Baŵa si Dua

Me göna fökhö sabölö-bölö Razo Hizikia, iʼandrö khö Yehowa enaʼö tola döhö ia. Tefondrondrongo wangandrönia ba ifadöhö ia Yehowa. (2 Ra. 20:​1-6) Hizaʼi, me mangandrö zinenge sotöi Faulo enaʼö iheta Yehowa ’ndroi si so ba mbotonia’, lö iheta wökhönia andrö Yehowa. (2 Ko. 12:​7-9) Edöna Razo Herode ba wamunu Sinenge sotöi Yakobo hegöi Fetero. Hizaʼi ba gafuriata labunu Yakobo, ba teʼefaʼö Wetero börö dandra sahöli-höli dödö. (Hal. 12:​1-11) Te manofu ita, ’Hana wa iʼefaʼö Yehowa zinenge sotöi Fetero, hizaʼi itehegö mate Yakobo?’ Lö itutunö Sura Niʼamoniʼö. Sambua zi tola tafaduhusi tödö yaʼia daʼö ’lö irai ebua dödö zambuana’ Yehowa. (5 Mo. 32:4) Itaria, lö tatema wanema li ba wangandröda simane nitötönada. Hewaʼae simanö, börö me faduhu dödöda wa lö ebua dödö zambuana ba safönu faʼomasi wameʼe Yehowa fanema li ba wangandröda, andrö wa lö mokökö-kökö ita gofu hadia lala niʼogunaʼönia ba wanema li fangandröda.—Yob. 33:13. w23.11 21 ¶6

Itutunö Yakobo si no manema eheha Lowalangi, wa niha satua-tua ”moloʼö-loʼö”. Angeragö hadia geluahania daʼö. Eluahania, moguna aoha gölöda ba no tafaʼanö ita ba woloʼö niha nifataro Yehowa. Tatu manö, lö omasi Yehowa na taʼoʼö niha sangumaʼö enaʼö tasawö goroisa Lowalangi. (Hal. 4:​18-20) Te abölö aoha khöda ba woloʼö niwaʼö Yehowa moroi ba wehede niha. Mendrua manö, Yehowa andrö zameʼe fanuturu lala soʼahonoa. (Si. 19:7) Hizaʼi, niha nibeʼe noro dödö andrö lö moʼahonoa. Hewaʼae simanö, so noro dödö nibeʼe Namada si so ba zorugo khö ndra satua, khö ndra samatörö, hegöi khö ndra satua sokubaloi. (Amd. 6:20; 1 Te. 5:12; 1 Fe. 2:​13, 14) Na taʼoʼö niwaʼöra, eluahania no taʼoʼö niwaʼö Yehowa. w23.10 6-7 ¶2-3

Sambua lala si tola tafalua ba wangaʼaroʼö famatida yaʼia daʼö na taʼangerönusi waʼabölö Yehowa. So khönia waʼabölö ba wamalua fefu hadia ia zi no ifabuʼu. Tola ifalua daʼö börö me yaʼia Lowalangi Fondrege Zabölö. (Yob. 42:2; Mrk. 10:27; Ef. 3:20) Ifaduhuʼö khö Gaberahamo hegöi Sara wa hasambalö tumbu khöra nono matua hewaʼae na no alawa ndröfira. (1 Mo. 17:​15-17) Iwaʼö göi khö Gaberahamo wa hasambalö tebeʼe danö Ganaʼana ba ngaʼötönia. Sagötö teʼosawuyu ngaʼötö Gaberahamo yaʼia daʼö iraono Gizaraʼeli ba Miserai, hulö tebai alua nifabuʼunia andrö. Hizaʼi, sindruhu-ndruhu alua daʼö. Ifatunö khö nono alawe sotöi Maria, wa hasambalö iʼadonogö Nono Lowalangi. Daʼa waʼalua zi no ifabuʼu Yehowa me hauga ribu fakhe silalö ba Kabu Edena! (1 Mo. 3:15) Na taʼangerönusi fefu zi no ifabuʼu Yehowa ba zilalö hegöi faʼaluania, tola aboto ba dödöda wa no fondrege zabölö Yehowa andrö. Buania, itugu aro wamatida ba gulidanö si bohou nifabuʼunia.—Yos. 23:14; Yes. 55:​10, 11. w23.04 28 ¶10-12

