ARTIKEL WAMAHAʼÖ 51
Hasambalö Alua Dötönafömö ba zi So Miföna
”Lö afatö dödöda ba wanötöna andrö.”—ROM. 5:5.
SINUNÖ 142 Tötönaföda Böi Taʼefasi
NITUTUNÖa
1. Hana wa tola tawaʼö faduhu dödö Gaberahamo wa hasambalö alua nidöna-dönania?
FAWUʼU LI Yehowa khö zi fahuwu khönia sotöi Aberahamo wa tefahowuʼö fefu soi börö ngaʼötönia. (1 Mo. 15:5; 22:18) Börö me aro wamati Gaberahamo khö Yehowa, andrö wa faduhu dödönia wa fefu nifabuʼu Lowalangi hasambalö alua. Hizaʼi me no 100 fakhe ndröfi Gaberahamo ba 90 fakhe ndröfi woʼomonia, lö nasa si tumbu khöra ndraono. (1 Mo. 21:1-7) Imane Sura Niʼamoniʼö, ”Manötöna ba mamati [Gaberahamo] wa tobali ia ama dozi soi hewaʼae na tebai dali wamaigi niha.” (Rom. 4:18) Simane si no taʼila, alua nitötöna Gaberahamo. Tobali ia ama khö nononia Izaʼaki si no ara ibalo-baloi. Hadia zi tobali dane-dane waʼafaduhu dödö Gaberahamo?
2. Hana wa faduhu dödö Gaberahamo wa hasambalö alua mbuʼusa li Lowalangi?
2 Börö me aro gamakhaitania khö Yehowa, andrö wa faduhu dödö Gaberahamo wa tola ”ifalua mbuʼusa linia Lowalangi”. (Rom. 4:21) Omuso dödö Yehowa khö Gaberahamo ba ifotöi ia niha satulö börö wamatinia. (Yak. 2:23) Simane nitutunö ba Roma 4:18, mamati Gaberahamo ba iʼokhögö göi dötönafö. Iadaʼa datatutunö hadia niwaʼö Waulo sanandrösa ba dötönafö nisura ba Roma faza 5.
3. Hadia nitutunö Waulo sanandrösa ba dötönafö?
3 Itutunö Faulo hadia mbörö wa tola tafaduhusi tödö wa ”lö afatö dödöda ba wanötöna andrö”. (Rom. 5:5) Itutunö göi hewisa lala enaʼö itugu aro dötönaföda. Sagötö tafareso hadia nitutunö Waulo ba Roma 5:1-5, angeragö hadia zi no irai alua khömö. Na öfalua daʼö, tola öʼila wa no itugu aro dötönafömö töra moroi ba zilalö. Ba artikel daʼa, tatutunö göi hewisa enaʼö itugu aro nasa dötönafömö. Si oföna, datatutunö wanötöna sahöli-höli dödö niwaʼö Waulo si lö möi fangafatö dödöda.
FANÖTÖNA SAHÖLI-HÖLI DÖDÖ NIʼOKHÖGÖDA
4. Hadia nitutunönia ba Roma 5:1, 2?
4 Baso Roma 5:1, 2. Isura daʼa Faulo ba mbanua niha Keriso ba Roma. Ira talifusöda si so ba daʼö, no lafahaʼö ira sanandrösa khö Yehowa hegöi khö Yesu, no laforomaʼö wamati ba no tobali ira niha Keriso. Andrö wa ifotöi ira Lowalangi ’no atulö börö wamati’, ba ibayoini ira faoma eheha niʼamoniʼö. No laʼokhögö dötönafö saro ba sahöli-höli dödö.
5. Hadia dötönafö niʼokhögö ndra niha nibayoini?
5 Lö ara aefa daʼö, ifaʼoheʼö zurania Faulo khö ndra niha nibayoini ba Nefeso sanandrösa ba dötönafö nibeʼe Lowalangi khöra, yaʼia daʼö ”ondröita ba niha niʼamoniʼö”. (Ef. 1:18) Ifatunö göi Faulo khö ndra niha Keriso ba Golose hezo so dania latema dötönaföra andrö. Iwaʼö wa daʼö ’wanötöna nihenaigö khöra ba zorugo’. (Kol. 1:4, 5) Eluahania, tötönafö niʼokhögö niha Keriso si no mubayoini yaʼia daʼö tesusugi dania ira ba wanöndra faʼauri si lö aetu ba zorugo, ba fao ira mamatörö awö Keriso.—1 Te. 4:13-17; Fam. 20:6.
