Hadia Sindruhu-ndruhu Öʼameʼegö Tödö Mbuku moroi khö Yehowa?

1-3. Hadia zalua ba gotalua Gewodia hegöi Zitikhe? Hewisa lala ba wanimbagö zalua andrö? (Faigi gambara ba wamobörö wamahaʼö.)

TAFOSUMANGE sibai Zura Niʼamoniʼö börö me taʼila wa daʼö Mbuku moroi khö Lowalangi. Ba Zura Niʼamoniʼö so mene-mene sanolo yaʼita ba wangasiwaisi gabula dödö, ba tola tobali degu-degu daʼö khöda ba ginötö tafalua zala. Andrö, hewisa dödöda ba mene-mene andrö? Angeraigö darua ndra alawe nibayoini ba götö si föföna, Gewodia ba Zitikhe. Itutunö Zura Niʼamoniʼö wa fatiti ira, hizaʼi lö itutunö khöda hadia mbörönia. Datakhalaigö hana wa tola alua daʼa.

² Tola manö, ikaoni Gewodia ndra talifusö enaʼö fao ira manga ba nomonia. Hizaʼi lö ikaoni Zitikhe. Ba gafuriata, mofönu sibai Zitikhe me so zodunö-dunö khönia wa omuso sibai dödöra wefao wemanga. Tola manö imane dödönia, ’Hadia saʼe lö ikaonido Gewodia! Uwalinga si fahuwu ndraʼaga.’ Irasoi Zitikhe wa sindruhu-ndruhu lö iʼomasiʼö ia Gewodia ba lö omasi fahuwu khönia. Andrö, ikaoni göi Zitikhe ndra talifusö enaʼö fao ira wemanga ba nomonia, hizaʼi lö ikaoni Gewodia! Ba zalua andre, tola manö so watitisa ba mbanua niha Keriso. Iforomaʼö Zura Niʼamoniʼö wa itegu ira Faulo ba ifarou ira enaʼö ifuli atulö ira. Tola manö lafondro-ndrongo niwaʼö Waulo ba lö aetu lafosumange Yehowa si fao faʼomuso dödö.—Filifi 4:2, 3.

³ Iadaʼa, itaria fatiti ita göi khö ndra talifusöda ba mbanua niha Keriso. Hizaʼi, na taʼoʼö mene-mene si so ba Zura Niʼamoniʼö, tola taʼasiwaisi ngawalö gabula dödö. Sindruhunia, tola tatimbagö enaʼö lö alua daʼö. Ba na taʼoʼö niwaʼö Zura Niʼamoniʼö, taforomaʼö wa tafosumange Mbuku moroi khö Yehowa.—Zinunö 27:11.

IFAHAʼÖ ITA SURA NIʼAMONIʼÖ ENAʼÖ TATAHA WÖNUDA

4, 5. Hadia mene-mene nibeʼe Daromali Lowalangi khöda sanandrösa ba wanaha fönu?

⁴ Lö aoha ba wanaha fönu. Tola manö afökhö sibai dödöda mazui mofönu ita na so zangoʼaya yaʼita mazui na laböbögö khöda zi lö duhu börö zi toʼölö alua ba mbanuada, me faböʼö gulida, mazui lagu wonukhada. Tola manö abölö afökhö dödöda na ira talifusöda zamalua daʼö khöda. Hadia mene-mene nisöndrada ba Daromali Lowalangi si tola möi fanoloda?

⁵ Aboto ba dödö Yehowa hadia zalua na lö itaha wönunia niha. Ba ginötö afatö dödöda mazui mofönu ita, ba gafuriata tola manö maniasa ita ba niwaʼö mazui ba nifaluada. Ba Zura Niʼamoniʼö, ifahaʼö ita Yehowa ba wanaha fönu ba imane, ”Böi alio-lio abao dödöu.” Angeraigö hawaʼoya gabula dödö si tola ötimbagö ba ginötö taʼoʼö mene-mene andrö ba lö alio-lio mofönu ita! (Baso Zangombakha 7:9; Gamaedola 16:32.) Iwaʼö göi khöda Sura Niʼamoniʼö ba wangefaʼö zala niha böʼö. Sindruhunia, itutunö Yesu wa na lö taʼefaʼö zala niha böʼö, ba lö iʼefaʼö zalada göi Yehowa. (Mataiʼo 6:14, 15) Hadia moguna öbologö dödömö ba abölö omasi ndraʼugö ba wangefaʼö zala niha böʼö?

