Odödögö ’Wangomasiʼö Talifusö Andrö, Böi Yatebulö’!

1, 2. Hadia mbörö wa isura Faulo zura ba niha Keriso si so ba mbanua Heberaiʼo?

ME DÖFI 61, laʼokhögö waʼohahau dödö ndraono Gizaraʼeli ba gangowuloa. Ba mbanua Roma lakuru Waulo. Hizaʼi, idöna-döna enaʼö alio laʼefasi ia. Awönia Dimoteo göi bohou muʼefasi moroi ba gurunga, ba latötöna enaʼö lafalukhaisi ndra talifusö si so ba Yudaia. (Heb. 13:23) Barö zi lima fakhe, niha Keriso si so ba Yudaia hegöi ba Yeruzalema moguna lafaʼanö ira. Hadia mbörö? No ihenaigö ifatunö Yesu khö ndra nifahaʼönia enaʼö laʼanemaiʼö lalau moloi na so zaradadu samasui Yeruzalema.​—Luk. 21:20-24.

² No 28 fakhe waʼara me ifangelama ndra nifahaʼönia Yesu. Me luo daʼö, hewaʼae so zolohi niha Keriso si so ba Gizaraʼeli, lö hadöi faröi ira. (Heb. 10:32-34) Hizaʼi, ihenaigö ifaʼanö ira Faulo ba wanaögö fanandraigö si lö aratö alua. Lö aratö latörö wanandraigö sabölö-bölö sanandrösa ba wamati. (Mat. 24:20, 21; Heb. 12:4) Moguna so khöra wangodödögö falöfaröi hegöi famati saro enaʼö moloi ira simane niwaʼö Yesu. Ba daʼö teʼodaligö waʼaurira. (Baso Heberaiʼo 10:36-39.) Börö daʼö, ibeʼe Yehowa gehehania khö Waulo ba wanura sura khö ndra talifusö. Sura daʼö nifotöi buku Heberaiʼo, musura ia ba wangaroʼö ndra talifusö sanandrösa ba zi lö aratö alua.

3. Hana wa moguna adöni dödöda ba mbuku Heberaiʼo?

³ Börö me yaʼita andre ono mbanua Lowalangi, moguna adöni dödöda ba mbuku Heberaiʼo. Hadia mbörö? Börö me arakhagö fagölö zalua khöda simane zalua ba niha Keriso ba Yudaia. So ita ba ”götö safuria”, ba ato zi lö faröi ba wanaögö famakao mazui folohi. (II Tim. 3:1, 12) Hizaʼi, ato ba gotaluada zi lö manörö fanandraigö. Hewaʼae simanö, moguna tafaʼanö ita simane niha Keriso ba götö Waulo. Hadia mbörö? Lö aratö tatörö wanandraigö sabölö-bölö sanandrösa ba wamati!​—Baso Luka 21:34-36.

4. Hadia ayati si no mufili ba ndröfi 2016, ba hana wa tefaudu sibai ayati daʼa?

⁴ Hewisa enaʼö tola tafaʼanö ita sanandrösa ba zalua miföna? Oya nitutunö Waulo ba mbuku Heberaiʼo, si tobali fanoloda enaʼö aro ita ba wamati. Sambua wamasugi ba dödö si tola taʼameʼegö tödö yaʼia daʼö nisura ba Heberaiʼo 13:1. Ifarou ita, ”Fangomasiʼö talifusö andrö, böi yatebulö.” Ayati andre no mufili tobali ayati ba ndröfi 2016.

HADIA NIFOTÖI FANGOMASIʼÖ TALIFUSÖ?

5. Hadia nifotöi fangomasiʼö talifusö?

⁵ Hadia nifotöi fangomasiʼö talifusö? Ngawua wehede niʼogunaʼö Waulo ba li ndrawa Heleni eluahania ”faʼomasi soroi ba dödö ba dalifusö”. Fangomasiʼö talifusö yaʼia daʼö fangomasiʼö soroi ba dödö ba gotalua nösi nomo mazui ba zi fahuwu khöda. (Yoh. 11:36) Tenga ha ba mbewe taʼomasiʼö ndra talifusöda, yaʼita andre oi si fatalifusö. (Mat. 23:8) Imane Faulo, ”Fangomasiʼö talifusö andrö, ba ya moroi ba dödömi, faoma mihulö nawömi, wamosumange yaʼia.” (Rom. 12:10) Ngawua wehede andrö zangoromaʼö hawaʼebua waʼomasida khö ndra talifusöda. Fangomasiʼö ndra talifusö andre teʼodane-dane ia ba goi-goi niha Keriso. Daʼa zi möi fanolo ba nono mbanua Lowalangi enaʼö so wahasara dödö ba faoma fahuwu ira khö nawöra.

