Hewisa Woloʼöda Fangefaʼö Sala Nifalua Yehowa?

1-2. (a) Hawaʼara tola manö abua khöda wangefaʼö sala zi samösa niha? (b) Hadia nifalua Diana ba wangefaʼö sala niha böʼö?

HADIA itaria abua khöu wangefaʼö sala niha böʼö? Ato ba gotaluada zorasoi simane daʼö, mendrua manö na si samösa niha andrö iwaʼö mazui ifalua zi möi fangafökhö dödöda. Hewaʼae simanö, tola talawa waʼafökhö dödö nirasoida ba taʼefaʼö zalania. Duma-dumania, nehegö zalua khö Diana,a samösa talifusöda si tobali duma-duma si sökhi ba wangefaʼö sala. Me döfi 2017, möi Diana hegöi ösi nomonia ba wangondrasi Gödo Sebua Ndra Samaduhuʼö Yehowa sawena mubokai. Me mangawuli ira ba nomo, so moto sabölö-bölö sotandru motora. Me luo daʼö, mate zagötö Diana. Me no ibörögö maoso ia, lafatunö khönia wa abölö-bölö sibai zokho ndraononia ba no mate woʼomonia sotöi Brian. Na ifuli itörö tödönia zalua andrö, imane Diana, ”Arasa bakha dödögu, ba lö uʼila hadia zinangea ufalua.” Ba gafuriata, iʼila wa lö si mabu ndra matua solohe moto sanandru yaʼira, ba lö göi samangoloi fangera-ngerania. Börö daʼö, ilau mangandrö Diana khö Yehowa enaʼö so khönia waʼahono dödö.

² No muraʼu niha sanandru yaʼira. Na muhalö gangetula wa fasala ia, hasambalö labeʼe ia ba gurunga. Hizaʼi, lafatunö khö Diana ira sohalöwö ba gödo zanguhuku wa teʼodaligö hukuma nitema niha daʼö moroi ba wehedenia sagötö mufalua persidangan. Imane Diana, ”Na ufuli ututunö zalua andrö föna ndra sangetuʼö huku, hulö na mufuli mubokai zokho bakha ba dödögu ba mufaduwa nasio.” Mato hauga migu aefa daʼö, modadao Diana ba gödo zanguhuku ba wameʼe famaduhuʼö föna niha si no mangaʼasogö abula dödö sebua ba nösi nomonia. Hadia wehede Diana? Iʼandrö khö ndra sanguhuku enaʼö laforomaʼö waʼahakhö dödö khö ndra matua daʼö.b Me no awai fahuhuo ia, asöndru dödö zanguhuku andrö ba ilau meʼe. Imane, ”Sagötö zi 25 fakhe me no tobali ndraʼo sanguhuku, lö irai urongo so wehede simane daʼö ba daʼa. Lö irai urongo so niha sangandrö faʼahakhö dödö ba niha samunu ösi nomonia. Lö irai urongo wehede safönu faʼomasi ba sangefaʼö sala simane daʼa.”

3. Hadia zanolo Diana wangefaʼö sala ndra matua daʼö?

³ Hadia zanolo Diana wangefaʼö sala ndra matua daʼö? Iʼangerönusi wangefaʼö horö nifalua Yehowa. (Mi. 7:18) Simane Diana, na taʼameʼegö tödö ba taʼandrö saohagölö ba wangefaʼö horö nibeʼe Yehowa, daʼö zanolo yaʼita ba wangefaʼö sala niha böʼö.

4. Hadia niʼandrö Yehowa khöda enaʼö tafalua? (Efeso 4:32)

⁴ Iʼandrö khöda Yehowa enaʼö taʼefaʼö zala niha böʼö soroi ba dödö simane me iʼefaʼö zalada. (Baso Efeso 4:32.) Iʼandrö khöda enaʼö taʼefaʼö zala niha sangafökhöiʼö tödöda. (Si. 86:5; Luk. 17:4) Ba artikel daʼa, tatutunö dania tölu ngawalö zanolo yaʼita ba wangefaʼö sala niha böʼö.

BÖI HÖNA BA DÖDÖU HADIA NIRASOIMÖ

5. Moloʼö Amaedola 12:​18, hadia zi tola manö tarasoi na so niha sangafökhöiʼö tödöda?

⁵ Tola manö afökhö sibai dödöda ba wehede mazui ba nifalua zi samösa niha, mendrua manö na daʼö niha si fahuwu khöda mazui ösi nomoda. (Si. 55:​12-14) Itaria, hulö zi göna ikhu rosö bakha dödöda. (Baso Gamaedola 12:18.) Na tahöna ba dödöda waʼafökhö dödö andrö, hulö no tatehegö tetaru manö bakha ba dödöda nikhu rosö. Lua-luania, lö döhö zokhoda, ba lö tebulö tarasoi waʼafökhö.

