ARTIKEL WAMAHAʼÖ 18
Yafaoma Tafarou Dödö Nawöda ba Gangowuloa
’Yafaoma taʼameʼegö tödö ba tafarou dödö nawöda zamösana.’—HEB. 10:24, 25.
SINUNÖ 88 Fahaʼö Ndraʼo ba Lalamö
NITUTUNÖa
1. Hana wa tabeʼe mbua gera-erada ba gangowuloa?
HANA wa taʼondrasi gangowuloa? Dane-dane siföföna yaʼia daʼö börö me omasi ita tasuno Yehowa. (Si. 26:12; 111:1) Taʼondrasi göi gangowuloa enaʼö faoma tafarou dödö nawöda ba ginötö si basaki andre. (1 Te. 5:11) Tafalua zi dombua ngawalö andrö ba ginötö tabeʼe yawa dangada ba tabeʼe mbua gera-erada.
2. Hawaʼara manö tola tabeʼe mbua gera-erada ba gangowuloa?
2 Ero migu tebeʼe khöda ginötö ba wameʼe mbua gera-era ba gangowuloa. Duma-dumania, ba gangowuloa hari migu, tabeʼe mbua gera-erada ba Wamahaʼö Manuriaigö. Aefa daʼö, ba gangowuloa barö migu, tola tabeʼe mbua gera-erada ba faosatö Girö-Girö ba Wamati, Famahaʼö Zura Niʼamoniʼö ba Gangowuloa hegöi ba faosatö huhuo si fao fanofu.
3. Hana wa tola manö abua khöda ba wameʼe mbua gera-era, ba hewisa Heberaiʼo 10:24, 25 wanolonia yaʼita?
3 Omasi ita fefu ba wanuno Yehowa ba tafarou dödö ndra talifusöda. Hizaʼi, te so daha-tahada ba ginötö tabeʼe mbua gera-era. Tola manö ataʼu ita ba wamaʼema yaʼia, mazui omasi sibai ita ba wameʼe mbua gera-era, hizaʼi lö asese latuyu ita. Hadia zi möi fanoloda? Fanema linia so ba zura nibeʼe Waulo ba niha Heberaiʼo. Ba ginötö itutunö wa moguna sibai taʼondrasi gangowuloa, iwaʼö wa moguna taʼosambuaʼö dödöda ’ba wamarou tödö nawöda’. (Baso Heberaiʼo 10:24, 25.) Moguna tatörö tödöda wa tola tefarou dödö ndra talifusöda na taforomaʼö wamatida ba mbua gera-erada, hewaʼae na no öna-öna daʼö. Na tatörö tödöda daʼö, lö talafo ataʼu ita ba wameʼe bua gera-era. Aefa daʼö, hewaʼae na lö asese latuyu ita, omuso dödöda börö me tebeʼe göi ginötö ba niha böʼö ba wamaʼema bua gera-erara.—1 Fe. 3:8.
4. Hadia zi tölu ngawalö nitutunöda ba artikel daʼa?
4 Ba artikel daʼa, tatutunö hewisa enaʼö faoma tafarou dödö nawöda ba mbanua niha Keriso side-ide, si lö atoto zameʼe mbua gera-era. Tatutunö göi hewisa enaʼö faoma tafarou dödö nawöda ba mbanua niha Keriso sebua, sato zameʼe mbua gera-era. Aefa daʼö, tatutunö göi hewisa enaʼö sindruhu-ndruhu möi famarou dödö niha böʼö nösi mbua gera-era nibeʼeda.
FAOMA TAFAROU DÖDÖ NAWÖDA BA MBANUA NIHA KERISO SIDE-IDE
5. Hewisa enaʼö faoma tafarou dödö nawöda hewaʼae na lö atoto zangondrasi angowuloa?
5 Ba kelompok mazui ba mbanua niha Keriso side-ide, tola manö lö ato zameʼe mbua gera-era. Itaria ara sibai labalo-baloi ira sondröniaʼö famahaʼö, awena so zameʼe yawa tanga. Daʼö mbörö wa tola manö aföli ita ba gangowuloa, irege lö tefarou dödö zangondrasi. Hadia zi tola öfalua? Forege enaʼö asese öbeʼe yawa dangamö. Na öfalua daʼö, no öfarou dödö niha böʼö enaʼö asese labeʼe mbua gera-erara.
6-7. Hewisa enaʼö alö waʼataʼuda ba wameʼe mbua gera-era?
6 Hewisa na ataʼu ndraʼugö ba wameʼe mbua gera-era? Ato göi niha zorasoi simane daʼö. Hizaʼi, enaʼö tedou nasa ndraʼugö ba wamarou tödö ndra talifusö, forege ba wangalui lala hewisa enaʼö alö waʼataʼumö. Hadia zi tola öfalua?
