Otu Fakhe No Tefasindro Wamatörö Lowalangi!

1. Hana wa moguna sibai halöwö fanuriaigö khö Yesu? Tutunö.

OMASI fahuhuo Yesu sanandrösa ba wamatörö Lowalangi. Me so ia ba gulidanö, asese idunö-dunö Mbanua Lowalangi moroi ba duho böʼö. Sagötö ba wanuriaigönia, töra 100 kali itutunö Mbanua Lowalangi. Si ndruhu-ndruhu wa iʼameʼegö tödö Yesu Mbanua Lowalangi.—Baso Mataiʼo 12:34.

2. Hadauga zamondro-ndrongo fareta nisura ba Mataiʼo 28:19, 20, ba hana wa tawaʼö daʼö?

² Lö ara me tesusugi Yesu, iʼoromaʼö ia khö ndra nifahaʼönia si töra 500 niha. (I Kor. 15:6) Te me luo daʼö ibeʼe fareta khöra Yesu ba wamahaʼö ”fefu soi”. Lö aoha wamalua halöwö daʼa.a Iʼombakhaʼö khö ndra nifahaʼönia wa halöwö fanuriaigö andre ”irugi gamozua götö danö andrö”. No ölului halöwö si no tefaʼeleʼö andre, na fao ndraʼugö ba wanuriaigö.—Mat. 28:19, 20.

3. Ba duho daʼa hadia zinangea tafatunö?

³ Me no aefa ibeʼe fareta Yesu imane, ”Fao khömi ndraʼo.” (Mat. 28:20) No ifabuʼu khö ndra nifahaʼönia wa yaʼia zanuturu lala enaʼö tola lafalua halöwö fanuriaigö ba zi sagörö ulidanö. Itolo göi ita Yehowa. Ibeʼe khöda ”zi sökhi andrö fefu” si tobali fanoloda weʼamöi manuriaigö. (Heb. 13:20, 21) Ba duho daʼa, so tölu ngawalö zinangea tafatunö: (1) fakake si no tehenaigö, (2) lala ba wamalua yaʼia, ba (3) famahaʼö si no labeʼe. Si oföna, datatutunö hadia fakake si no muʼogunaʼö barö zi 100 fakhe andre.

SI TOLA MUʼOGUNAʼÖ BA WANURIAIGÖ

4. Hewisa fakake si no teʼasogö andrö, tobali fanolo khöda weʼamöi manuriaigö?

⁴ Iʼamaedolagö Yesu duria Mbanua Lowalangi hulö danömö zinanö nitanö ba danö si faböʼö-böʼö. (Mat. 13:18, 19) Fatua lö itanö zinanö si samösa niha, tatu manö oya fakake niʼogunaʼönia ba wangehaogö tanö. Simanö göi, no ihenaigö khöda Razoda fanolo si tola taʼogunaʼö ba wangombakha turia somuso dödö enaʼö latema niha. So fakake nasa niʼogunaʼöda irugi iadaʼa so göi zi löʼö. Tobali, fefu fakake niʼasogö andre daʼa zanolo yaʼita ba wondrouʼö halöwö fanuriaigö.

5. Hadia kartu kesaksian andrö, ba hewisa wangogunaʼö yaʼia?

⁵ Me döfi 1933, labörögö ira talifusöda wangogunaʼö kartu kesaksian weʼamöi manuriaigö. Kartu daʼa lö ebua, hizaʼi no tesura ngawua ayati Zura Niʼamoniʼö. Itaria tefaböʼöni ayati Zura Niʼamoniʼö si so ba kartu andrö. Fulu fakhe ndröfi dalifusöda Erlenmeyer me iʼogunaʼö kartu kesaksian andre. Itutunö khöda, ”Tola tamane wangumaʼö, ’Hadia tola öbaso kartu daʼa?’ Na no ibaso kartu andrö sokhö omo, tola tabeʼe khönia mbuku ba talau mofanö.”

6. Hewisa wa tola tetolo ndra talifusöda me no laʼogunaʼö kartu kesaksian andre?

⁶ Kartu kesaksian tola tobali fanolo khö ndra talifusöda. Duma-dumania, so ndra talifusöda somasi manuriaigö, hizaʼi aila ira ba lö laʼila hadia niwaʼöra. So göi ndra talifusöda tanö böʼö si lö ataʼu. Ha ba zi sabata oya duho nifaʼemara ba niha, tobali itaria nifaluara andrö lö tefaudu. Kartu kesaksian zanolo ndra talifusöda ba wamaʼema turia somuso dödö ba niha.

