Baŵa si Öfa

So ösa genoni Yehowa ba götö Zura Niʼamoniʼö, no irai alua khöra gabula dödö si lö ladöna-döna. Samösa ba gotaluania yaʼia daʼö Yakobo. Ifarou ia amania Izaʼaki enaʼö mangowalu ia khö nono Labano, si fahatö khöra ba si sara lala wamati. Ifaduhuʼö ba dödö Yakobo Izaʼaki, wa hasambalö ifahowuʼö ia Yehowa. (1 Mo. 28:​1-4) Iʼoʼö wehedenia andrö Yakobo. Iröi Ganaʼana ba möi ia ba nomo Labano. So darua nono alawe khö Labano—Lea faoma Rakhela. Omasi Yakobo khö Rakhela, ba ilau mohalöwö khö Labano fitu fakhe waʼara enaʼö tola mangowalu ia khö Rakhela. (1 Mo. 29:18) Hizaʼi ba gafuriata, tenga simane nidöna-döna Yakobo zalua khönia. Ilimo ia Labano enaʼö mangowalu ia khö gaʼa Rakhela sotöi Lea. Itehegö Labano khö Yakobo enaʼö mangowalu ia khö Rakhela samigu aefa daʼö, hizaʼi moguna mohalöwö khönia Yakobo fitu fakhe tö. (1 Mo. 29:​26, 27) Lö tebulö ifalua zi lö atulö Labano khö Yakobo sagötö mohalöwö ia ba zi 20 fakhe faʼara!—1 Mo. 31:​41, 42. w23.04 15 ¶5

Hezo tola tasöndra wondrara dödö hegöi fanuturu lala soguna khöda? Aboto ba dödöda wa tola tasöndra daʼö moroi khö Lowalangi Yehowa na mangandrö ita khönia. Iʼandrö khöda Yehowa ba wamalua daʼö. Omasi ia na asese mangandrö ita khönia. Imane Sura Niʼamoniʼö, ”Böi miböhöli wangandrö.” (1 Te. 5:17) Tola tafaehagö nösi dödöda khönia, ba taʼandrö khönia wanuturu lala gofu hadia ia zalua khöda. (Amd. 3:​5, 6) Yehowa andrö no Lowalangi soböwö, omasi ia na asese mangandrö ita khönia. Aboto ba dödö Yesu wa ebua sibai mböli wangandrö andrö khö Yehowa. Fatua lö möi ia ba gulidanö, iʼila samösa hewisa wameʼe Yehowa fanema li ba wangandrö genoninia si lö faröi, simane Khana, Dawido, Elia, hegöi tanö böʼönia. (1 Sa. 1:​10, 11, 20; 1 Ra. 19:​4-6; Si. 32:5) Daʼö mbörö wa ifahaʼö ndra nifahaʼönia Yesu enaʼö böi laböhöli wangandrö, ba faduhu dödönia wa hasambalö latema wangandröra.—Mat. 7:​7-11. w23.05 2 ¶1, 3

Iʼataʼufi Yehowa Ere Sebua sotöi Yehoyada. Börö daʼö, lö faröi ia ba lö tebulö itolo niha ba wamalua famosumange satulö. Samuza inötö, ono Gizebela sotöi Atalia, ifadöni dadaoma ba wamatörö ba tobali ia ratu. Afaito ia ba omasi sibai ia mamatörö, irege iʼalui lala ba wamunu fefu ngaʼötö razo. Sindruhunia, yaʼira andrö maʼuwunia! (2 Ng. 22:​10, 11) Hizaʼi, foʼomo Yehoyada sotöi Yozabata, ilumöʼö samösa ngaʼötö razo yaʼia daʼö Yehoasi. Labiniʼö nono andrö ba laʼebuaʼö darua ira foʼomonia. Me lafalua daʼö, no latatugöi wa lö aetu ngaʼötö Razo Dawido. Lö faröi Yehoyada khö Yehowa ba lö göi ataʼu ia khö Gatalia. Me fitu fakhe ndröfi Yehoasi, ifuli iforomaʼö Yehoyada waʼalöfaröinia khö Yehowa. Iʼalui lala Yehoyada ba wamataro Yehoasi tobali razo, börö me yaʼia andrö ngaʼötö Dawido ba yaʼia zinangea mamatörö. Na lö mofozu niʼera-erania andrö, hasambalö mubunu Yehoyada. Hizaʼi börö wanolo moroi khö Yehowa, mofozu fefu niʼera-erania. w23.06 17 ¶12-13

