Lö Irai Ha Yaʼu-Yaʼugö

1-2. (a) Hadia mbörö wa tola faduhu dödöda wa lö irai ha yaʼi-yaʼita ba ginötö tataögö gabula dödö? (b) Hadia nitutunöda ba artikel daʼa?

NA ALUA khöda gabula dödö sebua, te tarasoi wa hulö ba dalu gatua si lö niha-niha so ita. Hizaʼi sindruhunia, tenga ha yaʼi-yaʼita. Iʼila Amada sebua faʼomasi hadia gabula dödö salua khöda, ba ifabuʼu wa hasambalö itolo ita ba wanaögö salua andrö. Ifaduhuʼö Yehowa ba nono mbanuania si lö faröi imane, ”Utolo ndraʼugö.”—Yes. 41:10.

² Ba artikel daʼa, tatutunö hewisa wanolo Yehowa yaʼita me (1) ibeʼe khöda wanuturu lala, (2) iʼasogö zoguna khöda, (3) ilumöʼö ita, ba (4) ibeʼe khöda wondrara dödö. Ifaduhuʼö khöda Yehowa wa lö irai iʼolifugö ba lö iröi ita gofu hadia gabula dödö salua khöda. Börö daʼö, lö irai ha yaʼi-yaʼita.

IBEʼE KHÖDA WANUTURU LALA YEHOWA

3-4. Hewisa wameʼe Yehowa khöda fanuturu lala? (Sinunö 48:14)

³ Baso Zinunö 48:14. Iʼila Yehowa wa moguna khöda wanuturu lala moroi khönia börö me tebai tatatugöi lalada samösa. Hewisa wameʼenia fanuturu lala ba nono mbanuania si lö faröi iadaʼa? Sambua lala niʼogunaʼönia yaʼia daʼö Sura Niʼamoniʼö. (Si. 119:105) Iʼogunaʼö Zura Niʼamoniʼö Yehowa ba wanolo yaʼita enaʼö tola tahalö gangetula si sökhi ba taʼoʼö mbua-buania. Na tafalua daʼö, tola tarasoi waʼomuso dödö ba waʼauri iadaʼa hegöi faʼauri si lö aetu ba zi so miföna.a Duma-dumania, ifahaʼö ita Yehowa enaʼö lö tebulö tatörö zindruhu, taʼomasiʼö niha böʼö soroi ba dödö ba lö tatanö ba dödöda zi lö sökhi. (Si. 37:8; Heb. 13:18; 1 Fe. 1:22) Na tafalua daʼö, hasambalö tobali ita satua si sökhi, foʼomo hegöi si fahuwu si sökhi.

⁴ Baero daʼö, itutunö göi khöda Sura Niʼamoniʼö sanandrösa ba waö-waö waʼauri niha sorasoi ba sanaögö abula dödö simane salua khöda. (1 Ko. 10:13; Yak. 5:17) Na tabaso waö-waö waʼaurira ba tafahaʼö ita moroi ba daʼö, so dombua mbua nitemada. Si oföna, faduhu dödöda wa lö irai ha yaʼi-yaʼita. Taʼila wa no irai so niha si no mofozu ba wanaögö abula dödö simane salua khöda. (1 Fe. 5:9) Si dua, tafahaʼö ita hewisa enaʼö anau gölöda ba wanaögö abula dödö salua.—Rom. 15:4.

5. Haniha manö niʼogunaʼö Yehowa ba wameʼe khöda fanuturu lala?

⁵ Iʼogunaʼö göi ndra talifusöda ba wamati Yehowa ba wameʼe khöda fanuturu lala.b Duma-dumania, möi ndra satua samasui ba mbanua niha Keriso misa ba wamarou tödöda. Huhuo nifaʼemara zanolo yaʼita enaʼö itugu aro wamatida ba itugu tarorogö wahasara dödö. (Hal. 15:40–16:5) Laforege göi ira satua sokubaloi ba wanolo yaʼita enaʼö lö tebulö ahatö ita khö Yehowa. (1 Fe. 5:​2, 3) Lafahaʼö göi ndraonora ira satua ba wangomasiʼö Yehowa, ba wangai angetula si sökhi hegöi ba wamalua halöwö ba wamati. (Amd. 22:6) Baero daʼö, ira talifusöda ira alawe si no aro ba wamati, tola latolo ndra talifusöda ira alawe si bohou ebua, yaʼia me tobali ira duma-duma, labeʼe mene-mene ba lafarou dödöra.—Tit. 2:​3-5.

