö khö ndra awöda wohalöwö mazui awöda sekola wa yaʼita Samaduhuʼö Yehowa. Ba börö me itugu lö sökhi gamuata niha ba zi fasuida, te itugu abua khöda woloʼö goi-goi si so ba Zura Niʼamoniʼö ba weʼamöi manuriaigö. (2 Ti. 1:8; 3:13) Hizaʼi törö tödöu, na lö ataʼu ita faböʼö moroi ba niha si lö mamosumange Yehowa, eluahania daʼö no ’taʼomusoiʼö dödö Yehowa’.—Amd. 27:11; Mal. 3:18. w24.02 16 ¶7; 17 ¶9

Nehegö hewisa zalua ba mbanua niha Keriso ba Roma. Oi faböʼö-böʼö lala waʼauri niha si farahu ba mbanua niha Keriso andrö. So ösa niha Yahudi moroi ba gotaluara si no irai mamahaʼö yaʼira ba woloʼö Oroisa Moze, so göi moroi ba soi böʼö si faböʼö-böʼö lala waʼauri. Baero daʼö, so ösa niha Keriso si tobali sawuyu, tanö böʼönia niha si kayo sangokhögö sawuyu. Hewaʼae no faböʼö-böʼö lala waʼaurira, hewisa niha Keriso ba wangoromaʼö faʼomasi khö nawöra zamösana? Iʼamenesi ira Faulo imane, ”Faoma mitemaʼö nawömi.” Hadia geluahania? Ngawua wehede nifoʼeluaha tobali ”mitemaʼö” eluahania mutemaʼö zi samösa niha si fao faʼasökhi dödö ba faʼoböwö. Duma-dumania, takaoni ira weʼamöi ba nomoda mazui tobali ita si fahuwu khöra. Me iʼombakhaʼö khö Wilemo Faulo ba wanemaʼö Onesimo, samösa sawuyu soloi, imane Faulo, ”Haogö wanemaʼö yaʼia.” (File. 17) Me edöna Wirisikila hegöi Akila ba wanolo Afolo enaʼö monönö waʼaboto ba dödönia wamahaʼö niha Keriso, ”lakaoni ia ba laʼombakhaʼö khönia zabölö tefaudu sanandrösa ba lala Lowalangi”. (Hal. 18:26) Sindruhu sa, hewaʼae no faböʼö-böʼö lala waʼaurira, tola laʼokhögö wahasara dödö ba faoma latemaʼö nawöra. w23.07 6 ¶13

Dane-dane siföföna wa ölulu waʼaurimö khö Yehowa yaʼia daʼö börö me öʼomasiʼö ia. Dane-dane waʼomasimö khönia tenga ha börö hadia nirasoimö, hizaʼi teʼodane-dane daʼö ba ”waʼaboto ba dödö si tefaudu” sanandrösa khö Yehowa hegöi ohitö dödönia. (Kol. 1:9) Börö me no öfahaʼö ndraʼugö ba Zura Niʼamoniʼö, itugu faduhu dödöu wa (1) sindruhu-ndruhu so Yehowa, (2) Sura Niʼamoniʼö andrö Taromali Lowalangi, ba (3) iʼogunaʼö organisasinia Yehowa ba wamalua ohitö dödönia. Niha solulu faʼaurinia khö Yehowa, moguna iʼila dane-dane wamahaʼö si so ba Daromali Lowalangi ba ifaudugö waʼaurinia ba goi-goi Zura Niʼamoniʼö. Laforege göi wanutunö ba niha böʼö hadia nifaduhusira tödö. (Mat. 28:​19, 20) Laʼomasiʼö Yehowa ba sindruhu-ndruhu ha yaʼia nifosumangera. Hadia simane daʼö göi nirasoimö? w24.03 4-5 ¶6-8

Foʼomo Abigaila töinia Nabalo, ifotöi ia Sura Niʼamoniʼö niha si lö sökhi ba safaito. (1 Sa. 25:3) Tatu manö abua khö Abigaila tobali foʼomo niha simane daʼö. Hadia so ginötö khö Abigaila enaʼö aetu wongambatönia? So. Samuza maʼökhö, tohare Dawido, sedöna tobali razo ndraono Gizaraʼeli, möi ia ba wamunu Nabalo börö me no iʼoʼaya Dawido hegöi ono mbuania. (1 Sa. 25:​9-13) Sindruhunia, tola menaʼö ilau moloi Abigaila ba itehegö mate Nabalo. Hizaʼi, mangalulu Abigaila khö Dawido enaʼö lö ibunu Nabalo. (1 Sa. 25:​23-27) Hadia mbörö? Iʼomasiʼö Yehowa Abigaila ba soroi ba dödönia woloʼö goi-goi sanandrösa ba wongambatö. Iʼila wa no niʼamoniʼö wangowalu andrö ba wamaigi Yehowa. Omasi ia ba wangomusoiʼö tödö Lowalangi, ba daʼö zamarou tödönia ba wamorege enaʼö terorogö wongambatönia, farahu ba daʼö woʼomonia. Iʼanemaiʼö ihalö gangetula ba itaha Dawido enaʼö lö ibunu Nabalo. w24.03 16 ¶9-10