6. Hadia geluaha wangomasiʼö talifusö moloʼö niha Keriso sindruhu?

⁶ Asese tesöndra ngawua wehede ”fangomasiʼö talifusö” ba mbuku niha Keriso. Ba niha Yehuda meföna, ”talifusö” andrö tola lafoʼeluaha ia talifusö ba waʼaniha mazui si tenga ösi nomora. Hizaʼi, lö laʼotalifusögö zi tenga niha Yehuda. Iadaʼa, gofu hezo so mbanua toröi niha Keriso sindruhu ba lö tebulö wa ”talifusöda” ira. (Rom. 10:12) Ifahaʼö ita Yehowa ba wangomasiʼö ndra talifusöda. (I Tes. 4:9) Hadia mbörö wa lö aetu-aetu taʼomasiʼö ndra talifusöda?

HANA WA MOGUNA SIBAI TAFOROMAʼÖ WAʼOMASI KHÖ NDRA TALIFUSÖDA?

7. (a) Hadia mbörö wa moguna sibai taforomaʼö waʼomasi ba dalifusö? (b) Tutunö hana wa faoma moguna taʼaroʼö waʼomasida khö nawöda.

⁷ Fangomasiʼö talifusö moguna sibai börö me Yehowa zangoʼou yaʼita. Tebai taʼomasiʼö Yehowa na lö taʼomasi ndra talifusöda. (I Yoh. 4:7, 20, 21) Baero daʼö, faoma tatolo nawöda börö me no so ita ba ginötö safuria. Me isura zurania Faulo ba niha Keriso si so ba Heberaiʼo, aboto ba dödönia wa lö aratö laröi nomora hegöi gokhötara fefu. No ifatunö Yesu hewisa waʼatosasa niha ba luo daʼö. (Mrk. 13:14-18; Luk. 21:21-23) Börö daʼö, fatua lö alua ginötö waʼatosasa andrö, moguna laʼaroʼö waʼomasira khö nawöra.​—Rom. 12:9.

8. Hadia zinangea tafalua iadaʼa fatua lö tohare wamakao sabölö-bölö?

⁸ Lö aratö tohare wamakao sabölö-bölö. (Mrk. 13:19; Fam. 7:1-3) Moguna taʼoʼö mene-mene andre, ”Ba miʼae si bakha, yaʼami banuagu, ba mbateʼe andrö khömi, ba milazi mbawandruhö furimi! Mibiniʼö ami, ha mamöʼi hörö waʼara, irege alö wönu andrö.” (Yes. 26:20) Eluaha ”mbateʼe” yaʼia daʼö banua niha Keriso. Daʼa nahiada wefao khö ndra talifusöda ba wamosumange Yehowa. Hizaʼi, tenga ha asala owulo ita ero migu. Ifarou niha Keriso si so ba Heberaiʼo Faulo enaʼö faoma lafarou dödö nawöra ba waʼomasi ba lafalua zi sökhi. (Heb. 10:24, 25) Iadaʼa, taʼaroʼö waʼomasida khö ndra talifusöda enaʼö tola tataögö gofu hadia ia wamakao salua ba zi so föna.

9. (a) Hadia manö ginötö si tola taʼogunaʼö iadaʼa ba wangoromaʼö faʼomasi khö ndra talifusöda? (b) Beʼe duma-duma hewisa nono mbanua Yehowa ba wangoromaʼö faʼomasi khö ndra talifusöda.

⁹ Iadaʼa, oya ginötö si tola taʼogunaʼö ba wangoromaʼö faʼomasi khö ndra talifusöda fatua lö tohare wamakao sabölö-bölö. Ato ndra talifusöda si göna abula dödö börö ndruru danö, molö sebua, angi sabölö-bölö, tsunami mazui tanö böʼönia. So ösa zi göna folohi. (Mat. 24:6-9) So göi zi tosasa ba wangalui soguna börö me so ita ba gulidanö si lö atulö. (Fam. 6:5, 6) Hewaʼae simanö, itugu oya gabula dödö ndra talifusöda, itugu oya göi ginötöda ba wangoromaʼö faʼomasida khöra. Hewaʼae so ita ba gulidanö si lö faʼomasi, moguna böi aetu-aetu taforomaʼö waʼomasi khö ndra talifusöda.​—Mat. 24:12^[1]

HEWISA ENAʼÖ BÖI AETU-AETU TAʼOROMAʼÖ WAʼOMASI BA DALIFUSÖ?

