Tola Fao Ndraʼugö ba Wangaʼaroʼö Fahasara Dödö ba Gangowuloa—Hewisa Wamalua Yaʼia?
”Ba khönia mobörö, wa tefaʼanö mboto andrö, maʼasambua, awö wa tefaböbö.”—EF. 4:16.
1. Iʼotarai me mböröta, hewisa na mohalöwö Lowalangi?
FALULU fohalöwö Yehowa hegöi Yesu iʼotarai me lafazökhi fefu hadia ia. Yesu no gomböila danga Yehowa si föföna sibai. Aefa daʼö, falulu fohalöwö Yesu tobali ’duka khönia’. (Gamd. 8:30) Simanö göi nono mbanua Yehowa, falulu fohalöwö ira ba halöwöra. Duma-dumania, Noakhi hegöi ösi nomonia falulu fohalöwö ira ba wamazökhi owo. Falulu fohalöwö göi ndraono Gizaraʼeli ba wamasindro, ba wodudugö, hegöi ba wombulöʼö nahia dawöla. Ba gosali, lalau manunö ba laʼogunaʼö ngawalö musik si möi fanuno Yehowa. Tola lafalua daʼö fefu ono mbanua Yehowa börö me falulu fohalöwö ira.—I Moz. 6:14-16, 22; IV Moz. 4:4-32; I Nga. 25:1-8.
2. (a) Hadia duma-duma si tola tahalö moroi ba niha Keriso si föföna? (b) Hadia wanofu-nofu nifatunöda ba duho daʼa?
2 Niha Keriso si föföna lö aetu-aetu falulu fohalöwö ira. Itutunö Faulo so khöra wahasara dödö hewaʼae no faböʼö-böʼö waʼatua-tuara hegöi halöwöra. Fefu ira laʼoʼö Yesu Keriso börö me yaʼia Zondröniaʼö yaʼira. Iʼamaedolagö ira Faulo hulö zi sambua boto. Fefu ndroto-ndroto si so ba mboto falulu fohalöwö. (Baso I Korindro 12:4-6, 12.) Hewisa göi ita iadaʼa? Hewisa enaʼö tola falulu fohalöwö ita ba wanuriaigö, ba mbanua niha Keriso, hegöi ba nomo?
FALULU FOHALÖWÖ BA WANURIAIGÖ
3. Hadia gangilata niʼila Yohane?
3 Yohane andrö no samösa sinenge. Me döfi si föföna no alua ba gangilatania sanandrösa ba dorofe nifoli ndra malaʼika si dafitu. Me inötö ifoli dorofe malaʼika si lima, iʼila Yohane ”ndröfi, si no atoru tou ba danö, moroi ba mbanua si yawa”. Tebeʼe nonokusi ba ndröfi andrö ba wamokai mbawa gawuwukha. Me ibokai mbawa gawuwukha andrö, möi baero zimbo ba tamo soya. Ba lö ifakiko zinanö tamo andrö hegöi eu, hizaʼi ”niha andrö nifakiko, si lö tandro Lowalangi andrö, ba gangango”. (Fam. 9:1-4) Aboto ba dödö Yohane wa tamo soya tola iʼasogö wamakiko. No irai alua daʼa ba danö Miserai ba götö Moze. (II Moz. 10:12-15) Tamo niʼila Yohane andrö eluahania niha Keriso si no labayoini ba wangombakha fanguhuku ba agama faya. Ba fao khöra niha si haʼuga zuta faʼato sanötöna ba waradaiso. Si dombua ngawawa andre so khöra wahasara dödö ba wamalua halöwö andrö. Börö halöwö andrö, ato niha si no latolo ba wondröi agama faya ba teʼefaʼö ira moroi ba danga Zatana.
4. Hadia halöwö nifalua nono mbanua Lowalangi, ba hadia zinangea lafalua enaʼö tefalua halöwö andrö?
4 Fatua lö alua wönu Lowalangi moguna taturiaigö ’duria somuso dödö’ ba zi sagörö ulidanö. No halöwö sebua daʼa! (Mat. 24:14; 28:19, 20) Moguna takaoni fefu niha ’sowökhi tödö’ enaʼö labadu ’idanö fangorifi’. Eluahania, tafahaʼö niha somasi mangila nösi Zura Niʼamoniʼö. (Fam. 22:17) Hizaʼi, awena tola tafalua ia, na tefaböbö ita maʼasambua ba falulu fohalöwö ita khö ndra talifusöda ba mbanua niha Keriso.—Ef. 4:16.
