TUHO SI OFÖNA | HEWISA WAMAIGI LOWALANGI FASUWÖTA?
Famaigi Lowalangi Fasuwöta MEFÖNA
Ato niha si tefakao meföna. Asese laʼandrö wanolo moroi khö Lowalangi, hizaʼi lö iʼanemai tefondro-ndrongo wangandröra. Yaʼira andrö iraono Gizaraʼeli, ono mbanua Lowalangi me föna. Tefakao ira ba danö Miserai. (II Moze 1:13, 14) No ara ladöna-döna enaʼö iʼefaʼö ira Lowalangi moroi ba danö Miserai. Ba gafuriatania, tohare ginötö si no itatugöi Lowalangi ba wangefaʼö yaʼira. (II Moze 3:7-10) Sura Niʼamoniʼö zanutunö khöda wa Yehowa zanuwö ndrawa Miserai. So fulu wamakao nibeʼe Yehowa ba danö Miserai, aefa daʼö ibunu Razo Miserai hegöi saradadunia ba Nasi Sukhu. (Zinunö 136:15) Si ndruhu-ndruhu wa Yehowa ”sabölö ba wanuwö” ba wanolo ono mbanuania.—II Moze 15:3, 4.
Fasuwöta Lowalangi ba ndrawa Miserai zangoromaʼö wa lö fatimba khönia fefu wasuwöta. Ba ginötö böʼö, itehegö fao ndraono Gizaraʼeli fasuwö. Duma-dumania, ifarou ira ba wanuwö ndrawa Ganaʼana. (V Moze 9:5; 20:17, 18) Ifarou Razo Dawido ba wanuwö ndrawa Wilisiti. Iʼombakhaʼö Lowalangi khö Dawido hewisa lala enaʼö möna ira fasuwö.—II Zamueli 5:17-25.
Sura Niʼamoniʼö zangombakha khöda wa me tefakao ndraono Gizaraʼeli, ilumöʼö ira Lowalangi enaʼö terorogö lala wamosumange satulö khö Lowalangi. So tölu ngawalö zinangea taʼila sanandrösa ba wasuwöta nifalua Lowalangi.
LOWALANGI ZOTATUGÖI HANIHA ZI MÖI FASUWÖ. Samuza inötö, imane Lowalangi ba ndraono Gizaraʼeli, ”Tenga yaʼami zi fasöndra zi samuza andre.” Hadia mbörö? Lowalangi zi fasuwö salahi mbanuania. (II Ngaʼötö 20:17; 32:7, 8) No asese fasuwö Lowalangi simane nidunö-dunö moroi yawa mege. Ba ginötö böʼö, ifatenge nono mbanuania Lowalangi weʼamöi fasuwö ba wamadöni Tanö Amabuʼula.—V Moze 7:1, 2; Yosua 10:40.
LOWALANGI ZOTATUGÖI HAWAʼARA ALUA WASUWÖTA. Labalo-baloi ono mbanua Lowalangi hawaʼara ginötö nitatugöi Lowalangi ba wolawa nudu si fasui yaʼira. Fatua lö tohare ginötö nitatugöi Lowalangi andrö, tebai fasuwö ira. Lö ifahowuʼö ira Lowalangi na lafalua wasuwöta. Iʼombakhaʼö khöda Sura Niʼamoniʼö, kala ndraono Gizaraʼeli me fasuwö ira ba ginötö si lö nitehegö Lowalangi.a
LÖ OMASI LOWALANGI NA MATE FEFU NIHA. Yehowa no Umbu fangorifi ba Samazökhi niha gulidanö. (Zinunö 36:10) Börö daʼö, lö omasi ia na mate niha. Hizaʼi, niha gulidanö laʼalui lala ba wamaʼala nawöra niha. (Zinunö 37:12, 14) Itaria itehegö Lowalangi alua wasuwöta ba wolawa niha si lö sökhi. Hewaʼae no hauga kali itehegö Yehowa khö ndraono Gizaraʼeli weʼamöi fasuwö, lö aetu iforomaʼö ’waʼahakhö dödö’ ba ’faʼebolo dödö’ ba niha samakao yaʼira. (Zinunö 86:15) Duma-dumania, fatua lö möi ndraono Gizaraʼeli ba wanuwö zi sambua banua, imane khöra Yehowa, ’Miʼangatulö ua,’ eluahania ibeʼe ginötö ba nudu ndraono Gizaraʼeli enaʼö labulöʼö wangera-ngerara irege lö alua fasuwö ira. (V Moze 20:10-13) Itörö zi no ifabuʼu Lowalangi me imane, ”Faya wa no sauri ndraʼo, na omasido mate zebua horö; somasi ndraʼo na iröi lalania andrö sebua horö, na ifalalalini gera-erania, ba na auri ia.”—Hezekieli 33:11, 14-16.b
Simane si no tafatunö, itehegö Lowalangi alua wasuwöta meföna börö me omasi ia iheta ngawalö wamakao ba faʼalösökhi. Börö me Lowalangi ia, yaʼia zotatugöi hawaʼara alua wasuwöta ba haniha zi möi manuwö. Ba hadia omasi fasuwö Lowalangi? Löʼö. Sura Niʼamoniʼö zangumaʼö wa iʼogorofi Yehowa zi lö sökhi. (Zinunö 11:5) Hadia tebulö wangera-ngera Lowalangi sanandrösa ba wasuwöta me no möi Nononia, Yesu Keriso ba gulidanö?
a Duma-dumania, samuza inötö, möi ndraono Gizaraʼeli ba wanuwö ndraono Gamalekhi awö ndrawa Ganaʼana. Lua-luania, kala ira börö me lö nitehegö Lowalangi khöra weʼamöi fasuwö. (IV Moze 14:41-45) Hauga fakhe aefa daʼö, möi fasuwö Razo Yosia ba ginötö si lö nitehegö Lowalangi, lua-luania mate ia.—II Ngaʼötö 35:20-24.
b Lö omasi atulö ndraono Gizaraʼeli ba ndrawa Ganaʼana fatua lö fasuwö ira. Hadia mbörö? Börö me no tebeʼe khöra ginötö 400 fakhe waʼara ba wamalalini amuatara si lö sökhi. Me fasuwö ira, si ndruhu-ndruhu wa lö sökhi gamuatara. (I Moze 15:13-16) Börö daʼö, moguna tehori ira. Hizaʼi, teʼorifi niha si no mamalalini amuatara.—Yosua 6:25; 9:3-27.