Tola manö so ba wangera-ngera Razo Nebukanesa wa no tobali si faʼudu khönia Danieli, ba te möi famunu Danieli daʼö. Hizaʼi, iforomaʼö waʼabarani Danieli ba itutunö geluaha wangifi andrö. Hadia zanolo Danieli ba wangokhögö faʼabarani sandrohu faʼaurinia? Faduhu dödöda wa iʼotarai me awuyu-wuyu Danieli, no labeʼe khönia duma-duma si sökhi ira satuania. (5 Mo. 6:​6-9) Niʼila Danieli tenga ha si Fulu Oroisa, hizaʼi fefu zoʼamakhaita ba Goroisa andrö. Duma-dumania, hadia zi tola awö zi tebai laʼa iraono Gizaraʼeli. (3 Mo. 11:​4-8; Dan. 1:​8, 11-13) Ifahaʼö göi ia Danieli ba waö-waö nono mbanua Lowalangi, ba iʼila hadia lua-luania na lö laʼoʼö goi-goi Yehowa. (Dan. 9:​10, 11) Fefu zi no irai itörö Danieli sandrohu faʼaurinia, daʼö zangaʼaroʼö tödönia wa gofu hadia zalua ba waʼaurinia, lö tebulö itolo ia Yehowa hegöi ira malaʼikania sabölö.—Dan. 2:​19-24; 10:​12, 18, 19. w23.08 3 ¶5-6

Rebeka andrö ira alawe si lö faʼataʼu ba satua-tua ba wangai angetula. Iʼila hawaʼara ba hadia zinangea ifalua. (1 Mo. 24:58; 27:​5-17) Hewaʼae simanö, ifosumange niha böʼö ba so khönia woloʼö. (1 Mo. 24:​17, 18, 65) Simane Rebeka, na öʼoʼö si fao fangide-ngideʼö gamakhoita nibeʼe Yehowa, no tobali ndraʼugö duma-duma si sökhi ba mbanua niha Keriso hegöi ba nösi nomomö. Amuata sinangea laʼokhögö ira talifusöda saro ba wamati yaʼia daʼö laʼila wa so zi tebai lafalua. Duma-dumania Esitera. Yaʼia andrö ira alawe samati ba sangila wa so zi tebai ifalua. Börö daʼö lö khönia faʼasiliyawa hewaʼae no tobali ia ratu. Lö tebulö ifondrondrongo ba iʼoʼö wanuturu lala nibeʼe Morodokhai, gaʼania si fasambua ama. (Est. 2:​10, 20, 22) Simane Esitera, tola öforomaʼö wa so nola-ola zi tola öfalua yaʼia na öʼandrö wanuturu lala si sökhi ba niha böʼö ba öfalua daʼö. (Tit. 2:​3-5) So nasa nifalua Gesitera sangoromaʼö wa iʼokhögö gamuata si sökhi andrö. Hewaʼae ’no baga-baga ia ba adöni dödö niha khönia’, hizaʼi lö iʼalui lala enaʼö abölö tohude ia moroi ba niha böʼö.—Est. 2:​7, 15. w23.12 19-20 ¶6-8

Lö omasi Yehowa na lö aetu itahi-tahigö ita tödöda. Na tafaduhuʼö horö nifaluada, tafalalini gera-erada, ba tafalua wondrege zi sökhi enaʼö lö ifuli tafalua horö andrö, tola faduhu dödöda wa hasambalö iʼefaʼö horöda Yehowa. (Hal. 3:19) Na no tafalua daʼö fefu, lö omasi Yehowa na itahi-tahigö manö ita tödöda. Iʼila wa möi famaʼalada daʼö. (Si. 31:10) Na talafo taʼabusi tödö daʼö, tola manö awuwu ita ba watandrisa waʼauri andre. (2 Ko. 2:7) Na lö tebulö itahi-tahigö manö ndraʼugö tödöu, osambuaʼö dödöu ba wangefa nibeʼe Lowalangi. (Si. 130:4) Ba ginötö iʼefaʼö zala niha samalalini era-era, ifabuʼu khöra, ”Lö saʼae itörö tödögu zi no lafalua andrö.” (Yer. 31:34) Eluahania, lö saʼae itörö-törö tödö Yehowa horö nifaluada ba zilalö börö me no iʼefaʼö khöda daʼö. Böi huku ndraʼugö samösa na aheta khöu halöwö ba mbanua niha Keriso börö horö nifaluamö. Lö iʼera-era saʼae Yehowa horö si no öfalua, ba itötöna enaʼö simane daʼö göi ndraʼugö. w23.08 30 ¶14-15

Oya informasi si fasala sagötö pandemi COVID-19. Lua-luania, ato niha saombö tödö. Hizaʼi, börö me lafondrondrongo wanuturu lala moroi ba organisasi, tola lasöndra waʼahono dödö ira Samaduhuʼö Yehowa. (Mat. 24:45) Moguna taʼosambuaʼö dödöda ba ngawalö ”hadia zabölö moguna”. (Fil. 1:​9, 10) Oya ngawalö zi tola mangohorigö inötö hegöi faʼabölöda. Duma-dumania, tola mangoloi dödöda na talafo taʼosambuaʼö wangera-ngerada ba nifaluada sero maʼökhö, simane femanga, famadu idanö, fanörö-nörö hegöi fohalöwö. (Luk. 21:​34, 35) Baero daʼö, asese tarongo duria sanandrösa ba sosial hegöi politik. Böi tatehegö mangoloi dödöda ba daʼö, mazui ibörögö tumbu ba dödöda hegöi fangera-ngerada ba wotuhini fazamösa ba gotaluara. Ngawalö lala niʼogunaʼö Zatana ba wowuwu angetulada ba wamalua satulö. w23.07 16-17 ¶12-13