6. Hadia manö zi tola alua na lö tataha wönuda?

⁶ Na lö tataha wönuda, tola manö lö aetu mofönu ita ba ibörögö mangelifi dödöda khönia. Mazui tola manö tadönisi niha böʼö ba mbanua niha Keriso enaʼö larasoi simane nirasoida. Hewaʼae taforege ba waminiʼö fönu mazui fökhö dödöda, arara manö tola laʼila niha böʼö hadia nirasoida. Ba lö omasi fahuwu ndra talifusöda khöda. (Gamaedola 26:24-26) Laʼogunaʼö Zura Niʼamoniʼö ira satua sokubaloi ba wanolo yaʼita woheta fönu mazui fökhö dödöda hegöi ba wangefaʼö zala niha böʼö. (III Moze 19:17, 18; Roma 3:11-18) Ba ginötö lafalua daʼö, hadia taʼoʼö wanuturu lala moroi ba Mbuku Yehowa?

YEHOWA ZONDRÖNIAʼÖ YAʼITA

7, 8. (a) Hewisa wondröniaʼö Yehowa nono mbanuania? (b) Hadia manö wanuturu lala nisöndrada ba Zura Niʼamoniʼö, ba hadia mbörö wa taʼoʼö daʼö?

⁷ Yehowa zondröniaʼö ba samahaʼö niha si fao ba organisasinia ba gulidanö iadaʼa. Hewisa wa tola? Ibayoini Keriso tobali ”högö mbanua”, ba ibayoini Keriso ”zawuyu andrö, si lö faröi, satua-tua” ba wamahaʼö hegöi ba wameʼe fanuturu lala ba nono mbanua Lowalangi. (Efeso 5:23; Mataiʼo 24:45-47) Hulö simane mboto solohe me götö si föföna, ira sawuyu andre sindruhu-ndruhu lafosumange Zura Niʼamoniʼö börö me Daromali Lowalangi daʼö. (Baso I Tesalonika 2:13.) Hadia manö wanuturu lala si so ba Zura Niʼamoniʼö?

⁸ Ifarou ita Sura Niʼamoniʼö weʼamöi ba gangowuloa ero migu. (Heberaiʼo 10:24, 25) Daʼö zamarou yaʼita fefu enaʼö faduhu dödöda ba wamahaʼö Zura Niʼamoniʼö si fagölö. (I Korindro 1:10) Ifarou ita göi enaʼö lö aetu ba ”wangalui Banua Lowalangi”. (Mataiʼo 6:33) Ibeʼe wanuturu lala khöda Sura Niʼamoniʼö ba wanuriaigö ba nomo misa, ba nahia sato niha, mazui hezoso manö so niha. (Mataiʼo 28:19, 20; Halöwö Zinenge 5:42; 17:17; 20:20) Ibeʼe wanuturu lala khö ndra satua sokubaloi ba wororogö enaʼö lö raʼiö mbanua niha Keriso. (I Korindro 5:1-5, 13; I Timoteo 5:19-21) Ba ifarou göi ita ba wondrorogö enaʼö lö raʼiö mbotoda ba tatimbagö zasese lafalua niha hegöi fangera-ngera si lö omasi Yehowa.—II Korindro 7:1.