6. Hewisa enaʼö tatema mbua moroi ba wanuturu lala nibeʼe Yehowa?

⁶ No ihenaigö Yehowa wanuturu lala soguna khöda. Hewisa enaʼö tatema mbua moroi ba daʼö? Imane ba Gamaedola 3:​5, 6, ”Döna-döna khö Yehowa moroi siʼaikö ba dödöu, ba böi odaligö waʼatua-tuamö samösa.” Na tafalua daʼö, hasambalö ’iʼadölöʼö Yehowa lala nitöröda’. Eluahania, itolo ita enaʼö lö göna ita abula dödö soya sibai ba tola tarasoi waʼauri sohahau tödö. Tatu taʼandrö sibai saohagölö khö Yehowa börö me no ibeʼe khöda fefu wanuturu lala safönu faʼomasi!—Si. 32:8.

IHENAIGÖ ZOGUNA KHÖDA YEHOWA

7. Hadia nasa nifalua Yehowa ba wanolo yaʼita? (Filifi 4:19)

⁷ Baso Wilifi 4:19. Tenga ha ibeʼe khöda wanuturu lala Yehowa, hizaʼi ifahowuʼö göi wamorege nifaluada ba wombönökhi soguna khöda, he niʼa, niʼonukha, hegöi nahia waʼatoröi. (Mat. 6:33; 2 Te. 3:12) Tola manö aombö dödöda hewisa wombönökhi soguna khöda, ba no si toʼölö daʼö. Hizaʼi, iʼamenesi ita Yehowa enaʼö lö talafo taʼaombösi tödö sanandrösa ba daʼö. (Faigi keterangan tambahan ba Mataiʼo 6:25.) Hadia mbörö? Börö me lö irai iröi ita Amada. (Mat. 6:8; Heb. 13:5) Yafaduhu dödöda wa hasambalö ifalua Yehowa zi no ifabuʼu ba wombönökhi soguna khöda.

8. Hadia nifalua Yehowa ba wanolo Dawido?

⁸ Nehegö hadia nifalua Yehowa ba wanolo Dawido. No irai basaki waʼauri Dawido me igohi-gohi ia Razo Saulo. Hizaʼi, lö tebulö ibönökhi Yehowa zoguna khö Dawido hegöi ira saradadunia. Me ifuli itörö tödönia wanolo nibeʼe Yehowa, imane Dawido, ”Me awuyu-wuyu ndraʼo mböröta, ba me no atua ndraʼo iadaʼa, lö irai uʼila iʼerogö niha satulö tödö Lowalangi, mazui mangandrö-ngandrö gö ndraononia.” (Si. 37:25) Simane Dawido, te no irai öʼila samösa hewisa wanolo Yehowa ono mbanuania si lö faröi ba wangehenaigö soguna khöra.

9. Hewisa wombönökhi Yehowa soguna ba nono mbanuania sagötö alua bencana alam? (Faigi göi gambara.)

⁹ Ibönökhi göi Yehowa zoguna ba nono mbanuania sagötö alua bencana alam. Duma-dumania, me alua lofo sabölö-bölö me abad siföföna, ira niha Keriso moroi ba mbanua böʼö lafaʼoheʼö dolo-tolo khö ndra talifusöra si göna lofo andrö. (Hal. 11:​27-30; Rom. 15:​25, 26) Iadaʼa, ono mbanua Lowalangi laforomaʼö göi waʼoböwö simane daʼö. Ba ginötö alua bencana, ifarou nono mbanuania Yehowa si fao faʼomasi enaʼö lafaʼoheʼö dolo-tolora, simane ö, idanö, nukha hegöi dalu-dalu khö ndra talifusö si göna bencana. Ira talifusöda si fao ba tim pembangunan, lafuli lafazökhi nomo ndra talifusöda hegöi Nahia Gangowuloa si no tekiko. Baero daʼö, ono mbanua Yehowa tanö böʼö labeʼe wondrara dödö ba laʼaroʼö ba wamati ndra talifusöda si göna bencana.c