Tohude sibai ba wamaigi ndra Samaduhuʼö Yehowa ngaluo Wanörö Tödö faʼamate Yesu nifalua ero röfi. Ha daʼa ngaluo niwaʼö Yesu enaʼö latörö tödö ira nifahaʼönia. (Luk. 22:​19, 20) Daʼö göi zamasugi ba dödöda hewisa wangoromaʼöda fangandrö saohagölö ba höli nibeʼe Yesu. (2 Ko. 5:​14, 15) Ba daʼö, tola ”tafarou dödö” ndra talifusöda. (Rom. 1:12) Ato zangondrasi somasi mamahaʼö yaʼira ba Zura Niʼamoniʼö, börö me adöni dödöra ba zi no laʼila mazui si no larongo. Tabalo-baloi ngaluo Wanörö Tödö börö me taʼila wa ba ngaluo daʼö teʼosambuaʼö ita khö ndra talifusöda ba zi sagörö ulidanö. Daʼö mbörö wa tohude sibai ba dödöda ngaluo Wanörö Tödö andre! w24.01 8 ¶1-3

Na itugu taʼangerönusi hawaʼebua mböli höli nibuʼa Yehowa hegöi Yesu, itugu aboto ba dödöda hawaʼebua waʼomasira khöda ero zamösana. (Gal. 2:20) Itehegö Nononia andrö tefakao ba mate salahida! Ba daʼa taʼila wa mubeʼe höli andrö tenga ha ba woloʼö niʼandrö ba goroisa, hizaʼi daʼö mbuala sabölö ebua nibeʼe Yehowa börö waʼomasinia ita. Tenga ha asala iʼomasiʼö ita Yehowa, hizaʼi iforomaʼö göi hawaʼebua waʼomasinia andrö khöda. (Yer. 31:3) Idöni ita Yehowa tobali tana khönia börö me iʼomasiʼö ita. (Faigi göi 5 Mo. 7:​7, 8.) Lö si tola mamabali yaʼita moroi ba waʼomasinia andrö. (Rom. 8:​38, 39) Hewisa dödömö ba waʼomasi niforomaʼönia andrö? w24.01 28 ¶10-11

Omuso sibai dödö niha nibayoini ba wanötönara ba zorugo. Samösa dalifusöda nibayoini sotöi Frederick Franz, imane me döfi 1991, ”Hasambalö alua dötönaföma, ba fefu ndraʼaga si farahu ba gotalua zi 144.000 niha, hasambalö matema nifabuʼu Lowalangi, töra moroi ba zi no makhalaigö.” Imane talifusöda Franz, ”Lö tebulö ebua sibai mböli dötönafö andrö ba dödöma. . . . Itugu ara mabaloi ba itugu ebua mbölinia bakha ba dödöma. No sinangea mabaloi daʼö . . . Itugu ebua mböli dötönafö andrö ba dödögu töra moroi ba zilalö.” He ba zorugo mazui ba gulidanö so dötönaföda, fefu daʼö oi sahöli-höli dödö ba sameʼe khöda faʼomuso dödö. Hewisa enaʼö itugu aro dötönaföda andrö? w23.12 9 ¶6; 10 ¶8

Tanö baero mbawandruhö weʼamöi bakha ba nose Lowalangi, so ba daʼö naha wanunu sumange nifazökhi moroi ba tembaga, laʼogunaʼö ia ba wameʼe sumange nitunu khö Yehowa. (2 Mo. 27:​1, 2; 40:29) Hizaʼi, sumange daʼö lö afönu wangehetania horöra. (Heb. 10:​1-3) Urifö nitunu si tobali sumange si lö tebulö labeʼe ba nose Lowalangi, ha lumö-lumö ba zumange si ha sambua si tola mangeheta horö niha gulidanö maʼafefu. Aboto ba dödö Yesu wa ifatenge ia Yehowa ba gulidanö ba wameʼe nosonia tobali höli ba niha gulidanö. (Mat. 20:28) Börö daʼö, me tebayagö ia idanö, no iforomaʼö wa omasi ia ifalua gohitö dödö Yehowa. (Yoh. 6:38; Gal. 1:4) Ibeʼe sumange waʼaurinia Yesu, ”sakali irugi zi lö aetu” irege sindruhu-ndruhu teʼefaʼö fefu horö niha samati khö Keriso.—Heb. 10:​5-7, 10. w23.10 26 ¶10-11