Iforomaʼö talifusöda F. W. Franz wa fefu niha Keriso nibayoini faduhu dödöra wa hasambalö alua nitötönara (Faigi ngenoli si 6)
6. Hadia niwaʼö zi samösa niha nibayoini sanandrösa ba dötönafönia?
6 Omuso sibai dödö niha nibayoini ba wanötöna andrö. Samösa dalifusöda nibayoini sotöi Frederick Franz, imane me döfi 1991, ”Hasambalö alua dötönaföma, ba fefu ndraʼaga si farahu ba gotalua zi 144.000 niha, hasambalö matema nifabuʼu Lowalangi, töra moroi ba zi no makhalaigö.” Hewaʼae no ngafulu fakhe lö faröi ia ba wangai halöwö khö Lowalangi, imane talifusöda Franz, ”Lö tebulö ebua sibai mböli dötönafö andrö ba dödöma. . . . Itugu ara mabaloi ba itugu ebua mbölinia bakha ba dödöma. No sinangea mabaloi daʼö gofu hawaʼara alua ia. Itugu ebua mböli dötönafö andrö ba dödögu töra moroi ba zilalö.”
7-8. Hadia dötönafö niʼokhögö niha sato samosumange Yehowa? (Roma 8:20, 21)
7 Ato zamosumange Yehowa ba ginötö andre sangokhögö tötönafö si faböʼö. Daʼa wanötöna niʼokhögö Gaberahamo, yaʼia daʼö faʼauri si lö aetu ba gulidanö barö Wamatörö Lowalangi. (Heb. 11:8-10, 13) No isura Faulo sanandrösa ba dötönafö sahöli-höli dödö andre. (Baso Roma 8:20, 21.) Me awena öfahaʼö ndraʼugö ba mbuʼusa li nitutunö Zura Niʼamoniʼö sanandrösa ba zi so miföna, hadia zadöni dödömö? Hadia adöni dödömö ba dötönafö wa lö saʼae göna ndraʼugö fökhö, atua ba mate? Mazui, ba dötönafö wa ifuli tesusugi nösi nomomö hegöi si fahuwu khöu ba zi so miföna? Börö dötönafö nibeʼe Lowalangi, oya zahöli-höli dödö si tola öbaloi waʼaluania.
8 He ba zorugo mazui ba gulidanö so dötönaföda, fefu daʼö oi sahöli-höli dödö ba sameʼe khöda faʼomuso dödö. Hewisa enaʼö itugu aro dötönaföda andrö? Datatutunö hadia nisura Waulo soʼamakhaita ba dötönafö. Daʼö zanolo yaʼita enaʼö itugu faduhu dödöda wa hasambalö alua nidöna-dönada ba lö afatö dödöda ibeʼe.
HEWISA ENAʼÖ ITUGU ARO WANÖTÖNADA?
Fefu niha Keriso hasambalö göna ira famakao (Faigi ngenoli si 9-10)
9-10. Simane Faulo, hadia zi lö tola löʼö alua khöda? (Roma 5:3) (Faigi göi gambara.)
9 Baso Roma 5:3. Iwaʼö Faulo, na tatörö wamakao, hasambalö itugu aro dötönaföda. Hadia atulö daʼö? Sindruhunia, fefu nifahaʼö Keriso hasambalö lataögö wamakao. Duma-dumania, imane Faulo ba niha Desalonika, ”Sagötö wefaoma khömi, asese maʼombakhaʼö wa hasambalö tatörö wamakao ba miʼila samösa wa daʼö zalua.” (1 Te. 3:4) Imane göi khö ndra niha Gorindro, ”Yaʼami ira talifusö, omasiga enaʼö miʼila wamakao nitöröma . . . irege mawaʼö tödöma wa si mate saʼae ndraʼaga.”—2 Ko. 1:8; 11:23-27.
10 Oya gabula dödö salua khö ndra niha Keriso ba ginötö andre. (2 Ti. 3:12) Hadia göna ndraʼugö famakao börö wamatimö khö Yesu mazui me no tobali ndraʼugö soloʼö khönia? Te laʼoʼaya ndraʼugö ira si fahuwu khömö mazui ösi nomomö. Tola manö lafalua khömö zi lö sökhi. Hadia göna ndraʼugö abula dödö ba nahamö wohalöwö börö me ötörö zindruhu ba ngawalö hadia ia? (Heb. 13:18) Hadia göna ndraʼugö folohi moroi khö ndra samatörö börö halöwö fanuriaigö? Gofu hadia gabula dödö salua khöda, iwaʼö Faulo wa hasambalö taʼokhögö waʼomuso dödö. Hadia mbörö?