10-11. Hadia wamahaʼö nihalöda moroi ba zalua khö Borys?

¹⁰ Si fao faʼoböwö ihenaigö göi Yehowa zoguna ba niha si lö nasa mamosumange yaʼia. Simane daʼö göi, moguna taʼalui ginötö ba wamalua si sökhi ba niha si tenga si sara lala wamati khöda. (Gal. 6:10) Si toʼölönia, tobali fanuriaigö si sökhi daʼö. Nehegö atö zalua khö Borys, samösa kepala sekolah si toröi ba Ukraina. Hewaʼae yaʼia andre tenga Samaduhuʼö Yehowa, hizaʼi sökhi gamuatania khö ndraono sekola Samaduhuʼö Yehowa ba iʼameʼegö tödö nifaduhusira tödö. Börö me alua wasuwöta, moloi Borys isawa mbanua si lö göna fasuwöta ba soinia, ba latolo ia ira talifusöda. Ba gafuriata, möi Borys ba Wanörö Tödö Faʼamate Yesu. Me itörö tödönia zalua khönia, imane wangumaʼö, ”Sindruhu-ndruhu laʼameʼegö tödö ndraʼo ira Samaduhuʼö Yehowa ba oya wanolo nibeʼera khögu. Uʼandrö sibai khöra saohagölö.”

¹¹ Tola göi taʼoʼö waʼahakhö dödö Namada si so ba zorugo yaʼia na taforomaʼö waʼomasi ba niha sinangea mutolo, farahu ba daʼö niha si tenga si sara lala wamati khöda. (Luk. 6:​31, 36) Tatötöna wa faʼomasi niforomaʼöda tobali famarou dödöra enaʼö lafosumange Yehowa. (1 Fe. 2:12) Hewaʼae dania lö lafosumange Yehowa, hizaʼi lö tebulö tarasoi waʼomuso dödö börö me no mamuala ita.—Hal. 20:35.

ILUMÖʼÖ ITA YEHOWA

12. Hadia nifabuʼu Yehowa ba nono mbanuania si sambua ngawawa? (Sinunö 91:​1, 2, 14)

¹² Baso Zinunö 91:​1, 2, 14. Iadaʼa, no ifabuʼu Yehowa ba wolumöʼö yaʼita ba wamati. Lö itehegö khö Zatana ba wamakiko famosumange satulö. (Yoh. 17:15) Sagötö alua dania ”wamakao sabölö-bölö”, faduhu dödöda wa hasambalö ifalua zi no ifabuʼu Yehowa ba wolumöʼö ono mbanuania si sambua ngawawa, he folumöʼö ba wamati hegöi ba mboto.—Fam. 7:​9, 14.

13. Hadia manö nifalua Yehowa ba wolumöʼö yaʼita ero zamösana?

¹³ Hewisa Yehowa wolumöʼö yaʼita ero zamösana? Iʼogunaʼö Daromalinia, sanolo yaʼita ba wamaehusi satulö ba si lö atulö. (Heb. 5:14) Na tafaudugö waʼaurida ba goi-goi Zura Niʼamoniʼö, itugu aro wahuwusada khö Yehowa. Tarasoi waʼomuso dödö ba waʼauri ba lö fökhö-fökhöda. (Si. 91:4) Baero daʼö, iʼogunaʼö göi mbanua niha Keriso Yehowa ba wolumöʼö yaʼita. (Yes. 32:​1, 2) Na taʼoʼö goroisa Yehowa ba ahatö ita ba niha sangomasiʼö yaʼia, itugu teʼaroʼö ba tefarou dödöda ba wamandröndröu yaʼita ba ngawalö zi lö sökhi.—Amd. 13:20.