Na taʼodaligö waʼabölöda samösa, tebai tahöli ita moroi ba horö hegöi faʼamate. (Si. 49:​7, 8) Börö daʼö, itehegö Nono niʼomasiʼönia Yehowa ba wameʼe nosonia ba wangöhöli yaʼita. Daʼö mbuala fondrege zebua nibeʼe Yehowa hegöi Yesu. Na lö tebulö taʼangerönusi daʼö, tatu itugu tedou wangandröda saohagölö ba höli si no labeʼe. Me ifalua zala Adamo, no itayaigö waʼauri si lö aetu khönia samösa hegöi ba ngaʼötönia. Enaʼö tefangawuli fefu zi no itayaigö Adamo, daʼö mbörö wa itehegö waʼaurinia soʼahonoa Yesu tobali höli. Sagötö faʼauri Yesu ba gulidanö, ”lö nifaluania horö ba lö irai falimo ia”. (1 Fe. 2:22) Me mate Yesu, ibeʼe mbotonia soʼahonoa tobali sumange, fagölö simane faʼauri nitayaigö Gadamo.—1 Ko. 15:45; 1 Ti. 2:6. w24.01 10 ¶5-6

Me no aefa tesusugi Yesu, möi ia ba Nahia Wondrege Niʼamoniʼö ba gosali wamati. No taʼila hewisa gamakhoita wamosumange Lowalangi ba götö föna hegöi amakhoita nibeʼe Yehowa ba wamosumange satulö iadaʼa, si teʼodane-dane ba höli ba nidöniaʼö Yesu Keriso si tobali Ere Sebua. Ba daʼa taʼila wa abölö sökhi lala wamosumange nifalua niha Keriso iadaʼa moroi ba götö föna. Ere sebua ba ndraono Gizaraʼeli, möi ia ba Nahia Wondrege Niʼamoniʼö nifazökhi danga niha ba iʼohe ndro gurifö si tobali sumange. Hizaʼi Yesu, ”möi ia ba zorugo”, nahia wondrege niʼamoniʼö ba wangondrasi Yehowa. Ba daʼö ’ibeʼe waʼaurinia soʼahonoa tobali sumange ba wangeheta horöda’. (Heb. 9:​24-26) Hewaʼae ba zorugo so dötönaföda mazui ba gulidanö, fefu ita tola tafosumange Yehowa ba gosali wamati khönia. w23.10 28 ¶13-14

Angeragö göi hadia nifalua Yesu ba zorugo si tobali Razo ba Ere Sebua sangila falömoʼahonoada. Tola mangandrö ita ba döinia gofu hawaʼara manö, amaedola zi no ’taʼondrasi dadaoma Lowalangi sangoromaʼö faʼasökhi dödö sebua’ börö me tola taʼandrö khönia waʼahakhö dödö hegöi fanolo ba ”ginötö si tefaudu”. (Heb. 4:​14, 15) Böi tehegö numalö zi maʼö-maʼökhö na lö taʼangerönusi nifalua Yehowa hegöi Yesu ba hadia nasa nifaluara khöda iadaʼa. Na tafalua daʼö, itugu ebua wangandröda saohagölö ba waʼomasi si no laforomaʼö ba itugu terou dödöda ba wamosumange Yehowa. (2 Ko. 5:​14, 15) Hadia zinangea tafalua ba wangoromaʼö fangandrö saohagölö? Taforege wanolo niha enaʼö tobali ira Samaduhuʼö Yehowa ba tobali ira göi nifahaʼö Yesu. (Mat. 28:​19, 20) Daʼö nifalua Waulo ba wangoromaʼö fangandrö saohagölö. Aboto ba dödönia wa omasi Yehowa na ”teʼorifi fefu niha ba lasöndra waʼaboto ba dödö si tefaudu sanandrösa ba zindruhu”.—1 Ti. 2:​3, 4. w23.10 22 ¶13-14

Ba ginötö manuriaigö, asese sibai taʼogunaʼö ayati si möi fondrara dödö andre ba wangoromaʼö hewisa sibai dania waʼaurida ba gulidanö Faradaiso. Börö daʼö, hewisa lalada enaʼö tola faduhu dödö niha böʼö hegöi yaʼita samösa wa hasambalö alua ngawalö nisura ba Wamaʼeleʼö 21:​3, 4? Me no ibeʼe khöda mbuʼusa li si möi fondrara dödö andrö, ibeʼe göi khöda dane-dane saro Yehowa hadia mbörö wa tola tafaduhusi tödö mbuʼusa linia andrö. Ba dohu-tohu ayati moroi ba Wamaʼeleʼö faza 21, taʼila dania hana wa tafaduhusi tödö mbuʼusa li Yehowa sanandrösa ba Waradaiso. Imane ayati daʼö, ”Imane si dadao ba dadaoma andrö, ’Hiza! Ubohouni fefu hadia ia.’ Imane nasa, ’Sura daʼa börö me atulö ba tola mufaduhusi tödö wehede andre.’ Aefa daʼö imane khögu, ’No numalö fefu daʼö! Alafa ndraʼo ba Omega, böröta ba amozua.’”—Fam. 21:​5, 6a. w23.11 3 ¶3-5

