”Mitatugöi Iadaʼa Haniha Nifosumangemi”

1. Hadia zinangea tafalua na omasi ita ohahau dödöda, ba hadia mbörö? (Yesaya 48:​17, 18)

IʼOMASIʼÖ ita Amada si so ba zorugo. Omasi ia na tarasoi waʼomuso dödö ba waʼaurida iadaʼa hegöi ba zi so miföna. (Sango. 3:​12, 13) Me iwöwöi ita, ibeʼe khöda waʼabölö ba wamalua ngawalö zahöli-höli dödö. Hizaʼi, lö nibeʼenia khöda faʼatua-tua ba wotatugöi samösa hadia zatulö hegöi si sala, ba lö tola löʼö moguna khöda wanuturu lala moroi khönia. (Sango. 8:9; Yer. 10:23) Moguna tafosumange ba taʼoʼö niwaʼönia na sindruhu-ndruhu omasi ita tarasoi waʼomuso dödö ba waʼaurida.—Baso Yesaya 48:​17, 18.

2. Hadia zomasi Zatana enaʼö tafaduhusi tödö, ba hadia nifalua Yehowa ba wangoromaʼö wa fasala daʼö?

² Omasi Zatana na faduhu dödöda wa tola tasöndra waʼomuso dödö hewaʼae lö hadöi fanuturu lala moroi khö Yehowa. (1 Mo. 3:​4, 5) Ba wangoromaʼö wa fasala daʼö, itehegö ba niha Yehowa ba wamatörö faʼaurira samösa irugi iadaʼa. Ba no oroma ba mbuania wa fasala daʼö ba lö mofozu. Hizaʼi, so waö-waö ndra matua hegöi ira alawe si no tesura ba Zura Niʼamoniʼö sanöndra faʼomuso dödö börö me lafosumange Yehowa. Fondrege zomuso tödö ba gotaluara yaʼia daʼö Yesu Keriso. Si oföna, datatutunö hadia mbörö wa ihalö gangetula Yesu ba wamosumange Yehowa. Aefa daʼö, tafahaʼö ita hadia mbörö wa no sinangea tafosumange Namada Yehowa. Safuria, tatutunö hadia mbörö wa tahalö gangetula ba wamosumange Yehowa.

HADIA MBÖRÖ WA IHALÖ GANGETULA YESU BA WAMOSUMANGE YEHOWA?

3. Hadia nitehegö Zatana khö Yesu, ba hadia gangetula nihalö Yesu?

³ Me so Yesu ba gulidanö, moguna ihalö gangetula haniha zomasi ia ifosumange. Lö ara me no aefa tebayagö ia idanö, itehegö khönia Satana ba wangokhögö fefu famatörö si so ba gulidanö andre asala mangalulu khönia Yesu sakali manö. Hizaʼi imane Yesu, ”Betaʼögö Satana! Börö me so ba zura, ’Ha khö Yehowa Lowalangiu mangalulu ndraʼugö ba öfosumange ia, ba ha khönia öbeʼe halöwö niʼamoniʼö.’” (Mat. 4:​8-10) Hadia mbörö wa ihalö gangetula daʼö Yesu?

4-5. Hadia manö mbörö wa ihalö gangetula Yesu ba wamosumange Yehowa?

⁴ Ihalö gangetula Yesu ba wamosumange Yehowa börö me iʼomasiʼö sibai Namania. (Yoh. 14:31) Ifosumange göi Yehowa börö me daʼö gangetula si tefaudu. (Yoh. 8:​28, 29; Fam. 4:11) Aboto ba dödönia wa Yehowa andrö Umbu waʼauri, tola mufaduhusi tödö ba oböwö sibai. (Si. 33:4; 36:9; Yak. 1:17) Fefu niwaʼö Yehowa khö Yesu oi sindruhu, ba oya ngawalö zi sökhi nibeʼenia khö Yesu. (Yoh. 1:14) Hizaʼi, tenga simane daʼö Zatana. Sindruhunia, yaʼia mbörö wa aekhu niha ba horö ba mate. Yaʼia andrö si falimo safönu fakhögusa. (Yoh. 8:44) Börö daʼö, lö omasi Yesu na ifaogö ia khö Zatana ba wolawa Yehowa. Lö irai tumbu ba wangera-ngerania daʼö.—Fil. 2:​5-8.

⁵ Baero daʼö, ihalö göi gangetula Yesu ba wamosumange Yehowa börö me iʼila wa oya sibai howu-howu si tola alua ba halöwö fanuriaigö nifaluania. (Heb. 12:2) Aboto ba dödönia, na lö faröi ia tola teʼamoniʼö döi Namania ba tola ihenaigö höli, si tobali dane-dane ba wangeheta horö hegöi faʼamate.

HADIA MBÖRÖ WA NO SINANGEA TAFOSUMANGE YEHOWA?