14. (a) Hadia mbörö wa lö iheta fefu gabula dödöda Yehowa? (b) Hadia zinangea tafaduhusi tödö moloʼö Sinunö 9:10? (Faigi göi nisura ba gahe zura.)

¹⁴ Me mböröta, itaria ilumöʼö nono mbanuania Yehowa moroi ba zi faʼudu khöra. Hizaʼi lö ero-ero ifalua daʼö. Ifatunö khöda Sura Niʼamoniʼö wa tola manö göna ita ”inötö hegöi salua si lö mudöna-döna”. (Sango. 9:11) Baero daʼö, itehegö Yehowa so ösa nono mbanuania nifakao mazui nibunu enaʼö oroma wa si falimo Zatana. (Yob. 2:​4-6; Mat. 23:34) Simanö göi iadaʼa, hewaʼae na lö iheta gabula dödöda Yehowa, hizaʼi faduhu dödöda wa lö irai iröi niha sangomasiʼö yaʼia.d—Si. 9:10.

YEHOWA ZAMEʼE KHÖDA FONDRARA DÖDÖ

15. Hewisa wangandrö, Sura Niʼamoniʼö, hegöi ira talifusöda ba wameʼe khöda fondrara dödö? (2 Korindro 1:​3, 4)

¹⁵ Baso 2 Korindro 1:​3, 4. Itaria abu dödöda, göna ita faʼaombö-aombö dödö mazui fanandraigö. Tola manö göna ita abula dödö irege tawaʼö wa hatö yaʼi-yaʼita. Te tamane, ’Hadia so zi tola morasoi salua khögu andre?’ Yafaduhu dödöu wa irasoi Yehowa zalua khömö. Tenga ha irasoi zalua khöda, hizaʼi ”yaʼia zondrara tödöda ba ngawalö wamakao nitaögöda”. Hewisa lalania? Ba ginötö tafaehagö nösi dödöda khö Yehowa ba wangandrö, ibeʼe khöda ’waʼohahau dödö sabölö moroi ba gera-era niha fefu’. (Fil. 4:​6, 7) Tola göi terara dödöda na tabaso wehede Yehowa ba Zura Niʼamoniʼö. Moroi ba daʼö, ifahaʼö ita Yehowa enaʼö atua-tua, taʼokhögö dötönafö, ba ifatunö khöda wa iʼomasiʼö sibai ita. Baero daʼö, tola göi terara dödöda na möi ita ba gangowuloa, börö me ba daʼö tatema mene-mene Zura Niʼamoniʼö sangaʼaroʼö famatida ba fariawö ita khö ndra talifusöda.

16. Hadia wamahaʼö nihalöda moroi khö Nathan hegöi Priscilla?

¹⁶ Nehegö sambua zalua sangoromaʼö wa tola iʼogunaʼö Zura Niʼamoniʼö Yehowa ba wondrara tödöda hegöi ba wangabölöʼö yaʼita. Mato hauga fakhe silalö, Nathan hegöi Priscilla si toröi ba Amerika Serikat, lahalö gangetula weʼamöi ba mbanua si lö ato sanuriaigö. Imane Nathan, ”Faduhu dödöma wa ifahowuʼö wamorege nifaluama Yehowa.” Hizaʼi me no larugi daʼö, göna ira fökhö hegöi abula dödö ba gefe. Ba gafuriata lahalö gangetula mangawuli ira ba mbanuara. Hewaʼae simanö, lö taya gabula dödöra ba waʼatosasa wangalui soguna. Imane Nathan, ”Abu dödögu hana wa lö ifahowuʼö ndraʼaga Yehowa simane nitötönama. Ibörögö manofu-nofu dödögu alai na so zala nifaluagu.” Hizaʼi samuza maʼökhö, ibörögö aboto ba dödö Nathan hegöi Priscilla wa sindruhunia lö irai iröi ira Yehowa. Imane Nathan, ”Sagötö mbaŵa waʼatosasa andrö, no tobali si fahuwu si sökhi khöma Zura Niʼamoniʼö sameʼe fanuturu lala ba famarou dödö. Maʼosambuaʼö dödöma ba wanolo nibeʼe Yehowa, tenga ba gabula dödö salua khöma. Me so khöma wangera-ngera simane daʼö, itugu faduhu dödöma wa lö tebulö ibeʼe khöma wanolo Yehowa na alua gabula dödö ba zi so miföna.”

