TUHO SI OFÖNA | HEZO TOLA ÖSÖNDRA WONDRARA DÖDÖ?
Fondrara Dödö ba Ginötö So Wangabu Dödö
Oya ngawalö gabula dödö si göna ita. Lö maʼila ma tutunö fefu, hizaʼi tola tanehegö zi öfa duma-duma moroi furi. Faigi hewisa gabula dödöra ba hewisa wameʼe Lowalangi fondrara dödö khöra.
ME AHETA NDRAʼUGÖ BA HALÖWÖMÖ
”Omasido uhalöwögöigö gofu hadia manö, ba lö uʼöli gama-gama si lö moguna.”—Jonathan
Itörö tödö Setha, ”Fendronga ndraʼaga woʼomogu me lafabatogö khöma wohalöwö. Ba zi dua fakhe faʼara, latolo ndraʼaga ira si fahatö khöma ba lö manö tatu halöwöma. Daʼö zameʼe baku gutogu hegöi foʼomogu, Priscilla, ba hulö lö moʼeluaha saʼae ndraʼaga.
”Hewisa wanaögö yaʼia? Itörö tödö Priscilla wehede Yesu ba Mataiʼo 6:34. Iwaʼö Yesu wa lö moguna tabusi tödö zoguna mahemolu börö me tasöndra lala zabu dödö mahemolu. Fangandrönia zangabölöʼö yaʼia. Zinunö 55:23 zondarara tödögu. Simane sanura mbuku zinunö, ubeʼe khö Yehowa fefu noro dödögu, ba urasoi wanolonia yaʼo. Iadaʼa so halöwögu, ba maʼöna-önaisi waʼaurima simane mene-mene Yesu ba Mataiʼo 6:20-22. Itugu ahatö ndraʼaga khö Lowalangi, simanö göi gamakhaitama yaʼaga si darua.”
Ifaduhuʼö Jonathan, ”Ataʼu ndraʼo na samuza inötö dania tekiko bisnisma ba tosasa ndraʼaga. Börö krisis ekonomi, andrö wa lö eluaha nisöndrama ba zi 20 fakhe faʼara. Asese faʼudu ndraʼaga woʼomogu ira alawe börö gefe. Ataʼuga maʼogunaʼö kartu kredit na möiga mowöli, ataʼuga na lö latema.
”Hizaʼi, faʼabölö Zura Niʼamoniʼö zanolo yaʼo ba wangai angetula si sökhi. Omasido uʼohalöwögöigö gofu hadia manö, ba lö uʼöli gama-gama si lö moguna. Börö me Samaduhuʼö Yehowa ndraʼaga, latologa ira talifusö si sara lala wamati. Larorogö döima ba laʼoroʼö dangara ba wanolo yaʼaga ba ginötö göna abula dödö.”
ME TEKIKO WONGAMBATÖ
Itutunö Raquel, ”Me iröi ndraʼo foʼomogu ira matua, mofönudo ba afökhö dödögu. Abu sibai dödögu. Hizaʼi, uhatöʼö ndraʼo khö Lowalangi, ba irara dödögu. Faʼatulö moroi khö Lowalangi zondrorogö tödögu me mangandrödo khönia ero maʼökhö. Urasoi wa idalu-daluni zokho dödögu.
”Ba uʼandrö saohagölö börö Daromalinia, Sura Niʼamoniʼö, sanolo yaʼo ba wanaha fönu. Itörö tödögu mene-mene Zura Niʼamoniʼö, ’Böi ilawa ndraʼugö si lö sökhi, beʼe folawa zi lö sökhi zi sökhi.’—Roma 12:21.
”Itataria, tola manö ataya fefu niʼokhögöda . . . hizaʼi, iadaʼa moʼeluaha waʼaurigu.”—Raquel
”Samösa nawögu zamasugi ba dödögu enaʼö böi awuwu ndraʼo. Iʼoromaʼö khögu Zangombakha 3:6, ba ihaogö wangumaʼö khögu wa tola manö so zataya ba waʼaurida. Abua sibai mene-mene andrö, hizaʼi moguna uʼoʼö. Iadaʼa, moʼeluaha waʼaurigu.”
Imane Elizabeth, ”Ba ginötö tekiko wongambatöu, moguna latoloʼö. So nawögu zanolo yaʼo ero maʼökhö. Fao ia khögu weʼe, irara dödögu, ba urasoi wa iʼomasiʼö ba lö iʼositengagö ndraʼo. Faduhu dödögu wa iʼodela ia Yehowa ba wamadöhö zokho dödögu.”
