’Böi Ataʼu Ndraʼugö, Utoloʼö’

KHALAIGÖ na mowaö-waö ndraʼugö baero ba lala ba zi bongi, ha yaʼugö samösa. Iʼanemaiʼö öʼila wa so samösa niha soloʼö-loʼö ndraʼugö moroi furi. Me öbato wofanö ba ibatogö ia göi. Me öʼaliokö wofanö, ba iʼaliokö ia göi. Ba ölau fagohi ba nomo nawöu sahatö ba daʼö. Me ibokai mbawandruhönia, ba möiʼö bakha, ahono saʼae dödöu börö me öʼila wa no telumöʼö ndraʼugö.

Te lö irai alua khöu zimane daʼö. Hizaʼi, tola manö so danö böʼö sameʼe aombö dödöu. Duma-dumania, hadia öforege ba wotimbagö falömoʼahonoamö, hizaʼi öfuli öfalua nasa zala simane daʼö? Hadia no ara lö hadöi halöwöu hewaʼae no öforege wangalui yaʼia? Hadia aombö dödöu na itugu atuaʼö mazui ambö faʼabölöu ba götö si so föna? Mazui so ngawalö tanö böʼö zameʼe aombö dödöu?

Hadia manö gabula dödömö, sökhi na so zi fahuwu khöu, ba tola ötutunö khönia hadia gabula dödömö ba tola itolo ndraʼugö. Hadia so zi fahuwu khöu? Tatu manö, so! Yehowa nawö si fahuwu khöu, hulö simane me fahuwu ia khö niha samati yaʼia daʼö Gaberahamo, simane nisura ba Yesaya 41:8-13, NW. Ba ayati 10 ba 13, fabuʼu li Yehowa khöda samösa, ’Böi busi dödöu, löʼö sa aefado khöu? Böi tokeaʼö, Lowalangiu sa ndraʼodo, uʼabeʼeʼö ndraʼugö, ba utoloʼö, ugogohe ndraʼugö na tangagu kambölö andre, samalua satulö. Yaʼodo saʼae, Yehowa, Lowalangimö andrö zololohe kambölöu, yaʼodo andre, sangumaʼö khöu, böi ataʼu ndraʼugö, utoloʼö!’

SINDRUHU-NDRUHU UGOGOHE NDRAʼUGÖ

Terara sibai dödöda ba wehede Yehowa. Tandraigö atö ba wokhalaigö hadia sindruhu-ndruhu nifabuʼu Yehowa khöda. Ba ayati daʼa lö iwaʼö wa mowaö-waö ita ba zinga Yehowa ba tagogohe dangania. Na mowaö-waö ndraʼugö ba zingania, tatu manö kambölönia zogogohe kaberau. Hizaʼi, ibeʼe Yehowa ”dangania kambölö samalua satulö” ba idöni ”dangamö kambölö”, hulö simane idöni ndraʼugö moroi ba gabula dödö. Me idöni Yehowa kambölömö, ifarou ndraʼugö ba imane, ’Böi ataʼu ndraʼugö, utoloʼö.’

Moloʼö yaʼugö, Yehowa andrö hadia Ama sangomasiʼö yaʼugö hegöi Awömö? Hadia faduhu dödömö wa itolo ndraʼugö ba ginötö so gabula dödömö? Sindruhu-ndruhu wa iʼameʼegö tödö ndraʼugö Yehowa, ba omasi ia wanolo yaʼugö. Na so noro dödö mazui abula dödömö, omasi Yehowa na ahono dödömö. Hadia mbörö? Börö me iʼomasiʼö sibai ndraʼugö. Sindruhu-ndruhu yaʼia andrö ”fanolo sabölö, ba waʼabu dödö”.​—Zinunö 46:2.

IHUKU ITA TÖDÖDA BA ZALA NIFALUADA MEFÖNA

So niha latörö-törö tödö manö hadia zala nifaluara, ba aombö dödöra hadia no iʼefaʼö Lowalangi horöra andrö. Na örasoi zimane daʼö, angeraigö sanandrösa khö Yobi niha samati. Ifatunö hadia zala nifaluania me bohou ebua ia. (Yobi 13:26) Irasoi göi Dawido simane daʼö, ba iʼandrö khö Yehowa, ”Böi angeragö horögu me ono matua ndraʼodo ba he lalögu andrö.” (Zinunö 25:7) Börö me lö moʼahonoa, fefu ita ’noa sa ahori mamazökhi horö, ba löʼö sa si sökhi turiada khö Lowalangi’.​—Roma 3:23.