6. Hadia zi tola tafalua na so zangafökhöiʼö tödöda?

⁶ Na so zangafökhöiʼö tödöda, si toʼölönia mofönu ita. Iwaʼö Sura Niʼamoniʼö wa no sinangea daʼö. Hizaʼi, ifangelama göi ita enaʼö böi ifatörö ita fönuda andrö. (Si. 4:4; Ef. 4:26) Hadia mbörö? Börö me molua-lua hadia nirasoida ba ngawalö nifaluada, tola idönisi dödöda ba wamalua si lö sökhi. (Yak. 1:20) Törö tödöu, no si toʼölö na mofönu ita. Hizaʼi, tola tafili hadia lö tebulö mofönu ita mazui taʼolifugö daʼö.

7. Hadia nasa zi tola manö tarasoi na so zangafökhöiʼö tödöda?

⁷ Na lafalua khöda zi lö sökhi, tola manö tumbu ba dödöda wangera-ngera si lö tefaudu. Duma-dumania, imane si samösa talifusöda ira alawe sotöi Ana, ”Me ide-ide ndraʼo, faröi Bapagu khö Mamagu ba mangowalu ia khö ndra alawe solaya yaʼo. Urasoi wa lö moguna khöra ndraʼo. Inönö nasa me tumbu nonora, hulö latiboʼö ndraʼo. So ba dödögu wa lö hadöi sangomasiʼö yaʼo.” Itutunö göi talifusöda ira alawe sotöi Georgette hadia nirasoinia me no mohorö woʼomonia khö ndra alawe böʼö, imane, ”No fahuwu ndraʼaga iʼotarai me iraono ba fagölö-gölö göi me merintis ndraʼaga. Arasa bakha dödögu!” Imane göi talifusöda ira alawe sotöi Naomi, ”Lö irai ukhalaigö wa ifalua khögu zafökhö foʼomogu. Me ifatunö khögu wa no ifaigi pornografi ba zi ha yaʼi-yaʼia, urasoi wa no ilimo ba iröi ndraʼo.”

8. (a) Hadia mbörö wa moguna taʼefaʼö zala niha böʼö? (b) Hadia mbuania khöda na taʼefaʼö zala niha böʼö? (Faigi kotak ”Hewisa Na So Niha Sangafökhöiʼö Tödöda ba Tebai Taʼolifugö Daʼö?”)

⁸ Lö taʼila tafatörö wehede mazui nifalua niha böʼö, hizaʼi tola taforege ba wamatörö lala nifaluada ba wanemaʼö daʼö fefu. Sasesenia, sabölö sökhi yaʼia daʼö taʼefaʼö zalara. Hadia mbörö? Börö me taʼomasiʼö Yehowa, ba iʼandrö khöda enaʼö taʼefaʼö zala niha böʼö. Na lö tabato wofönu, tola manö tafalua zi lö sökhi mazui göna ita fökhö. (Amd. 14:​17, 29, 30) Nehegö duma-duma dalifusöda ira alawe sotöi Christine. Imane, ”Ba ginötö uʼera-era manö waʼafökhö dödögu, lua-luania no ufakuru manö mbawagu, uʼagaga manö gofu hadia gö, ambö femörögu, ba alio sibai möi yawa ndrogu. Lö sökhi gamuatagu khö woʼomogu ba tekiko wahuwusagu ba niha böʼö.”

9. Hana wa moguna tatiboʼö waʼafökhö dödö?

⁹ Hewaʼae lö iʼandrö khöda waʼebolo dödö niha sangafökhöiʼö tödöda, hizaʼi tola taʼalösi waʼafökhö dödö nirasoida. Hewisa lalania? Imane Georgette, nitötöi moroi yawa, ”Sindruhu sa moguna khögu ginötö, hizaʼi ba gafuriata tola utiboʼö fefu wönu hegöi faʼafökhö dödö nirasoigu khö woʼomogu ba zilalö. Buania, usöndra waʼahono dödö.” Na no tatiboʼö waʼafökhö dödö nirasoida, no taforege enaʼö lö hadöi si tobali fökhö wangera-ngerada. Lö saʼae taʼangera-ngeragö hadia zi no irai alua, ba tola ifuli tarasoi waʼomuso dödö ba waʼauri. (Amd. 11:17) Hizaʼi, hadia zinangea tafalua na abua nasa khöda ba wangefaʼö sala niha böʼö?