6-7. Hadia mbörö wa ato niha iadaʼa zi lö mamosumange Yehowa, hizaʼi hadia mbörö wa no sinangea tafosumange ia?

⁶ Iadaʼa, ato niha zi lö omasi mamosumange Yehowa börö me lö saboto ba dödöra haniha ia. Lö saboto ba dödöra gamuatania sahöli-höli dödö awö ngawalö zi no ifalua khöra. Yaʼira andrö simane niha nituriaigö Waulo ba Atena.—Hal. 17:​19, 20, 30, 34.

⁷ Ifatunö Faulo ba niha Atena wa Lowalangi sindruhu andrö Somböi, ’sameʼe faʼauri ba niha, hanu-hanu, hegöi ngawalö hadia ia’. Baero daʼö, ”moroi ba zi samösa niha ifazökhi fefu soi si toröi ba gulidanö”. Imane nasa, ”Börö ia wa auri ita, maliwa-liwa ita, ba so ita.” Daʼö mbörö wa no sinangea tafosumange Yehowa.—Hal. 17:​25, 26, 28.

8. Hadia zi lö irai ifalua Yehowa, ba hadia nifaluania ba wangoromaʼö wa iʼomasiʼö sibai ita?

⁸ Börö me Yehowa andrö Somböi ba Samatörö banua si yawa awö danö, tola manö ifaso niha ba wamosumange yaʼia. Hizaʼi, lö irai ifalua daʼö Yehowa. Sindruhunia, no oya dandra si no ihenaigö sangoromaʼö wa so ia, ba iʼomasiʼö sibai ita ero zamösana. Omasi ia na fefu niha tobali si fahuwu khönia sagötö faʼara. (1 Ti. 2:​3, 4) Börö daʼö, ifomaha ita ba wamahaʼö niha böʼö sanandrösa ba gohitö dödönia hegöi ngawalö zi sökhi nifaluania ba niha gulidanö. (Mat. 10:​11-13; 28:​19, 20) Ihenaigö göi khöda mbanua niha Keriso irege tola tafosumange ia ba tatema wanolo moroi khö ndra satua sokubaloi safönu faʼomasi.—Hal. 20:28.

9. Hewisa wangoromaʼö Yehowa wa iʼomasiʼö fefu niha?

⁹ Faʼomasi Yehowa sahöli-höli dödö oroma moroi ba nifaluania ba niha gulidanö, farahu ba daʼö niha si lö faduhu tödö khönia. Khalaigö atö: Sagötö sejarah, miliaran niha samili ba wotatugöi lala waʼaurira samösa ba lö laʼangeragö goi-goi Yehowa. Hewaʼae simane daʼö, si fao faʼasökhi dödö ibönökhi zoguna khöra Yehowa enaʼö auri ira ba lasöndra waʼomuso dödö. (Mat. 5:​44, 45; Hal. 14:​16, 17) Ibeʼe khöra waʼatua-tua Yehowa enaʼö tola laʼokhögö wahuwusa saro ba niha böʼö, lafasindro wongambatö ba larasoi waʼomuso dödö ba niʼeregesira tödö. (Si. 127:3; Sango. 2:24) Daʼö fefu zangoromaʼö wa iʼomasiʼö fefu niha Amada si so ba zorugo. (2 Mo. 34:6) Iadaʼa, datatutunö hadia manö mbörö wa omasi ita tafosumange Yehowa, ba hadia manö howu-howu nitemada.

HADIA MBÖRÖ WA TAHALÖ GANGETULA BA WAMOSUMANGE YEHOWA?

10. (a) Hadia dane-dane siföföna wa tafosumange Yehowa? (Mataiʼo 22:37) (b) Hewisa wangoromaʼö Yehowa faʼebolo dödönia khöu? (Sinunö 103:​13, 14)

¹⁰ Simane Yesu, tafosumange Yehowa börö me taʼomasiʼö ia. (Baso Mataiʼo 22:37.) Tefarou dödöda tobali si fahuwu khönia ba ginötö tafahaʼö ita ba gamuatania. Duma-dumania, angeragö sanandrösa ba waʼebolo dödö Yehowa. Me lö laʼoʼö niwaʼönia iraono Gizaraʼeli, iʼandrö khöra Yehowa imane, ”Mifalalini wangera-ngerami si lö sökhi andrö.” (Yer. 18:11) Aboto ba dödö Yehowa wa lö moʼahonoa ita. (Baso Zinunö 103:​13, 14.) Ba ginötö taʼangerönusi sanandrösa ba waʼebolo dödö Yehowa hegöi amuatania tanö böʼö, tatu manö tefarou dödöda ba wamosumange yaʼia sagötö faʼara.

