Böi Aetu-Aetu Woʼangerönusi Soʼamakhaita ba Wamati

1, 2. Hadia zi faböʼö niha moroi ba gurifö?

AHÖLI-HÖLI dödöda wamazökhi Lowalangi guto niha. Börö daʼö, niha gulidanö tola lafahaʼö ira ba ngawalö li. Börö li wa tola taʼila wombaso, wanura, fahuhuo, ba aboto ba dödöda hadia nirongoda. Tola mangandrö ita ba tasuno Yehowa. Daʼa gamaehuta niha moroi ba gurifö. Lö aboto ba dödö niha sagatua-tua iadaʼa hewisa zi ndruhunia wohalöwö guto niha.

² No buala moroi khö Yehowa wa tola fahuhuo ita ba li niʼilada. (Zinunö 139:14; Famaʼeleʼö 4:11) Ibeʼe göi nasa mbuala zamaböʼöni niha moroi ba gurifö. Tefazökhi niha ”Famaedo Lowalangi.” No ibeʼe khöda Yehowa ginötö ba wangai angetula samösa. Tola taʼogunaʼö li niʼilada ba wamosumange Yehowa.​—I Moze 1:27.

3. Hadia niʼamualagö Yehowa enaʼö so khöda waʼatua-tua?

³ No ibeʼe Yehowa khöda Zura Niʼamoniʼö ba wanolo yaʼita enaʼö tafosumange ia. No lafoʼeluaha Zura Niʼamoniʼö ba zi 2.800 ngawalö li. Aboto ba dödöda wangera-ngera Yehowa na taʼangerönusi Zura Niʼamoniʼö. (Zinunö 40:6; 92:6; 139:17) So khöda waʼatua-tua ba tasöndra waʼauri si lö aetu.​—Baso II Timoteo 3:14-17.

4. Hadia geluahania woʼangerönusi, hadia manö wanofu nifatunöda ba duho daʼa?

⁴ Foʼangerönusi eluahania mangosambuaʼö fangera-gera ba wangalui eluaha zi no tafahaʼö yaʼita. (Zinunö 77:13; Gamaedola 24:1, 2) So gunania na taʼangerönusi fefu zi no tafahaʼö yaʼita sanandrösa khö Yehowa hegöi Yesu. (Yohane 17:3) Ba duho daʼa tasöndra wanemali moroi ba zinofu-nofu: Hewisa zi bagania wombaso enaʼö tola taʼangerönusi hadia zi no tabaso? Hadia manö zinangea taʼangerönusi? Hadia zi tola manolo yaʼita enaʼö böi taböhöli woʼangerönusi ba tasöndra waʼomuso dödö?

ENAʼÖ ABOTO BA DÖDÖU HADIA NIFAHAʼÖMÖ YAʼUGÖ

5, 6. Hewisa enaʼö aboto ba dödöu zi no öbasö? Hadia nifaluau enaʼö itörö tödöu zi no öbaso?

⁵ Hadia no irai öfalua halöwö si lö niʼera-erau simane na mofanö, mazui na ötörö gureta? Simanö göi, itaria lö öʼangeraigö hadia zi no öbaso. Tola manö mangoloi wangera-ngerau ba ginötö mombaso. Hadia zinangea öfalua enaʼö böi alua zimane daʼö? Sabölö bagania moguna öʼosambuaʼö wangera-ngerau ba ginötö öbaso ba öʼangeraigö hadia geluahania zi no öbaso andrö. Na no aefa öbaso zi sambua ngenoli mazui sambua tuho ba mbuku andrö, batogö sabata ba angerönusi hadia zi no öbaso. Angeraigö hadia wamahaʼö si tola öhalö, ba moguna aboto ba dödöu hadia zi no öbaso.

⁶ No lasöndra ira sagatua-tua ba gulidanö andre, enaʼö tola tatörö tödöda hadia zi no tabaso moguna taʼebuaʼö lida. Aboto ba dödö Yehowa daʼa. Daʼö mbörö wa iwaʼö Yehowa khö Yosua ”öfatou-tou tödöu,” ba wombaso goroisa andre, eluahania öhaogö wombaso. (Baso Yosua 1:8.) Na ebua lida ba wombaso Sura Niʼamoniʼö, daʼa zi tola manolo yaʼita ba wangosambuaʼö fangera-ngerada enaʼö tola itörö tödöda zi no tabaso.