LALA ENAʼÖ TAYA WAʼAFÖKHÖ DÖDÖ MAZUI FÖNU

10. Enaʼö tola taya waʼafökhö dödö nirasoida, hana wa moguna tatehegö numalö ginötö? (Faigi göi gambara.)

¹⁰ Hewisa enaʼö taya waʼafökhö dödö nirasoida? Sambua lala si tola tafalua yaʼia daʼö na tatehegö numalö ginötö. Simane niha sesokho sabölö-bölö, moguna ginötö irege döhö zokhonia andrö, hewaʼae no labeʼe dalu-dalu. Simane daʼö göi, moguna khöda ginötö enaʼö lö saʼae tarasoi waʼafökhö dödö andrö ba tola taʼefaʼö zalania soroi ba dödö.—Sango. 3:3; 1 Fe. 1:22.

11. Hewisa wa möi fanoloda wangandrö enaʼö tola taʼefaʼö zala niha böʼö?

¹¹ Ohe ba wangandrö khö Yehowa enaʼö itolo ndraʼugö ba wangefaʼö sala niha böʼö.c Ana, nitötöi moroi yawa, itutunö hewisa wa möi fanolonia wangandrö. Imane, ”Uʼandrö khö Yehowa enaʼö ibologö dödönia khöma yaʼaga si sambua omo ba ngawalö nifaluama hegöi fehedema sambö tefaudu. Aefa daʼö, ufaʼoheʼö zura khö bapagu hegöi khö woʼomonia si bohou, ba ufatunö khöra wa no ubologö dödögu khöra.” Ifaduhuʼö Ana wa abua khönia wamalua daʼö. Hizaʼi imane, ”Uforege woloʼö nifalua Yehowa ba wangefaʼö sala. Utötöna wa möi fanolo daʼö khö Bapagu hegöi foʼomonia enaʼö lafahaʼö ira sanandrösa khö Yehowa.”

12. Hadia mbörö wa abölö sökhi na tafaduhusi tödö Yehowa, tenga nirasoida samösa? (Amaedola 3:​5, 6)

¹² Faduhusi tödö Yehowa. Böi abeʼe dödöu wa fefu nirasoimö hasambalö atulö. (Baso Gamaedola 3:​5, 6.) Ha Yehowa zabölö mangila hadia zi sökhi khöda. (Yes. 55:​8, 9) Lö irai iʼandrö khöda wamalua zi möi famaʼalada. Börö daʼö, me iʼandrö khöda ba wangefaʼö sala niha böʼö, tatu manö so mbuania khöda daʼö. (Si. 40:4; Yes. 48:​17, 18) Hizaʼi, na talafo fatandro ita mazui taʼoʼö niwaʼö dödöda, tola manö tebai taʼefaʼö zala niha böʼö. (Amd. 14:12; Yer. 17:9) Imane Naomi nitötöi moroi yawa, ”Ba wamobörö, abeʼe dödögu wa lö moguna uʼefaʼö zala woʼomogu me no ifaigi pornografi. Ataʼu ndraʼo ma dania ifuli iʼafökhöiʼö dödögu ba olifu ia hawaʼebua zokho niröinia khögu. Uwaʼö göi tödögu wa iʼila Yehowa nirasoigu andre. Hizaʼi, ibörögö aboto ba dödögu wa hewaʼae iʼila Yehowa hadia nirasoigu, tenga daʼö geluahania wa fao dödönia ba nifaluagu andrö. Sindruhu sa, iʼila hadia zi so ba dödögu, ba aboto ba dödönia wa moguna khögu ginötö irege taya waʼafökhö dödögu. Hizaʼi, omasi ia na uʼefaʼö zala niha böʼö.”d

OKHÖGÖ WANGERA-NGERA SI SÖKHI

13. Moloʼö Roma 12:​18-21, hadia zinangea tafalua?

¹³ Ba ginötö taʼefaʼö zala niha sangafökhöiʼö tödöda, te tahalö gangetula wa lö saʼae tafuli tadunö-dunö hadia zalua. Hizaʼi, tenga ha daʼö. Na sangafökhöiʼö tödöda andrö talifusöda ba wamati, moguna mangatulö ita khönia. (Mat. 5:​23, 24) Lö mofönu manö ita sagötö faʼara mazui fatuwu ita khönia, hizaʼi taforomaʼö waʼahakhö dödö ba taʼefaʼö zalania. (Baso Roma 12:​18-21; 1 Fe. 3:9) Hadia zanolo yaʼita ba wamalua daʼö?

