Hewisa Wangaroʼöda Famatida ba Gulidanö si Bohou Nifabuʼu Yehowa?

1-2. Hadia zinangea tafalua gasa-gasa wombaloida ulidanö si bohou?

TAʼANDRÖ sibai saohagölö khö Yehowa me no ifabuʼu wa hasambalö iheta gulidanö si lö sökhi andre, ba iʼasogö gulidanö si bohou safönu faʼatulö. (2 Fe. 3:13) Hewaʼae na lö taʼila hawaʼara tohare gulidanö si bohou andrö, hizaʼi tola oroma moroi ba dandra-tandrania wa lö ara tö alua daʼö.—Mat. 24:32-34, 36; Hal. 1:7.

² Gasa-gasa wombaloida, moguna taʼaroʼö wamatida ba mbuʼusa li andrö hewaʼae na no ara farahu ita ba zindruhu. Hadia mbörö? Börö me tola awuwu wamatida hewaʼae na aro sibai ia iadaʼa. Sindruhunia, no irai iwaʼö Faulo wa faʼambö wamati andrö no horö salio sibai mamöbö yaʼita. (Heb. 12:1) Enaʼö lö awuwu wamatida, moguna asese taʼangerönusi dandra-tandra sangoromaʼö wa lö ara tö tohare gulidanö si bohou.—Heb. 11:1.

3. Hadia nitutunöda ba artikel daʼa?

³ Ba artikel daʼa, tatutunö tölu ngawalö zinangea tafalua ba wangaʼaroʼö famatida ba mbuʼusa li Yehowa sanandrösa ba gulidanö si bohou: (1) taʼangerönusi höli, (2) taʼangerönusi waʼabölö Yehowa ba (3) tabeʼe ginötöda ba wamalua halöwö ba wamati. Aefa daʼö, tatutunö hewisa wa möi fangaroʼö wamatida wehede nifaʼema Yehowa khö Habakuki. Hizaʼi si oföna, datatutunö hadia manö zi tola alua khöda iadaʼa sanandraigö famatida ba mbuʼusa li sanandrösa ba gulidanö si bohou.

NGAWALÖ ZALUA SANANDRAIGÖ FAMATIDA

4. Hadia manö gangetula sanandraigö famatida?

⁴ Ero maʼökhö, moguna taforomaʼö wamati ba wangai angetula. Duma-dumania, tahalö gangetula sanandrösa ba wariawösa, hiburan, sekola, fangowalu, iraono hegöi halöwöda sero maʼökhö. Moguna tasofu khöda samösa, ’Hadia angetulagu andre zangoromaʼö faʼafaduhu dödögu wa lö ara tö ihori gulidanö daʼa Lowalangi, ba iʼasogö gulidanö si bohou? Mazui hadia angetulagu andre zangoromaʼö wa no tedönisi dödögu ba lala wangera-ngera niha sangumaʼö wa lö hadöi faʼauri si lö aetu?’ (Mat. 6:19, 20; Luk. 12:16-21) Tola tahalö gangetula si tefaudu na taʼaroʼö wamatida wa lö ara tö tohare gulidanö si bohou andrö.

5-6. Hana wa moguna khöda wamati saro ba ginötö si basaki? Beʼe duma-duma.

⁵ Moguna göi khöda wamati saro na göna ita fanandraigö. Tola manö göna ita folohi, fökhö sabölö-bölö, mazui so zalua tanö böʼö sangaʼasogö khöda faʼide-ide dödö. Ba wamobörö, te tawaʼö tödöda wa tola tataögö daʼö. Hizaʼi si toʼölönia, ara aheta gabula dödö simane daʼö. Andrö wa moguna khöda wamati saro enaʼö anau gölöda ba lö tebulö tafosumange Yehowa si fao faʼomuso dödö.—Rom. 12:12; 1 Fe. 1:6, 7.

⁶ Na göna ita fanandraigö, tola manö tarasoi wa lö duhu tola tohare gulidanö si bohou. Hadia daʼö geluahania wa no awuwu wamatida? Tatu manö löʼö. Nehegö atö duma-duma andre. Na so ita ba mbaŵa deu mato hauga migu, tola manö tarasoi wa lö saʼae tohare mbaŵa lökhö. Hizaʼi sindruhunia, hasambalö tohare mbaŵa lökhö. Simanö göi, na so khöda waʼide-ide dödö, tola manö tarasoi wa lö irai tohare gulidanö si bohou. Hizaʼi na aro wamatida, aboto ba dödöda wa hasambalö alua nifabuʼu Lowalangi. (Si. 94:3, 14, 15; Heb. 6:17-19) Na so khöda waʼafaduhu dödö simane daʼö, lö tebulö taʼofönaiʼö wamosumange Yehowa ba waʼaurida.

