ARTIKEL WAMAHAʼÖ 15
Famahaʼö Moroi ba Dandra Sahöli-höli Dödö Nifalua Yesu
”Itöröi mbanua andrö ba wamalua si sökhi ba ifadöhö niha.”—HAL. 10:38.
SINUNÖ 13 Duma-Duma Khöda Keriso
NITUTUNÖa
1. Tutunö hadia zalua me ifalua dandra sahöli-höli dödö siföföna Yesu.
ME LUO daʼö angohorita ndröfi 29 M, awena sibai ibörögö ifalua halöwö fanuriaigö Yesu. Me luo daʼö Yesu hegöi inania Maria, ba so ösa ndra nifahaʼönia nikaoni ba wangondrasi falöwa nifalua ba Kana, banua tanö yöu Nazareta si toröi Yesu. Si fahuwu khö Maria nösi nomo zolau falöwa, ba omasi ia itolo ira ba wangehenaigö soguna ba dome si tohare. Hizaʼi, so sambua zi möi fangailasi wongambatö si bohou andre hegöi ösi nomora. Ambö khöra nagu ba no ahori.b Alua daʼö, börö me ato sibai dome si tohare töra moroi ba zi no latötöna. Iʼanemaiʼö ifahatö ia Maria khö Yesu ba imane, ”Ahori khöra nagu.” (Yoh. 2:1-3) Hadia nifalua Yesu? Ifalua sambua dandra sahöli-höli dödö. Ibaliʼö nidanö tobali ”nagu si sökhi”.—Yoh. 2:9, 10.
2-3. (a) Hadia manö dandra sahöli-höli dödö nifalua Yesu? (b) Hadia mbuania na tafahaʼö ita ba dandra sahöli-höli dödö nifalua Yesu?
2 Ifalua dandra sahöli-höli dödö tanö böʼö Yesu sagötö ifalua halöwö fanuriaigö.c Ifalua dandra sahöli-höli dödö ba wanolo ngafulu ribu niha. Duma-dumania, ba zi dombua dandra sahöli-höli dödö nifaluania yaʼia daʼö me ibeʼe gö ndra matua si 5.000 faʼato. Aefa daʼö ba ginötö tanö böʼö, ifuli zui ibeʼe gö ndra matua si 4.000 faʼato. Ba na muʼerai ndra alawe awö ndraono töra 27.000 niha. (Mat. 14:15-21; 15:32-38) Ba zi dombua salua andrö, ato göi nifadöhö Yesu zofökhö. (Mat. 14:14; 15:30, 31) Tatu ato sibai niha sahöli-höli tödö ba nifalua Yesu andrö!
3 Oya wamahaʼö si tola tahalö ba dandra sahöli-höli dödö nifalua Yesu. Ba artikel daʼa, tatutunö ösa wamahaʼönia si tola möi fangaro wamatida. Aefa daʼö, taʼila dania hewisa Yesu ba wangoromaʼö fangide-ngideʼö, faʼahakhö dödö me ifalua dandra sahöli-höli dödö, ba hewisa woloʼöda amuatania andrö.
FAMAHAʼÖ SANANDRÖSA KHÖ YEHOWA HEGÖI YESU
4. Hadia mbuania na tafahaʼö ita ba dandra sahöli-höli dödö nifalua Yesu?
4 Moroi ba dandra sahöli-höli dödö nifalua Yesu, oya wamahaʼö si tola tahalö sanandrösa khönia hegöi khö Namania. Hadia mbörö? Börö me Yehowa zameʼe faʼabölö khö Yesu ba wamalua tandra sahöli-höli dödö. Imane ba Halöwö Zinenge 10:38, ”Ibayoini [Yesu] Lowalangi faoma eheha niʼamoniʼö ba tebeʼe khönia waʼabölö hegöi me itöröi mbanua andrö ba wamalua si sökhi ba ifadöhö niha nifakao Gafökha, börö me fao khönia Lowalangi.” Baero daʼö, törö tödöu wa moʼahonoa woloʼö Yesu Amania. Daʼö mbörö wa fefu niwaʼö hegöi nifalua Yesu, farahu ba daʼö dandra sahöli-höli dödö nifaluania, tola tafahaʼö ita ba lala wangera-ngera hegöi nirasoi Namania. (Yoh. 14:9) Datatutunö tölu wamahaʼö si tola tahalö moroi ba dandra sahöli-höli dödö nifalua Yesu si möi fangaro wamatida.