10. Hadia nifatunöda iadaʼa?

¹⁰ Hewisa enaʼö böi aetu-aetu taʼoromaʼö waʼomasi ba dalifusö hewaʼae oya gabula dödö salua khöda? Hewisa wangoromaʼöda wa so khöda fangomasiʼö dalifusö? Me iwaʼö Faulo, ’fangomasiʼö talifusö andrö, böi yatebulö’, no izara-zara khöda wangombakha hadia zinangea tafalua yaʼita niha Keriso ba wangoromaʼö faʼomasi khö ndra talifusöda. So önö ngawalö zinangea tafalua.

11, 12. Hadia geluahania lö abua gölöda ba wotemaʼö dome? (Faigi gambara ba wamobörö wamahaʼö.)

¹¹ ”Böi miʼolifugö ami, faböi abua gölömi ba dome.” (Baso Heberaiʼo 13:2.) Hadia geluaha ”böi abua gölömi ba dome”? Ngawua wehede niʼogunaʼö Waulo andre, eluahania ”tafalua zi sökhi ba niha si lö taʼila”. Te itörö tödöda zalua khö Gaberahamo hegöi Loti. Si darua niha andre, laforomaʼö gamuata si sökhi me so zangondrasi yaʼira si lö irai falukha khöra. Hizaʼi, ba gafuriatania awena aboto ba dödöra wa malaʼika zangondrasi yaʼira. (I Moz. 18:2-5; 19:1-3) Duma-duma andrö zamarou dödö niha Keriso si so ba mbanua Heberaiʼo ba wangoromaʼö faʼomasi ba dalifusö, enaʼö lö abua gölöra ba wanemaʼö tome.

¹² Hadia zi tola tafalua ba wangoromaʼö wa lö abua gölöda wanemaʼö tome? Tola takaoni ndra talifusöda enaʼö falulu manga ira ba nomoda mazui faoma tafarou dödö nawöda. Hewaʼae ambö fahatö ita khö pengawas wilayah mazui khö woʼomonia, hizaʼi tola takaoni ira ba nomoda ba ginötö laʼondrasi gangowuloada. (III Yoh. 5-8) Tenga ha balazi oya gö mazui dali ebua gefeda awena takaoni ira ba nomoda. Ohitö dödöda tenga enaʼö lasuno ita, tobali enaʼö tafarou dödö ndra talifusöda. Nikaonida böi ha niha si tola mosulöni nifaluada. (Luk. 10:42; 14:12-14) Sinangea tatörö tödöda, böi ha börö waʼoya halöwö olifu ita ba wokaoni ndra talifusöda ba nomo!

13, 14. Hewisa enaʼö ’tatörö-törö tödöda nikuru andrö’?

¹³ ”Mitörö-törö tödömi nikuru andrö.” (Baso Heberaiʼo 13:3.) Fehede Waulo andre manandrösa ia khö ndra talifusöda nikuru börö wamati. lʼandrö saohagölö Faulo ba nono mbanua niha Keriso börö me ’lahakhösi tödö nikuru’. (Heb. 10:34) So ba gotalua ndra talifusö sanolo Faulo me lakuru ia öfa fakhe waʼara. Hizaʼi, so ösa ndra talifusö si toröi ba danö saröu. Hewisa ira ba wanolo Faulo? Lö aetu mangandrö ira salahinia.​—Fil. 1:12-14; Heb. 13:18, 19.

¹⁴ Iadaʼa, ato ndra Samaduhuʼö Yehowa nikuru börö wamatira. Ira talifusöda sahatö ba mbanua andrö tola labeʼe khöra wanolo. Hizaʼi, so göi ba gotaluada si töröi ba mbanua saröu. Hewisa enaʼö tatolo ira ba lö olifu ita khöra? Fangomasiʼö talifusö daʼö zameʼe famarou dödö khöda enaʼö lö aetu mangandrö ita salahira. Duma-dumania, tola taʼangöndröi ndra talifusöda hegöi ndraono si gide-ide nikuru ba mbanua Eritrea, simane dalifusöda Paulos Eyassu, Isaac Mogos, hegöi Negede Teklemariam. No töra 20 fakhe ira ba gurunga.