7 Tola öʼalui wanuturu lala si no mufaʼanö ba majalah Manuriaigö.b Duma-dumania, lafarou dödöda enaʼö tahaogö wamaʼanö yaʼita. (Amd. 21:5) Na sindruhu-ndruhu aboto ba dödöda duho nitutunö, tola aoha khöda ba wameʼe mbua gera-era. Lafarou göi ita enaʼö tabeʼe mbua gera-era sadogo-dogo. (Amd. 15:23; 17:27) Na tafaʼanö mbua gera-era sadogo-dogo, tola manö lö ataʼu ita ba wamaʼema daʼö. Abölö alio göi aboto ba dödö ndra talifusöda mbua gera-era sadogo-dogo si lö oya ngawua wehede, moroi na tabeʼe mbua gera-era sanau ba abölö oya wamahaʼö nitutunöda. Na tabeʼe mbua gera-era sadogo-dogo faoma fehededa samösa, daʼö zangoromaʼö wa no tahaogö tafaʼanö ita ba sindruhu-ndruhu aboto ba dödöda duho nitutunö.
8. Hewisa wamaigi Yehowa famorege nifaluada?
8 Hewisa na no öʼoʼö wanuturu lala andrö, hizaʼi lö tebulö so khöu waʼataʼu ba wameʼe mbua gera-era töra moroi ba zi sakali mazui dua kali? Yafaduhu dödöu wa iʼameʼegö tödö Yehowa wamorege si no öfalua. (Luk. 21:1-4) Lö irai iʼandrö khöda Yehowa ba wamalua si tebai tafalua. (Fil. 4:5) Börö daʼö, angeragö hadia zi tola öfalua, tatugöi enaʼö öfalua daʼö, ba angandrö enaʼö so khöu waʼahono dödö. Ba wamobörö, tola ötatugöi ba wamaʼema sambua mbua gera-era sadogo-dogo.
FAOMA TAFAROU DÖDÖ NAWÖDA BA MBANUA NIHA KERISO SEBUA
9. Hadia manö daha-taha nitaögöda ba mbanua niha Keriso sebua?
9 Na farahu ndraʼugö ba mbanua niha Keriso sato sanuriaigö, tola manö so daha-taha tanö böʼö nitaögömö. Te ato ndra talifusöda sameʼe yawa tangara, irege lö asese latuyu ndraʼugö. Nehegö duma-duma Danielle. Omasi sibai ia ba wameʼe mbua gera-era ba gangowuloa.c Ba wamaiginia, no sambua faosatö ba lala wamosumange daʼö, ba tola möi fangaro wamatinia hegöi niha böʼö ba zindruhu si so ba Zura Niʼamoniʼö. Hizaʼi, me findra ia ba mbanua niha Keriso sebua, lö asese latuyu ia. Ba itaria, lö mutuyu ia sagötö mufalua gangowuloa. Imane wangumaʼö, ”Abao sibai dödögu. Hulö taya ginötö si sökhi andrö. Ba me alua daʼö ba zi hauga kali, ibörögö so ba wangera-ngeragu alai na iʼodödögö wa lö ituyu ndraʼo.”
10. Hewisa enaʼö oya tabeʼe mbua gera-erada ba gangowuloa?
10 Hadia no irai örasoi simane nirasoi Danielle? Na noa, te lö omasiʼö saʼae ba wameʼe mbua gera-era, ba ha si tobali samondrongo ndraʼugö ba gangowuloa. Hizaʼi, böi tebulö öforege ba wameʼe mbua gera-era. Hadia zi tola öfalua? Tola öfaʼanö mato hauga ngawua mbua gera-eramö ero mufalua gangowuloa. Na öfalua daʼö, tola nasa öbeʼe mbua gera-eramö sandrohu wamahaʼö, hewaʼae na lö hadöi mutuyu ndraʼugö ba wamobörö. Ba ginötö öfaʼanö Wamahaʼö Manuriaigö, angeragö hadia gamakhaita ero sambua ngenoli ba duho artikel. Na öfalua daʼö, tola öfaʼanö mato hauga ngawua mbua gera-era si sökhi, si tola öfaʼema sagötö mufalua wamahaʼö. Baero daʼö, tola öfaʼanö mbua gera-era ba ngenoli sanutunö sindruhu sabölö abakha, sabua ba wanutunö. (1 Ko. 2:10) Hadia mbörö? Börö me si toʼölönia lö ato zameʼe yawa tangara ba ngenoli daʼö. Hizaʼi, hewisa na no öʼoʼö wanuturu lala si no mubeʼe andrö, ba lö nasa mutuyu ndraʼugö ba wamaʼema mbua gera-era ba zi hauga kali mufalua gangowuloa? Tola fahuhuoʼö khö zondröniaʼö famahaʼö fatua lö mufalua gangowuloa, ba fatunö khönia hezo so dania wanofu sinangea öbeʼe wanema li.