17. Hezo isöndra wondrara dödö Helga? (Faigi göi gambara.)

¹⁷ Tola göi labeʼe khöda wondrara dödö ira talifusöda. Nehegö zalua khö Helga si toröi ba Hongaria. Ngafulu fakhe itaögö ngawalö gabula dödö sabua, irege iwaʼö tödönia wa lö saʼae eluaha waʼaurinia. Hewaʼae simanö, me ifuli itörö tödönia zalua khönia ba zilalö, awena aboto ba dödönia wa no ibeʼe khönia wondrara dödö Yehowa moroi khö ndra talifusö ba mbanua niha Keriso. Imane, ”Lö aetu wanolo nibeʼe Yehowa khögu ba ginötö fawuka gera-eragu börö halöwö, mondrorogö onogu sofökhö, ba abula dödö tanö böʼönia. Ero maʼökhö sagötö zi 30 fakhe ba zilalö andre, no ifalua mbuʼusa linia Yehowa ba wameʼe khögu fondrara dödö. Asese ifarou dödö ndra talifusöda ba wamaʼoheʼö khögu sura ba wamaʼema fehede si möi famarou dödö. Asese utema daʼö ba ginötö si tefaudu.”

18. Hewisa wameʼeda fondrara dödö ba niha böʼö?

¹⁸ Tola taʼoʼö Lowalangi ba wameʼe fondrara dödö ba niha böʼö. Hewisa lalada wamalua daʼö? Haogö fondrondrongo nitutunöra, beʼe khöra wondrara dödö ba tolo ira moloʼö soguna khöra. (Amd. 3:27) Dataforege wameʼe fondrara dödö ba niha si göna abula dödö, hewaʼae na lö nasa nifosumangera Yehowa. Na göna abula dödö niha si so ba zi fasuida, aombö dödöra mazui mofökhö ira, datafalukhaisi ira ba tafondrondrongo nitutunöra enaʼö taʼila tafaudugö hadia ayati si tefaudu si möi fondrara dödöra. Na taʼoʼö Yehowa ”Lowalangi wondrara dödö”, tenga ha ira talifusöda si sara lala wamati nitoloda, hizaʼi tatolo göi niha böʼö enaʼö adöni dödöra ba wamahaʼö yaʼira sanandrösa khö Yehowa.—Mat. 5:16.

LÖ TEBULÖ FAO KHÖDA YEHOWA

19. Hadia nifalua Yehowa khöda ba hewisa woloʼöda duma-dumania?

¹⁹ Sindruhu-ndruhu wa iʼameʼegö tödö Yehowa niha sangomasiʼö yaʼia. Lö iröi ita na göna ita abula dödö. Simane satua sebua faʼomasi, ibeʼe khöda wanuturu lala Yehowa, ibönökhi zoguna khöda, ilumöʼö ita ba ibeʼe khöda wondrara dödö. Tola taʼoʼö Namada sebua faʼomasi yaʼia na tatolo ba tafarou dödö niha si göna abula dödö. Sagötö fekolida ba gulidanö andre, hasambalö oya gabula dödö nitaögöda. Hizaʼi, yafaduhu dödöda wa lö iröi ita Yehowa. Fawuʼu li ia khöda imane, ”Böi ataʼufi börö me fao ndraʼo khöu.” (Yes. 41:10) Lö irai ha yaʼi-yaʼita!