15. Hewisa lalada ba wangosinangegö farongasa?

¹⁵ ”Dozi sa, ba ndramuʼonangegö warongasa.” (Baso Heberaiʼo 13:4.) Tola taforomaʼö waʼomasi khö ndra talifusöda na tahaogö mbua-buada. (I Tim. 5:1, 2) Duma-dumania, na tafalua gamuata wohorö khö ndra talifusöda si sara lala wamati khöda, no tafawukaisi waʼaurinia hegöi ösi nomonia. Lö saʼae lafaduhusi tödö ita ira talifusöda. (I Tes. 4:3-8) Angeraigö göi hewisa dödö woʼomo ira alawe na iʼila woʼomonia ira matua ifaigi-faigi gambara zohorö. Hadia faduhu dödönia wa iʼomasiʼö ia foʼomonia ba iʼosinangegö wongambatöra?​—Mat. 5:28.

16. Na ahono dödöda ba zi no so, hewisa wangoromaʼöda waʼomasi ba dalifusö?

¹⁶ ”Yaʼabönö khömi zi ho so.” (Baso Heberaiʼo 13:5.) Na faduhu dödöda khö Yehowa, daʼö zanolo yaʼita enaʼö ahono dödöda ba zi no so. Tobali, hewisa wangoromaʼöda faʼomasi ba dalifusö na so khöda gamuata daʼö? Na abönö khöda zi no so, itörö tödöda wa abölö moguna ndra talifusöda niha Keriso moroi ba gefe mazui tanö böʼönia. (I Tim. 6:6-8) Lö mukökö ita börö ndra talifusöda mazui börö zalua ba waʼaurida. Ba lö olohu ita mazui so khöda gamuata fakhögusa. Sindruhunia, na ahono dödöda ba zi no so, tola oböwö ita.​—I Tim. 6:17-19.

17. Na ’aro dödöda’ ba wamati, hewisa wa tola taforomaʼö waʼomasi khö ndra talifusöda?

¹⁷ ”Tola abeʼe dödöda.” (Baso Heberaiʼo 13:6.) Na faduhu dödöda khö Yehowa tola aro dödöda ba wanaögö fanandraigö. Daʼa zanolo yaʼita enaʼö so khöda gamuata si sökhi. Na tafalua daʼö, tola taforomaʼö waʼomasi ba dalifusö na tabeʼe khöra wondrara dödö ba famarou dödö. (I Tes. 5:14, 15) Hewaʼae na alua wamakao sabölö-bölö, tola aro dödöda börö me taʼila no ahatö wangefaʼö andrö.​—Luk. 21:25-28.

18. Hadia zinangea tafalua enaʼö aro waʼomasida khö ndra satua sokubaloi?

¹⁸ ”Mitörö-törö tödömi zolohe yaʼami andrö.” (Baso Heberaiʼo 13:7, 17.) Labeʼe ginötöra ira satua sokubaloi ba gangowuloa ba wanolo yaʼita. Na öʼangeraigö fefu nifaluara, tumbu ba dödöda waʼomasi hegöi fangandrö saohagölö khöra. Lö omasi ita na lö khöra faʼomuso dödö mazui abu dödöra börö gamuatada. Omasi ita taʼoʼö niwaʼöra. Na tafalua daʼö, no ’tafosumange, ba taʼomasiʼö sibai ira, börö halöwö nifaluara andrö’.​—I Tes. 5:13.

FALUA WAʼOMASI ANDRÖ SOROI BA DÖDÖ

19, 20. Hadia zinangea taʼangerönusi ba wangoromaʼö faʼomasi khö ndra talifusöda?

¹⁹ Aboto ba dödö niha wa yaʼita andre ono mbanua Yehowa börö me so khöda waʼomasi. Simane daʼö zalua me götö Waulo. Ifarou Faulo ndra talifusöda enaʼö laforege wamalua faʼomasi. Imane, ’Enaʼö tedou-dou manö waʼomasi ba nawömi.’ (I Tes. 4:9, 10) Börö daʼö, moguna tadouʼö waʼomasida khö ndra talifusöda!

²⁰ Na no tafaigi ayati si so ba Balai Kerajaan barö ndröfi daʼa, dataʼangerönusi wanofu-nofu andre: Hadia tola aoha gölögu ba wanemaʼö tome? Hewisa wanologu ndra talifusöda nikuru? Hadia uʼosinangegö warongasa nihonogöigö Lowalangi? Hadia zanolo yaʼo enaʼö ahono dödögu ba zi no so? Hewisa enaʼö itugu ufaduhusi tödö Yehowa? Hewisa enaʼö abölö uʼoʼö li ndra talifusöda sangai halöwö ba gangowuloa? Na tahaogö woʼangerönusi fefu wanofu si önö ngawalö andre, ayati nisura ba ndröfi daʼa tenga ha asala lafalemba ba dowa. Daʼö zamasugi ba dödöda enaʼö taʼoʼö li Waulo me imane, ’Fangomasiʼö talifusö andrö, böi yatebulö.’​—Heb. 13:1.