7. Hawaʼara ginötö si sökhi woʼangerönusi Sura Niʼamoniʼö? (Faigi gambara ba ngaʼörö 27.)

⁷ Moguna taʼodödögö woʼangerönusi hadia zi no tafahaʼö yaʼita ba Zura Niʼamoniʼö. Inötö si sökhi yaʼia daʼö na lö erege dödö ba tafili nahia si lö nini-nini. Ifalua Dawido woʼangerönusi fatua lö mörö ia. (Zinunö 63:7) Hewaʼae niha soʼahonoa Yesu, ifaigi nahia si lö nini-nini ba woʼangerönusi hegöi ba wangandrö.​—Luka 6:12.

OYA ZINANGEA TAʼANGERÖNUSI

8. (a) Hadia zinangea taʼangerönusi? (b) Hewisa dödö Yehowa na tadunö-dunö ba niha sanandrösa khönia?

⁸ Oya zinangea öʼangerönusi baero Zura Niʼamoniʼö. Duma-dumania, ba ginötö öfaigi niwöwöi Yehowa, anofu khöu samösa: ’Hadia wamahaʼö khögu sanandrösa khö Yehowa?’ Fangera-ngera simane daʼö zamarou yaʼugö ba wangandrö saohagölö khönia ba wangandrö. Na so nawöu tola ödunö-dunö khönia hewisa waʼomuso dödömö ba niwöwöi Yehowa. (Zinunö 104:24; Halöwö Zinenge 14:17) Ifaigi-faigi Yehowa ba omuso dödönia na taʼangerönusi ia, na mangandrö ita, ba tadunö-tunö ba niha sanandrösa khönia. Ifabuʼu khöda Sura Niʼamoniʼö, ”Tefazökhi zura fönania, sura famasugi ba dödö, börö zangataʼufi Yehowa andrö, samosumange töinia.”​—Maleakhi 3:16.

9. (a) Hadia niwaʼö Waulo khö Dimoteo? (b) Hadia zinangea öʼangerönusi fatua lö möiʼö manuriaigö?

⁹ Ifarou dödö Dimoteo Faulo enaʼö iʼangenanöi wehedenia, amuatania, hegöi famahaʼönia enaʼö lö laʼositengagö wamahaʼönia niha böʼö. (Baso I Timoteo 4:12-16.) Tola göi öfalua zimane daʼa. Duma-dumania, angeraigö niha nifahaʼöu ba ginötö öfaʼanö ndraʼugö. Alui wanofu mazui gamaedola si tefaudu ba wanolo yaʼia enaʼö tedou ba wamati. Na öfalua daʼa, tola aro wamatiu ba tobali ndraʼugö samahaʼö si sökhi ba sowölö-ölö. So gunania na öʼangerönusi hadia zinangea öfaʼema fatua lö möiʼö manuriaigö. (Baso Gesitera 7:10.) Enaʼö so waʼöwölö-ölöu weʼamöi manuriaigö, tola öbaso Daromali Lowalangi nihalö ba zura Halöwö Zinenge. Tola göi öʼangerönusi ayati sinangea öʼogunaʼö mazui buku nibeʼeu ba niha. (II Timoteo 1:6) Ba mbanua si möi yaʼugö manuriaigö, angeraigö hadia duho si tefaudu irege omasi ira fahuhuo khöu. Na öfalua daʼa, tola tefaudu wangogunaʼöu Sura Niʼamoniʼö ba wahuhuosa ba niha.​—I Korindro 2:4.