7. Hadia wanandraigö salua khö ndra talifusöda ba wangogunaʼö kartu kesaksian andre?

⁷ So göi wanandraigö salua ba wangogunaʼö kartu daʼa. Talifusöda ira alawe sotöi Grace Estep imane, ”Itaria manofu ita ba niha, ’Hadia nösi kartu andre? Hadia tola ötutunö khögu?’” So zokhö omo lö laʼila labaso hadia nösi kartu andre. Tanö böʼö ha lafaigi manö aefa daʼö laduhö nomora. So göi zi lö omasi ba duria nifaʼemada ba lasika kartu nibeʼeda khöra. Hewaʼae oya wanandraigö salua, kartu kesaksian andre si tobali fanolo khö ndra talifusöda ba wangombakha Mbanua Lowalangi.

8. Hewisa wangogunaʼö fonograf portabel ba wanuriaigö? (Faigi gambara ba ngaʼörö 28.)

⁸ Me no aefa ndröfi 1930, so fakake böʼö niʼogunaʼö ba wanuriaigö yaʼia daʼö fonograf portable. So ndra talifusöda sangumaʼö wa fakake daʼa lafotöi ia Aʼaroni börö me hulö zi fahuhuo ba niha. (Baso II Moze 4:14-16.) Na fao dödö zokhö omo ba wamondro-ndrongo, ira talifusöda andre lafuta huhuo sebua ba labeʼe khöra mbuku. Itaria fefu nösi nomo owulo ira ba wamondro-ndrongo huhuo sebua! Me döfi 1934, Lembaga Menara Pengawal labörögö wamazökhi fonograf portable niʼogunaʼö ba wanuriaigö. Ba gafuriatania, so 92 huhuo sebua si no lafaʼanö ira talifusöda.

9. Hadia lua-luania me no laʼogunaʼö fonograf portable?

⁹ Me no irongo sambua huhuo sebua Hillary Goslin, ifiza fonograf andre samigu faʼara enaʼö iʼombakhaʼö ba zi fahatö khönia Daromali Lowalangi. Lua-luania, so zadöni dödö ba tebayagö ira idanö. Darua dalifusönia alawe möi ba Sekolah Gilead ba tobali ira sangombakha ba soi böʼö. Simane kartu kesaksian, fonograf portable no tobali fanolo khö ndra talifusöda weʼamöi manuriaigö. Ba gafuriatania, iʼasogö Razoda Sekola Famomaha ba Wanuriaigö, si tobali fanolo khöda enaʼö atua-tua ita ba wamahaʼö niha böʼö.

TAʼOGUNAʼÖ NGAWALÖ LALA BA WAMAʼEMA TAROMALI

10, 11. Hewisa wangogunaʼöda koran hegöi radio ba wamaʼema turia somuso dödö ba niha, ba hana wa tefaudu sibai nifalua andre?

¹⁰ Oya wanuturu lala niʼasogö Razoda si tola taʼogunaʼö ba wanuriaigö ba niha fefu. Moguna sibai wanuturu lala andrö börö me lö ato niha sanuriaigö. (Baso Mataiʼo 9:37.) Duma-dumania, ba ndröfi si lalö laʼogunaʼö koran ba wangombakha turia somuso dödö. Ero migu, Talifusöda Russell ifaʼoheʼö huhuo sebua ba zamazökhi koran. Aefa daʼö, lafaʼoheʼö huhuonia ba koran Kanada, Eropa ba Amerika Serikat. Me döfi 1913, huhuo sebua Dalifusöda Russell no lafaʼanö ba koran faʼoyania 2.000 ba so 15 zuta niha sombaso!

¹¹ Laʼogunaʼö göi radio ba wamaʼema turia somuso dödö. Me 16 mbaŵa si Öfa 1922, iʼogunaʼö radio Talifusöda Rutherford ba wamaʼema huhuo sebua, ba so 50.000 niha zamondro-ndrongo. Lö ara aefa daʼö, tabörögö wangogunaʼö stasiun radio nifazökhida nifotöi WBBR me 24 mbaŵa si Dua 1924. Me 1 mbaŵa si Felendrua 1924 imane The Watch Tower, ”Faduhu dödöma wa radio andre zabölö baga ba wamaʼema turia somuso dödö ba niha.” Simane koran, radio göi tobali fanolo khö ndra talifusöda ba wamaʼema turia somuso dödö hewaʼae ba mbanua si lö ato sanuriaigö.