Itema li wangandrö Dawido Yehowa ba iʼefaʼö ia. (1 Sa. 19:​10, 18-20; 2 Sa. 5:​17-25) Ba faduhu göi dödöda ba daʼö. (Si. 145:18) Itaria lö tefaudu ba nitötönada wanema li nibeʼe Yehowa. No irai iʼandrö Waulo khö Lowalangi ba wangeheta abula dödönia sabua si no amaedola ’ndroi bakha ba mbotonia’. Tölu kali no iʼohe ba wangandrönia daʼö Faulo. Hadia ibeʼe wanema li Yehowa ba wangandrönia andrö? Ibeʼe, hizaʼi tenga simane nitötöna Waulo. Lö iheta gabula dödönia andrö Yehowa, hizaʼi ibeʼe khönia waʼabölö soguna khönia enaʼö lö tebulö ifosumange Yehowa si fao faʼalöfaröi. (2 Ko. 12:​7-10) Itaria, fanema li ba wangandröda lö tefaudu ba zi no tatötöna. Hizaʼi, faduhu dödöda wa abölö iʼila Yehowa lala sabölö sökhi ba wanolo yaʼita. Ba ”oya zi tola ifalua moroi ba niʼandröda hegöi si tola takhalaigö”. (Ef. 3:20) Börö daʼö, fanema li ba wangandröda te alua ia ba zi lö tadöna-döna mazui ba lala si lö niʼera-erada. w23.05 8-9 ¶4-6

Böi taböhöli woʼangerönusi mbuʼusa li Lowalangi sanandrösa ba wanusugi. Hadia mbörö? Börö me lö taʼila hadia manö dania zalua khöda. Tola manö ba zi lö tadöna-döna göna ita fökhö si möi famunuda mazui mate niha niʼomasiʼöda. (Sango. 9:11; Yak. 4:​13, 14) Tötönafö fanusugi zi tola manolo yaʼita enaʼö anau gölöda wanaögö salua andrö fefu. (1 Te. 4:13) Ifaduhuʼö ba dödöda Sura Niʼamoniʼö, wa iʼomasiʼö sibai ita Amada si so ba zorugo, ba aboto ba dödönia haniha ita. (Luk. 12:7) Börö me iʼomasiʼö sibai ita, andrö wa ibeʼe khöda ginötö enaʼö tola auri ita sagötö faʼara. Hewaʼae na mate ita, tola ifuli isusugi ba ifangawuli fefu gamuatada hegöi era-erada börö me aboto ba dödönia ita. Hadia mbörö wa tola tafaduhusi tödö dötönafö fanusugi? Börö me faduhu dödöda wa Samaʼema buʼusa li andrö, sindruhu-ndruhu omasi ia, so khönia waʼabölö, mazui tola ifalua mbuʼusa linia andrö. w23.04 8-9 ¶2-4

Falulu fohalöwö Yosefo hegöi Maria ba wondrorogö amakhaitara khö Yehowa enaʼö lö tebulö aro. Aboto ba dödöra wa moguna sibai fao ira ba wamosumange Yehowa. (Luk. 2:​22-24; 4:16) No tobali duma-duma si sökhi ira ba zi no mongambatö. Sindruhu sa, na no so khömi ndraono te abua khömi ba wangondrasi angowuloa, mazui ba wotatugöi wamalua famahaʼö ba zi sambua omo. Baero daʼö, te abua khömi wefao yaʼami si darua ba wamalua famahaʼö hegöi fangandrö. Hizaʼi törö tödömi, na fao ami ba wamosumange Yehowa, itugu ahatö ami khönia hegöi khö nawömi zamösana. Börö daʼö, miʼofönaiʼö wamosumange Yehowa ba nösi nomomi. Na so gabula dödö ba wongambatömi, te daʼö zameʼe abua khömi wefao ba wamalua famahaʼö ba zi sambua omo. Na simane daʼö zalua, mifatunöisi duho-tuho sadogo-dogo ba si möi fangomuso dödö. Tola möi fangaro gamakhaitami zamösana daʼö ba itugu terou dödömi wefao wamalua halöwö ba wamati. w23.05 22 ¶7-8

Börö me iʼataʼufi Yehowa Obadia, tobali ia niha sanörö sindruhu ba tola mufaduhusi tödö. Andrö wa ifataro ia Razo tobali samaigi-maigi halöwö ba nomo Razo. (Fareso göi Nehemia 7:2.) Baero daʼö, börö me iʼataʼufi göi Yehowa— iʼokhögö Gobadia waʼabarani sahöli-höli dödö. Moguna sibai khönia waʼabarani me luo daʼö börö me auri ia ba götö Razo Gahabi si lö sökhi. (1 Ra. 16:30) Baero daʼö, foʼomo Gahabi sotöi Izebela, samösa samosumange Baʼali. Fatuwu sibai ia khö Yehowa, irege iʼalui lala ba wangohori famosumange satulö moroi ba wamatörö Gizaraʼeli si fulu mado. Ato göi zamaʼeleʼö khö Lowalangi nibununia. (1 Ra. 18:4) Me iʼalui lala Izebela ba wamunu fefu zamaʼeleʼö khö Lowalangi, ’ibiniʼö Gobadia 100 ndra samaʼeleʼö khö Yehowa ba dögi narö hili, 50 niha ero sambua nahia, ba iʼasogö roti hegöi öra idanö’. (1 Ra. 18:​13, 14) Na iʼila daʼö Izebela, tatu ihuku mate Gobadia. Sindruhu sa, tola manö ataʼu Gobadia ba lö omasi ia mate. Hizaʼi, itehegö nosonia börö waʼomasinia khö Yehowa hegöi faʼomasinia ba niha samosumange Yehowa. w23.06 16 ¶9-10

