TUHO SI OFÖNA
Hewisa Wamaigi Lowalangi Fasuwöta?
Ato niha sangumaʼö wa fao dödö Lowalangi ba wasuwöta. So zangumaʼö wa no ifatenge nono mbanuania Lowalangi we fao ba wasuwöta me föna; no göi tesura ia ba Zura Niʼamoniʼö. Hizaʼi, ba wamahaʼö Yesu ifarou ndra nifahaʼönia enaʼö laʼomasiʼö niha si faʼudu khöra. (Mataiʼo 5:43, 44) Tobali, lamane wangumaʼö wa no faböʼö dödö Lowalangi sanandrösa ba wasuwöta irege lö fao dödönia na so zamalua wasuwöta iadaʼa.
Hewisa moloʼö yaʼugö? Hadia fao dödö Lowalangi ba wasuwöta? Na simanö, haniha niʼoʼawögönia na alua wasuwöta ba ginötö andre? Na no ösöndra wanema li moroi ba wanofu andrö, daʼa zi tola mombulöʼö fangera-ngerau sanandrösa ba wasuwöta. Duma-dumania, na öʼila wa fao dödö Lowalangi ba wasuwöta ba faʼawö ia khöu, tola manö faduhu dödöu wa möna ndraʼugö. Hewisa dödöu na faʼawö Lowalangi ba nudumö? Te öfuli öhaogö öʼangeraigö haʼökhö faʼawö ndraʼugö.
Hizaʼi, so zabölö moguna. Na taʼila hewisa wamaigi Lowalangi wasuwöta, daʼa zi tobali dane-dane hewisa dödöda sanandrösa khö Lowalangi. Na so ndraʼugö ba gotalua niha si göna fasuwöta, tatu manö omasi öʼila wanema li moroi ba zinofu andre: Hadia si ndruhu-ndruhu Lowalangi zondröniaʼö niha weʼamöi fasuwö ba fao dödönia na alua wamakao börö wasuwöta simane niwaʼö niha? Hadia lö ba dödö Lowalangi niha si tefakao börö fasuwöta?
Teʼahöli-höli dödöu me öʼila wa faböʼö wanema li Zura Niʼamoniʼö moroi ba wangera-ngera niha. Si ndruhunia lö si tebulö wangera-ngera Lowalangi irugi iadaʼa. Angeraigö atö hadia niwaʼö Zura Niʼamoniʼö sanandrösa ba wamaigi Lowalangi fasuwöta meföna, irugi me möi Yesu ba gulidanö. Daʼa zi tola manolo yaʼita enaʼö aboto ba dödöda hewisa dödö Lowalangi sanandrösa ba wasuwöta iadaʼa ba hadia lö aetu-aetu alua wasuwöta ba gulidanö.