Oroma wa iʼokhögö wangera-ngera si sökhi talifusöda ono matua moroi ba lagu wonukha mazui gaya mbunia. Sasesenia, niha samazökhi hegöi sohöni-höni lagu wonukha si bohou, lö lafosumange Yehowa ba lasawö goi-goi sanandrösa ba gamuata. Börö daʼö, nukha nifazökhira si toʼölönia no fandroli-ndroli mazui hulö nukha ndra alawe. Ba ginötö ifili nukha niʼogunaʼönia si samösa ono matua somasi tobali niha Keriso saro ba wamati, moguna iʼalui goi-goi Zura Niʼamoniʼö ba iʼoʼö duma-duma si sökhi ba mbanua niha Keriso. Tola isofu khönia samösa, ’Moroi ba nifiligu andre, hadia oroma wa uʼokhögö wangera-ngera si sökhi ba uʼangeragö nirasoi niha böʼö? Moroi ba lagu wonukhagu, hadia laʼila niha wa yaʼodo andre samosumange Lowalangi?’ (1 Ko. 10:​31-33) Ono matua sangokhögö fangera-ngera si sökhi, hasambalö lafosumange ia ira talifusöda ba omuso dödö Namania si so ba zorugo khönia. w23.12 26 ¶7

Ba zilalö, ”razo tanö raya” lafakao nono mbanua Yehowa. (Dan. 11:40) Duma-dumania, sagötö Wasuwöta Gulidanö I hegöi Fasuwöta Gulidanö II, ato ndra talifusöda nikuru börö me lö omasi ira fao ba wasuwöta, ba so ösa ndraono ndra Samaduhuʼö Yehowa niʼefasi moroi ba zekola börö me lö labeʼe yawa dangara ba mandrera. Sagötö zi hauga fakhe barö-barö daʼa, oya lala nifalua razo tanö raya ba wamakao ono mbanua Yehowa si lö faröi. Duma-dumania, sagötö pemilu, tetandraigö wamati niha Keriso ba wotuhini fazambua partai politik mazui niha sedöna mamatörö. Hewaʼae lö mamili ira, hizaʼi tola manö ebua zambuana dödöra. Börö daʼö, enaʼö lö ebua dödö zambuana ita, moguna taʼangenanöi hadia nifaluada, nirasoida hegöi niʼera-erada!—Yoh. 15:​18, 19. w23.08 12 ¶17

Sagötö fagohi ita ba wogamö faʼauri, moguna ’taforege wagohisa enaʼö tatema mbuala andrö’. (1 Ko. 9:24) Iwaʼö Yesu enaʼö ”böi tobali noro dödö sabua [khöda] wemanga-manga, famadu-madu, ba faʼaombö dödö ba waʼauri”. (Luk. 21:34) Ayati daʼa hegöi ayati tanö böʼö möi fanolomö ba wangila hadia manö zinangea öbulöʼö ba wagohisa wogamö faʼauri. Faduhu dödöda wa tola möna ita ba wagohisa wogamö faʼauri börö me hasambalö iʼabölöʼö ita Yehowa. (Yes. 40:​29-31) Börö daʼö, böi awuwu ndraʼugö! Oʼö zinenge sotöi Faulo si no mamorege ba wagohisa wogamö buala si no tehenaigö fönania. (Fil. 3:​13, 14) Sindruhu sa, lö hadöi niha si fagohi salahimö, hizaʼi tola mofozu ndraʼugö börö wanolo moroi khö Yehowa. Itolo ndraʼugö ba woluʼi noro sinangea öʼohe hegöi ba wotouʼö tou noro si lö moguna. Börö me ituhini ndraʼugö Yehowa, tola anau gölöu ba möna ndraʼugö ba wagohisa andre! w23.08 31 ¶16-17

Me 12 fakhe ndröfi Yesu, no laröi ia ira satuania ba Yeruzalema. (Luk. 2: 46-52) Sindruhunia, noro dödö Yosefo hegöi Maria ba wotatugöi wa so fefu ndraonora ba gotalua niha sangawuli moroi ba wamalua owasa me luo daʼö. Ba gafuriata me no lasöndra Yesu, fatahi khönia Maria! Tola manö molawa Yesu me luo daʼö. Hizaʼi, ihaogö wanema li ndra satuania ba ifosumange ira. ’Lö aboto ba dödö Yosefo hegöi Maria hadia geluaha wehede Yesu andrö.’ Hewaʼae simanö, ’lö tebulö iʼoʼö hadia niwaʼöra’ Yesu. Yaʼami si bohou ebua, hadia no irai mirasoi wa abua khömi ba woloʼö niwaʼö zatuami mazui lö aboto ba dödöra hadia zomasi ami? Hadia zanolo yaʼugö? Angeragö hewisa dödö Yehowa. Iwaʼö Sura Niʼamoniʼö, na miʼoʼö li zatuami ”daʼö zomasi Zoʼaya”. (Kol. 3:20) Aboto ba dödö Yehowa wa lö ahori laʼila ira satuami fefu zomasi-masi dödömi mazui itaria labeʼe gamakhoita sabua khömi foloʼö. Hizaʼi na mihalö gangetula ba woloʼö niwaʼöra, no miʼomusoiʼö dödö Yehowa. w23.10 7 ¶5-6