11. Hadia mene-mene si tola tafalua ba Wilifi 2:4?
11 Baso Wilifi 2:4. Ibeʼe wanuturu lala Lowalangi khö Waulo ba woʼamenesi niha Keriso enaʼö laʼameʼegö tödö zoguna ba niha böʼö. Hewisa woloʼöda mene-mene andrö ba gangowuloa? Yaʼia daʼö na tatörö tödöda wa omasi göi niha böʼö ba wameʼe mbua gera-erara simane yaʼita.
Ba ginötö fahuhuo, tatu öbeʼe göi ginötö ba niha böʼö enaʼö fahuhuo ira. Simane daʼö göi, moguna öbeʼe ginötö ba niha böʼö ba wamaʼema mbua gera-erara ba gangowuloa (Faigi ngenoli si 12)
12. Hadia sambua lala si sökhi ba wangabölöʼö niha böʼö ba gangowuloa? (Faigi göi gambara.)
12 Angeragö atö. Ba ginötö fahuhuo ndraʼugö khö ndra awö-awömö, hadia ha yaʼugö manö zi fahuhuo ba lö öbeʼe ginötö ba niha böʼö fahuhuo? Tatu omasiʼö öbeʼe khöra ginötö enaʼö fahuhuo ira. Simane daʼö göi ba gangowuloa. Omasi ita tabeʼe ginötö ba niha böʼö ba wamaʼema mbua gera-erara. Sambua lala si sökhi ba wangaroʼö ira talifusöda yaʼia daʼö na tabeʼe khöra ginötö ba wamatunö famatira. (1 Ko. 10:24) Datatutunö hewisa wamaluada daʼö.
13. Hadia zi tola tafalua enaʼö tebeʼe ginötö ba niha böʼö ba wamaʼema mbua gera-erara?
13 Tola tatatugöi enaʼö adogo-dogo mbua gera-era nifaʼemada, irege so ginötö ba niha böʼö ba wamaʼema mbua gera-erara. Ira satua sokubaloi hegöi sanuriaigö si no toʼölö, tola labeʼe ira duma-duma ba wamalua daʼö. Na öbeʼe mbua gera-era sadogo-dogo, böi oya sibai nitutunömö. Na ötutunö fefu zi so ba ngenoli, lö hadöi inötö ba niha böʼö ba wameʼe mbua gera-era. Duma-dumania, ba ngenoli daʼa, so dombua wanuturu lala si no mubeʼe: Tatugöi enaʼö adogo-dogo mbua gera-era nifaʼemamö, ba böi talafo oya nitutunömö. Na yaʼugö nituyu ba ngenoli daʼa, tola ha sambua manö nitutunömö.
Hawaʼara ginötönia lö tabeʼe yawa dangada? (Faigi ngenoli si 14)f
14. Hewisa wotatugöida hawaʼasese tabeʼe yawa dangada? (Faigi göi gambara.)
14 Angeragö hawaʼasese öbeʼe yawa dangamö. Na talafo asese tabeʼe yawa dangada, tola manö alawö dödö zondröniaʼö famahaʼö na lö ituyu ita ba zi hauga kali, hewaʼae na lö fakhamö ituyu niha böʼö. Tola manö daʼö mbörö wa alawö niha böʼö ba wameʼe yawa tangara.—Sango. 3:7.
15. (a) Hadia nifaluada na lö latuyu ita ba wamaʼema mbua gera-era? (b) Hewisa zondröniaʼö famahaʼö ba wameʼe inötö ba niha sato ba wamaʼema mbua gera-era? (Faigi kotak ”Na Yaʼugö Zondröniaʼö Famahaʼö”.)
15 Na ato zanuriaigö sameʼe yawa tangara sagötö mufalua wamahaʼö, te lö asese tabeʼe mbua gera-erada simane somasi ita. Itaria, lö ituyu ita sondröniaʼö famahaʼö. Ba tola manö afatö dödöda. Hizaʼi, taforege enaʼö böi abao dödöda.—Sango. 7:9.
16. Hewisa enaʼö tola tafarou dödö ndra talifusöda sameʼe mbua gera-era?
16 Na tebai asese öbeʼe mbua gera-eramö simane somasiʼö, tandraigö haogö fondrondrongo mbua gera-era nifaʼema niha böʼö. Aefa daʼö, na no awai gangowuloa, suno ira ba mbua gera-era nifaʼemara andrö. Fanuno simane daʼö möi famarou dödö ndra talifusöda, hulö simane na öbeʼe mbua gera-eramö. (Amd. 10:21) Daʼö lala tanö böʼö ba wamarou tödö niha böʼö.
