TUHO SIʼOFÖNA | LALA BA WANAÖGÖ ABULA DÖDÖ
Gofu Hezo, So Waʼaombö Dödö!
”Me möido mowöli gö, ha kue zi so—ba bölinia tenga simane si toʼölö! Mahemolunia, fefu lafo lö hadöi samawa gö.”—Paul, Zimbabwe.
”Me mudadao ndraʼaga foʼomogu, ifatunö khögu wa iröi ndraʼo. Hewisa wanaögögu abula dödö daʼa? Hadia zalua ba ndraonogu dania?”—Janet, Amerika Serikat.
”Me urongo li sebua, ubiniʼö ndraʼo ba ufalögu ndraʼo ba zalo, aefa daʼö urongo so zamoka. Lö ara aefa daʼö manizi-nizi ndraʼo.”—Alona, Israel.
Iadaʼa, no so ita ba gulidanö safönu abula dödö, ”baŵa si lö sökhi.” (II Timoteo 3:1) Ato niha sabu tödö börö wa lö kefe, faʼafawuka dödö ba zi sambua omo, fasuwöta, fökhö sabölö-bölö, molö sebua, duru danö, ba abula dödö tanö böʼö. Inönö nasa gabula dödöda zamösana: ’Hadia so wökhö sabölö-bölö ba mbotogu andre?’ ’Hewisa gulidanö andre dania na no egebua ndraonogu?’
Lö fefu waʼaombö dödö andrö lö sökhi. Itaria abu dödöda fatua lö uzia ba zekola, fatua lö fahuhuo ita föna niha sato, mazui fatua lö labeʼe khöda wanofu-nofu sanandrösa ba halöwö. Na ataʼu ita ba zi tobali famaʼala, daʼö zanolo yaʼita enaʼö taʼaröuʼö ita moroi ba daʼö. Na abölö aombö-aombö dödöda tola ifakiko waʼaurida. Moloʼö nisöndra niha satua-tua ba gulidanö, töra 68.000 niha sangumaʼö, itugu tedou waʼato niha si mate börö wa aombö-aombö dödö. Imane Yesu, ”Ba haniha ba khömi zangila mondrouʼö faʼanau nosonia sambua siʼu, na ibusi tödö?” Si ndruhunia, lö anau noso niha na asese so khönia waʼaombö dödö. Andrö imane Yesu, ”Böi mibusi tödömi.” (Mataiʼo 6:25, 27) Hizaʼi, hewisa wamalua yaʼia?
Tafalua goi-goi moroi ba Zura Niʼamoniʼö, tarorogö wamatida, so khöda wanötöna ba zi so föna. Hewaʼae lö göna ita abula dödö sabölö-bölö iadaʼa, hizaʼi tola manö alua khöda ba zi so föna. Da tatutunö hadia manö zi tola manolo Paul, Janet, hegöi Alona ba wanaögö abula dödö salua khöra.