5. Hana wa tefarou dödö Yesu ba wamalua dandra sahöli-höli dödö? (Mataiʼo 20:30-34)
5 Si oföna, iʼomasiʼö ita Yesu hegöi Amania. Börö waʼomasi, ifalua dandra sahöli-höli dödö Yesu ba wangeheta abula dödö niha gulidanö. Samuza inötö, so darua niha sauʼa sangandrö tolo khö Yesu. (Baso Mataiʼo 20:30-34.) ’Ahakhö dödö’ Yesu khöra ba ifadöhö ira. So khönia waʼahakhö dödö simane daʼö börö me iʼomasiʼö ira. Daʼö göi zamarou yaʼia ba wameʼe gö niha sato hegöi ba wamadöhö niha si göna bou auri. (Mat. 15:32; Mrk. 1:41) Tola faduhu dödöda wa Yehowa andrö no Lowalangi sahakhö tödö, ba iʼomasiʼö sibai göi ita Ononia, ba tola irasoi wamakao nitaögöda. (Luk. 1:78; 1 Fe. 5:7) Tatu manö omasi ira na alio laheta fefu gabula dödö salua ba gulidanö andre!
6. Hadia waʼabölö nibeʼe Lowalangi khö Yesu?
6 Si dua, no ibeʼe waʼabölö Lowalangi khö Yesu ba wangeheta fefu gabula dödö niha gulidanö. Börö me tola ifalua dandra sahöli-höli dödö, iforomaʼö khöda Yesu wa tola iheta fefu gabula dödö si tebai taʼasiwai samösa. Duma-dumania, tola iheta zi tobali mbörö gabula dödö niha gulidanö yaʼia daʼö horö ondröita hegöi lua-luania, simane fökhö ba faʼamate. (Mat. 9:1-6; Rom. 5:12, 18, 19) Ngawalö dandra sahöli-höli dödö nifaluania zangoromaʼö wa tola ifadöhö ”fefu ngawalö wökhö” ba tola isusugi niha si no mate. (Mat. 4:23; Yoh. 11:43, 44) Baero daʼö, tola ifahono mbade sabölö-bölö ba iʼefaʼö niha moroi ba malaʼika si lö sökhi. (Mrk. 4:37-39; Luk. 8:2) Tatu omuso dödöda me no ibeʼe Yehowa waʼabölö sebua khö Nononia!
7-8. (a) Hadia zi faduhu dödöda ba dandra sahöli-höli dödö nifalua Yesu? (b) Hadia dandra sahöli-höli dödö nibalo-baloimö ba gulidanö si bohou?
7 Si tölu, tola tafaduhusi tödö wa fefu mbuʼusa li Lowalangi hasambalö alua na tohare Wamatörö Lowalangi ba gulidanö. Me auri Yesu ba gulidanö tobali niha, no oya dandra sahöli-höli dödö si no ifalua. Börö daʼö, tola faduhu dödöda wa ba ginötö mamatörö ia ba gulidanö tobali Razo ba Wamatörö Lowalangi, hasambalö ifalua dania dandra sahöli-höli dödö sabölö ebua. Khalaigö atö hadia manö howu-howu nirasoida dania. Taʼokhögö mboto soʼahonoa, börö me no iheta Yesu fefu wökhö hegöi soʼamböta ba mbotoda. (Yes. 33:24; 35:5, 6; Fam. 21:3, 4) Lö göi irai olofo ita mazui tefakao börö bencana alam. (Yes. 25:6; Mrk. 4:41) Ba omuso sibai dödöda me tatemaʼö nösi nomoda mazui si fahuwu khöda nisusugi. (Yoh. 5:28, 29) Hadia dandra sahöli-höli dödö sabölö öbalo-baloi ba gulidanö si bohou?
8 Ba ginötö ifalua dandra sahöli-höli dödö Yesu, lö tebulö iforomaʼö wangide-ngideʼö hegöi faʼahakhö dödö. Moguna taʼoʼö gamuatania si dombua andrö. Iadaʼa, datatutunö dombua dandra sahöli-höli dödö nifaluania. Si oföna, datatutunö dandra sahöli-höli dödö me alua walöwa ba Kana.