9. Haniha nituyu Yesu ba wanolo yaʼita enaʼö aboto ba dödöda Daromali Lowalangi?

⁹ So zorasoi wa lö moguna latutunö khöra Zura Niʼamoniʼö. Hizaʼi, iʼotarai 1919 iʼogunaʼö Yesu ”zawuyu andrö, si lö faröi, satua-tua” ba wanolo nono mbanua Lowalangi enaʼö aboto ba dödöra hadia nifahaʼö Zura Niʼamoniʼö ba laʼoʼö hadia niwaʼönia. Na taʼoʼö niwaʼö Zura Niʼamoniʼö, no fao ita ba wororogö enaʼö teʼosambuaʼö mbanua niha Keriso, lö raʼiö ba afönu faʼatulö. Sofu khöu samösa, ’Hadia lö faröi ndraʼo khö Yesu ba uʼoʼö wanuturu lala nibeʼe ndra sawuyu si lö faröi?’

ALIO WOFANÖ GURETA YEHOWA!

10. Hewisa woʼamaedolagö mbuku Hezekieli organisasi Yehowa si so ba zorugo?

¹⁰ Ba Zura Niʼamoniʼö, taʼila wa toföfö göi ndra samosumange Yehowa ba zorugo. Duma-dumania, so gangilata niʼila Hezekieli, so Yehowa yawa ba gureta, alio sibai wofanönia tefaudu ba zomasi Yehowa. (Hezekieli 1:4-28) Kureta zorugo andrö muʼamaedolagö ia organisasi Lowalangi ba zorugo salio sibai woloʼö fanuturu lala moroi khönia. Ba molua-lua daʼö ba organisasinia si so ba gulidanö. Angeraigö, oya zi tebulö nifazökhi organisasi Lowalangi ba zi fulu fakhe safuria andre. Törö tödöu wa Yehowa zameʼe fanuturu lala ba zi tebulö andrö. Lö aratö, Keriso hegöi ira malaʼika, lahori dania fefu zi lö sökhi ba gulidanö andre. Lö hadöi saʼae niha si lö mamosumange Yehowa hegöi töinia mazui sangoʼaya famatörönia!

11, 12. Hadia zi no ifalua organisasi Yehowa ba ngaluo safuria?

¹¹ Fatimbaisi nifalua organisasi Yehowa ba luo safuria andre. Famazökhi omo Yehowa. Ngaotu ndra talifusöda samorege wohalöwö ba wangehaogö gödo sebua ndra Samaduhuʼö Yehowa si bohou ba Warwick, New York, Amerika Serikat. Ngahönö relawan ba zi sagörö ulidanö fao ira ba wangehaogö Balai Mbanua Lowalangi hegöi gödo ndraha. Ira relawan andre, laʼoʼö wanuturu lala moroi ba Departemen Rancang/Bangun Sedunia. Taʼandrö sibai saohagölö börö me ato zamorege wohalöwö ba wangehaogö daʼö! Ira Samaduhuʼö Yehowa ba zi sagörö ulidanö, labeʼe dolo-tolo ba wombönökhi zoguna ba halöwö famazökhi nahia andre. Ba ifahowuʼö nono mbanuania Yehowa, sangoromaʼö fangide-ngideʼö hegöi si lö faröi khönia.—Luka 21:1-4.

¹² Famahaʼö. Omasi Yehowa wamahaʼö ono mbanuania. (Yesaya 2:2, 3) Angeraigö ngawalö sekola niʼokhögöda. So Sekolah Dinas Perintis, Sekolah bagi Penginjil Kerajaan, Sekolah Gilead, Sekolah Dinas Betel, Sekolah bagi Pengawas Wilayah dan Istri, Sekolah bagi Penatua Sidang, Sekolah Pelayanan Kerajaan hegöi Sekolah untuk Panitia Cabang dan istri. Ba situs Web jw.org, tola taʼalui Zura Niʼamoniʼö hegöi lektur tanö böʼö ba ngawalö li. Ba situs Web daʼö, so göi faosatö nifaʼanö ba ndraono, ba nösi nomo hegöi faosatö berita. Hadia öʼogunaʼö jw.org ba wanuriaigö hegöi ba wamahaʼö zi sambua omo?