Irugi iadaʼa, lö tebulö ibeʼe wanuturu lala Yehowa ba nono mbanuania simane nifaluania ba götö föna. Iʼogunaʼö Daromalinia hegöi Ononia, högö mbanua niha Keriso. Iʼogunaʼö göi nasa niha si tobali salahinia. Hadia dandrania? Nehegö waʼatedou salua ba gangohorita ndröfi 1800-an. Ibörögö aboto ba dödö Charles Taze Russell hegöi ira awönia wa döfi 1914 no döfi si tohude börö me moʼamakhaita ia ba Wamatörö Lowalangi. (Dan. 4:​25, 26) Tola lahalö rahu-rahu simane daʼö börö me lafahaʼö ira ba wamaʼeleʼö Zura Niʼamoniʼö ba faduhu dödöra wa hasambalö alua wamaʼeleʼö andrö. Hadia ibeʼe khöra wanuturu lala Yehowa ba wangai angetula? Tatu manö. Ngawalö zalua me döfi 1914, daʼö zamaduhuʼö wa no tohare Wamatörö Lowalangi. Alua Wasuwöta Gulidanö I, fökhö waba, duru danö hegöi faʼambö soguna. (Luk. 21:​10, 11) Ba daʼa oroma wa iʼogunaʼö Yehowa niha Keriso sadölö tödö andrö ba wanolo ono mbanuania enaʼö laʼila zindruhu. w24.02 22 ¶11

Yaʼita ono mbanua Yehowa, faduhu dödöda wa iʼomasiʼö ita Yehowa ba omasi ia na tasöndra waʼowua-wua dödö. (Rom. 8:​35-39) Faduhu göi dödöda wa hasambalö tatema mbua na taʼoʼö goi-goi Zura Niʼamoniʼö. (Yes. 48:​17, 18) Hizaʼi, hewisa na alua khöda gabula dödö si lö tadöna-döna? Duma-dumania, tola manö afatö dödöda ba nifalua nösi nomoda. Göna ita fökhö sabölö-bölö irege lö oya zi tola tafalua ba halöwö fanuriaigö. Göna ita bencana alam, mazui lafakao ita börö nifaduhusida tödö. Na alua khöda fefu daʼö, tola manö so ba wangera-ngerada, ’Hana wa tola alua khögu daʼa? Hadia zala si no ufalua? Hadia lö ifahowuʼö ndraʼo Yehowa?’ Hadia no irai örasoi zimane daʼö? Na noa, böi so khöu waʼide-ide dödö. Ato nono mbanua Lowalangi si lö faröi, no irai larasoi zimane daʼö.—Si. 22:​1, 2; Hab. 1:​2, 3. w23.04 14 ¶1-2

Ba ginötö so wondrönisi dödö ba woʼangeragö mazui ba wamalua sala, moguna taʼanemaiʼö tatimbagö daʼö börö me tola ifakiko wahuwusada khö Lowalangi. Omasi Yehowa na taʼoʼö goroisania soroi ba dödö. (Rom. 6:17) Fefu wanuturu lala hegöi oroisania, oi si sökhi khöda daʼö ba tebai tafili-fili hezo zomasi ita taʼoʼö. (Yes. 48:​17, 18; 1 Ko. 6:​9, 10) Iʼogunaʼö Afökha ngawalö wolohi hegöi faʼabasaki ba wowuwu angetulada. Omasi ia ’iʼa’ ita mazui ifakiko wahuwusada khö Yehowa. (1 Fe. 5:8) Niha Keriso me abad siföföna, lafetaʼu, laböbözi, ba labunu ira, börö me lahalö gangetula enaʼö lö faröi ira. (Hal. 5:​27, 28, 40; 7:​54-60) Irugi iadaʼa, lö iböhöli Satana ba wamakao ono mbanua Lowalangi. Ba Rusia hegöi ba soi tanö böʼö, abölö-bölö sibai wamakao nifalua ndra samadaö khö ndra Samaduhuʼö Yehowa mazui laʼogunaʼö lala böʼö ba wosuwö ira talifusöda. Baero wamakao, iʼogunaʼö ’waʼonekhe’ göi Satana.—Ef. 6:11. w23.07 15-16 ¶6-9