7. Hadia lala wangera-ngera sinangea tatimbagö?

⁷ Moguna göi khöda wamati saro ba wamalua halöwö fanuriaigö. Ato niha nifalukhaisida ba halöwö fanuriaigö, lö faduhu dödöra wa tola alua ’duria somuso dödö’ sanandrösa ba gulidanö si bohou nifabuʼu Lowalangi. (Mat. 24:14; Hez. 33:32) Na lö mangelama ita, tola manö taʼaombösi tödö nifabuʼu Yehowa simane nifaluara. Enaʼö lö alua daʼö, moguna lö taböhöli ba wangaʼaroʼö famatida. Datatutunö tölu ngawalö zinangea tafalua.

ANGERÖNUSI HÖLI

8-9. Hadia lua-luania ba wamatida na taʼangerönusi höli?

⁸ Sambua lala si tola tafalua ba wangaʼaroʼö famatida yaʼia daʼö na taʼangerönusi höli. Höli andrö zi tobali weʼe-weʼe dödöda wa hasambalö alua nifabuʼu Lowalangi. Na tahaogö taʼangerönusi hadia mbörö wa ibeʼe khöda höli Lowalangi, ba hawaʼebua zi no itehegö, daʼö zanolo yaʼita ba wangaʼaroʼö famatida wa hasambalö alua nifabuʼu Lowalangi sanandrösa ba waʼauri si lö aetu ba gulidanö sabölö sökhi. Hana wa tola tawaʼö zimanö?

⁹ Hadia zi farahu ba höli? Ifatenge Nono niʼomasiʼönia Yehowa ba sabölö ahatö khönia enaʼö möi ba gulidanö tobali niha soʼahonoa. Me so Yesu ba gulidanö, anau gölönia ba wanaögö faʼabasaki. Ebua sibai mböli zi no itehegö Yehowa! Lowalangida sebua faʼomasi, lö itehegö tefakao ba mate Nononia ha enaʼö tasöndra waʼauri sabölö sökhi ba zi sabata. (Yoh. 3:16; 1 Fe. 1:18, 19) Börö me ebua sibai mböli zi no ibeʼe Yehowa, itatugöi enaʼö sindruhu-ndruhu tasöndra waʼauri si lö aetu ba gulidanö si bohou.

ANGERÖNUSI WAʼABÖLÖ YEHOWA

10. Molo’ ö Efeso 3:20, hadia zi tola ifalua Yehowa?

¹⁰ Lala si dua si tola tafalua ba wangaʼaroʼö famatida yaʼia daʼö na taʼangerönusi waʼabölö Yehowa. So khönia waʼabölö ba wamalua fefu hadia ia zi no ifabuʼu. Sindruhu sa, ba wamaigi niha gulidanö, lö duhu wa tola alua nifabuʼunia sanandrösa ba waʼauri si lö aetu ba gulidanö si bohou. Hizaʼi, oya zi no ifabuʼu Yehowa si tebai lafalua niha gulidanö. Tola ifalua daʼö börö me yaʼia Lowalangi Fondrege Zabölö. (Yob. 42:2; Mrk. 10:27) Börö daʼö, lö tokea ita na ifabuʼu khöda zahöli-höli dödöda!—Baso Efeso 3:20.

11. Tutunö sambua duma-duma mbuʼusa li Lowalangi sahöli-höli dödö. (Faigi kotak ”Buʼusa Li Sahöli-höli Dödö si No Alua”.)

¹¹ Nehegö atö mbuʼusa li sahöli-höli dödöda nifaʼema Yehowa ba nono mbanuania me götö föna. Ifaduhuʼö khö Gaberahamo hegöi Sara wa hasambalö tumbu khöra nono matua hewaʼae na no alawa ndröfira. (1 Mo. 17:15-17) Iwaʼö göi khö Gaberahamo wa hasambalö tebeʼe danö Ganaʼana ba ngaʼötönia. Sagötö teʼosawuyu ngaʼötö Gaberahamo yaʼia daʼö iraono Gizaraʼeli ba Miserai, hulö tebai alua nifabuʼunia andrö. Hizaʼi, sindruhu-ndruhu alua daʼö. Aefa daʼö, ifatunö Yehowa wa hasambalö moʼono Gelizabe si no alawa döfi. Ifatunö göi khö nono alawe sotöi Maria, wa hasambalö iʼadonogö Nono Lowalangi. Daʼa waʼalua zi no ifabuʼu Yehowa me hauga ribu fakhe silalö ba Kabu Edena!—1 Mo. 3:15.