FAMAHAʼÖ SANANDRÖSA BA WANGIDE-NGIDEʼÖ
9. Hana wa ifalua dandra sahöli-höli dödö Yesu me alua walöwa ba Kana? (Yohane 2:6-10)
9 Baso Yohane 2:6-10. Me ahori nagu ba walöwa andrö, hadia sinangea na so nifalua Yesu? Löʼö. Lö nifaʼeleʼö wa ifalua dandra sahöli-höli dödö Mesia ba wamazökhi agu. Hizaʼi, khalaigö atö hadia nirasoimö na ahori nidanö nibadu ba walöwamö. Tatu aila sibai ndraʼugö. Te daʼö mbörö wa omasi Yesu na so nifaluania. Ahakhö dödö Yesu ba niha sangowalu andrö hegöi ösi nomora. Daʼö mbörö wa ifalua dandra sahöli-höli dödö si no mututunö ba wamobörö artikel andre. Ibaliʼö mato 390 liter nidanö tobali agu si sökhi. Ihenaigö nagu soya sibai enaʼö tola laʼiröʼö mazui lafamawa, irege kefenia tola moguna ba niha sangowalu andrö. Tatu larasoi waʼahono dödö niha sangowalu no mege ba laʼandrö sibai saohagölö.
Simane Yesu, lö omasi ita ba wohöni-höni waʼamofozu si no takhamö (Faigi ngenoli si 10-11)e
10. Hadia zi tohude si no muzara-zara wanutunö ba Yohane faza 2? (Faigi göi gambara.)
10 Nehegö ösa zi tohude si no muzara-zara wanutunö ba Yohane faza 2. Hadia Yesu zamoʼösi rumbi naha nidanö andrö? Tenga. Enaʼö lö teʼosambuaʼö dödö niha khönia, daʼö wa iwaʼö Yesu khö ndra sohalöwö ba wamoʼösi rumbi naha nidanö andrö. (Ayati 6, 7) Me no aefa ibaliʼö nidanö tobali agu si sökhi, hadia iʼohe nagu andrö Yesu khö zondröniaʼö falöwa? Löʼö. Iwaʼö khö ndra sohalöwö ba wamalua daʼö. (Ayati 8) Ba lö göi ifazawa galasi si no mufoʼösi nagu andrö ba imane wangumaʼö ba dome, ’Mibadu nagu si no uhaogö.’
11. Hadia wamahaʼö si tola tahalö ba dandra sahöli-höli dödö nifalua Yesu?
11 Hadia wamahaʼö si tola tahalö ba dandra sahöli-höli dödö nifalua Yesu me alua walöwa ba Kana? Tola tafahaʼö ita wa moguna so khöda wangide-ngideʼö. Lö ihöni-höni ia Yesu ba waʼamofozu si no ifalua. Lö irai ihöni-höni ia samösa. Hizaʼi, si fao fangide-ngideʼö lö tebulö ifolakhömi Namania. (Yoh. 5:19, 30; 8:28) Simane Yesu, moguna göi so khöda wangide-ngideʼö. Gofu hadia ia waʼamofozu si no takhamö ba wangai halöwö khö Yehowa, tebai tahöni-höni ita samösa. Hizaʼi, omasi ita tasuno Lowalangi sabölö, si no mangoromaʼö khöda faʼasökhi dödö me ibeʼe khöda ginötö ba wamosumange yaʼia. (Yer. 9:23, 24) Börö daʼö, yalötebulö tafolakhömi Yehowa. Tatörö tödöda, wa tola mofozu fefu halöwö nifaluada börö wanolonia.—1 Ko. 1:26-31.
12. Hewisa lalada ba woloʼö fangide-ngideʼö niʼokhögö Yesu? Beʼe duma-duma.
12 Hewisa nasa lalada ba woloʼö fangide-ngideʼö niʼokhögö Yesu? Khalaigö zalua andre: So samösa zatua sokubaloi, itolo samösa genoni si bohou ebua ba wamaʼanö huhuo sebua nifaʼemania si oföna sibai. Buania, sökhi sibai wamaʼemania huhuo sebua andrö ba teʼabölöʼö ndra talifusöda. Me no aefa gangowuloa, so samösa dalifusöda sangumaʼö khö zatua sokubaloi no mege, ”Baga sibai huhuo sebua nifaʼema dalifusöda andrö!” Tola manö imane wangumaʼö satua sokubaloi andrö, ’Yaʼia wö sa, hauga hari göi utolo ia ba wamaʼanö.’ Hizaʼi, si fao fangide-ngideʼö ha imane, ’Yaʼia he baga sibai. Adöni göi dödögu nifaʼemania!’ Na so khöda wangide-ngideʼö, lö tafatunö ba niha böʼö hadia manö zi sökhi si no tafalua. Omuso dödöda börö me iʼila ba iʼameʼegö tödö wamorege nifaluada Yehowa. (Fareso göi Mataiʼo 6:2-4; Heb. 13:16) Tatu omasi ia na taʼoʼö wangide-ngideʼö niʼokhögö Yesu.—1 Fe. 5:6.