Me no oya öfahaʼö ndraʼugö ba zindruhu moroi ba Zura Niʼamoniʼö, itugu tedou waʼomasimö khö Yehowa. Börö me öʼomasiʼö Yehowa, terou dödöu ba wamalua si no öfahaʼö yaʼugö. Tola öhalö gangetula si sökhi ba si tefaudu moloʼö goi-goi Zura Niʼamoniʼö. Börö me omasi ndraʼugö ba wangomusoiʼö tödö Lowalangi, andrö wa öbulöʼö lala wangera-ngeramö hegöi amuatamö enaʼö itugu sökhi. Hulö simane iraono soloʼö satuania sebua faʼomasi, tola göi öʼoʼö Namada si so ba zorugo. (Ef. 5:​1, 2) Tola taʼangeragö wanofu-nofu andre: ’Hadia itugu tedou waʼomasigu khö Yehowa moroi me awena tebayagö ndraʼo idanö? Hadia itugu fakhili wangera-ngeragu hegöi amuatagu simane Yehowa, mendrua manö ba wangomasiʼö ira talifusö?’ Na tenga simane ba zilalö waʼomasimö khö Yehowa hegöi khö ndra talifusö, böi ide-ide dödömö. No irai alua daʼö ba niha Keriso me abad siföföna, ba omasi Yesu wanolo yaʼira ba ifalua göi khöda zimane daʼö. (Fam. 2:​4, 7) Aboto ba dödönia wa tola ifuli taʼokhögö waʼomasi saro khö Yehowa hegöi khö ndra talifusöda. w23.07 8 ¶2-3

No mato hauga kali ifalua zala Fetero. Si oföna, talafo faduhu dödönia khönia samösa. No irai iwaʼö wa lö faröi ia khö Yesu hewaʼae na faröi ndra sinenge tanö böʼö. (Mrk. 14:​27-29) Baero daʼö, no hauga kali mörö Wetero hewaʼae no iwaʼö khönia Yesu ba wozago yaʼia. (Mrk. 14:​32, 37-41) Aefa daʼö me tohare niha sato ba wondraʼu Yesu, moloi Wetero. (Mrk. 14:50) Ba gafuriata, tölu kali iʼosilöʼögö Yesu, irege möi ia ba hölu wa si göna fangelifi ia na falimo ia. (Mrk. 14:​66-71) Hewisa dödö Wetero me no aboto ba dödönia hawaʼebua horö si no ifalua? Afatö sibai dödönia ba iduhugö wege-ege. (Mrk. 14:72) Lö mofönu Yesu khö zi fahuwu khönia andrö börö zala nifaluania. Ba gafuriata, ifatunö khönia Yesu wa tebeʼe dania khönia noro dödö sebua. (Yoh. 21:​15-17) Sindruhu, aboto ba dödö Wetero wa no ifalua horö sebua, hizaʼi lö awuwu ia. Hadia mbörö? Börö me iʼila wa iʼomasiʼö ia Sokhö yaʼia, yaʼia daʼö Yesu. Hadia wamahaʼönia? Omasi Yehowa na tafaduhusi tödö wa iʼomasiʼö ba iʼefaʼö zalada.—Rom. 8:​38, 39. w24.03 18 ¶13-15

Amuata fohorö tola möi fangaila ba zi samösa niha, ba si lö eluaha waʼaurinia. Tola göi abeto ia ba tekiko wahuwusania ba nösi nomonia. Baero daʼö, niha samalua amuata wohorö mate ira ba wamati. Ba ato göi ba gotaluara zi göna fökhö si tola mamunu yaʼira. (Amd. 7:23) Andrö, imane ba Gamaedola 9 ayati 18, ’Ba Lewatö sabakha so dome ndra alawe si bodo andrö.’ Sindruhu sa, abölö sökhi na tatimbagö wogaoni nibeʼe ”ndra alawe si bodo”. Hizaʼi, hana wa ato niha somasi manemaʼö fogaoni nibeʼenia? (Amd. 9:​13-18) Sambua dandrawa sasese muʼogunaʼö yaʼia daʼö pornografi. So zangumaʼö, wa lö möi famaʼalara pornografi andrö. Hizaʼi sindruhunia, tenga sohare ira daʼö, möi fangekhugö tou döi, ba tola manö sandru ira. Abua ba wangeheta ngawalö gambara zohorö ba wangera-ngerada. Baero daʼö, pornografi tola ifatumbuʼö gisö-isö dödö si fasala, ba abua wangeheta yaʼia. (Kol. 3:5; Yak. 1:​14, 15) Ato niha samaigi pornografi ba gafuriata lafalua gamuata fohorö. w23.06 23 ¶10-11