5, 6. Hewisa wa tola oroma wahasara dödöda moroi ba halöwö fanuriaigö?
5 Fanuriaigöda moguna toföfö ba tefaʼanö enaʼö tola terongo ba niha fefu. Tola tafalua ia börö wanuturu lala moroi ba mbanua niha Keriso simane ba gangowuloa weʼamöi manuriagö. Möita taturiaigö duria somuso dödö ba niha sanandrösa Mbanunia Lowalangi. No haʼuga zuta mbuku si teʼodane-dane moroi ba Zura Niʼamoniʼö si no tebeʼe ba niha ba zi sagörö ulidanö. Itaria, laʼandrö khöda ba wotuhini kampanye khusus ba wanuriaigö. Na tafalua daʼö, so khöda wahasara dödö ba zi haʼuga zuta ndra talifusöda ba zi sagörö ulidanö ba wamalua halöwö si fagölö andre! Falulu fohalöwö göi ita khö ndra malaʼika sanolo nono mbanua Lowalangi ba wanuriaigö.—Fam. 14:6.
6 Na tabaso Buku Tahunan, so khöda waʼomuso dödö me taʼila so mbua nitemada moroi ba wanuriaigö ba zi sagörö ulidanö. Aefa daʼö, so khöda wahasara dödö ba zi sagörö ulidanö ba wokaoni niha weʼamöi ba gangowuloa sebua. Fagölö-gölö gangombakhata nitemada ba gangowuloa sebua. Me no tarongo huhuo sebua, drama, hegöi famadumaisi, itugu terou dödöda wameʼe si sökhi khö Yehowa. So khöda wahasara dödö khö ndra talifusöda ba zi sagörö ulidanö na fao ita ba Wanörö Tödö faʼamate Yesu nifalua ero röfi. (I Kor. 11:23-26) So gangowuloa si fendronga tafalua ba zi sagörö ulidanö, ba mufalua ia me 14 Nisan, no aekhu luo ba wangandrö saohagölö khö Yehowa ba zi no ifalua khöda hegöi ba woloʼö oroisa Yesu. Haʼuga migu fatua lö alua Wanörö Tödö faʼamate Yesu, falulu fohalöwö ita ba wogaoni niha sato enaʼö fao ira ba gangowuloa nifaluada andre.
7. Hadia zi tola tafalua na so khöda falulu fohalöwö?
7 Na ha sambua damo, lö moʼeluaha halöwö nifaluania. Simanö göi na ha samösa ita, tatu manö lö ikhamö ölöda ba wanuriaigö ba niha fefu. Hizaʼi börö me falulu fohalöwö ita, tola taʼombakhaʼö sanandrösa khö Yehowa ba zi haʼuga zuta niha irege fao ira ba wanuno hegöi ba wamolakhömi yaʼia.
FALULU FOHALÖWÖ BA MBANUA NIHA KERISO
8, 9. (a) Hadia duma-duma nibeʼe Waulo ba wamahaʼö niha Keriso enaʼö so wahasara dödö? (b) Hewisa enaʼö tola falulu fohalöwö ita ba mbanua niha Keriso?
8 Itutunö Faulo ba niha Efeso hadia zinangea lafalua enaʼö toföfö halöwö ba mbanua niha Keriso. Imane göi wangumaʼö wa ono mbanua niha Keriso moguna ”manöi fefu hadia ia” ba wamati. (Baso Efeso 4:15, 16.) Imane Faulo wa fefu niha Keriso iʼamaedolagö simane botoda, tola falulu fohalöwö ira ba gangowuloa enaʼö so khöra wahasara dödö hegöi ba woloʼö Yesu, Sondröniaʼö banua niha Keriso. Imane wangumaʼö wa tefaʼanö mboto andrö börö me no ”tefaböbö, ba wamakhai andrö fefu”. Tobali, yaʼita fefu he si no atua mazui sawuyu-wuyu, sofökhö mazui si löʼö, hadia zinangea tafalua?
9 No ituyu ndra satua sokubaloi Yesu ba wameʼe fanuturu lala ba mbanua niha Keriso, ba omasi ia göi na tafosumange ira ba taʼoʼö wanuturu lala nibeʼera. (Heb. 13:7, 17) Tatu manö abua ba wamalua yaʼia. Hizaʼi, tola taʼandrö geheha moroi khö Yehowa ba wanolo yaʼita enaʼö taʼoʼö fefu hadia ia wanuturu lala nibeʼe ndra satua sokubaloi. Angeraigö göi hadia mbuania ba mbanua niha Keriso na so khöda wangide-ngideʼö hegöi na falulu fohalöwö ita khö ndra satua sokubaloi. So wahasara dödö ba mbanua niha Keriso, ba faoma laʼomasiʼö nawöra fefu.