BA GINÖTÖ MOFÖKHÖ BA ITUGU ALAWA NDRÖFI
”Me no aefa mangandrödo khö Lowalangi, urasoi waʼabölö gehehania ba waʼaurigu.”—Luis
Luis, nitötöi ba wamobörö duho andre, abölö-bölö khönia wökhö tödö, ba no irai arakhagö mate ia ba zi dua inötö. Iadaʼa, iʼogunaʼö oksigen 16 za ba zi sara ngaluo. Imane wangumaʼö, ”Lö faröi ndraʼo ba wangandrö khö Yehowa. Me no aefa mangandrödo khö Lowalangi, urasoi waʼabölö gehehania ba waʼaurigu. Fangandrö zangabölöʼö enaʼö so khögu waʼaro dödö börö me uʼila ba ufati wa iʼameʼegö tödö ndraʼo.”
Petra si 80 fakhe, imane wangumaʼö, ”Oya zomasido ufalua, ba tebai ndraʼo. Abua khöda woʼangeraigö wa itugu alö waʼabölöda. Alio atage ndraʼo ba uʼodaligö dalu-dalu. Asese ukhalaigö me ba ginötö iʼandrö Yesu khö Lowalangi, na tola menaʼö, teʼefaʼö ia moroi ba waʼafökhö. Iʼabölöʼö Yesu Yehowa, hegöi yaʼo. Fangandrö no dalu-dalu khögu. Itugö sökhi waʼaurigu na no aefa ulau mangandrö.”—Mataiʼo 26:39.
Iʼodödögö Julian ba wolawa fökhö sklerosis multipel ba zi 30 fakhe. Imane wangumaʼö, ”Me mböröta, mudadao ndraʼo ba gurusi wohalöwö. Iadaʼa, ba gurusi roda so ndraʼo. Moʼeluaha waʼaurigu börö me utolo niha böʼö. Mamuala, zi möi fangalö wökhöda, ba oroma wa sindruhu iʼabölö ita Yehowa ba ginötö si tefaudu. Hulö simane niwaʼö Zura Niʼamoniʼö, ’Ulawa manö fefu, börö zangabölöʼö yaʼo andrö.’”—Filifi 4:13.
BA GINÖTÖ ALUA WANGABU DÖDÖ
Imane Antonio, ”Me itörö tanö bapagu, itandru ia moto ba mate. Abua khögu wotemaʼö salua andrö. Lö sinangea menaʼö alua daʼö. Koma ia lima hari fatua lö mate. Lö uʼoromaʼö waʼabu dödögu föna mamagu, hizaʼi ba zi ha yaʼo ba ulau meʼe. Hana? Hana? Manofu-nofu manö dödögu.
”Ba ginötö andrö, uʼandrö khö Yehowa enaʼö tola utaha dödögu ba enaʼö ibeʼe khögu waʼahono dödö. Awena ahono dödögu. Itörö tödögu niwaʼö Zura Niʼamoniʼö wa ’no ha sambua ginötö ba no ha sara zi göna ira fefu’. Börö me lö falimo Lowalangi, faduhu dödögu wa hasambalö ifuli falukha ndraʼo khö bapagu na tesusugi ia dania.”—Zangombakha 9:11; Yohane 11:25; Tito 1:2.
”Hewaʼae na no mate nonoma ba waʼatoru göfa si hombo, hizaʼi so zalua sauli itörö tödö ba wefaoma khönia. Daʼö nitörö-törö tödöma.”—Robert
Robert, nitötöi ba wamobörö duho andre, so khönia wangera-ngera si fagölö. Imane wangumaʼö, ”Ba wangandrö khö Yehowa, urasoi hegöi foʼomogu, Maribel, wa so khöma waʼahono wangera-ngera simane niwaʼö ba Filifi 4:6, 7. Börö waʼahono dödö andre wa tola fahuhuo ndraʼaga khö reporter TV sanandrösa ba wanötönama wa so wanusugi zi mate. Hewaʼae na no mate nonoma ba waʼatoru göfa si hombo, hizaʼi so zalua sauli itörö tödö ba wefaoma khönia. Daʼö nitörö-törö tödöma.
”Me so ndra talifusö sangumaʼö wa so khöma waʼahono ba wameʼe fanemali me lasofu-sofu khöma ba TV, mawaʼö wa tola mafalua fefu daʼö börö wangandröra. Faduhu dödögu wa itolo ndraʼaga Yehowa, iʼodela wehede fondrara dödö sofeta khöma.”
Simane si no agalua no mege, tola ihenaigö wondrara dödö Lowalangi ba niha si tefakao ba si göna abula dödö. Hewisa göi ndraʼugö? Gofu hadia zalua khöu, so wondrara dödö si tola manolo yaʼugö ba wanaögö fefu daʼö.b Andrö wanolo moroi khö Yehowa. Yaʼia andrö ”Lowalangi wondrara dödö, fefu”.—II Korindro 1:3.
a So zi no lafaböʼöni töi.
b Na omasiʼö ahatö khö Lowalangi ba ötema wondrara dödö moroi khönia, hubungi ndra Samaduhuʼö Yehowa mazui hubungi gödo ndraha sahatö ba mbanua zi so yaʼugö.