Hewaʼae na itaria soi tanö böʼö laforege ba wolawa kuaso Gulidanö Inggris-Amerika, hizaʼi tebai tekalaisi ia. Hezo taʼila daʼö? ”Kara” si no amaedola famatörö Lowalangi, göna dania ia ba dete kahe andrö, yaʼia daʼö angorudua Inggris-Amerika. (Dan. 2:​34, 35, 44, 45) Hadia faduhu dödöu wa atulö wamaʼeleʼö Danieli sanandrösa ba gahe siʼöli si no faruka tambu laʼuri? Na faduhu dödöu, tola molua-lua daʼö ba lala waʼaurimö. Daʼö zanolo yaʼugö enaʼö lö öʼosambuaʼö dödömö ba wangalui harato sebua börö me öʼila wa lö ara tö tedudugö gulidanö si lö sökhi andre. (Luk. 12:​16-21; 1 Yo. 2:​15-17) Daʼö göi zanolo yaʼugö enaʼö öʼila hawaʼamoguna wamalua halöwö fanuriaigö hegöi famahaʼö. (Mat. 6:33; 28:​18-20) Na no aefa öfahaʼö ndraʼugö ba wamaʼeleʼö daʼa, sofu khöu samösa, ’Hadia oroma waʼafaduhu dödögu moroi ba gangetula nihalögu wa lö ara tö tohare Wamatörö Lowalangi ba wangohori fefu gamatöröwa niha gulidanö?’ w23.08 11 ¶13-14

Yaso khöu wangide-ngideʼö ba faduhuʼö wa so zi tebai öfalua iadaʼa börö me no atua ndraʼugö, mofökhö mazui so zalua tanö böʼö. Simane Barasilai, böi temaʼö halöwö nibeʼe khöu na lö sagu öfalua daʼö börö wökhö mazui me no atua ndraʼugö. (2 Sa. 19:​35, 36) Simane Moze, temaʼö wanolo ba beʼe noro dödö andrö ba niha böʼö. (2 Mo. 18:​21, 22) Na so khöu wangide-ngideʼö, lö öfaso ndraʼugö ba wamalua si tebai öfalua börö me möi fangawuwumö daʼö. Lö göi tawaʼö tödöda wa taʼonorogö tödö lua-lua gangetula si fasala nihalö niha böʼö. Tebai tahalö gangetula ba niha böʼö ba tebai göi talumöʼö ira ba lua-lua gangetula si fasala nihalöra. Duma-dumania, so samösa ndraono sangai angetula ba wamöhöli famosumange Yehowa. Tatu abu sibai dödö zatuara na alua daʼö. Hizaʼi, tola tobali noro sabua khö ndra satua na lawaʼö tödöra wa börö ira wa alua daʼö. Ba lö omasi Yehowa na laluʼi noro andrö. w23.08 29 ¶11-12

Simane yaʼita, lö moʼahonoa Zimesono. Daʼö mbörö wa itaria ihalö gangetula si fasala. Sambua gangetula si fasala nihalönia tobali famaʼala waʼaurinia. Lö ara me no tobali ia sanguhuku, ibörögö ’omasi ia khö zi samösa ira alawe ba Ndraso Zoreki sotöi Delila’. Ba zilalö, no famatua Zimesono khö zi samösa ndra alawe Wilisiti. Yehowa zameʼe ba dödönia enaʼö ifalua daʼö irege so ginötö khönia ba wolawa niha Wilisiti. Aefa daʼö, möi ia ba nomo ndra alawe sohorö-horö ba mbanua Gaza si so ba Wilisiti. Ba daʼö ibeʼe khönia waʼabölö Lowalangi enaʼö tola ideha fefu mbawa göli mbanua, irege aoha ba wokalaisi banua andrö. (Sangu. 14:​1-4; 16:​1-3) Hizaʼi, börö me Delila andre te moroi ba soi Gizaraʼeli, tebai iʼogunaʼö daʼö Yehowa ba wolawa niha Wilisiti. Itema gefe sebua Delila moroi ba niha Wilisiti ba wemanga mböli Zimesono. w23.09 5 ¶12-13

Tola tobali fanolo khöda waʼaboto ba dödö. Niha si so faʼaboto ba dödö, tola iforomaʼö wanaha tödö na so zanandrawaisi famatinia. Itaria, na manofu zi samösa niha khöda, sasesenia lö lafatunö khöda hadia mbörö wa labeʼe wanofu andrö. Börö daʼö, fatua lö tabeʼe wanema li, abölö sökhi na tatörö tödöda wa lö aboto sibai ba dödöda hadia gohitö dödöra. (Amd. 16:23) Angeragö hewisa Gideono ba wameʼe fanema li khö ndra niha Geferai. Mofönu ira me lasofu hadia mbörö wa lö ifaogö ira Gideono ba wamobörö me lalawa nudu ndraono Gizaraʼeli. Hizaʼi, sindruhunia hadia sibai mbörö wa mofönu ira? Tola manö börö waʼabao dödöra. Gofu hadia mbörönia, iforomaʼö waʼaboto ba dödö Gideono. Iʼameʼegö tödö hadia nirasoira ba ihaogö wameʼe khöra fanema li. Hadia mbuania? Imane Sura Niʼamoniʼö, ”Me iwaʼö wehede daʼö, alö saʼae wönura.”—Sangu. 8:​1-3. w23.09 16 ¶8-9