10. Hadia zinangea lafalua ira enoni enaʼö so wahasara dödö ba mbanua niha Keriso? (Faigi gambara ba wamobörö wamahaʼö.)
10 Ira enoni tola latolo mbanua niha Keriso enaʼö so wahasara dödö. Falulu fohalöwö ira khö ndra satua sokubaloi. Lafaigi göi hadia ibönö mbuku niʼogunaʼöda ba wanuriaigö, ba latemaʼö na so niha sawena möi ba gangowuloa. Laʼodödögö göi ba wangehaogö Balai Kerajaan hegöi ba wondrorogö yaʼia enaʼö lö taʼunö. Tatu manö taʼandrö khöra saohagölö ba nifaluara andrö. Na falulu fohalöwö ita khöra, fefu halöwö ba mbanua niha Keriso tola toföfö.—Fatimbaisi Halöwö Zinenge 6:3-6.
11. Hadia zi tola lafalua ira talifusöda ono matua ba wangaʼaroʼö fahasara dödö?
11 Ato zatua sokubaloi samorege halöwö ba mbanua niha Keriso ba zi haʼuga fakhe faʼara. Hizaʼi, börö me itugu atua ira tola manö lö oya zi tola lafalua simane me mböröta. Ira talifusöda ono matua tola labeʼe wanolo. Na tefahaʼö ira, tola lafalua halöwö ba mbanua niha Keriso. Na laʼodödögö halöwöra ira enoni, samuza inötö tola manö tobali ira satua sokubaloi. (I Tim. 3:1, 10) Iadaʼa, so ösa ndra satua sokubaloi sagawuyu boto, oya halöwö si tola lafalua. So zi tobali pengawas wilayah ba oya mbanua niha Keriso si no latolo. Tatu manö taʼandrö saohagölö khöra me aoha gölöra wamalua daʼa.—Baso Zinunö 110:3; Zangombakha 12:1.
FALULU FOHALÖWÖ YOMO BA NOMO
12, 13. Hewisa enaʼö falulu fohalöwö zi sambua omo?
12 Hewisa enaʼö falulu fohalöwö ita yomo ba nomo? Sambua lala yaʼia daʼö na fao ita ba wamahaʼö ba nomo nifalua ero migu. Satua hegöi iraono tola fao ira ba wamahaʼö sanandrösa khö Yehowa, enaʼö tedou waʼomasira khö nawöra. Ba mbongi wamahaʼö ba nomo, tola lafahaʼö ira hewisa lala weʼamöi manuriaigö. Ba wamahaʼö andrö, tola göi lafondro-ndrongo na so zodunö-dunö sanandrösa ba Zura Niʼamoniʼö irege laʼila wa fefu ira laʼomasiʼö Yehowa ba lafalua zomasi ia. Lua-luania itugu aro wahuwusara ba nomo.
Na mufalua mbongi wamahaʼö ba nomo, tola itugu aro wahuwusa zatua hegöi iraono (Faigi ngenoli si 12, 15)
13 Hewisa enaʼö falulu fohalöwö zi sambua ngambatö? (Mat. 19:6) Na faoma laʼomasiʼö ba lafalua zomasi Yehowa, tola so khöra waʼomuso dödö ba fahasara dödö ba wongambatö. Moguna laʼoromaʼö waʼomasi khö nawöra, simane nifalua Gaberahamo ba Sara, Izaʼaki ba Rebeka, hegöi Elikana ba Hana. (I Moz. 26:8; I Zam. 1:5, 8; I Fet. 3:5, 6) Na lafalua daʼö, so khöra wahasara dödö ba itugu aro wahuwusara khö Yehowa.—Baso Zangombakha 4:12.
