Faʼaombö-aombö Dödö Ba Gefe

”Me itugu lö moʼösi gefe ba mbanuama, tedou mböli zoguna ba ha fataria so gö,” nitutunö Paul, si darua iraono. ”Me möido mowöli gö, ato sibai niha so wöli irege lö irugi ndraʼo. Börö waʼolofo, ato niha safuo ba mate zagötö. Böli zoguna itugu tedou. Afuriatania, lö ösi-ösi gefe saʼae. Ahori fefu gefegu ba bank, asuransi ba gazi fasiu.”

Aboto ba dödö Paul, enaʼö tola lataögö gabula dödö salua andre, moguna so ”waʼaboto ba dödö.” (Gamaedola 3:21) Imane Paul, ”Yaʼodo so halöwö ba listrik, hizaʼi, uhalö halöwö tanö böʼö nasa hewaʼae no ide-ide gazi. So zameʼe khögu gö mazui soguna ba nomo, si tobali gazigu. Na labeʼe khögu öfa ngawua sabu, maʼogunaʼö zi dombua ba ufamawa zi törania. Börö daʼö, uʼöli khögu 40 ngawua nono manu. Me no egebua, ufamawa ba ufuli uʼöli töra 300 ngawua. Aefa daʼö, ubeʼe 50 ngawua manu enaʼö lagati khögu dombua goni böra si 50 kg. Daʼö mbörö wa tola ubönökhi zoguna ba nösi nomogu hegöi ira talifusögu.”

Aboto ba dödö Paul wa daʼö zabölö moguna faʼafaduhu dödö khö Yehowa. Na tafalua zomasi Lowalangi, hasambalö itolo ita. Sanandrösa ba wangalui soguna, imane Yesu, ”Böi fawuka dödömi; ba . . . Amami andrö, ba no iʼila, wa soguna khömi daʼö.”​—Luka 12:29-31.

Si faʼudu khö Yehowa sotöi Afökha iʼalui sibai lala enaʼö arörö niha gulidanö ba wangalui kefe. Labusi dödöra ba zoguna, ba laʼodödögö sibai wangalui gisö-isö dödöra irege ato niha soʼömö. Si ndruhu niwaʼö ba zura, ”Samalali anaʼa, ba tobali sawuyu zameʼe nifalali.”​—Gamaedola 22:7.

So niha sangai angetula si lö sökhi. Imane Paul, ”Ato niha zondröi ösi nomonia ba fao khö nawönia wangalui halöwö ba soi böʼö. So ösa zi lö hadöi sura-sura ba lua-luania lö lasöndra halöwöra. Asese labiniʼö ira khö ndra folisi ba lalau mörö ba zinga lala. Hizaʼi, yaʼaga si sambua omo maʼodaligö Lowalangi ba wanaögö abula dödö.”

TAʼOʼÖ WANUTURU LALA NIBEʼE YESU

Itohugö wangumaʼö Paul, ”Simane niwaʼö Yesu, ’Böi miʼabusi tödö zoguna mahemolu, mahemolu tesöndra lala zabu dödö mahemolu. Noa manö wamakao zi sara-sara ngaluo.’ Mangandrö ndraʼo ero maʼökhö khö Lowalangi enaʼö ’Öma sirugi maʼökhö beʼe khöma maʼökhö andre.’ Itolo ndraʼaga simane niwaʼö Yesu. Hizaʼi, lö fefu wangandröma izumaigö so. Me möi ndraʼo mowöli gö, awai zi so ha sambua ngawalö, ba ö daʼö lö omasido uʼa. Hewaʼae simane daʼö, uhalö manö, ba maʼa bongi daʼö. Maʼandrö saohagölö khö Lowalangi me itolo ndraʼaga me lö irai möröga ba wa olofo.”a

”Si ndruhunia, na göna khöma gabula dödö, abua wanaögö yaʼia. Hizaʼi, masöndra wamahaʼö moroi ba zalua andrö, na faduhu dödöda khö Yehowa, itolo ita ba wanaögö abula dödö. Lö mamalö-malö ibeʼe wanolo Yehowab natafalua zomasi ia. No marasoi niwaʼö ba Zinunö 34:9, ”Mitandra ba mifaigi, wa no sebua tödö Yehowa, yaʼahowu zanötöna khönia.” Lua-luania, lö ataʼu ndraʼaga ba wanaögö abula dödö tanö böʼö.”

”Aboto ba dödöma wa moguna ba niha gulidanö mbalazo, tenga kefe mazui halöwö. Madöna-döna wa ifalua Lowalangi fefu nifabuʼunia, sambua inötö dania ’Fahöna mbua nowi ba danö.’ Iadaʼa asala ’so khöda mbalazo, awö nukha, ba noa khöda daʼö’. So göi khöma waʼabölö simane niwaʼö Zura Niʼamoniʼö, ’Böi fatewu ba gera-erami waʼomasi ganaʼa, yaʼabönö khömi zi ho so. Noa sa yaʼia zangumaʼö, ’Löʼö manö faröido khöu, ba löʼö manö uʼositengagö ndraʼugö.’ Börö daʼö, tola tawaʼö, ”Soʼaya zanolo yaʼo, lö ataʼu ndraʼo.”’”c

Ba wanörö lala Lowalangi moguna wamati soroi ba dödö simane nifalua Paul hegöi ösi nomonia. (I Moze 6:9) Hewaʼae lö göna ita abula dödö iadaʼa, tola manö göna ita ba zi so föna. Hizaʼi, tola tahalö wamahaʼö moroi ba duma-duma nibeʼe Paul sanandrösa ba wamati hegöi faʼatua-tuania.

Hewisa na moroi ba nösi nomoda iʼotarai abula dödö?