Yehowa hegöi Yesu no laʼokhögö wahuwusa saro simane si samösa ama khö nononia. Faduhu dödöda wa afökhö sibai dödö Yehowa me lafakao, laʼoʼaya ba lafalua zi lö atulö khö Nononia. Fefu zatua hasambalö larasoi waʼabu dödö sabölö-bölö na mate nonora. Hewaʼae mamati ita wa so wanusugi, hizaʼi hasambalö abu sibai dödöda na mate niha niʼomasiʼöda. Daʼa duma-duma sanolo yaʼita enaʼö tola takhalaigö hawaʼafökhö dödö Yehowa me iʼila tefakao Nono niʼomasiʼönia ba mate me 14 Nisana döfi 33 M. (Mat. 3:17) Iʼotarai iadaʼa ofeta dania ba ginötö wamalua Fanörö Tödö, tandraigö falua wamahaʼö samösa mazui famahaʼö ba zi sambua omo sanandrösa ba höli. Böi olifuʼö göi wamaigi video Ibadah Pagi si tohude ba ngaluo Wanörö Tödö. Na no tafaʼanö dödöda, tola tatolo niha böʼö enaʼö so mbuania khöra.—Esr. 7:10. w24.01 11 ¶10-12

Sambua lala enaʼö tatema waʼabölö moroi khö Yehowa yaʼia daʼö mangandrö ita khönia. Ibeʼe wanema li Yehowa ba wangandröda yaʼia na ibeʼe khöda ’waʼabölö sahöli-höli dödö’. (2 Ko. 4:7) Tola göi tatema waʼabölö na tabaso ba taʼangerönusi Daromali Yehowa. (Si. 86:11) Sindruhu-ndruhu mofaʼabölö Daromalinia andrö. (Heb. 4:12) Na mangandrö ndraʼugö khö Yehowa ba öbaso Daromalinia, tola ösöndra waʼabölö enaʼö anau gölömö, lö tebulö omuso dödömö ba tola öfalua halöwömö hewaʼae abua ia. Nehegö hewisa Yehowa wameʼe faʼabölö khö Yona samaʼeleʼö. Me itema Yona halöwö sabua moroi khö Yehowa, ilau moloi itörö göfa. Lua-luania, yaʼia hegöi niha si so ba göfa andrö arakhagö mate börö mbade sabölö-bölö. Me latiboʼö ia ba nasi ba itölö ia iʼa sebua, aboto ba dödönia wa so ia ba nahia sogömi-gömi safönu ametaʼuö. Hadia nifalua Yona enaʼö isöndra waʼabölö me so ia ba dalu giʼa? Ilau mangandrö khö Yehowa.—Yon. 2:​1, 2, 7. w23.10 13 ¶4-6

Sindruhu sa, mufanandrösa zura Wetero andre khö ndra niha Keriso me abad siföföna. Hizaʼi, itatugöi Yehowa enaʼö tobali faosatö ba Daromalinia zura andre irege tola tatema mbuania iadaʼa. (Rom. 15:4) Ba zi fasuida, ato sibai niha si lö faduhu tödö ba wamaʼeleʼö si so ba Zura Niʼamoniʼö. Te laʼoʼaya ita börö me no ngafulu fakhe tadöna-döna gamozua gulidanö andre. So ösa ba gotaluara zangumaʼö wa lö tohare ngaluo andrö. (2 Fe. 3:​3, 4) Na tarongo wehede simane daʼö moroi ba nösi nomoda, awöda wohalöwö mazui niha si falukha khöda ba wanuriaigö, tola awuwu wamatida. Hizaʼi, itutunö khöda Fetero hadia manö zi tola manolo yaʼita. So ösa niha sangumaʼö wa iradö-radö Yehowa ba wangohori ulidanö si lö sökhi andre. Fehede Wetero zamasugi ba dödöda wa lala wamaigi Yehowa inötö faböʼö moroi ba lala wamaigi niha. (2 Fe. 3:​8, 9) Khö Yehowa, si saribu fakhe fagölö ira zi sahari. So waʼebolo dödö khö Yehowa ba lö omasi ia na so niha nihori. Hizaʼi, na tohare dania ngaluo Yehowa, hasambalö ihori gulidanö si lö sökhi andre. w23.09 26-27 ¶2-5