FAMAHAʼÖ SANANDRÖSA BA WAʼAHAKHÖ DÖDÖ
13. Hadia niʼila Yesu salua ahatö ba mbanua Naʼi, ba hadia nifaluania? (Luka 7:11-15)
13 Baso Luka 7:11-15. Khalaigö zalua andre me no arakhagö dua fakhe ibörögö Yesu wamalua halöwö fanuriaigö. Me luo daʼö möi Yesu ba Naʼi, banua si so ba Galilaia sahatö ba mbanua Zunema. Mato 900 fakhe silalö, samaʼeleʼö sotöi Elisa, no irai isusugi nono ndra alawe moroi ba Zunema. (2 Ra. 4:32-37) Me no ahatö Yesu ba mbawa göli mbanua Naʼi, iʼila so mboto zi mate nifahea, laʼohe baero mbanua andrö. Sindruhu faʼabu dödö zalua. Mate nono lakha mbanua andrö si ha sambu-sambua. Hewaʼae simanö, ato niha moroi ba mbanua andrö zi fao khönia, irege lö irasoi wa ha yaʼi-yaʼia. Itaha ira Yesu, ba ifalua zahöli-höli dödö khö lakha mbanua sabu tödö andrö. Isusugi nononia! Daʼa zi oföna sibai moroi ba zi tölu wanusugi nifalua Yesu, ba no musura ba Injil.
Simane Yesu, moguna taʼalui lala ba wangoromaʼö faʼahakhö dödö ba niha sabu tödö (Faigi ngenoli si 14-16)
14. Hadia zi tohude si no muzara-zara wanutunö ba Luka faza 7? (Faigi göi gambara.)
14 Nehegö ösa zi tohude si no muzara-zara wanutunö ba Luka faza 7, sangoromaʼö faʼahakhö dödö Yesu. Imane ba daʼö, ’ahakhö dödö’ Yesu me no iʼila zi samösa ina sabu tödö. (Ayati 13) Te inehe-nehegö ia Yesu me ilau mowaö-waö ba mege-ege ia ba zinga nononia si no mate. Hizaʼi, tenga ha asala irasoi waʼahakhö dödö Yesu. So göi nifaluania ba wanolo zi samösa ina andrö. Si fao faʼasökhi dödö, imane wangumaʼö khönia, ’Böi eʼe saʼae.’ Aefa daʼö, isusugi nono andrö Yesu ba ”itouʼö ba danga ninania”.—Ayati 14, 15.
15. Hadia wamahaʼö nihalöda ba dandra sahöli-höli dödö nifalua Yesu?
15 Hadia wamahaʼö nihalöda ba dandra sahöli-höli dödö nifalua Yesu? Tafahaʼö ita wa moguna so khöda waʼahakhö dödö ba niha sabu tödö. Sindruhu sa, tebai tasusugi niha si no mate. Hizaʼi, simane Yesu, tola taforomaʼö khöra waʼahakhö dödö na taʼameʼegö tödö ira. Tola taʼalui lala ba wangumaʼö mazui ba wamalua hadia ia si tola möi fanolo ba sondrara tödöra.d (Amd. 17:17; 2 Ko. 1:3, 4; 1 Fe. 3:8) Moguna itörö tödöda, fehede mazui fondrege zide-ide nifaluada khöra tola möi fangabölöra.
16. Simane ba gambara, hadia wamahaʼö nihalömö ba zi no irai alua khö zi samösa ina si mate ono?
16 Nehegö zi no irai alua. Hauga fakhe silalö na manunö ba gangowuloa, so samösa dalifusöda ira alawe inehe-nehegö dalifusöda ira alawe tanö böʼö si dadao ba zingania sege-ege. Sinunö niʼanunöisi yaʼia daʼö sanandrösa ba dötönafö fanusugi, ba ilau meʼe talifusöda ira alawe andrö börö me bohou mate nononia ono alawe. Daʼö mbörö wa iʼanemaiʼö ifahatö ia khö dalifusöda sege-ege andrö, italagui ba faoma laʼanunöisi zinunö andrö. Ba gafuriata, imane talifusöda sabu tödö no mege wa itugu iʼomasiʼö ndra talifusöda. Iʼandrö sibai saohagölö börö me lö tebulö iʼondrasi gangowuloa. Ba imane nasa, ”Ba daʼö tatema wanolo, ba Nahia Gangowuloa.” Tola faduhu dödöda wa iʼila ba iʼameʼegö tödö Yehowa ngawalö zide-ide nifaluada ba wangoromaʼö faʼahakhö dödö ba niha sabu tödö, si no ’arasa tödö’.—Si. 34:18.