11. Hadia mbörö wa moguna taforomaʼö waʼanau gölö na göna ita fanandraigö?
11 Tola tarasoi waʼomuso dödö hewaʼae tefakao ita, börö me taʼila wa möi fanoloda daʼö ba wangokhögö bua-bua si sökhi. Simane niwaʼö ba Roma 5:3, ”famakao andrö zangaʼasogö faʼanau gölö”. Fefu niha Keriso hasambalö lataögö gabula dödö. Daʼö mbörö wa moguna laʼokhögö waʼanau gölö. Moguna taforomaʼö waʼanau gölö gofu hadia zalua khöda. Tola tatema mbua dötönaföda andrö na anau gölöda ba lö faröi ita ba wamosumange Yehowa. Lö omasi ita tobali tanömö saekhu ba dete gara simane ba gamaedola nibeʼe Yesu. Ba wamobörö, omuso sibai dödönia ba wanema turia si sökhi, hizaʼi ”me itörö ia famakao mazui fangoʼaya” awuwu ia. (Mat. 13:5, 6, 20, 21) Sindruhu wa lö aoha wanaögö na alua khöda gabula dödö, hizaʼi so mbua nitemada na anau gölöda. Hadia duma-dumania?
12. Hadia gunania na anau gölöda wanaögö abula dödö?
12 Itutunö Yakobo hadia gunania na anau gölöda. Imane, ”Yalötebulö miforomaʼö waʼanau gölö irugi gamozua, enaʼö moʼahonoa ami, lö mosinegu, ba lö moʼamböta gofu hadia ia.” (Yak. 1:2-4) Moloʼö Yakobo, so gohitö dödö sinangea ikhamö faʼanau gölö. Hadia daʼö? Itolo ndraʼugö enaʼö itugu öʼokhögö waʼebolo dödö, famati ba abölö öʼodaligö Lowalangi. Hizaʼi, so mbua si sökhi tanö böʼö nitemada na anau gölöda.
13-14. Hadia mbuania na anau gölöda, ba hadia gamakhaitania daʼö ba dötönaföda? (Roma 5:4)
13 Baso Roma 5:4. Imane Faulo, ”Na anau gölöda omuso dödö Lowalangi.” Tenga daʼö geluahania wa omuso dödö Yehowa na göna ndraʼugö fanandraigö mazui abula dödö. Hizaʼi, omuso dödönia na lö faröi ndraʼugö ba wangoromaʼö faʼanau gölö. Tatu tefarou sibai dödöda börö me taʼila wa tola taʼomusoiʼö dödö Yehowa na anau gölöda!—Si. 5:12.
14 Törö tödöu gabula dödö salua khö Gaberahamo. Börö me anau gölönia, daʼö mbörö wa omuso sibai dödö Yehowa khönia. Tobali ia si fahuwu khö Yehowa ba tefotöi ia niha satulö. (1 Mo. 15:6; Rom. 4:13, 22) Tola göi tatema howu-howu simane daʼö. Omuso dödö Yehowa, tenga börö me oya halöwö mazui noro dödö nitemada, hizaʼi börö me anau gölöda wanaögö famakao. Tola anau gölöda gofu hawaʼalawa ndröfida, hadia zalua ba waʼaurida mazui hawaʼabölöda. Hadia so gabula dödö nitaögömö iadaʼa ba moguna öforomaʼö waʼanau gölö? Na simanö, törö tödömö wa no öʼomusoiʼö dödö Yehowa. Na öʼangerönusi daʼö, tola itugu aro dötönafömö.
TÖTÖNAFÖ SARO
15. Hadia nasa niwaʼö Waulo, ba hana wa so ösa niha lö aboto sibai ba dödöra daʼö?
15 Simane nitutunö Waulo, tola omuso dödö Yehowa na anau gölöda ba wanaögö fanandraigö. Nehegö atö dohu-tohu wehede Waulo, ”Na omuso dödö Lowalangi iʼasogö khöda wanötöna. Lö afatö dödöda ba wanötöna andrö.” (Rom. 5:4, 5) So ösa niha, lö aboto sibai ba dödöra geluaha wehede daʼö. Hadia mbörö? Simane niwaʼönia ba Roma 5:2, itutunö Faulo wa fefu niha Keriso ba Roma, no laʼokhögö dötönafö yaʼia daʼö ’tötönafö ba wanema lakhömi Lowalangi’. Börö daʼö, te so ösa zangumaʼö, ’Ba ayati 4 hegöi 5, hana wa ifuli itötöi Faulo sanandrösa ba dötönafö?’