11. Hadia nasa mbörö wa omasi ita tafosumange Namada si so ba zorugo?

¹¹ Tefarou dödöda ba wamosumange Yehowa börö me no sinangea tafalua daʼö. (Mat. 4:10) Baero daʼö, aboto göi ba dödöda na lö faröi ita ba wamosumange Yehowa, hasambalö sökhi mbuania. Duma-dumania, no fao ita ba wangamoniʼö töi Yehowa, no tafaduhuʼö wa si falimo Gafökha, ba no taʼomusoiʼö dödö Namada. Na tahalö gangetula iadaʼa ba wamosumange Yehowa, tebeʼe dania khöda ginötö ba wamosumange yaʼia sagötö faʼara!—Yoh. 17:3.

12-13. Hadia wamahaʼö nihalöda moroi ba zalua khö Jane hegöi Pam?

¹² Tola tadouʼö waʼomasida khö Yehowa iʼotarai ba waʼide-ide, ba itugu tedou waʼomasi andrö irege atua ita. Nehegö zalua khö zi darua si fatalifusö sotöi Jane hegöi Pam.a Awena 11 ba 10 fakhe ndröfira me ibörögö lafahaʼö ira ba Zura Niʼamoniʼö. Lö omasi ndra satuara wamahaʼö yaʼira ba Zura Niʼamoniʼö khö ndra Samaduhuʼö Yehowa. Hizaʼi, latehegö khö Jane hegöi Pam na lafahaʼö ira, asala fao ira khö ndra satuara weʼamöi ba gosali ero hari Migu. Imane Jane, ”Famahaʼö nifaʼema ndra Samaduhuʼö Yehowa si teʼodane-dane ba Zura Niʼamoniʼö, daʼö zanolo yaʼo ba wanimbagö fondrönisi dödö moroi khö ndra awö-awögu ba wamadu narkoba hegöi ba wamalua fohorö.”

¹³ Mato hauga fakhe aefa daʼö, tobali ira sanuriaigö. Ba gafuriata merintis biasa ira ba larorogö göi zatuara si no alawa döfi. Me ifuli itörö tödöra zalua khöra, imane Jane, ”No urasoi samösa hewisa waʼalöfaröi Yehowa ba wondrorogö niha si fahuwu khönia. Ba simane niwaʼönia ba 2 Timoteo 2:​19, ’Iʼila Yehowa haniha dana khönia.’” Börö daʼö, faduhu dödöda wa iʼameʼegö tödö Yehowa niha sangai angetula ba wangomasiʼö hegöi ba wamosumange yaʼia!

14. Hewisa ita ba wangoʼawögö töi Yehowa? (Faigi göi gambara.)

¹⁴ Tatu omasi ita ba wangamoniʼö töi Yehowa moroi ba ngawalö niböbögö khönia. Khalaigö atö: So samösa zi fahuwu khöu si sökhi amuata, soböwö ba omasi sibai ia mangefaʼö sala. Samuza maʼökhö, laböbögö khönia zi lö duhu, labaliʼö ia niha samuʼi ba si falimo-limo. Hadia nifaluamö? Tatu omasiʼö öʼoʼawögö ia. Simane daʼö göi, ba ginötö laböbögö zi lö duhu khö Yehowa, tatu omasi ita taʼoʼawögö ia ba tatutunö zindruhu sanandrösa khönia. (Si. 34:1; Yes. 43:10) Moroi ba wehede hegöi amuatada, taforomaʼö wa omasi ita tafosumange Yehowa soroi ba dödö.

15. Hadia howu-howu nitema Waulo börö me ifalua wombulöʼö? (Filifi 3:​7, 8)

¹⁵ Tafalua wombulöʼö ba waʼaurida enaʼö tola taʼomusoiʼö dödö Yehowa ba itugu oya zi tola tafalua ba wamosumange yaʼia. Nehegö duma-duma Waulo. No tebeʼe khönia dadaoma salawa ba agama Yahudi. Hizaʼi, iröi daʼö fefu enaʼö tola tobali ia nifahaʼö Keriso ba ifosumange Yehowa. (Gal. 1:14) Buania, irasoi waʼomuso dödö, ba tebeʼe khönia ginötö ba wamatörö awö Keriso ba zorugo. Lö irai maniasa ia ba gangetula nihalönia andrö. Simanö göi ita, lö irai maniasa ita na tahalö gangetula ba wamosumange Yehowa.—Baso Wilifi 3:​7, 8.