Ngawua wehede zondrara dödö ba Yesaya faza 41 lasura zoguna khö ndraono Gizaraʼeli. Ebua sibai zala nifaluara, ba iwaʼö Yehowa wa ihuku ira ba latiboʼö ira ba mbanua Babilona. (Yesaya 39:6, 7) Ba ginötö daʼö, fabuʼu li Yehowa wa iʼefaʼö niha samalalini era-erara ba sangawuli khönia! (Yesaya 41:8, 9; 49:8) Iʼoromaʼö Yehowa waʼomasinia hegöi faʼahakhö dödönia iadaʼa, khö ndra niha samalalini era-erania ba somasi mangomusoiʼö dödö Yehowa.​—Zinunö 51:3.

Faigi hadia zalua khö Takuya,a no iʼoigö tödönia woböhöli gamuatania si lö sökhi ba wamaigi pornografi hegöi ba wamalua masturbasi. Asese ifalua gamuata si lö sökhi andrö. Hewisa dödönia? ”Lö moʼeluaha waʼaurigu, hizaʼi me uhatöʼö ndraʼo khö Yehowa ba wangandrö, ba uʼandrö wangefa moroi khönia, ifazawa ndraʼo moroi ba waʼaekhu tou.” Hewisa wamalua Yehowa daʼa? Ira satua sokubaloi ba gangowuloa si so Takuya, lamane khönia enaʼö itelefo ira na so ba dödönia wamalua gamuata si lö sökhi andrö. Imane, ”Abua khögu wo telefo yaʼira. Hizaʼi, ero utelefo ira, ifuli teʼabölöʼö ndraʼo.” Aefa daʼö, ira satua sokubaloi lahaogö lala enaʼö möi satua samasui ba nomo Takuya. Imane satua samasui andrö khönia, ”Weʼamöigu ba daʼa tenga ba zi lö mudöna-döna. Omasi ndra satua sokubaloi na so ndraʼodo ba daʼa. Latuyu ndraʼugö enaʼö ötema wokubaloi.” Imane Takuya, ”Yaʼo zamalua horö, hizaʼi Yehowa zamatenge ira satua sokubaloi ba wameʼe fanolo khögu.” Ba gafuriata, iböhöli Takuya gamuatania si lö sökhi andrö, ba tobali ia perintis biasa, ba iadaʼa mohalöwö ia ba gödo ndraha. Simane wanolo Yehowa dalifusöda andre, simanö göi wanolo Yehowa ndraʼugö na öfalua zala.

BA GINÖTÖ ABU DÖDÖDA SANANDRÖSA BA HALÖWÖ

So ösa niha, abu dödöra börö me no aheta ira ba halöwöra ba abua wangalui halöwö sibohou. Khalaigö hewisa waʼabua na lö latema-tema ita ba wohalöwö. Na alua simane daʼa, so zangumaʼö wa lö moʼeluaha waʼaurira. Hewisa tola itolo ndraʼugö Yehowa? Te lö alio ibeʼe khöu halöwö somasiʼö. Hizaʼi, tola itolo ndraʼugö enaʼö ötörö tödö ngawua wehede Dawido, ”Me iraono ndraʼo föna ba me satua ndraʼo maʼökhö, ba lö irai uʼila, numana zatulö tödö, ba lö irai uʼila mangandrö gö maʼuwunia.” (Zinunö 37:25) Iʼameʼegö tödö ndraʼugö Yehowa, ba ibeʼe khöu ”tangania kambölö samalua satulö” enaʼö tembönökhi zoguna khöu irege lö öböhöli wamosumange yaʼia.