12. Hadia nifaduhuʼö Yosua 23:14 hegöi Yesaya 55:10, 11 sanandrösa ba waʼabölö Yehowa?

¹² Na taʼangerönusi fefu zi no ifabuʼu Yehowa ba zilalö hegöi faʼaluania, tola aboto ba dödöda wa no fondrege zabölö Yehowa andrö. Buania, itugu aro wamatida ba gulidanö si bohou nifabuʼunia. (Baso Yosua 23:14; Yesaya 55:10, 11.) Daʼa zamaʼanö yaʼita ba wanolo niha böʼö enaʼö faduhu dödöra wa tenga ha fangifi mazui hikaya gulidanö si bohou andrö. Imane Yehowa sanandrösa ba mbanua si yawa si bohou hegöi tanö si bohou, ”Atulö ba tola mufaduhusi tödö wehede andre.”—Fam. 21:1, 5.

BEʼE GINÖTÖU BA WAMALUA HALÖWÖ BA WAMATI

13. Hewisa wa möi fangaroʼö wamatida gangowuloa? Tutunö.

¹³ Lala si tölu si tola tafalua ba wangaʼaroʼö famatida yaʼia daʼö na tabeʼe ginötöda wamalua halöwö ba wamati. Duma-dumania, nehegö atö hadia manö mbua nitemada ba gangowuloa. Imane Anna, si no hauga wulu fakhe mangai halöwö safönu inötö, ”Angowuloa zanolo yaʼo enaʼö lö tebulö aro wamatigu. Hewaʼae na lö onekhe mamahaʼö dalifusöda samaʼema huhuo, mazui lö hadöi nifaʼemania sawena urongo, hizaʼi asese so nirongogu sanolo yaʼo enaʼö itugu aboto ba dödögu Zura Niʼamoniʼö. Daʼö zangaroʼö famatigu.”b Tatu manö taʼandrö saohagölö göi ba mbua gera-era nifaʼema ndra talifusöda si möi fangaroʼö wamatida.—Rom. 1:11, 12; 10:17.

14. Hewisa wa tola möi fangaroʼö wamatida halöwö fanuriaigö?

¹⁴ Tola göi teʼaroʼö wamatida na fao ita ba halöwö fanuriaigö. (Heb. 10:23) Imane Barbara, si no mangai halöwö khö Yehowa ba zi töra 70 fakhe faʼara, ”Lö tebulö teʼaroʼö wamatigu na fao ndraʼo ba halöwö fanuriaigö. Itugu oya fahuhuo ndraʼo ba niha böʼö sanandrösa ba mbuʼusa li Yehowa sahöli-höli dödö, itugu teʼaroʼö wamatigu.”

15. Hewisa wa tola möi fangaroʼö wamatida wamahaʼö samösa? (Faigi göi gambara.)

¹⁵ Nehegö atö halöwö ba wamati tanö böʼö si möi fangaroʼö wamatida: famahaʼö samösa. No irasoi samösa talifusöda Susan wa tola möi fanolonia na itatugöi hawaʼara ifalua wamahaʼö samösa. Imane, ”Ba ngaluo Migu, ufahaʼö ndraʼo ba Wamahaʼö Manuriaigö nifalua ba migu fönada. Ba ngaluo Sinaya hegöi Salasa, ufaʼanö ndraʼo ba waö-waö gangowuloa barö migu. Na no awai ufaʼanö fefu waö-waö ba gangowuloa, ufahaʼö ndraʼo ba duho-tuho tanö böʼö soguna khögu.” Börö me lö tebulö ifahaʼö ia Susan ba ginötö si no itatugöi, tola itugu aro wamatinia. Talifusöda Irene si no mangai halöwö ba zi hauga wulu fakhe ba gödo sebua, no irasoi samösa wa möi fangaroʼö wamatinia na ifahaʼö ia ba wamaʼeleʼö Zura Niʼamoniʼö. Imane, ”Ahöli-höli sibai dödögu börö me alua fefu nifaʼeleʼö Yehowa irugi ba wondrege zide-ide.”c

”HASAMBALÖ ALUA DAʼÖ”