LALA TANÖ BÖʼÖ BA WAMAROU TÖDÖ NIHA BÖʼÖ
17. (a) Hewisa zatua ba wanolo iraonora ba wamaʼanö mbua gera-era? (b) Simane niforomaʼö ba video, hadia zi öfa ngawalö si tola lafalua ba wamaʼanö mbua gera-era? (Faigi göi nisura ba gahe zura.)
17 Hadia lala tanö böʼö enaʼö faoma tafarou dödö nawöda ba gangowuloa? Na so ndraonomö, tolo ira ba wamaʼanö mbua gera-era si tefaudu ba ndröfira. (Mat. 21:16) Itaria, so duho nitutunö ba gangowuloa sanandrösa ba gabula dödö ba wangowalu, mazui sanandrösa ba gamuata si lö raʼiö. Hewaʼae simanö, te so sambua mazui dombua ngenoli zi tola labeʼe mbua gera-erara iraono. Tolo ndraonomö enaʼö aboto ba dödöra hadia mbörö wa lö asese latuyu ira na labeʼe yawa dangara. Na öfalua daʼö, lö afatö dödöra hewaʼae na lö latuyu ira.—1 Ti. 6:18.d
18. Hadia zinangea itörö tödöda enaʼö lö tedönisi dödö niha böʼö khöda ba ginötö tabeʼe mbua gera-erada? (Amaedola 27:2)
18 Fefu ita, tola tafaʼanö mbua gera-era si möi mamolakhömi töi Yehowa hegöi famarou dödö ndra talifusöda ba wamati. (Amd. 25:11) Itaria tatutunö zi no irai alua khöda. Hizaʼi, moguna taforege enaʼö lö talafo oya tatutunö sanandrösa khöda. (Baso Gamaedola 27:2; 2 Ko. 10:18) Si sökhinia, taforege enaʼö taʼosambuaʼö dödöda khö Yehowa, Taromalinia, hegöi ono mbanuania. (Fam. 4:11) Sindruhu sa, na fanofu ba ngenoli andrö iʼandrö khöda ba wanutunö hadia nirasoida mazui si no irai alua khöda, tola tafalua daʼö. So duma-dumania ba wanofu aefa daʼa.
19. (a) Hadia mbuania na taʼameʼegö tödö zoguna ba niha böʼö ba gangowuloa? (Roma 1:11, 12) (b) Hana wa taʼameʼegö tödö ginötö ba wameʼe mbua gera-era ba gangowuloa?
19 Sindruhu sa, lö hadöi si no muhonogöi lala ba wameʼe mbua gera-era ba gangowuloa. Sabölö moguna, fefu ita taforege enaʼö faoma tafarou dödö nawöda. Börö daʼö, moguna asese tabeʼe mbua gera-erada. Mazui na lö asese tabeʼe mbua gera-erada simane somasi dödöda, moguna so khöda waʼahono dödö börö me no mubeʼe khöda ginötö ba wamaʼema mbua gera-era. Omuso göi dödöda börö me tola göi labeʼe mbua gera-erara niha böʼö. Na taʼosambuaʼö dödöda ba zoguna ba niha böʼö ba gangowuloa, tola sindruhu-ndruhu ”tafarou dödö nawöda”.—Baso Roma 1:11, 12.
SINUNÖ 93 Fahowuʼö Gangowuloama
a Faoma tafarou dödö nawöda ba ginötö tabeʼe mbua gera-erada ba gangowuloa. Hizaʼi, so ösa zataʼu ba wameʼe mbua gera-era. Tanö böʼönia, sindruhunia omasi ira ba wameʼe mbua gera-era, hizaʼi lö asese latuyu ira. Ba zi dombua salua andre, hewisa woʼameʼegöda tödö soguna ba niha böʼö enaʼö faoma tafarou dödö nawöda? Ba hewisa wameʼeda mbua gera-era si möi famarou dödö ndra talifusöda ba wangoromaʼö faʼomasi hegöi ba wamalua si sökhi? Tatutunö daʼö ba artikel daʼa.
b Enaʼö öʼila wanuturu lala tanö böʼö, faigi majalah Manuriaigö Mbaŵa si Sara 2019, ngaʼörö 8-13, hegöi ba Menara Pengawal 1 Mbaŵa si Siwa 2003, ngaʼörö 19-22.
c No mufaböʼöni döi.
d Faigi video Tobali si Fahuwu khö Yehowa—Henaigö Mbua Gera-erau ba jw.org.
f ELUAHA GAMBARA: Ba zi sambua banua niha Keriso sebua, samösa dalifusöda si no mameʼe mbua gera-era, ibeʼe göi ginötö ba niha böʼö ba wamaʼema mbua gera-erara.