16. Hadia wamahaʼö nihalöda moroi ba zalua khö Julia? (Faigi göi gambara.)

¹⁶ Na taʼosambuaʼö dödöda ba wamosumange Yehowa, tatema howu-howu iadaʼa hegöi ba zi so miföna. Nehegö zalua khö dalifusöda Julia. Me awuyu-wuyu ia, fao ia ba zekola wanunö ba gerejania. Onekhe sibai ia wanunö irege ibörögö itema wamomaha enaʼö tobali ia niha sanunö si tehöngö. Lö ara aefa daʼö, tehöngö ia ba asese lakaoni ia manunö. Me ifomaha ia ba sekolah musik si tehöngö, so samösa nawönia samörögö fahuhuo khönia sanandrösa khö Lowalangi. Ifatunö khönia awönia andrö wa so döi Lowalangi, yaʼia daʼö Yehowa. Lö ara aefa daʼö, ibörögö ifahaʼö ia Julia ba Zura Niʼamoniʼö dua kali samigu. Ba gafuriata, ihalö gangetula ba wangosambuaʼö tödönia ba wamosumange Yehowa, ba lö saʼae igohi enaʼö tobali ia niha si tehöngö ba wanunö. Abua wangai angetula daʼa. Imane Julia, ”Ato niha sangumaʼö khögu wa no uʼalimagösi waʼonekhe si no uʼokhögö. Hizaʼi, omasido uʼogunaʼö waʼaurigu ba wamosumange Yehowa. Me no 30 fakhe ihalö gangetula daʼö Julia, hewisa dödönia? Imane, ”Urasoi waʼahono dödö, ba faduhu dödögu wa ibönökhi zomasi-masi dödögu Yehowa ba zi so miföna.”—Si. 145:16.

BÖI BÖHÖLI WAMOSUMANGE YEHOWA

17. Börö me no itugu ahatö gamozua götö danö andre, hadia lua-luania daʼö ba niha si lö nasa mamosumange Yehowa hegöi ba niha si no mamosumange yaʼia?

¹⁷ No itugu ahatö gamozua götö danö andre. Imane Faulo, ”Ba ’zi lö ara tö’, ’tohare zi möi andrö ba lö ahou weʼasonia.’” (Heb. 10:37) Börö daʼö, ba niha si lö nasa mangai angetula ba wamosumange yaʼia, lö oya tö ginötö niʼokhögöra ba wangai angetula hadia omasi ira lafosumange Yehowa mazui löʼö. (1 Ko. 7:29) Hizaʼi, yaʼita si no mangai angetula ba wamosumange Yehowa, aboto ba dödöda wa hewaʼae göna ita fanandraigö, ha sabata waʼalua daʼö.

18. Hadia niʼandrö Yesu hegöi Yehowa enaʼö tafalua?

¹⁸ Ifarou ndra nifahaʼönia Yesu tenga ha ba woloʼö yaʼia, hizaʼi enaʼö lö laböhöli wamalua daʼö. (Mat. 16:24) Börö daʼö, hewaʼae no hauga wulu fakhe no tafosumange Yehowa, datahalö gangetula enaʼö lö awuwu ita. Moguna taforege enaʼö lö taböhöli wamosumange Yehowa. Te abua wamalua daʼö. Hizaʼi, na tafalua ia hasambalö fahöna howu-howu nitemada ba tasöndra waʼomuso dödö iʼotarai iadaʼa!—Si. 35:27.

19. Hadia wamahaʼö nihalöda moroi ba zalua khö Gene?

¹⁹ So ösa niha sorasoi wa tebai laʼomusoiʼö dödöra ba waʼaurira na lafosumange Yehowa. Yaʼami si bohou ebua, hadia mirasoi wa aföli ami waʼaurimi börö me mifosumange Yehowa? Imane talifusöda si bohou ebua sotöi Gene, ”Ambö ami dödögu na tobalido Samaduhuʼö Yehowa. Na ufaigi ndraono tanö böʼö omuso-muso dödöra wefao khö ndra awö-awöra weʼamöi manörö-nörö, fakawa mazui lamaikö game si faʼudu-udu. Na yaʼo, möido ba gangowuloa ba manuriaigö.” Hadia lua-luania lala wangera-ngera daʼö khönia? Imane Gene, ”Ibörögö mamodombua tödö ndraʼo. Ba wamobörö omuso dödögu, hizaʼi ha sabata daʼö. Börö daʼö, ufuli uhaogö uʼangeragö hadia mbuania na uʼoʼö mene-mene Zura Niʼamoniʼö. Ba gafuriata, uhalö gangetula ba wamosumange Yehowa soroi ba dödö. Iʼotarai daʼö, urasoi wa ifondrondrongo Yehowa ero-ero na mangandrö ndraʼo.”

20. Hadia gangetula nihalöda?

²⁰ Manunö zi samösa sanura sinunö khö Yehowa, imane, ”Ohahau dödö niha nifilimö ba öfahatö ira khöu, enaʼö laʼiagö golayama nomomö.” (Si. 65:4) Datahalö gangetula simane nihalö Yosua: ”Yaʼo hegöi ösi nomogu, mafosumange Yehowa.”—Yos. 24:15.