TUHO SI OFÖNA | HEWISA WAMAIGI LOWALANGI FASUWÖTA?
Famaigi Lowalangi Fasuwöta Ba Ndröfi Si Föföna
Ato niha si tefakao ba ndröfi si föföna. Simane ira tuara meföna, niha Yehuda ba ndröfi si föföna lö aetu laʼandrö wanolo moroi khö Lowalangi, börö me lafakao ira niha Roma. Me larongo-rongo sanandrösa khö Yesu, so zangumaʼö wa yaʼia andre Mesia si no tefaʼeleʼö. Andrö wa latötöna sibai wa ”yaʼia zi möi mangorifi iraono Gizaraʼeli” moroi ba niha Roma. (Luka 24:21) Tobali, lö hadöi sanolo yaʼira. Me döfi 70 M, möi zaradadu Roma ba wodudugö Yeruzalema.
Hadia zalua? Hana wa lö fao Lowalangi ba niha Yehuda, simane nifaluania meföna? Hana wa lö itehegö Lowalangi khö ndra niha Yehuda ba wanuwö enaʼö teʼefaʼö ira ba wamakao? Hadia no tebulö dödö Lowalangi ba wasuwöta? Löʼö. Tobali, so mbörö wa tebulö dödö Lowalangi ba niha Yehuda yaʼia daʼö, no latimbagö Yesu, Ono Lowalangi, si tobali Mesia. (Halöwö Zinenge 2:36) Lua-luania, taya wahuwusara khö Lowalangi.—Mataiʼo 23:37, 38.
Lö ilumöʼö saʼae niha Yehuda hegöi Tanö Amabuʼula Lowalangi. Tebai lafaduhuʼö niha Yehuda wa fao Lowalangi khöra ba wasuwöta. No ifaʼeleʼö Yesu wa teheta dania khöra howu-howu si no ifabuʼu Lowalangi, ba tebeʼe ba soi si bohou si no tesura ba Zura Niʼamoniʼö ”ndraono Gizaraʼeli andrö, khö Lowalangi”. (Galatia 6:16; Mataiʼo 21:43) Si ndruhu-ndruhu wa niha Keriso si no tebayoini tobali ira ndraono Gizaraʼeli ba wamati khö Lowalangi. Me döfi si föföna lamane khöra, ’Yaʼami no banua Lowalangi iadaʼe’.—I Fetero 2:9, 10.
Me lafotöi niha Keriso si föföna ”banua Lowalangi”, hadia fasuwö Lowalangi ba wangefaʼö yaʼira moroi ba wamakao niha Roma? Hadia itehegö khöra Lowalangi weʼamöi fasuwö? Löʼö. Hadia mbörö? Simane nifatunöda ba duhö si oföna, na Lowalangi zi möi fasuwö, ha yaʼia zotatugöi hawaʼara alua wasuwöta andrö. Lö fao Lowalangi ba wasuwöta niha Keriso si föföna. Lö göi itehegö khöra ba wamalua fasuwöta. Inötö si no ihonogöi Lowalangi ba wohori si lö sökhi ba si lö atulö tenga ba ndröfi si föföna.
Simane ono mbanua Lowalangi meföna, niha Keriso si föföna labaloi ginötö si no itatugöi Lowalangi ba wangefaʼö yaʼira ba ngawalö wamakao. Fatua lö alua ginötö si no itatugöi Lowalangi, lö itehegö khöra weʼamöi fasuwö. No iʼombakhaʼö khöda Yesu ba wamahaʼönia. Duma-dumania, lö ifahaʼö ndra nifahaʼönia weʼamöi fasuwö, tobali imane khöra, ”Miʼomasiʼö zi fatiu tödö khömi ba miʼangandrö, salahi zolohi yaʼami.” (Mataiʼo 5:44) No ifaʼeleʼö Yesu wa lasuwö Yeruzalema niha Roma. Andrö, iʼoʼou ndra nifahaʼönia enaʼö laröi Yeruzalema, tenga lalau fasuwö. Daʼö nifaluara.—Luka 21:20, 21.
Baerö daʼö, imane Faulo, ”Böi milau mbalömi, . . . noa sa so ba zura, ’Khögu wolau balö, yaʼo zanulöni,’ iwaʼö Soʼaya.” (Roma 12:19) Ifuli itötöi Faulo wehede Lowalangi ngaotu fakhe si lalö si no tesura ba III Moze 19:18 ba V Moze 32:35. Simane nifatunöda ba duho si oföna, lala nifalua Lowalangi ba wanolo nono mbanuania meföna yaʼia daʼö, fao ia ba wanuwö nudu nono mbanuania. Moroi ba wehede Waulo andre aboto ba dödöda wa lö tebulö wamaigi Lowalangi wasuwöta. Ba ndröfi si föföna, famaigi Lowalangi wasuwöta lö tebulö ba omasi iʼefaʼö nono mbanuania moroi ba wamakao ba faʼalösökhi. Hewaʼae simane daʼö, fagölö simane me götö föna hegöi ba ndröfi si föföna, Lowalangi zotatugöi hawaʼara alua wasuwöta ba haniha zi möi manuwö.
No aboto ba dödöda wa lö itehegö Lowalangi ba niha Keriso si föföna weʼamöi fasuwö. Hewisa ba ginötöda andre? Hadia fao dödö Lowalangi na so niha si möi fasuwö? Hadia no irugi inötö khö Lowalangi fao ia ba wosuwö si faʼudu ba nono mbanuania? Hewisa wamaigi Lowalangi fasuwöta ba ginötö andre? Ibeʼe khöda wanema linia ba duho aefa daʼa.