Ba gangowuloa, hadia so ndra talifusöda samorege ba woʼöna-önaiʼö faʼaurinia enaʼö abölö oya zi tola ifalua ba wamosumange Yehowa? Hadia so ndraono si bohou ebua si lö faʼataʼu ba wangoromaʼö wa faböʼö ira khö ndra awö-awöra sekola hewaʼae abua? Hadia so nisaisi nösi nomora ba samorege enaʼö lö faröi? Yalötebulö taʼalui ginötö ba wangaʼaroʼö yaʼira faoma fehededa. Foromaʼö wa taʼameʼegö tödö wamorege hegöi faʼanau gölöra. (File. 4, 5, 7) Faduhu dödö Yehowa wa sindruhu-ndruhu omasi ita wangomusoiʼö tödönia ba oya nitehegöda ba wamalua buʼusa li me talulu waʼaurida khönia. Si fao faʼasökhi dödö ibeʼe göi khöda ginötö ba wangoromaʼö faʼomasida khönia. (Amd. 23:​15, 16) Börö daʼö, dataʼosambuaʼö dödöda ba wangai halöwö khö Yehowa ba tatehegö wameʼe khönia fondrege zi sökhi! w24.02 18 ¶14; 19 ¶16

Me luo daʼö angohorita ndröfi 29 M, awena sibai ibörögö ifalua halöwö fanuriaigö Yesu. Me luo daʼö Yesu hegöi inania Maria, lakaoni ira ba wangondrasi falöwa nifalua ba Kana. Omasi Maria ba wameʼe fanolo ba wangehenaigö soguna ba dome si tohare. Hizaʼi, so sambua gabula dödö salua yaʼia daʼö ambö khöra nagu ba no ahori. Iʼanemaiʼö ifahatö ia Maria khö Yesu ba imane, ”Ahori khöra nagu.” (Yoh. 2:​1-3) Hadia nifalua Yesu? Ifalua sambua dandra sahöli-höli dödö. Ibaliʼö nidanö tobali ”nagu si sökhi”. (Yoh. 2:​9, 10) Ifalua dandra sahöli-höli dödö tanö böʼö Yesu sagötö ifalua halöwö fanuriaigö. Ifalua dandra sahöli-höli dödö ba wanolo ngafulu ribu niha. Duma-dumania, ba zi dombua dandra sahöli-höli dödö nifaluania yaʼia daʼö me ibeʼe gö ndra matua si 5.000 faʼato. Aefa daʼö ba ginötö tanö böʼö, ifuli zui ibeʼe gö ndra matua si 4.000 faʼato. Ba na muʼerai ndra alawe awö ndraono töra 27.000 niha. (Mat. 14:​15-21; 15:​32-38) Ba zi dombua salua andrö, ato göi nifadöhö Yesu zofökhö.—Mat. 14:14; 15:​30, 31. w23.04 2 ¶1-2

Na no aefa göna ita abula dödö, no sinangea na tarasoi wa lö faʼabölöda mazui atata dölada. Simane Elia, te abua sibai khöda wemaoso. Omasi manö ita mörö. (1 Ra. 19:​5-7) Moguna khöda wanolo enaʼö lö taböhöli wamosumange Yehowa. Ba ginötö simane daʼö, ifaduhuʼö khöda Yehowa wanolo nibeʼenia, simane nitutunö ba ayati maʼökhö andre. No irai alua khö Razo Dawido daʼö. Me oya ngawalö gabula dödö ba lasuwö ia si faʼudu khönia, imane khö Yehowa, ”Tangamö kambölö zangabeʼeʼö yaʼo.” (Si. 18:35) Asese ifarou dödö niha böʼö Yehowa ba wanolo yaʼita. Duma-dumania, me irasoi Dawido wa hulö zi lö faʼabölö ia, tohare Yonata si fahuwu khönia ba wangabeʼeʼö hegöi ba wamarou tödönia. (1 Sa. 23:​16, 17) No göi irai iʼogunaʼö Gelisa Yehowa ba wanolo Elia.—1 Ra. 19:​16, 21; 2 Ra. 2:2. w24.01 23-24 ¶10-12

Moroi ba Gamaedola faza 9 sanutunö sanandrösa ba ndra alawe niʼamaedolagö ’faʼatua-tua sindruhu’, tola tafahaʼö ita wa oböwö sibai Yehowa andrö, ba omasi ia ba wameʼe khöda ngawalö zi sökhi. Ira alawe andrö no ihenaigö ifaʼanö nagole hegöi nagu, ba ibeʼe daʼö fefu ba domenia. (Amd. 9:2) Aefa daʼö, ba ayati 4 hegöi 5, ”Imane [faʼatua-tua sindruhu] ba niha si lö tödö, ’Aine, dataʼa roti daʼa khögu.’” Hana wa moguna tatema wogaoni andrö? Omasi Yehowa na atua-tua ndraononia ba lö teʼala ira. Omasi ia ba wolumöʼö yaʼita enaʼö lö tatörö ua sakali waʼafökhö, awena maniasa ita. Daʼö mbörö wa ”iʼiröʼö waʼatua-tua soguna ba niha sadölö tödö”. (Amd. 2:7) Na taʼataʼufi Yehowa, taforege ba wangomusoiʼö tödönia. Tafondrondrongo mene-menenia satua-tua ba taʼoʼö daʼö si fao faʼomuso dödö.—Yak. 1:25. w23.06 23-24 ¶14-15

