Hadia So Waʼahakhö Dödö khö Lowalangi?

LALA WAMAZÖKHI YAʼITA

Moloʼö Dr. Rick Hanson, samösa ahli kesehatan mental, ”no taʼokhögö waʼahakhö dödö iʼotarai me tumbu”. Faʼahakhö dödö yaʼia daʼö ”faʼatola ba wangiʼila hegöi ba worasoi salua ba niha böʼö, ba ikhalaigö hewisa na khönia samösa alua daʼö”.

ANGERAGÖ: Ha niha gulidanö zi tola mangokhögö faʼatola andrö. Hana wa tola taʼokhögö daʼö? Itutunö Sura Niʼamoniʼö wa iwöwöi niha Lowalangi si fakhili khönia. (1 Moze 1:26) Eluahania, tola taʼokhögö mbua-bua simane niʼokhögö Lowalangi. Tobali, ba ginötö tatolo niha böʼö börö me tarasoi zalua khönia, sindruhunia no taʼoʼö Zomböi yaʼita sebua faʼomasi, Lowalangi Yehowa.​—Gamaedola 14:31.

IFAHAʼÖ ITA SURA NIʼAMONIʼÖ SANANDRÖSA BA WAʼAHAKHÖ DÖDÖ LOWALANGI

Lö omasi Lowalangi na tefakao ita ba irasoi göi zalua khöda. Me götö föna, no irai teʼosawuyu ndraono Gizaraʼeli ba danö Miserai ba tefakao sibai ira. Aefa daʼö, toröi göi ira ba danö si mate 40 fakhe waʼara. Imane Sura Niʼamoniʼö, ”Si tosasa ira, fefu, ba tosasa ia göi.” (Yesaya 63:9) Tenga ha iʼila Yehowa wamakao nitaögöra, hizaʼi irasoi göi daʼö. Imane, ”Noa sa uʼila waʼabölö-bölö wamakaora andrö.” (2 Moze 3:7) Imane Lowalangi, ’No sombambaya ono hörögu zombambaya yaʼami.’ (Zakharia 2:8) Andrö, na tefakao ita irasoi göi daʼö.

Itaria tatahigö ita samösa ba tawaʼö wa tenga sinangea ihakhösi tödö ita Lowalangi. Hizaʼi, ifaduhuʼö khöda Sura Niʼamoniʼö wa ”abölö ebua Lowalangi moroi ba dödöda ba iʼila ngawalö hadia ia”. (1 Yohane 3:19, 20) Abölö aboto ba dödönia ita moroi na khöda samösa. Iʼila hadia zalua khöda, niʼera-erada hegöi nirasoida. Ba daʼa oroma wa sindruhu-ndruhu irasoi wamakao nitaögöda.

Ayati Zura Niʼamoniʼö sondrara tödöda

• ”Ba muʼao ndraʼugö ba itema liu Yehowa; öʼangaröfili ia, ba imane: Yaʼe ndraʼodo!”​—YESAYA 58:9.

• ”Uʼila sa, hewisa dödögu khömi iwaʼö Yehowa. Tödö ba wangorifi ba tenga ba wamakiko, ba wamaigi faʼohahau dödö khömi, ba götö dania! Awena dania miʼangaröfili ndraʼo, möi ami mangandrö khögu, ba ufondrondrongo khömi.”​—YEREMIA 29:11, 12.

• ”Beʼe ba nahia andrö khöu dawa hörögu andrö. Tenga no so ia ba zura khöu?”​—ZINUNÖ 56:9.

IFAIGI-FAIGI ITA LOWALANGI, ABOTO BA DÖDÖNIA ITA, BA IRASOI ZALUA KHÖDA

Hadia mbua nitemada me taʼila wa irasoi Lowalangi wamakao salua khöda? Nehegö zalua khö Maria.

”Moloʼö yaʼo, abua sibai waʼauri andre ba oya walöʼatulö. Mate nonogu matua si 18 fakhe me no dua fakhe göna ia kanker. Abu sibai dödögu ba mofönudo khö Yehowa börö me lö itolo ba ifadöhö nonogu!

”Önö fakhe aefa daʼö, ututunö nösi dödögu khö dalifusöda si sara lala wamati si sökhi tödö. Mato hauga za ututunö khönia wa lö iʼomasiʼö ndraʼo Yehowa. Ihaogö wamondrondrongo ba lö itaba dalu huhuogu. Aefa daʼö, ifatunö khögu sambua ayati si toröi-röi ba dödögu yaʼia daʼö 1 Yohane 3:19, 20, ösinia, ’Abölö ebua Lowalangi moroi ba dödöda ba iʼila ngawalö hadia ia.’ Ifatunö khögu wa sindruhunia aboto ba dödö Yehowa wamakao nitaögöda.

”Hewaʼae simanö, lö taya nasa wönugu! Aefa daʼö, ubaso Zinunö 94:19 sangumaʼö, ’Ba waʼoya ngawalö waʼabu dödögu andrö, ba iʼokafui dödögu fondrara tödö andrö khöu.’ Urasoi wa khögu manandrösa ayati daʼa! Ba gafuriatania, ahono dödögu börö me no utouʼö khö Yehowa hadia nirasoigu. Faduhu dödögu wa ifondrondrongo ba aboto ba dödönia ndraʼo.”

Omuso sibai dödöda me taʼila wa aboto ba dödö Lowalangi zalua khöda ba irasoi göi daʼö! Na simanö, hana wa oya wamakao iadaʼa? Hadia daʼa wanguhuku si göna ita börö horö nifaluada? Hadia so nifalua Lowalangi ba wangasiwai famakao andrö? Taʼila wanema linia ba duho aefa daʼa.