12. (a) Hezo manö zomasi möi ndraʼugö ba wanuriaigö ba nahia sato niha? (b) Hadia zi tola manolo yaʼita enaʼö lö khöda faʼataʼu na manuriaigö ba nahia sato niha?

¹² Lala tanö böʼö nifaluada ba wanuriaigö ba ginötö andre yaʼia daʼö, manuriaigö ba nahia sato niha. Moguna so khöda wangodödögö weʼamöi manuriaigö ba nahia wolombase moto, ba stasiun kereta api, ba nahia parkir, ba fasa mazui ba hari mbale. Hadia ataʼu ndraʼugö na möi manuriaigö ba nahia sato niha? Na simanö, andrö wanolo moroi khö Yehowa. Datafaigi niwaʼö dalifusöda pengawas wilayah sotöi Manera imane, ”Na so fitur si bohou ba wanuriaigö, no sambua lala daʼö ba wamosumangema Yehowa, ba wangoromaʼö falö faröi ba faʼanau gölöma, hegöi ba wamalua gofu hadia ia ba wamosumange Yehowa.” Na lö ataʼu ita weʼamöi manuriaigö ba taʼogunaʼö fefu wanuturu lala si no teʼasogö, itugu faduhu dödöda khö Yehowa ba tobali ita samahaʼö si sökhi.—Baso II Korindro 12:9, 10.

13. Hadia mbörö wa tefaudu sibai wangogunaʼö situs Web ba wanuriaigö? Tutunö hadia zi no irai ötörö me no öʼogunaʼö situs Web daʼa.

¹³ Ato ndra talifusöda sanuriaigö laʼombakhaʼö ba niha situs Web jw.org. Tola labaso ba lahalö mbuku si no tehenaigö ba situs daʼa ba zi töra 700 ngawalö li. Ero maʼökhö, töra 1,6 zuta zamaigi situs andre. Meföna, laʼogunaʼö radio enaʼö tola ofeta duria somuso dödö ba mbanua sigide-ide. Iadaʼa, taʼogunaʼö göi situs Web.

FAMAHAʼÖ BA NIHA SANURIAIGÖ

14. Hadia wamahaʼö nibeʼe khö ndra talifusöda sanuriaigö, ba hadia zekola si no tehenaigö enaʼö tobali ira sanuriaigö satua-tua?

¹⁴ Fanuturu lala hegöi fakake si no tehenaigö si no tafatunö moroi yawa, daʼa zi tobali fanoloda weʼamöi manuriaigö. Tobali, moguna tefahaʼö ndra sanuriaigö me luo daʼö. Duma-dumania, itaria so niha lö fao dödöra hadia zi no larongo moroi ba fonograf. So göi zadöni dödö ba omasi lafahaʼö ira. Andrö moguna tefahaʼö ita enaʼö taʼila hadia zinangea tafalua na so niha si lö omasi ba duria nifaʼemada ba enaʼö tobali ita sanuriaigö si sökhi. Börö wanolo moroi khö Lowalangi, aboto ba dödö Dalifusöda Knorr wa moguna tefahaʼö ndra dalifusöda sanuriaigö, enaʼö tola fahuhuo ira ba niha. Me döfi 1943, tebörögö Sekola Famomaha ba Wanuriaigö ba mbanua niha Keriso. Sekola andre zanolo ndra talifusöda enaʼö atua-tua ira ba wanuriaigö.

15. (a) Hadia zalua khö ndra talifusöda me awena lahalö Sekola Famomaha ba Wanuriaigö? (b) Hewisa worasoimö fanolo Yehowa niwaʼönia ba Zinunö 32:8?