Na so nawöda sekola zangumaʼö wa moguna labulöʼö lala wangera-ngerara ira Samaduhuʼö Yehowa sanandrösa ba homoseks, mazui faʼorudu ndra matua ba ndra matua hegöi ira alawe ba ndra alawe. Moguna taʼalui lala enaʼö faduhu dödönia wa taʼameʼegö tödö fefu niha ba tafosumange gangetula nihalöra. (1 Fe. 2:17) Aefa daʼö, tafatunö khönia hadia goi-goi Zura Niʼamoniʼö sanandrösa ba gamuata ba hadia gunania na ifalua daʼö. Na lö fatema ba dödö zi samösa niha hadia nifaduhusida tödö, böi tawaʼö tödöda wa no taʼila hadia nifaduhusinia tödö. Duma-dumania, na so nawöda sekola sangoʼaya yaʼita börö me faduhu dödöda wa so Lowalangi, hadia daʼö geluahania wa faduhu sibai dödönia ba teori evolusi ba ahori iʼila sanandrösa ba daʼö? Lö tatu. Tola manö, lö irai ihaogö woʼangeragö daʼö. Moroi na fabuʼa-buʼa ita khönia sanandrösa ba evolusi, abölö sökhi na tabeʼe khönia wanuturu lala si tola iʼangeragö. Tola öfarou dödönia ba wamaigi artikel mazui video si so ba jw.org soʼamakhaita ba womböwöi. Tola manö adöni dödönia ba wanutunö sambua artikel mazui video si so ba daʼö. Na taʼameʼegö tödö mbua gera-erara, tola manö terou dödöra ba wamahaʼö yaʼira ba Zura Niʼamoniʼö. w23.09 17 ¶12-13

Faduhu dödöda wa lö tebulö iʼogunaʼö ba ifahowuʼö ita Yehowa hewaʼae no irai tafalua zala. Hizaʼi, iʼandrö khöda enaʼö taforege ba wombulöʼö amuatada ba lö tebulö taʼodaligö ia. (Amd 28:13) Simesono andrö tenga niha soʼahonoa, hizaʼi lö iböhöli wamosumange Yehowa, mendrua manö me no aefa ifalua zala soʼamakhaita khö Delila. Ba lö göi tebulö iʼogunaʼö ia Yehowa ba lala sahöli-höli dödö. Ifaduhuʼö Yehowa wa Simesono andrö ira matua samati, ba tefarahu ia ba gotalua ndra matua samati nitutunö ba Heberaiʼo faza 11. Tatu tefarou sibai dödöda börö me taʼila wa tafosumange Namada safönu faʼomasi si so ba zorugo somasi manolo yaʼita, mendrua manö ba ginötö alua khöda gabula dödö! Börö daʼö, simane nifalua Zimesono, dataʼandrö khö Yehowa, ”Törö tödöu ndraʼo ba beʼe khögu waʼabölö.”—Sangu. 16:28. w23.09 7 ¶18-19

Börö me taʼila wa no ahatö ngaluo Yehowa, tefarou dödöda ba wanuriaigö turia somuso dödö ba niha böʼö. Hizaʼi, itaria ataʼu ita wamalua daʼö. Hadia mbörö? Tola manö aombö dödöda ba lala wanemaʼö niha turia nifaʼemada. Daʼö zalua khö Wetero. Ba mbongi me muʼetuʼö hukuma Yesu, lö barani Wetero ba wamaduhuʼö wa yaʼia andrö soloʼö khö Yesu ba mato hauga kali iʼosilöʼögö Yesu. (Mat. 26:​69-75) Hizaʼi ba gafuriata, si fao faʼafaduhu dödö imane Fetero, ”Böi miʼataʼufi na so zataʼu niha ba böi aombö dödömi.” (1 Fe. 3:14) Fehede Wetero andrö zamaduhuʼö ba dödöda wa tola talawa waʼataʼuda ba niha. Hewisa wolawada faʼataʼu ba niha? Imane Fetero, ”Mifaduhuʼö ba dödömi wa Keriso andrö Soʼaya.” (1 Fe. 3:15) Eluahania, moguna taʼangerönusi dadaoma hegöi kuaso niʼokhögö Razo hegöi Soʼaya yaʼita Keriso Yesu. w23.09 27 ¶6-8

Böi tebulö taforege enaʼö lö aekhu ita ba dandrawa ”ba wamalua amuata waʼogömi-gömi andrö”. (Ef. 5:11) Niha samaigi, samondrondrongo mazui samadunö-dunö ngawalö zi raʼiö mazui soʼamakhaita ba wohorö, aoha sibai tedönisi dödönia wamalua horö. (1 Mo. 3:6; Yak. 1:​14, 15) Iforege ulidanö Satana ba wolimo yaʼita, enaʼö faduhu dödöda wa lö atulö fefu niwaʼö Yehowa sanandrösa ba gamuata si raʼiö hegöi fohorö. (2 Fe. 2:19) Lö tokea ita ba daʼö! Lö tebulö iʼalui lala Afökha ba wamaelungu niha irege lö laʼila hezo zatulö hegöi si fasala. (Yes. 5:20; 2 Ko. 4:4) Oya sibai film, acara TV, hegöi nisura ba web, samarou niha sato ba wolawa goi-goi Yehowa satulö! Omasi Zatana na so ba wangera-ngerada wa fefu gamuata si raʼiö hegöi lagu waʼauri safönu amuata fohorö, no si toʼölö manö daʼö, ha si möi fangomuso dödö ba lö salania na tafalua.—Ef. 5:6. w24.03 22 ¶8-10