Hadia mbörö wa ifaʼoheʼö zurania Faulo khö ndra niha Keriso ba Yudea? So dombua mbörö. Si oföna, ba wamarou tödöra. Ato ba gotaluara niʼebuaʼö ba agama Yahudi. Ira sondröniaʼö agama Yahudi me luo daʼö te laʼoʼaya-aya ira me tobali ira niha Keriso. Hadia mbörö? Börö me lö hadöi osali sebua me luo daʼö khö ndra niha Keriso, lö hadöi naha wanunu sumange, ba lö hadöi ere sangai halöwö khöra. Fangoʼaya simane daʼö, tola manö möi fangawuwu wamati ndra nifahaʼö Yesu ba ide-ide dödöra. (Heb. 3:​12, 14) Te so ba gotaluara zomasi mangawuli ba agama Yahudi. Si dua, omasi Waulo wamatunö khö ndra niha Keriso Heberaiʼo wa moguna laforege enaʼö aboto ba dödöra ’gö sabeʼe’, yaʼia daʼö famahaʼö si bohou mazui sabölö abakha ba Daromali Lowalangi. (Heb. 5:​11-14) Te so ba gotaluara nasa zamalua Oroisa Moze. w23.10 24-25 ¶3-4

So ösa nono alawe sangai angetula wa lö omasi ira möi nihalö. (Mat. 19:​10-12) Yafaduhu dödöu wa lö tebulö ebua mbölimö föna Yehowa hegöi Yesu hewaʼae lö sangowalu ndraʼugö. Ba zi sagörö ulidanö, ira talifusöda si lö sangowalu no tobali ira duma-duma si sökhi ba mbanua niha Keriso. Börö me laʼomasiʼö ba laʼameʼegö tödö niha böʼö, daʼö mbörö wa tobali ira talifusö ira alawe hegöi ina ba wamati khö ndra talifusö sato. (Mrk. 10:​29, 30) So ösa zangai halöwö safönu inötö. Oya zi tola lafalua ira talifusöda ira alawe ba halöwö fanuriaigö ba zi sagörö ulidanö. (Si. 68:11) Hadia no öʼera-era iʼotarai iadaʼa ba wangai halöwö safönu inötö? Tola tobali ndraʼugö perintis, sohalöwö ba konstruksi mazui ba Mbetieli. Ohe ba wangandrö gohitö dödö somasiʼö. Tutunö daʼö ba niha si no mogamö ohitö dödöra ba wamati ba alui lala hadia zinangea öfalua ba wogamö ohitö dödöu. Tatugöi hadia zinangea öfalua ba wogamö yaʼia. Na tobali ndraʼugö sangai halöwö safönu inötö, oya zi tola öfalua ba wangai halöwö khö Yehowa. w23.12 22 ¶16-17

Börö me no itugu ahatö wamakao sabölö-bölö, aboto ba dödöda wa moguna sibai tafalua halöwö fanuriaigö. Hizaʼi, te abua khöda wangosambuaʼö fangera-ngerada ba halöwö fanuriaigö na tosasa ita ba gefe mazui alua khöda wolohi. Hadia zanolo yaʼita? Böi tebulö waʼafaduhu dödöda wa fao khöda ”Yehowa samatörö saradadu zorugo”. Hasambalö itolo ita na taʼofönaiʼö wamatörönia ba waʼaurida moroi ba gohitö dödöda samösa. Börö daʼö, lö moguna ataʼu ita. (Hag. 2:4) Omasi Yehowa na taʼosambuaʼö dödöda ba halöwö fombaliʼö nifahaʼö si möi fangorifi. Ifarou nono mbanua Yehowa Hagaʼi enaʼö ifuli latohugö wamazökhi fondrasi gosali. Na lafalua daʼö, no ifabuʼu Yehowa wa hasambalö ”ibeʼe khöra howu-howu”. (Hag. 2:​18, 19) Faduhu göi dödöda wa ifahowuʼö nifaluada Yehowa na taʼofönaiʼö wamalua halöwö nibeʼenia khöda. w23.11 16 ¶8; 17 ¶11

Ifatunö Faulo ba zura nifaʼoheʼönia ba niha Roma wa dozi niha oi mamalua horö. Na simanö, hewisa wa tola iʼomusoiʼö dödö Lowalangi si samösa niha ba tefotöi ia niha satulö? Iʼogunaʼö duma-duma Gaberahamo Faulo ba wanolo niha Keriso satulö tödö enaʼö lasöndra wanema linia. Atulö Gaberahamo ba wamaigi Yehowa me toröi ia ba danö Ganaʼana. Hizaʼi, hadia atulö ia börö me moʼahonoa wamaluania Oroisa Moze? Tenga. (Rom. 4:13) Awena tebeʼe Goroisa daʼö ba ndraono Gizaraʼeli töra 400 fakhe me no aefa iwaʼö Lowalangi wa niha satulö Gaberahamo. Na simanö, hadia mbörö wa atulö Gaberahamo ba wamaigi Lowalangi? Börö me mamati Gaberahamo khö Yehowa, andrö wa iforomaʼö waʼasökhi dödönia Yehowa ba ifotöi Gaberahamo andrö niha satulö.—Rom 4:​2-4. w23.12 3 ¶4-5