Sara, si toröi ba Kolombia, no irasoi samösa hewisa wanolo Yehowa yaʼia. Yaʼia andre itema gazi sebua börö me mohalöwö ia maʼö-maʼökhö ba nahia wohalöwö si tehöngö ba niʼosinangegö niha. Hizaʼi, omasi ia ba wamalua sabölö oya ba wohalöwö khö Yehowa, andrö, iheta ia moroi ba halöwönia ba ibörögö merintis. Hizaʼi, abua sibai khönia wangalui halöwö si ha matonga hari. Andrö, ibokai khönia toko es krim side-ide, hizaʼi itugu ara ahori manö gefenia, ba iduhö saʼae toko andrö. Imane, ”Tölu fakhe no numalö saʼae, hizaʼi uʼandrö saohagölö khö Yehowa börö me lö awuwu ndraʼodo.” Iʼila saʼae hadia manö ngawalö zindruhu-ndruhu zoguna khönia ba hewisa enaʼö böi aombö dödönia ba zalua mahemolu. (Mataiʼo 6:33, 34) Ba gafuriata, kafalonia si oföna itelefo ia ba ibeʼe khönia halöwö si fagölö simane halöwönia ba zilalö. Iwaʼö wa omasi ia wotema halöwö andrö, ha na tola mohalöwö ia matonga hari ba na tola itaria ihalö cuti enaʼö tola möi ba gangowuloa, möi ba kebaktian wilayah hegöi ba kebaktian regional. Iadaʼa, lö isöndra Sara gazi sebua simane ba zilalö. Hizaʼi, tola itohugö merintis. Iwaʼö ba ginötö abu dödönia, irasoi samösa danga Yehowa si fao faʼomasi.

BA GINÖTÖ AOMBÖ DÖDÖDA BÖRÖ ME ITUGU ATUA

Ato zabu tödö börö me itugu atua ira ba lö aratö awai ginötöra wohalöwö. Abu dödöra na lö ibönö gefera enaʼö lasöndra waʼohahau dödö ba waʼauri. Aombö dödöra göi börö me alö waʼabölöra ba götö si so föna. Te Razo Dawido zangandrö khö Yehowa, imane, ”Böi tiboʼö ndraʼodo, na itugu atua ndraʼo, na alö dölagu, ba böi faröi ndraʼugö khögu!”​—Zinunö 71:9, 18.

Hewisa enaʼö niha salawa ndröfi lö aombö dödöra sanandrösa ba ginötö si so föna? Moguna laʼaroʼö wamatira khö Lowalangi ba faduhu dödöra wa iʼasogö hadia manö zoguna khöra. Hizaʼi, so ösa niha zorasoi faʼohahau dödö ba ginötö tefönui fefu zoguna hegöi waʼomasi dödöra börö me oya gefera, ba moguna lafahaʼö ira hewisa enaʼö ahono ba ohahau dödöra ba zi no so. Te laʼila waʼabölö sökhi ba waʼaurira na laʼa ’sambua figa sayu’ moroi ba ”göröbao satabö”! (Gamaedola 15:17, NW) Na öʼosambuaʼö dödöu wamosumange Yehowa, hasambalö iʼasogö fefu hadia manö zoguna khöu ba ginötö no atua ndraʼugö.

Angeraigö sanandrösa khö José hegöi Rose, samosumange Yehowa safönu inötö töra moroi ba zi 65 fakhe. Ba ginötö daʼö oya lataögö wanandraigö. Larorogö nama ga Rose börö me moguna khönia wanolo ba zi maʼökhö hegöi ba zi bongi. Simanö göi José, laʼoperasi ba lakemoterapi ia börö me mofökhö kanker ia. Hewisa wameʼe Yehowa dangania kambölö khö ndra ngambatö samati andre? Iʼogunaʼö sambua ngambatö niha Keriso sotöi Toni ba Wendi. So khöra sambua apartemen ba omasi ira labeʼe khö perintis safönu inötö ba lö laʼandrö okosi. Itörö tödö Toni me SMA ia, ero maʼökhö ifaigi baero ba zandrela, lalau manuriaigö ndra José hegöi Rose. Iʼomasiʼö sibai ira Tomi, börö owölö-ölö ira, ba daʼö sambua duma-duma sebua khönia. Börö me José hegöi Rose labeʼe fefu waʼaurira ba wamosumange Yehowa, andrö wa Tomi ba Wendi labeʼe apartemenra khöra. No 15 fakhe latolo José ba Rose ba no 85 fakhe ndröfira iadaʼa. Imane José hegöi Rose wa Toni ba Wendi andre, no sambua mbuala Yehowa khöra.

Fawuʼu li Yehowa khöu, ’Böi ataʼu ndraʼugö, utoloʼö!’ Ibeʼe ”dangania kambölö samalua satulö” khöu göi. Hadia öʼoroʼö göi dangamö?