Ose Lowalangi andrö sambua tomosa simane ose si tola mududugö ba mufaʼanö mangawuli niʼohe-ohe ndraono Gizaraʼeli na awuʼa ira. Arakhagö 500 fakhe laʼogunaʼö nose Lowalangi andre irege lafazökhi gosali Lowalangi ba Yeruzalema. (2 Mo. 25:​8, 9; 4 Mo. 9:22) Laʼogunaʼö nose Lowalangi andrö iraono Gizaraʼeli ba wamosumange Lowalangi hegöi ba wanunu sumange. (2 Mo. 29:​43-46) Hizaʼi, so göi geluahania sabölö sökhi. Yaʼia daʼö ”lumö-lumö moroi ba ngawalö zi so ba zorugo”. Eluahania, osali ba wamati solakhömi khö Yehowa. Itutunö Faulo wa ”ose andrö ha duma-duma ba ginötöda iadaʼa”. (Heb. 9:9) Na simanö, no so gosali wamati andrö me ifaʼoheʼö zurania Faulo khö ndra niha Heberaiʼo. No so ia iʼotarai me döfi 29 M me tebayagö idanö Yesu, tebayoini ia eheha niʼamoniʼö ba ibörögö mangai halöwö ia tobali ’ere sebua salawa’ ba gosali wamati khö Yehowa.—Heb. 4:14; Hal. 10:​37, 38. w23.10 25-26 ¶6-7

Enaʼö lö tebulö aro ita ba wamati moguna taʼokhögö gamuata faʼalöfatandro. Hewisa lalania? Lö fatandro ita na tafaudugö waʼaurida ba ginötö so waʼatebulö ba taʼameʼegö tödö lala wangera-ngera hegöi angetula niha böʼö. Börö me ono mbanua Yehowa ita, lö omasi ita fatandro. Omasi göi ita ba wangokhögö amuata fangide-ngideʼö hegöi faʼahakhö dödö. Yehowa andrö lafotöi ia ”Gowe Saro” börö me aro ia ba lö mangiwa. (5 Mo. 32:4) Hizaʼi, lö fatandro ia. Hewaʼae oya waʼatebulö salua ba gulidanö, so göi wombulöʼö nifalua Lowalangi enaʼö alua gohitö dödönia. Ifazökhi niha Yehowa si fakhili-khili khönia. Daʼö mbörö wa so khöda waʼabölö ba wamaudugö faʼaurida na so waʼatebulö. Ibeʼe khöda goi-goi ba Zura Niʼamoniʼö si tola manolo yaʼita ba wangai angetula si sökhi gofu hadia ia waʼabasaki nitaögöda. Duma-duma Yehowa hegöi goi-goi nibeʼenia, daʼö zangoromaʼö wa lö fatandro ia hewaʼae na yaʼia andrö ”Gowe Saro”. w23.07 20 ¶1-3

Ba Zura Niʼamoniʼö, ifagölösi ia Yehowa simane ina safönu faʼomasi. (Yes. 66:​12, 13) Khalaigö zi samösa ina sondrorogö ononia side-ide si fao faʼomasi, na meʼe mazui mofökhö nononia ba ihaogö wondrorogö. Simane daʼö göi na göna ita abula dödö, faduhu dödöda wa itolo ita Yehowa börö me iʼomasiʼö ita. Lö tebulö iʼomasiʼö ita hewaʼae tafalua zala. (Si. 103:8) Asese sibai laʼafökhöiʼö dödö Yehowa iraono Gizaraʼeli. Hizaʼi, na lafalalini gera-erara ba laböhöli wamalua amuata si lö sökhi andrö, ifaduhuʼö khöra wa lö mamalö-malö iʼomasiʼö ira. Duma-dumania, imane khöra, ”Ebua mböliu fönagu, uʼalawaʼö ba uʼomasiʼö ndraʼugö.” (Yes. 43:​4, 5) Lö irai tebulö waʼomasi Lowalangi irugi iadaʼa. Tola tafaduhusi tödö daʼö. Hewaʼae no tafalua zala sebua, lö iröi ita Yehowa. Na tafalalini gera-erada ba tafuli ita khö Yehowa, tola taʼila wa lö tebulö iʼomasiʼö ita. Ifabuʼu wa hasambalö ”ibeʼe wangefa soroi ba dödö”. (Yes. 55:7) Buania, tola tarasoi ’waʼohahau dödö nibeʼe Yehowa’.—Hal. 3:19. w24.01 27 ¶4-5