10. Hadia danö böʼö sinangea taʼangerönusi?

¹⁰ Hadia danö böʼö sinangea öʼangerönusi? Na so nisurau huhuo nifaʼema ba gangowuloa mazui ba gangowuloa sebua, ogunaʼö ginötö ba wombaso hadia zi no ösura. Ba ginötö öbaso haogö öʼangerönusi, ’Hadia wamahaʼö si tola uhalö khögu moroi ba Zura Niʼamoniʼö hegöi ba gangowuloa Yehowa?’ Tola göi öʼangerönusi wamahaʼö si no tehenaigö ba mbuku Manuriaigö Famatörö Yehowa ba Sadarlah! so göi mbuku tanö böʼö sawena tatema ba gangowulo sebua. Na öbaso Buku Tahunan, angerönusi hadia zi no alua khö ndra talifusöda ba hadia wamahaʼö si tola öhalö. Ba ginötö öbaso mbukuda, tola öbeʼe dandra ba duho si tobali famahaʼö khöu samösa mazui sura ba zinga mbuku hadia wamahaʼö moroi ba zi no öbaso andrö. Daʼa zi tola manolo yaʼugö na öfuli öfalukhaisi niha somasi fahuhuo khöu, na möi ndraʼugö öfarou dödö ndra talifusöda, mazui ba wamaʼema huhuo sebua. Sabölö moguna, na öbato sabata ba öʼangerönusi hadia zi no öbaso tola möi ba dödöu. Andrö saohagölö khö Yehowa ba zi no öfahaʼö yaʼugö.

ANGERÖNUSI ZURA NIʼAMONIʼÖ ERO MAʼÖKHÖ

11. Hadia mbuku si lö tola löʼö taʼangerönusi, ba hadia gunania khöda? (Faigi zi no musura ba gahe zura.)

¹¹ Tatu manö, Sura Niʼamoniʼö zabölö taʼangerönusi ero maʼökhö. Tobali, hadia nifaluau na samuza inötö lö latehegö khöu ba wangokhögö Zura Niʼamoniʼö? a (Faigi zi no musura ba gahe zura.) Na alua daʼö, lö hadöi si tola manaisi yaʼugö ba woʼangerönusi fefu zi no ötanö ba dödöu, simane ayati Zura Niʼamoniʼö mazui sinunö khö Yehowa. (Halöwö Zinenge 16:25) Faʼabölö moroi khö Yehowa zi tola manolo yaʼugö enaʼö itörö tödöu hadia zi no öfahaʼö yaʼugö, irege lö faröi ndraʼugö ba wamati.​—Yohane 14:26.

12. Beʼe duma-duma ginötö si tola tafalua ba wombaso Sura Niʼamoniʼö ero maʼökhö.

¹² Hadia ginötö si tola tatatugöi? Duma-dumania, hauga kali ba zi samigu tola öbaso ba öʼangerönusi ayati Zura Niʼamoniʼö si no latatugöi ba Sekola Famomaha ba Wanuriaigö. Ba ngaluo böʼö, tola göi öbaso ba öʼangerönusi sanandrösa khö Yesu si no tesura ba zura Mataiʼo, Mareko, Luka, ba Yohane. (Roma 10:17; Heberaiʼo 12:2; I Fetero 2:21) So göi khöda mbuku sodunö-dunö waö-waö waʼauri Yesu ba hadia zi no irai alua ba waʼaurinia. Na no öbaso mbuku andre, tola öhalö khöu wamahaʼö moroi ba zura Mataiʼo, Mareko, Luka ba Yohane.​—Yohane 14:6.

HANA WA MOGUNA SIBAI WOʼANGERÖNUSI?

13, 14. (a) Hana wa moguna taʼangerönusi Yehowa hegöi Yesu? (b) Hadia zi tola mamarou tödöda ba wamalua yaʼia?

¹³ Na taʼangerönusi Yehowa hegöi Yesu, daʼa zi tola manolo yaʼita enaʼö tedou ba wamati ba taʼokhögö wamati saro. (Heberaiʼo 5:14; 6:1) Na lö oya tabeʼe ginötöda ba woʼangerönusi fefu nifalua Lowalangi, itugu ara itugu taya wahuwusada khönia ba lö taʼoʼö zomasi ia. (Heberaiʼo 2:1; 3:12) Ifangelama ita Yesu na lö tafondro-ndrongo niwaʼö Lowalangi faoma tödö ”si sökhi, satulö”, lö mowua ba lö ’faʼanau gölö’. Hizaʼi, tola manö so ”waʼabu dödö ba ba ganaʼa andrö, ba ba zomasi dödöra ba gulidanö andre.”​—Luka 8:14, 15.

¹⁴ Börö daʼö, böi taböhöli woʼangerönusi Zura Niʼamoniʼö ba taʼodödögö wamahaʼö yaʼita sanandrösa khö Yehowa. Daʼa zi tola mamorou tödöda ba woloʼö amuatania. (II Korindro 3:18) Böi taböhöli wamahaʼö yaʼita sanandrösa khö Yehowa ba taʼoʼö gamuatania sagötö faʼara. Sambua töi sebua khöda daʼa!​—Zangombakha 3:11.