BÖI FARÖI KHÖ YEHOWA BA TUHINI ORGANISASINIA

13. Hadia zi lö tola löʼö lafalua ono mbanua Yehowa?

¹³ No sambua töi sebua wefao ba organisasi Yehowa hegöi me taʼila hadia niʼandrönia khöda! Tatu manö, me no taʼila zi tola mangomusoiʼö dödö Lowalangi, lö tola löʼö taʼoʼö ia ba tafalua zindruhu. Ba hewaʼae ato niha samalua si lö sökhi, moguna ’taʼogorofi zi lö sökhi’ simane nifalua Yehowa. (Zinunö 97:10) Böi irai fao dödöda ba niha sangumaʼö ”sökhi si lö sökhi ba samotöi si lö sökhi si sökhi”. (Yesaya 5:20) Omasi ita wangomusoiʼö dödö Yehowa, andrö dataʼosambuaʼö dödöda enaʼö lö raʼiö ita ba ngawalö hadia ia. (I Korindro 6:9-11) Hadia niwaʼö Yehowa khöda ba Zura Niʼamoniʼö, si sökhi khöda samösa daʼö. Taʼomasiʼö ia ba omasi ita lö faröi khönia. Daʼö mbörö wa taʼoʼö wanuturu lala moroi khönia he ba nomo, ba mbanua niha Keriso, ba nahia wohalöwö, ba zekola mazui hezoso manö so ita. (Gamaedola 15:3) Datatutunö hezoso manö tola taforomaʼö wa lö faröi ita khö Lowalangi.

14. Hewisa wa tola lö faröi zatua khö Yehowa?

¹⁴ Lala wamomaha iraonoda. Ba Zura Niʼamoniʼö, ibeʼe wanuturu lala Yehowa khö zatua hewisa lala wamomaha iraonora. Moguna mangelama niha Keriso enaʼö lö tedönisi ira ba lala wangera-ngera si toʼölö ba gulidanö andre. (Efeso 2:2) Duma-dumania, ba mbanua-banua böʼö so samösa ama zangumaʼö, ’Ba daʼa, sökhi na ira alawe zamahaʼö iraono.’ Hizaʼi, Sura Niʼamoniʼö zangoʼou ama ba wamahaʼö iraonora sanandrösa khö Yehowa. (Efeso 6:4) Ira satua sangomasiʼö Yehowa, omasi ira na fahuwu ndraonora khönia, simane nirasoi Samuʼeli me ide-ide ia.—I Zamueli 3:19.

15. Hewisa enaʼö lö faröi ita khö Yehowa ba ginötö tahalö gangetula sebua?

¹⁵ Lala wangai angetula. Fatua lö tahalö gangetula sebua ba waʼauri, moguna taʼila hewisa wangera-ngera Yehowa enaʼö tola lö faröi ita khönia. Tola itolo ita Sura Niʼamoniʼö hegöi organisasinia. Duma-dumania, so ösa zatua iadaʼa sohalöwö ba mbanua böʼö, lahalö gangetula ba wameʼe nonora sawena tumbu khö dalifusöra ba mbanua. Na lafalua daʼa, lö aetu mohalöwö ira ba lasöndra gefe. Atulösa, gangetula samösa-mösa niha daʼö, hizaʼi tola lasofu khöra samösa ira satua, ’Hewisa moloʼö Yehowa gangetula nihalöma andre?’ (Baso Roma 14:12.) Sökhi na oföna taʼalui hadia niwaʼö Zura Niʼamoniʼö fatua lö tahalö gangetula sanandrösa ba nösi nomoda hegöi ba halöwöda. Moguna khöda wanolo moroi khö Namada, börö me tebai tatatugöi lalada samösa.—Yeremia 10:23.

16. Hadia gangetula nihalö zi samösa ina ba ginötö tumbu khönia nono matua? Hadia zanolo yaʼia ba wangai angetula satulö?