16. Hadia mbörö wa moguna göi khöda ba ginötö iadaʼa wehede Yehowa khö Habakuki? (Heberaiʼo 10:36, 37)

¹⁶ So ösa nono mbanua Yehowa si no ara mombalo-mbaloi faʼatohare gamozua götö danö andre. Ba wamaigi niha gulidanö, hulö ahou sibai waʼalua mbuʼusa li Lowalangi. Aboto ba dödö Yehowa hadia nirasoi nono mbanuania. Daʼö mbörö wa imane khö zamaʼeleʼö sotöi Habakuki, ”Hasambalö alua gangilata daʼa ba ginötönia, ba lö ara tö ginötönia; tenga angilata faya daʼa. Hewaʼae tetaha ia, böi böhöli wanötöna yaʼia si fao faʼafaduhu dödö! Börö me hasambalö alua daʼö. Lö zi lö alua ba ginötö si no muhonogöi!” (Hab. 2:3) Hadia ha khö Habakuki moguna wehede Lowalangi andrö? Mazui, hadia moguna göi khöda daʼö iadaʼa? Barö wanuturu lala geheha niʼamoniʼö, ifaʼema wehede daʼö sinenge sotöi Faulo ba niha Keriso sombalo-mbaloi faʼatohare gulidanö si bohou. (Baso Heberaiʼo 10:36, 37.) Tatu manö, tola faduhu dödöda hewaʼae na hulö ahou waʼalua mbuʼusa linia, hizaʼi ”hasambalö alua daʼö. Lö zi lö alua ba ginötö si no muhonogöi!”

17. Hewisa zi samösa talifusöda ira alawe wamaluania mene-mene Yehowa khö Habakuki?

¹⁷ Ato nono mbanua Yehowa si no mamalua mene-menenia enaʼö lö laböhöli wanötöna si fao faʼafaduhu dödö ba zi hauga wulu fakhe. Duma-dumania Louise, si no mamosumange Yehowa iʼotarai me döfi 1939. Imane, ”Me luo daʼö, uwalinga tohare Hamagedo fatua lö tama ndraʼo SMA. Hizaʼi, lö alua daʼö. Sagötö zi hauga wulu fakhe andre, tola möi fanologu waö-waö Zura Niʼamoniʼö sanandrösa khö Noakhi, Aberahamo, Yosefo, hegöi niha tanö böʼö si no ara mombalo-mbaloi luora moroi khö Yehowa. Börö me lö uböhöli wanötöna si fao faʼafaduhu dödö, daʼö zanolo yaʼo hegöi niha böʼö enaʼö lö tebulö faduhu dödöma wa no ahatö waʼatohare gulidanö si bohou.” Ato nono mbanua Yehowa si no ara mangai halöwö khönia si fao tödö ba daʼö!

18. Hewisa wa tola möi fangaroʼö wamatida na tanehegö niwöwöi?

¹⁸ Sindruhu sa, lö si tohare nasa gulidanö si bohou. Hewaʼae simanö, nehegö atö hadia manö zi so iadaʼa, döfi, eu, urifö, hegöi niha. Lö hadöi niha zoʼaombösi tödö wa sindruhu-ndruhu so fefu daʼö, hewaʼae na sindruhunia no irai lö hadöi daʼö ba zilalö. Tola so daʼö fefu iadaʼa börö me iwöwöi ira Yehowa. (1 Mo. 1:1, 26, 27) No itatugöi Lowalangida wa hasambalö ifazökhi gulidanö si bohou. Lö zi lö alua gohitö dödönia andrö. Ba gulidanö si bohou dania, owua-wua dödö niha fefu börö me auri ira irugi zi lö aetu ba moʼahonoa mbotora. Tola faduhu dödöda wa hasambalö tohare gulidanö si bohou ba ginötö si no itatugöi Lowalangi.—Yes. 65:17; Fam. 21:3, 4.

19. Hewisa lalamö ba wangaʼaroʼö famatimö?

¹⁹ Gasa-gasa daʼö, ogunaʼö ginötö si no tebeʼe khöu ba wangaʼaroʼö famatimö. Böi tebulö andrö saohagölö ba höli. Angerönusi waʼabölö Yehowa, ba beʼe ginötöu ba wamalua halöwö ba wamati. Na öfalua daʼö, tola so ndraʼugö ba gotalua ”niha sanema amabuʼula andrö börö wamati ba faʼebolo dödö”.—Heb. 6:11, 12; Rom. 5:5.