15, 16. (a) Hadia gunania khöu na no öʼangerönusi Yehowa hegöi Yesu? (b) Hana wa itaria abua khöda woʼangerönusi zi no tabaso, ba hana wa lö taböhöli?

¹⁵ Na taʼangerönusi Yehowa hegöi Yesu, daʼö zi tola manolo yaʼita enaʼö lö faröi ita ba wamosumange Lowalangi. Tafarou dödö ndra talifusöda ba gangowuloa hegöi niha nifalukhaisida ba wanuriaigö. Na taʼangerönusi höli si no ibeʼe Yehowa, itugu monönö wangandröda saohagölö ba wahuwusada khönia. (Roma 3:24; Yakobo 4:8) Samösa dalifusöda sotöi Mark moroi ba Afrika Selatan, labeʼe ia ba gurunga tölu fakhe waʼara börö wamatinia. Imane wangumaʼö, ”Moʼangerönusi amaedola niha sanöröi atua. Na lö taböhöli woʼangerönusi soʼamakhaita ba wamati, itugu aboto ba dödöda sanandrösa khö Yehowa. Na so khögu wa ide-ide dödö mazui faʼaombö-aombö dödö sanandrösa ba zi so föna, uhalö Zura Niʼamoniʼö ba uʼangerönusi ayati si no ubaso. Awena so khögu waʼahono dödö.”

¹⁶ Ba gulidanö andre, oya zi tola mondrönisi fangera-ngerada irege abua khöda ba wameʼe inötö woʼangerönusi Zura Niʼamoniʼö. Samösa dalifusöda sotöi Patrick moroi ba Afrika, imane wangumaʼö, ”Fangera-ngeragu andre amaedola kotak sura safönu angombakhata sinangea mufareso ero maʼökhö, börö me so zomasi ita ba soi göi zi löʼö. Me ufareso wangera-ngeragu, asese sibai aombö dödögu. Enaʼö so khögu wangera-ngera si sökhi ulau mangandrö khö Yehowa. Moguna ubeʼe ginötö ba wamalua yaʼia. Lua-luania, itugu ahatö ndraʼo khö Yehowa. Edöna ndraʼo ba wamalua si ndruhu.” (Zinunö 94:19) Oya gunania khöda na tabaso ba taʼangerönusi Zura niʼamoniʼö ero maʼökhö.​—Halöwö Zinenge 17:11.

LALA BA WOTATUGÖI INÖTÖ

17. Hewisa enaʼö so ginötöu woʼangerönusi Sura Niʼamoniʼö?

¹⁷ So zi maoso sihulö wongi ba wombaso Sura Niʼamoniʼö, laʼangerönusi, ba lalau mangandrö. Tanö böʼönia so zamalua ba ginötö molombase ira wohalöwö. So göi zombaso Sura Niʼamoniʼö ba zi bongi fatua lö mörö. Tanö böʼönia so zomasi mombaso sihulö wongi ba latohugö zui wombaso ba zi bongi. (Yosua 1:8) Sabölö moguna alösi ginötöu ba zi lö moguna enaʼö oya ginötöu ba woʼangerönusi Zura Niʼamoniʼö ero maʼökhö.​—Efeso 5:15, 16.

18. Hadia zi no ifabuʼu Taromali Lowalangi ba niha so angerönusi Sura Niʼamoniʼö ero maʼökhö?

¹⁸ No ifabuʼu Yehowa khöda ba Zura Niʼamoniʼö wa ifahowuʼö niha so angerönusi Taromalinia ba sangodödögö wamalua hadia zi no lafahaʼö ira. (Baso Zinunö 1:1-3.) Imane Yesu, ”Yaʼahowu zamondrongo taromali Lowalangi ba sameʼe ba dödö!” (Luka 11:28) Sabölö sökhi yaʼia daʼö, na taʼangerönusi Daromali Lowalangi ero maʼökhö, daʼa zanolo yaʼita enaʼö tafaudugö gamuatada si möi famolakhömi töi Yehowa. Na tafalua daʼa, ifahowuʼö ita Yehowa ba ibeʼe waʼomuso dödö iadaʼa ba faʼauri si lö aetu ba gulidanö si bohou.​—Yakobo 1:25; Famaʼeleʼö 1:3.