Me no itugu numalö ginötö, itugu aro dötönaföu töra moroi ba zilalö. Itugu öʼameʼegö tödö ba öbalo-baloi waʼaluania (Faigi ngenoli si 16-17)
16. Beʼe duma-duma sangoromaʼö wa tola itugu aro wanötöna andrö. (Faigi göi gambara.)
16 Tola taʼila geluaha wehede Waulo na tatörö tödöda wa tola itugu aro dötönafö andrö. Duma-dumania: Hadia itörö tödömö me awena sibai örongo dötönafö sahöli-höli dödö sanandrösa ba gulidanö Faradaiso si no tesura ba Daromali Lowalangi? Ba wamobörö, te ambö faduhu dödömö hadia sindruhu-ndruhu alua ia mazui löʼö. Hizaʼi, me itugu tedou waʼaboto ba dödömö sanandrösa khö Yehowa hegöi buʼusa linia ba Zura Niʼamoniʼö, itugu faduhu dödömö wa hasambalö alua dötönafö andrö.
17. Hewisa wa tola itugu aro dötönafömö na no ölulu waʼaurimö ba tebayagö ndraʼugö idanö?
17 Me no ölulu waʼaurimö ba öfabayagöʼö ndraʼugö idanö, moguna nasa itugu tedou waʼaboto ba dödömö sanandrösa khö Yehowa ba öʼomasiʼö ia. Na öfalua daʼö, itugu aro dötönafömö. (Heb. 5:13–6:1) Te no irai alua khömö zimane nitutunö ba Roma 5:2-4. No oya wamakao salua khöu, hizaʼi no öforomaʼö waʼanau gölö ba örasoi wa omuso dödö Yehowa ba nifaluamö. Daʼö zangaʼaroʼö tödöu wa hasambalö ötema hadia zi no ifabuʼu Yehowa. Itugu aro dötönafömö töra moroi ba zilalö. Hulö zi no alua ia. Ebua sibai lua-luania daʼö ba ngawalö nifaluamö, duma-dumania, itolo ndraʼugö ba wombulöʼö amuatamö ba nösi nomomö, ba wangai angetula hegöi ba wangogunaʼö inötö.
18. Hadia weʼe-weʼe dödö nibeʼe Yehowa?
18 No itutunö Faulo wa tola taʼokhögö dötönafö na taʼomusoiʼö dödö Lowalangi. Hizaʼi, inönö nasa wangombakha khöda wa hasambalö alua dötönaföda. Ba wangaʼaroʼö tödöda sanandrösa ba daʼö, isura sambua weʼe-weʼe dödö moroi khö Lowalangi ba niha Keriso imane, ”Lö afatö dödöda ba wanötöna andrö, börö me no iʼamualagö ba dödöda waʼomasi Lowalangi moroi ba gehehania si no ibeʼe khöda.” (Rom. 5:5) Sindruhu-ndruhu tola mufaduhusi tödö dötönafö nibeʼe Yehowa khöda.
19. Hadia manö zi tola öfaduhusi tödö?
19 Angerönusi mbuʼusa li Yehowa khö Gaberahamo ba hadia mbörö wa omuso dödö Yehowa khönia irege tobali ia si fahuwu khö Lowalangi. Hasambalö alua nidöna-döna Gaberahamo. Imane Sura Niʼamoniʼö, ”Börö me no ibaloi Aberahamo, andrö wa itema zi no mufabuʼu andrö.” (Heb. 6:15; 11:9, 18; Rom. 4:20-22) Tatu manö lö afatö dödö Gaberahamo. Na lö faröi göi ndraʼugö, hasambalö ötema zi no ödöna-döna. Hasambalö alua daʼö! Daʼö mbörö wa ösöndra waʼomuso dödö, tenga faʼafatö dödö. (Rom. 12:12) Imane Faulo, ”Lowalangi wanötöna andrö, yaʼibeʼe khömi waʼomuso dödö ba faʼohahau dödö börö me faduhu dödömi khönia irege afönu wanötönami ba waʼabölö geheha niʼamoniʼö.”—Rom. 15:13.
SINUNÖ 139 Khalaigö Waʼaurimö ba Gulidanö si Bohou
a Ba artikel daʼa, tatutunö hadia dötönafö niʼokhögöda ba hadia mbörö wa faduhu dödöda wa hasambalö alua daʼö ba zi so miföna. Tobali fanoloda nisura ba Roma faza 5 irege taʼila hadia gamaehutania dötönafö niʼokhögöda iadaʼa faoma me awena tafahaʼö ita ba zindruhu.