14. Na tenga samosumange Yehowa woʼomou, hadia nifaluau enaʼö aro wongambatöu?
14 No itegu ita Sura Niʼamoniʼö wa tebai mangowalu ba niha si lö mamosumange Yehowa. (II Kor. 6:14) Hizaʼi, so göi woʼomo ndra talifusöda si tenga Samaduhuʼö Yehowa. So zawena mangila sindruhu me no mangowalu ira, ba lö omasi woʼomonia tobali Samaduhuʼö. Tanö böʼönia so göi zangowalu ba zi sara lala famati, hizaʼi ba gafuriata iröi mbanua niha Keriso foʼomonia. Hewaʼae simanö, ira talifusöda andre laʼodödögö sibai ba wondrorogö fongambatöra enaʼö aro ba woloʼö mene-mene Zura Niʼamoniʼö. Abua wamalua daʼa. Duma-dumania, simane Mary ba foʼomonia David, no irai fao ira ba wangai halöwö Yehowa. Ba gafuriata lö omasi David weʼamöi ba gangowuloa. Hizaʼi foʼomonia Mary iʼodödögö enaʼö tobali ia foʼomo si sökhi ba iforomaʼö mbua-bua niha Keriso. Ifahaʼö ndraononia si daönö sanandrösa khö Yehowa ba lö ibato weʼamöi ba gangowuloa hegöi ba gangowuloa sebua. Haʼuga fakhe aefa daʼö, no egebua ndrononia ba tola laʼalui zoguna khöra samösa. Lö faröi Mary ba wamosumange Yehowa hewaʼae oya gabula dödönia. Ba ginötö daʼö, ibörögö ibaso David mbuku nibeʼe Mary. Lua-luania, fasakali möi ia ba gangowuloa. Maʼuwunia si önö fakhe, ihenaigö ihalö gurusi. Na lö hadöi möi David, imane maʼuwunia andrö, ”Abu dödögu na lö möi duagu.” Ba gafuriatania, hewaʼae 25 fakhe no faröi David khö Yehowa ifuli mangawuli ia. Yaʼia hegöi foʼomonia so khöra waʼomuso dödö börö me ifuli fao ira ba wamosumange Yehowa.
15. Hewisa ndra talifusöda si no ara mongambatö tola latolo ndra talifusöda sawena mongambatö?
15 Irugi iadaʼa, lö ibato Satana wamakiko fongambatö. Daʼö mbörö wa moguna falulu fohalöwö zi no mongambatö. Hewaʼae no ara mongambatö ndraʼugö mazui sawena, angeraigö hadia zinangea öwaʼö mazui öfalua enaʼö aro wongambatömi. Ira talifusö si no ara mongambatö tola tobali ira duma-duma si sökhi khö ndra talifusöda sawena mongambatö. Tola lakoni ndra talifusöda sawena mongambatö andre ba nomora enaʼö fao ira ba mbongi wamahaʼö ba nomo. Tola göi laʼila wa moguna sibai laforomaʼö waʼomasi khö ngambatöra zamösana ba so khöra wahasara dödö hewaʼae no ara mangowalu ira mazui löʼö.—Tit. 2:3-7.
”TALABU TASAWA MIYAWA HILI YEHOWA ANDRÖ”
16, 17. Hadia nidöna-döna nono mbanua Lowalangi?
16 Falulu fohalöwö ndraono Gizaraʼeli me möi ira ba Yeruzalema ba wamalua gowasa. Lafaʼanö fefu hadia zoguna khöra ba lala. Aefa daʼö fao ira ba wofanö ba faoma latolo nawöra. Ba gosali, fao ira ba wanuno hegöi ba wamosumange Yehowa. (Luk. 2:41-44) Iadaʼa tafaʼanö ita ba weʼamöi ba gulidanö si bohou. Andrö wa moguna falulu fohalöwö ita ba taʼodödögö wamalua fahasara dödö. Hadia no öʼodödögö wamalua yaʼia?
17 Niha ba gulidanö andre lö khöra fahasara dödö ba asese faʼudu ira gofu hadia ia mbörö. Tobali, taʼandrö sibai saohagölö khö Yehowa börö me no aboto ba dödöda zindruhu ba taʼokhögö wahasara dödö! Ono mbanua Yehowa ba zi sagörö ulidanö lafosumange ia si tefaudu ba zomasi dödönia. Mendrua manö ba ginötö safuria andre, abölö taʼodödögö wahasara dödö yaʼita ono mbanua Yehowa. Simane nifaʼeleʼö Yesaya hegöi Mikha, faoma möi ita ba ”hili Yehowa”. (Yes. 2:2-4; baso Mikha 4:2-4.) Ba zi so föna, omuso sibai dödöda me ”teʼosambuaʼö ita” fefu ba zi sagörö ulidanö ba falulu fohalöwö ba wamosumange Yehowa!