¹⁶ Me no findra zi sambua ngambatö ba mbanua böʼö, tumbu khöra nono matua, ba laʼera-era ba wameʼe nonora andre khö ndra nenenia. Hizaʼi, ba ginötö daʼö, ibörötaigö ifahaʼö ia foʼomonia ira alawe ba Zura Niʼamoniʼö khö zi samösa Samaduhuʼö Yehowa. Ifahaʼö ia wa no sambua noro dödönia ba wamomaha ononia matua andrö sanandrösa khö Yehowa. (Zinunö 127:3; Gamaedola 22:6) Simane niʼoʼou Zura Niʼamoniʼö, mangandrö ia khö Yehowa, enaʼö ifalua zindruhu. (Zinunö 62:9, 10) Itutunö göi gabula dödönia khö dalifusöda samahaʼö yaʼia ba Zura Niʼamoniʼö hegöi khö dalifusö ba mbanua niha Keriso. Hewaʼae lö aetu lafarou ia ira talifusönia ba mbanua hegöi ndra awönia, enaʼö ibeʼe nononia andrö khö ninania, hizaʼi ihalö gangetula si sökhi, lö ifalua daʼö. Iʼila foʼomonia ira matua hewisa wanolo nibeʼe ndra talifusöda khö woʼomonia hegöi khö nonora. Ahöli-höli dödönia ba ibörögö ifahaʼö ia ba Zura Niʼamoniʼö, ba fao ia ba nösi nomonia weʼamöi ba gangowuloa. Khalaigö hewisa waʼomuso dödö nirasoi ndra alawe andre me iʼila wa itema li wangandrönia Yehowa!

17. Ba ginötö tafahaʼö zi samösa niha ba Zura Niʼamoniʼö, hadia wanuturu lala sinangea taʼoʼö?

¹⁷ Lala woloʼöda fanuturu lala. Na lö faröi ita khö Lowalangi, tatu taʼoʼö wanuturu lala nitemada moroi ba organisasinia. Duma-dumania, fatimbaisi hadia zinangea tafalua na no aefa tafahaʼö niha ba mbuku Hadia Nifahaʼö Zura Niʼamoniʼö Khöda? Ero na no awai wamahaʼö, moguna taʼogunaʼö maʼifu ginötö ba wanolo niha nifahaʼöda enaʼö abölö oya iʼila sanandrösa ba organisasi Yehowa. Tola taʼogunaʼö video Hadia Manö Nifalua ba Nahia Gorahua Mbanua Lowalangi? hegöi brosur Haniha Zamalua Somasi Yehowa ba Ginötö Andre? Na no awai wamahaʼö ba mbuku Nifahaʼö Khöda, tohugö ba wamahaʼö mbuku ”Tetaplah Berada dalam Kasih Allah” ba wanolo niha nifahaʼöda enaʼö abölö ’teʼabeʼeʼö ba wamati’ hewaʼae no tebayagö ia idanö. (Kolose 2:7) Hadia öʼoʼö wanuturu lala moroi ba organisasi Yehowa?

18, 19. Hadia manö dani wa taʼandrö sibai saohagölö khö Yehowa?

¹⁸ Oya dani hana wa taʼandrö sibai saohagölö khö Yehowa! Duma-dumania manö, börö me ”ba khönia sa auri ita, ba khönia maliŵa-liŵa ita, ba khönia so ita”. (Halöwö Zinenge 17:27, 28) Ibeʼe göi khöda Mbukunia, Sura Niʼamoniʼö. Simane niha Keriso ba Desalonika, taʼameʼegö tödö sibai mbuala andre börö me turia moroi khö Lowalangi daʼa.—I Tesalonika 2:13.

¹⁹ Itolo ita Sura Niʼamoniʼö enaʼö ahatö ita khö Yehowa ba ahatö ia göi khöda. (Yakobo 4:8) Taʼandrö sibai saohagölö khö Namada börö me no ikaoni ita wefao ba organisasinia! Tarasoi simane nirasoi sanura zinunö me imane, ”Miʼandrö saohagölö khö Yehowa, me si sökhi tödö ia; me no si lö aetu waʼebua dödönia andrö!” (Zinunö 136:1) Ero-ero ayati andrö, ifuli itutunö sanura zinunö ngawua wehede ”me no si lö aetu waʼebua dödönia andrö”. Na lö faröi ita khö Yehowa ba taʼoʼö wanuturu lala nibeʼenia khöda moroi ba organisasinia, ibeʼe khöda waʼauri si lö aetu ba lö faröi ia khöda sagötö faʼara!