FAMAHAʼÖ 10
Lö Tebulö Woloʼö Yesu
Hadia lö tebulö öʼoʼö li zatuamö?— Itaria abua woloʼö li zatua. Hadia öʼila wa lö tebulö woloʼö Yesu li Yehowa hegöi satuania ba gulidanö?— Na öbaso waö-waö Yesu, hasambalö öʼoʼö li zatuau hewaʼae afökhö. Iadaʼa, databaso waö-waönia.
Ba zorugo toröi Yesu khö Namania Yehowa fatua lö möi ia ba gulidanö. Me so ia ba gulidanö, so göi zatuania sotöi Yosefo ba Maria. Hewisa wa tola tobali ira satua Yesu?—
Megenia ba zorugo so Yesu, aefa daʼö tefawuʼa waʼaurinia ba dalu Maria. Andrö wa tola tumbu ia ba gulidanö. Ha Yehowa zi tola mamalua simane daʼö! Itugu tedou waʼebua Yesu ba dalu Maria, hulö simane ono sawuyu tanö böʼö ba dalu ninania. Me no irugi siŵa waŵa, tumbu Yesu. Simanö waö-waönia wa tola tobali satua Yesu Maria ba Yosefo.
Yesu, iʼomasiʼö sibai Namania sotöi Yehowa. Iforomaʼö waʼomasinia andrö me 12 fakhe ia, me möi ira fefu ba Yeruzalema ba wamalua gowasa Fasa. Aröu danö latörö. Me so ndra satuania ba lala ba wangawuli, awena laʼila wa lö Yesu ba gotaluara. Moloʼö yaʼugö, hezoso so Yesu?—
Hadia nifalua Yesu ba gosali?
Laʼanemai mangawuli ira Yosefo ba Maria ba Yeruzalema ba wangalui Yesu. Abu sibai dödöra me lö laʼila hezo so Yesu. Tölu ngaluo aefa daʼö awena lasöndra Yesu. Ba gosali so ia! Hadia halöwö Yesu ba daʼö?— Ifahaʼö ia sanandrösa khö Namania, Yehowa. Iʼomasiʼö sibai Yehowa, andrö iʼalui lala ba wangomusoiʼö tödö Namania. Me no ebua ia, lö tebulö iʼoʼö li Yehowa, hewaʼae afökhö, ba itörö wamakao. Hadia Yesu andrö iʼoʼö göi li ndra Yosefo ba Maria?— Iʼoʼö, simane niwaʼö Zura Niʼamoniʼö.
Hadia zi tola öʼoʼö ba nifalua Yesu?— Oʼö li zatuau, hewaʼae afökhö. Hadia omasiʼö öʼoʼö lira?—