Hewaʼae na so zi tebai tafalua ba wamosumange Lowalangi, hizaʼi faduhu dödöda wa iʼameʼegö tödö nifaluada Yehowa soroi ba dödö ba wangomusoiʼö tödönia. Hewisa wa taʼila daʼö? Ba götö Zakharia, iʼandrö khö zamaʼeleʼö khönia andre enaʼö ifazökhi dakula moroi ba ganaʼa hegöi firö nifaʼoheʼö ndra niha nitiboʼö si toröi ba Mbabilona. (Zak. 6:11) ”Takula solakhömi” andre daʼö zi tobali ”fanörö tödö” sanandrösa ba dolo-tolo nifaʼoheʼöra si fao faʼaohagölö. (Zak. 6:​14, nis.) Faduhu göi dödöda wa lö iʼolifugö Yehowa wamorege nifaluada soroi ba dödö ba wamosumange yaʼia sagötö alua khöda gabula dödö. Faduhu dödöda wa itugu oya gabula dödö salua khöda iadaʼa ba ginötö safuria andre, ba tola manö itugu monönö nasa daʼö ba zi so miföna. (2 Ti. 3:​1, 13) Hewaʼae simanö, böi talafo taʼaombösi tödö. Böi olifu ita daromali Yehowa niwaʼönia khö ndraono mbanuania nifaʼema Hagaʼi imane: ”Fao ndraʼo khömi . . . Böi miʼataʼufi.” (Hag. 2:​4, 5) Faduhu dödöda wa fao khöda Yehowa sagötö tabeʼe wondrege zi sökhi ba wamalua ohitö dödönia. w23.11 19 ¶20-21

Tola manö lö itehegö Yehowa na musura ba Zura Niʼamoniʼö fefu zala si no irai ifalua Fetero. Hizaʼi, enaʼö so wamahaʼö nihalöda moroi ba zi no irai alua khönia, itehegö Yehowa enaʼö mufaʼanö daʼö ba Zura Niʼamoniʼö. (2 Ti. 3:​16, 17) Tola tafahaʼö ita khö Wetero hewaʼae lö moʼahonoa ia simane yaʼita. Aboto ba dödöda wa lö itötöna Yehowa enaʼö moʼahonoa fefu nifaluada. Omasi ia na lö awuwu ita, hewaʼae na so zoʼamböta ita. Hana wa tebai awuwu ita? Hewaʼae tawaʼö tödöda wa no mofozu ita ba wolawa falömoʼahonoa, itaria manö tafuli zui tafalua zala. Börö daʼö, böi awuwu ita. Tola manö, maniasa ita ba wehede hegöi nifaluada. Hizaʼi, na lö awuwu ita, hasambalö itolo ita Yehowa enaʼö itugu sökhi nifaluada. (1 Fe. 5:10) Faʼasökhi dödö niforomaʼö Yesu khö Wetero hewaʼae asese ifalua zala, daʼö zamarou tödöda enaʼö lö taböhöli wamosumange Yehowa. w23.09 20-21 ¶2-3

Tola manö ifadöhö Lazaro Yesu simane niwaʼö Marata ba ayati maʼökhö andre. Hizaʼi, omasi ia ba wamalua si töra moroi ba daʼö. Ifabuʼu, ”Hasambalö ifuli auri dalifusömö.” Imane nasa, ”Yaʼodo wemaoso ba faʼauri.” (Yoh. 11:​23, 25) Sindruhu-ndruhu iʼokhögö waʼabölö Yesu moroi khö Lowalangi ba wanusugi niha si no mate. No irai isusugi nono alawe sawena sibai mate. No göi irai isusugi nono matua si bohou ebua lö ara me no aefa mate nono andrö. (Luk. 7:​11-15; 8:​49-55) Hizaʼi, hadia tola isusugi zi no öfa hari no mate ba si no ibörögö obou mboto? Talifusö alawe Lazaro tanö böʼö sotöi Maria, möi göi ia wamalukhaisi Yesu. Ifaʼema göi wehede si fagölö simane nifaʼema dalifusönia alawe. Imane, ”He Soʼaya, na so menaʼö ndraʼugö ba daʼa, ba lö mate dalifusögu.” (Yoh. 11:32) Me iʼila ba irongo mege-ege Maria hegöi niha tanö böʼö, fao göi Yesu ba waʼabu dödö. Börö waʼahakhö dödönia zi fahuwu khönia, ibörögö meʼe Yesu. Aboto ba dödönia waʼafökhö nirasoira ba ginötö mate niha niʼomasiʼöra. Börö daʼö, omasi sibai ia ba wangeheta si tobali mbörö wangabu dödö nirasoira. w23.04 10-11 ¶12-13