DOUʼÖ WAMAHAʼÖ YAʼUGÖ BA DANDRA SAHÖLI-HÖLI DÖDÖ NIFALUA YESU
17. Hadia zi no tafahaʼö yaʼita moroi ba dandra sahöli-höli dödö nifalua Yesu?
17 Tola teʼabölö ita na tafahaʼö ita ba ngawalö dandra sahöli-höli dödö nifalua Yesu si no musura ba Injil. Moroi ba daʼö taʼila wa Yehowa hegöi Yesu, laʼomasiʼö sibai ita. Tola iʼasiwai fefu gabula dödö niha gulidanö Yesu, ba simanö göi mbuʼusa li Lowalangi hasambalö alua ia ba zi lö ara tö, na no tohare Wamatörö Lowalangi ba gulidanö. Ba ginötö öfahaʼö ndraʼugö sanandrösa ba dandra sahöli-höli dödö nifalua Yesu, angerönusi hewisa lalamö ba woloʼö gamuata Yesu. Fahaʼö nasa ndraʼugö ba dandra sahöli-höli dödö tanö böʼö nifalua Yesu ba ginötö öfalua wamahaʼö samösa, mazui famahaʼö ba zi sambua omo. Alui wamahaʼö si tola öhalö ba tutunö daʼö khö ndra talifusöda ba wamati. Na öfalua daʼö, itugu adöni dödöu ba wahuhuosa ba tola möi fangabölöʼö ndra talifusöda.—Rom. 1:11, 12.
18. Hadia nitutunöda ba artikel aefa daʼa?
18 Ba gafuriata wangai Yesu halöwö fanuriaigö me so ia ba gulidanö, ifalua nasa dandra sahöli-höli dödö tanö böʼö. Daʼö zi medölu kalinia, mazui safuria isusugi niha si no mate. Hizaʼi, faböʼö waö-waö salua andre. Isusugi zi fahuwu khönia si no öfa hari no mate. Hadia wamahaʼö nihalöda ba dandra sahöli-höli dödö andrö, ba hewisa enaʼö itugu mamati ita ba dötönafö fanusugi? Fanema linia, tatutunö ba artikel aefa daʼa.
SINUNÖ 20 Öbeʼe Nonomö Sebua Böli
a Ifahono mbade Yesu, ifadöhö niha sofökhö, ba isusugi niha si no mate. Sindruhu-ndruhu no sahöli-höli dödö nifaluania! Tenga ha adöni dödöda waö-waö salua andre, hizaʼi so wamahaʼö si tohude si tola tahalö. Daʼö mbörö wa musura ia ba Zura Niʼamoniʼö. Na tatutunö ia, oya wamahaʼö si tola tahalö sanandrösa khö Yehowa hegöi Yesu, ba taʼila göi hadia mbua-bua si sökhi sinangea tadouʼö.
b Imane zi samösa pakar Zura Niʼamoniʼö, ”Faʼaohagölö ba wanemaʼö tome ba soi tanö ba Gatumbukha, no halöwö niʼamoniʼö sinangea mufalua, ba abölö sökhi na töra gö si no muhenaigö. Faʼaohagölö soroi ba dödö ba wanemaʼö tome, töra-töra na mufalua walöwa, moguna oya gö nihenaigö, he niʼa hegöi nibadu.”
c Töra 30 dandra sahöli-höli dödö nifalua Yesu si no musura bakha ba Injil. Baero daʼö, oya nasa dandra sahöli-höli dödö nifalua Yesu si lö muzara-zara wanutunö. Duma-dumania, samuza inötö ”owulo fefu niha si so ba mbanua andrö” ba ”ifadöhö fefu ngawalö wökhö si göna ba niha”.—Mrk. 1:32-34.
d Mene-mene si tola öʼoʼö ba öfalua sanandrösa ba wondrara tödö niha sabu tödö, tola öfaigi ba artikel ”Mondrara Tödö Niha Sabu Tödö” ba Manuriaigö No. 3 2016.
e ELUAHA GAMBARA: No mosindro Yesu tanö furi. Marafule hegöi tome, labadu-badu nagu si sökhi.