Tola itolo ita Yehowa na alua khöda gabula dödö. Duma-dumania, na taʼandrö cuti khö gafaloda wohalöwö enaʼö tola möi ita ba kebaktian mazui enaʼö itehegö tafaböʼöni ginötöda wohalöwö enaʼö tola taʼondrasi gangowuloa, daʼö ginötönia khöda ba wangiʼila faʼabölö danga Yehowa ba waʼaurida. Tola manö abölö sökhi mbuania moroi ba nitötönada irege tedou waʼafaduhu dödöda khö Yehowa. Si fao fangide-ngideʼö mangandrö Gesera khö Yehowa. Ero irasoi waʼaombö dödö ba wamalua halöwönia, si fao fangide-ngideʼö mangandrö Gesera khö Yehowa. (Esr. 8:​21-23; 9:​3-5) Nifalua Gesera andrö tobali famarou dödö niha böʼö si so ba zi fasuinia ba wanolo yaʼia ba laʼoʼö göi wamatinia. (Esr. 10:​1-4) Ero na ihawui ita faʼaombö dödö ba wangalui soguna mazui faʼauri nösi nomoda, sökhi na tatouʼö daʼö ba danga Yehowa si fao faʼafaduhu dödö. w23.11 17-18 ¶15-17

Lö niwaʼö Yehowa enaʼö tafalua simane sibai nifalua Gaberahamo enaʼö tefotöi ita niha satulö. Sindruhunia, oya sibai zi tola tafalua ba wangoromaʼö famatida. Duma-dumania, tola tatemaʼö ndra talifusöda mazui niha sawena möi ba gangowuloa, tatolo ndra talifusöda soʼamböta, ba tafalua göi zi sökhi ba nösi nomoda börö me fefu daʼö möi fangomuso dödö Lowalangi ba ifahowuʼö ita. (Rom. 15:7; 1 Ti. 5:​4, 8; 1 Yo. 3:18) Sambua lala si tohude sangoromaʼö wa mamati ita yaʼia daʼö na owölö-ölö ita ba wanuriaigö turia somuso dödö. (1 Ti. 4:16) Na mamati ita wa hasambalö ifalua fefu mbuʼusa linia Yehowa ba faduhu dödöda wa fanuturu lala nibeʼenia zabölö sökhi, moguna taforomaʼö daʼö ba gamuatada. Na tafalua daʼö, faduhu dödöda wa tola atulö ita föna Lowalangi ba ifotöi ita si fahuwu khönia. w23.12 3 ¶3; 6 ¶15

Ifaʼema wehede daʼö Razo Dawido khö Zelomo me lö ara tö mate ia. (1 Ra. 2:​1, 3) Fefu ndra talifusöda ira matua iadaʼa, moguna laforege ba wamalua mene-mene daʼö. Enaʼö tola mofozu ira, lö tola löʼö lafahaʼö ira ba woloʼö oroisa Lowalangi ba lafalua goi-goi Zura Niʼamoniʼö ba waʼaurira. (Luk. 2:52) Hana wa moguna laforege ira talifusöda ono matua enaʼö tobali ira niha Keriso saro ba wamati? Oya noro dödö nitema ndra talifusöda ira matua, he yomo ba nomo mazui ba mbanua niha Keriso. Yaʼami ira talifusöma ono matua, tatu no irai göi miʼangeragö sanandrösa ba noro dödö niʼokhögömi ba zi so miföna. Tola manö omasiʼö mangai halöwö safönu inötö, tobali enoni mazui satua sokubaloi. Mazui te omasiʼö mangowalu ba so nonomö. (Ef. 6:4; 1 Ti. 3:1) Enaʼö tola mofozu ndraʼugö ba wogamö ohitö dödö daʼö, moguna tobali ndraʼugö niha Keriso saro ba wamati. w23.12 24 ¶1-2

No mufaduhusi tödö ndra satua sokubaloi ba wondrorogö biri-biri Yehowa sebua böli. Laʼameʼegö tödö sibai döi si sökhi andrö ba wondrorogö ira talifusöra, ba laforege sibai enaʼö tobali ira kubalo si sökhi. (Yer. 23:4; 1 Fe. 5:2) Taʼandrö sibai saohagölö me taʼokhögö ndra talifusö simane daʼö ba mbanua niha Keriso si so yaʼita! Tola lahalö wamahaʼö ira satua sokubaloi moroi ba duma-duma zanguhuku sotöi Gideono. (Heb. 6:12) Labeʼe khönia noro dödö ba wondrorogö hegöi ba wokubaloi ono mbanua Lowalangi. (Sangu. 2:16; 1 Ng. 17:6) Simane Gideono, lafataro göi ndra satua sokubaloi ba wondrorogö ono mbanua Lowalangi ba mbaŵa sabua fanaögö andre. (Hal. 20:28; 2 Ti. 3:1) Tola tafahaʼö ita ba duma-duma Gideono si lö fayawa, sangokhögö fangide-ngideʼö ba lö tebulö moloʼö. Lö faröi ia ba halöwönia hewaʼae na abua daʼö. He na satua sokubaloi ita mazui tenga, moguna itugu tafosumange ndra satua sokubaloi. Tatuhini ira börö me no labeʼe khöra noro dödö ba wondrorogö yaʼita.—Heb. 13:17. w23.06 2 ¶1, 3