Bongi daʼö fahuhuo Natano khö Razo Dawido, ifatunö Yehowa khö Natano wa tenga Dawido zamazökhi osali andrö. (1 Ng. 17:​3, 4, 11, 12) Hadia nifalua Dawido me irongo daʼö? Ifaudugö wangera-ngerania. Iʼosambuaʼö dödönia Dawido ba wangowuloi kefe hegöi gama-gama niʼogunaʼö nononia Selomo ba wamazökhi osali. (1 Ng. 29:​1-5) Me no aefa ifatunö khö Dawido wa tenga yaʼia zangehaogö osali, so sambua mbuʼusa li Yehowa khö Dawido. Ifabuʼu khönia wa so samösa moroi ba ngaʼötönia dania zamatörö irugi zi lö aetu. (2 Sa. 7:16) Ba gulidanö si bohou dania, sagötö Wamatörö si Saribu Fakhe, tatu omuso dödö Dawido me iʼila haniha Razo ba wamatörö andrö yaʼia daʼö Yesu, samösa moroi ba ngaʼötönia! Hadia wamahaʼönia? Hewaʼae na tebai tafalua hadia zomasi ita tafalua khö Yehowa, hasambalö ifahowuʼö ita ba lala tanö böʼö ba zi lö tadöna-döna. w23.04 16 ¶8-10

So ösa faosatö ba Zura Niʼamoniʼö si möi fondrara dödömö na örasoi waʼataʼu. Duma-dumania, tola ösöndra zi möi fondrara dödömö moroi ba mbuku Yobi, Sinunö, Amaedola hegöi ba wehede Yesu nisura ba Mataiʼo faza 6. Na lö öböhöli wangandrö khö Yehowa ba öbaso Daromalinia, hasambalö itolo ndraʼugö enaʼö örasoi waʼahono dödö. Faduhu dödöda wa fao khöda Yehowa ba ginötö göna ita abula dödö. Lö irai faröi ia khöda. (Si. 23:4) No ifabuʼu Yehowa wa hasambalö irorogö ita, ibeʼe waʼahono dödö, itolo ba ibeʼe khöda wondrara dödö. Ba Yesaya 26:3 imane sanandrösa khö Yehowa, ”Ölumöʼö niha sangodaligö yaʼugö; lö tebulö öbeʼe khöra waʼahono dödö, börö me faduhu dödöra khöu.” Börö daʼö, faduhusi tödö Yehowa ba ogunaʼö fefu wanolo si no ihenaigö. Na öfalua daʼö, ösöndra waʼabölö na göna ndraʼugö abula dödö. w24.01 25 ¶16-17

No alua iadaʼa zi no tefaʼeleʼö ba ayati maʼökhö andre. Alua göi iadaʼa wehede andre: ”Nifahaʼö Yehowa dania ndraonou maʼafefu, ba fahöna waʼahono dödöra. Teʼaroʼö dania wamazökhi yaʼugö ba zindruhu. . . . Lö ataʼuʼö gofu hadia ia ba lö hadöi samanizi yaʼugö, börö me lö ahatö ia khöu.” (Yes. 54:​13, 14) Satana, ”lowalangi si sagötö tanö andre”, tebai ibatogö halöwö fanuriaigö nifalua nono mbanua Yehowa. (2 Ko. 4:4) Ba daʼa taʼila wa no tebohouni wamosumange satulö ba lö irai raʼiö ia saʼae. So ia irugi zi lö aetu. Lö mofozu fefu wangöna nifazökhi ba wolawa yaʼita! w24.02 4 ¶10

Yaʼita niha Keriso, taʼameʼegö tödö sibai mbuʼusa lida khö Yehowa. Molua-lua daʼö ba gangetula hegöi nifaluada ba nösi nomoda. Taforege wamalua noro dödöda yomo ba nomo, hizaʼi lö tebulö taʼofönaiʼö gohitö dödö Yehowa moroi ba zomasi-masi nösi nomoda. (Mat. 10:​35, 36; 1 Ti. 5:8) Tobali, börö me omasi ita taʼomusoiʼö dödö Yehowa, itaria te moguna tahalö gangetula si lö fatema ba dödö nösi nomoda. Yehowa zamazökhi amakhoita ba wongambatö, ba omasi ia na tarasoi waʼomuso dödö wefao ba nösi nomoda. (Ef. 3:​14, 15) Börö daʼö, enaʼö sindruhu-ndruhu tarasoi waʼomuso dödö, moguna taʼoʼö niwaʼö Yehowa. Te abua khöu wamosumange Yehowa hegöi ba wamalua noro dödö yomo ba nomo ba wangomasiʼö, awö ba wamosumange nösi nomomö ba ginötö si fagölö. Hizaʼi, yafaduhu dödöu wa iʼameʼegö tödö Yehowa fefu wamorege nifaluamö.—Rom. 12:10. w24.02 17 ¶11; 18 ¶13