14. Hadia zinangea taforege wamalua, ba hadia mbörö?

¹⁴ Moguna taforege wangokhögö lala wangera-ngera Yehowa ba wamaigi niha sangafökhöiʼö tödöda. Amuata si sökhi nifaigi-faigi Yehowa ba niha maʼafefu. (2 Ng. 16:9; Si. 130:3) Sasesenia, na taʼalui gamuata si lö sökhi niʼokhögö zi samösa niha, hasambalö tasöndra daʼö. Simane daʼö göi, na taʼalui zi sökhi ba waʼauri zi samösa niha, hasambalö tasöndra daʼö. Na tatöngöni gamuatara si sökhi, aoha khöda ba wangefaʼö salara. Imane talifusöda ira matua sotöi Jarrod, ”Aoha khögu wangefaʼö sala zi samösa talifusöda ba ginötö uʼangeragö wa abölö oya gamuatania si sökhi somasido, moroi ba zala nifaluania.”

15. Hana wa moguna tafatunö ba niha sangafökhöiʼö tödöda wa no taʼefaʼö zalania?

¹⁵ Sabölö moguna sinangea nasa tafalua yaʼia daʼö tafatunö ba niha sangafökhöiʼö tödöda wa no taʼefaʼö zalania. Hadia mbörö? Imane Naomi nitutunö moroi yawa, ”Isofu khögu foʼomogu, ’Hadia no öʼefaʼö zalagu?’ Me edöna uwaʼö wa no uʼefaʼö zalania, lö iʼila kalua wehede daʼö. Aboto ba dödögu wa lö niʼefaʼögu salania soroi ba dödö. Me no numalö ginötö, tola saʼae uwaʼö khönia, ’No uʼefaʼö zalamö.’ Me uwaʼö khönia wehede daʼö, kalua nidanö hörönia. Tokeado sibai me uʼila hawaʼomuso dödönia, ba urasoi samösa göi waʼahono dödö. Iʼotarai daʼö, tola ifuli ufaduhusi tödö ia, ba aro wahuwusama mangawuli.”

16. Hadia wamahaʼö nihalömö moroi ba zi no tatutunö sanandrösa ba wangefaʼö sala?

¹⁶ Omasi Yehowa na taʼefaʼö zala niha böʼö. (Kol. 3:13) Hizaʼi, te abua khöda wamalua daʼö. Hewaʼae simanö, tola tafalua daʼö na lö tahöna-höna bakha ba dödöda hadia nirasoida, taforege ba wanayaigö daʼö ba taʼokhögö wangera-ngera si sökhi.—Faigi kotak ”Tölu Lala ba Wangefaʼö Sala”.

OSAMBUAʼÖ DÖDÖU BA HOWU-HOWU NITEMAMÖ

17. Hadia mbua nitemada na taʼefaʼö zala niha böʼö?

¹⁷ Oya sibai mbua nitemada na taʼefaʼö zala niha böʼö. Duma-dumania, si oföna, no taʼoʼö ba taʼomusoiʼö dödö Namada safönu faʼahakhö dödö sotöi Yehowa. (Luk. 6:36) Si dua, no taforomaʼö wangandrö saohagölö börö me no iʼefaʼö zalada Yehowa si fao faʼasökhi dödö. (Mat. 6:12) Si tölu, lö taʼasogö khöda wökhö ba no tarorogö wahuwusada ba niha böʼö.

18-19. Hadia zalua na taʼefaʼö zala niha böʼö?

¹⁸ Na taʼefaʼö zala niha böʼö, tola manö tatema howu-howu si lö tadöna-döna. Duma-dumania, nehegö zalua khö Diana, nitötöi ba wamobörö. Ba gafuriata, iʼila Diana wa no iʼera-era ira matua sanandru yaʼira andrö wa ibunu ia samösa na no aefa laʼetuʼö hukumania ira sanguhuku. Hizaʼi, asöndru sibai dödönia me iʼila wa no iʼefaʼö zalania Diana. Börö daʼö, ibörögö ifahaʼö ia ba Zura Niʼamoniʼö khö ndra Samaduhuʼö Yehowa.

¹⁹ Tola manö göi tarasoi wa abua sibai khöda wangefaʼö sala niha böʼö. Hizaʼi, datatörö tödöda wa hasambalö so howu-howu sebua nitemada na tafalua daʼö. (Mat. 5:7) Börö daʼö, datafalua wondrege zi sökhi ba woloʼö fangefaʼö sala nifalua Yehowa.