FANEMA LI MOROI BA ZURA NIʼAMONIʼÖ
Hezo moroi mbörö waʼa lö sökhi?
Haniha zangoʼou yesu ba wamalua si lö sökhi?—Mataiʼo 4:8-10
Si toʼölönia, omasi niha na fahuwu ira ba nawöra niha, lö falimo, ba sökhi lagura. Na simanö, hana waʼasese taʼila waʼalö sökhi, falöʼatulö, ba famakao? No asese tarongo duria si lö sökhi. Haniha zamarou niha wamalua si lö sökhi?—Baso I Yohane 5:19.
Hadia iwöwöi niha gulidanö Yehowa enaʼö lafalua zi lö sökhi? Löʼö. Ifazökhi niha Yehowa si fakhili-khili khönia enaʼö laʼoʼö waʼomasinia. (I Moze 1:27; Yobi 34:10) Hizaʼi no itehegö khöda Yehowa ba wangai angetula. Me lahalö gangetula si lö sökhi Adamo ba Khawa, lö laʼoʼö duma-duma nibeʼe Lowalangi irege lö moʼahonoa ira. Börö horö ondröita wa tola so khöda dödö faʼomasi ba wamalua horö.—Baso V Moze 32:4, 5.
Hadia tola tebato waʼalö sökhi?
Omasi Yehowa na tatimbagö gisö-isö dödö si lö sökhi. (Gamaedola 27:11) Iadaʼa, lö moʼahonoa wamaluada faʼomasi Lowalangi. Hewaʼae simanö, ifahaʼö ita ba wolawa si lö sökhi hegöi lala wanöndra faʼohahau dödö si lö tebulö.—Baso Zinunö 32:8.
Iadaʼa, gofu hezo manö so waʼalö sökhi. Itehegö Lowalangi alua zi lö sökhi hegoi zi lö arara enaʼö aboto ba dödö niha hadia lua-luania nifaluara andrö. (II Fetero 3:7-9) Ba zi lö aratö, anönö gulidanö niha somuso tödö samosumange Lowalangi.—Baso Zinunö 37:9-11.