¹⁵ Ato ndra talifusöda si lö toʼölö fahuhuo föna niha sato. Itörö tödö Dalifusöda Ramu me awena ifaʼema huhuo sebua me döfi 1944. Ifaʼema huhuo soʼamakhaita ba gamuata Dugi si so ba Zura Niʼamoniʼö. Imane, ”Manizi-nizi gahegu hegöi dangagu. Daʼa zalua khögu me awena uʼohe sekola, tobali lö uböhöli wangai yaʼia.” Hewaʼae abua wamalua yaʼia, tebeʼe göi ginötö ba ndraono enaʼö fao ira ba Zekola Famomaha andre. Itörö tödö Dalifusöda Manera hadia zalua khö nononia matua me awena ihalö zekola andre, ”Ataʼu sibai ia, me ibörögö fahuhuo ilau meʼe. Hewaʼae asöndru-söndru ia weʼe, hizaʼi tola iʼawaisi wamaʼema huhuonia andrö.” Te so khöu waʼataʼu wameʼe mbua wangera-ngera ba gangowuloa mazui aila ndraʼugö irege tebai öfalua. Na alua khöu zimanö, andrö wanolo moroi khö Yehowa enaʼö tola ölawa waʼataʼu andrö. Itolo ndraʼugö ba ginötö öhalö halöwö ba Zekola Famomaha ba Wanuriaigö.—Baso Zinunö 32:8.

16. Hadia gohitö dödö wa lafalua Sekolah Gilead (a) meföna ba (b) iʼotarai me döfi 2011?

¹⁶ No iʼasogö Sekolah Gilead angowuloa Yehowa ba wamahaʼö ndra talifusöda sanuriagö. Wa lafalua zekola andre, yaʼia daʼö ba wanolo ira talifusöda enaʼö so khöra waʼaterou dödö ba wanuriaigö. Tebörögö Sekolah Gilead me döfi 1943, iʼotarai daʼö so 8.500 ndra talifusöda si no tefahaʼö ba lafatenge ira ba zi 170 soi. Iʼotarai me 2011, nikaoni ba zekola andre yaʼia daʼö, ira talifusöda si no merintis, pengawas wilayah, sohalöwö ba Mbetieli, mazui ira talifusöda nifatenge ba wangombakha ba soi böʼö si lö irai lakaoni ba zekola daʼa.

17. Hadia mbua nitema me no teʼasogö Sekolah Gilead?

¹⁷ Hadia so gunania me no tefalua Sekolah Gilead? So. Datafaigi hadia zalua ba Jepang. Me baŵa si Walu ba ndröfi 1949, lö ikhamö dafulu ndra talifusöda sanuriaigö ba soi daʼö. Ba gafuriata ndröfi, so 13 ndra talifusöda nifatenge ba wangombakha ba mbanua andrö ba fao ira wanuriaigö khö ndra talifusöda si so ba daʼö. Iadaʼa, so 216.000 ndra talifusöda sanuriaigö ba Jepang, arakhagö matonga zi tobali perintis!

18. Hadia zekola tanö böʼö si no tehenaigö?

¹⁸ So zekola tanö böʼö si no teʼasogö simane Sekolah Pelayanan Kerajaan, Sekolah Dinas Perintis, Sekolah bagi Penginjil Kerajaan, Sekolah bagi Pengawas Keliling dan Istri, dan Sekolah bagi Para Anggota Panitia Cabang dan Istri. Sekola daʼa zanolo ndra talifusöda ba wangai halöwö khö Lowalangi ba so khöra wamati saro. Aboto ba dödöda wa lö aetu-aetu ibeʼe Yesu wamahaʼö khöda.

19. Hadia niwaʼö Dalifusöda Russell ba halöwö fanuriaigö, ba hewisa wa tola alua daʼa?

¹⁹ Töra 100 fakhe no tefasindro Mbanua Lowalangi ba zorugo. Iʼotarai daʼö, no itolo ita Razoda, Yesu Keriso ba wamalua halöwö fanuriaigö ba zi sagörö ulidanö. Me döfi 1916, faduhu dödö Dalifusöda Russell wa halöwö fanuriaigö irugi ba zi sagörö ulidanö. Imane, ”Halöwö fanuriaigö alio sibai tedou, ba itugu monönö nasa irugi ba wondrege danö ba wamaʼema turia somuso dödö sanandrösa ba ’wamatörö Lowalangi.’” (Faith on the March, nisura A. H. Macmillan, ngaʼörö 69) Halöwö fanuriaigö no tefalua irugi iadaʼa! Taʼandrö sibai saohagölö khö Yehowa, Lowalangi faʼohahau dödö, me no ibeʼe wanolo khöda ba wamalua somasi ia!