Böi Miförö Omasi Gafökha Iʼa Ndraʼugö!

1. Tutunö hewisa wa tola tobali Satana zi samösa malaʼika.

NO IRAI fahuwu ia khö Yehowa. Ba gafuriata, omasi malaʼika andre na labeʼe khönia zumange niha gulidanö. Lö iʼanemai iheta khönia gera-era si lö sökhi andrö, tobali itugu ifadanö ia ba gera-era daʼö irege ifalua horö. (Yakobo 1:14, 15) Lö taʼila haniha döinia, tobali tafotöi ia iadaʼa Satana. ”Lö niʼagönia si duhu”. Ilawa Yehowa ba tobali ia ”ama zofaya”.—Yohane 8:44.

2, 3. Hadia geluaha nifotöi ”Satana”, ”Afökha”, ”ulö”, ba ”naga” si faʼudu khö Yehowa?

² Iʼotarai me molawa ia khö Yehowa, no tobali ia si faʼudu khö Yehowa hegöi ba niha gulidanö. Amalalata döi Zatana nibeʼe Zura Niʼamoniʼö daʼö zangoromaʼö wa lö sökhi gamuatania. Nifotöi Satana eluahania ”Solawa”, daʼö zangoromaʼö wa malaʼika si lö sökhi andre fatuwu ia wamatörö Lowalangi, oya ngawalö nifaluania ba wolawa famatörö Yehowa andrö. Omasi sibai Zatana wamakiko famatörö Yehowa andrö.

³ Ba zura Wamaʼeleʼö 12:9, Satana lafotöi ia Afökha eluahania ”Sanandrawaisi”. Iʼobousi döi Lowalangi Satana ibaliʼö si falimo. Na latötöi ”ulö satua” daʼö zamasugi ba dödöda me iʼodela gulö Satana ba wolimo Khawa. Fao sibai khö Zatana na lafotöi ia ”naga”. Amuʼi, afaito, ba lö sökhi. Omasi ia na lö aʼozu gohitö dödö Yehowa ba ihori nono mbanua Lowalangi.

4. Hadia nifatunöda ba duho andre?

⁴ Atulö, ba gotalua zi tola mamakiko yaʼita, Satana zabölö mamaʼala yaʼita. Börö daʼö, ifangelama ita Sura Niʼamoniʼö, ”Böi mabu-mabu ami, ba böi mörö-mörö, itörö sa danö si faʼudu khömi andrö, Afökha andrö, hulö zingo sindröndrö-ndröndrö, iʼalu-alui haniha niʼania.” (I Fetero 5:8) So tölu ngawalö gamuata Zatana si faʼudu khö Yehowa hegöi ba nono mbanuania sinangea taʼangelamaisi nifatunö ba duho daʼa.

ABÖLÖ SIBAI GAFÖKHA

5, 6. (a) Beʼe duma-duma wa ira Malaʼika ”so khöra waʼabölö”. (b) Hadia geluahania wa so khö Zatana ”waʼabölö waʼamate”?

⁵ So ”waʼabölö” khö ndra malaʼika. (Zinunö 103:20) Abölö ba atua-tua ira moroi ba niha. Ira malaʼika si lö faröi laʼogunaʼö waʼabölöra ba wamalua si sökhi. Duma-dumania, ha samösa malaʼika tola ibunu 185.000 zaradadu Asiria. Tebai ifalua daʼa si samösa niha, he naʼato ndra saradadu samalua yaʼia. (II Razo 19:35) Malaʼika tanö böʼö laʼogunaʼö waʼabölöra ba wangefaʼö ira nifahaʼö Yesu moroi ba gurunga. Lö laʼila ira sanaro kurunga me ibokai mbawandruhö malaʼika andrö aefa daö, ifofanö ndra nifahaʼö baero ba ifuli ikusi mbawandruhö gurunga!—Halöwö Zinenge 5:18-23.

⁶ Tenga simane malaʼika si lö faröi. Satana iʼogunaʼö waʼabölönia ba wamalua si lö sökhi. Abölö sibai Zatana ba ebua wondrönisi dödö niha khönia. Ifotöi ia Sura Niʼamoniʼö ”salawa gulidanö” ba ”Lowalangi zi sagötö tanö andre”. (Yohane 12:31; II Korindro 4:4) So khö Zatana ”waʼabölö waʼamate”. (Heberaiʼo 2:14) Tenga daʼö geluahania iʼanemaiʼö ibunu fefu niha. Na simanö, hadia geluahania? Siʼoföna, idönisi dödö niha gulidanö Satana ba wamalua amuata si lö sökhi. Si dua, börö me faduhu dödö Khawa khö Zatana ba lö iʼoʼö niwaʼö Lowalangi Adamo, andrö wa aekhu ba horö niha gulidanö ba göna ira faʼamate. (Roma 5:12) Itörö niwaʼö Yesu, wa no ”samunu” niha Zatana. (Yohane 8:44) Si ndruhu-ndruhu wa Satana nududa sabölö.

7. Hewisa wangoromaʼö mbekhu faʼabölöra?

⁷ Na talawa Zatana, eluahania talawa fefu zi fao khönia hegöi solawa famatörö Lowalangi. Fao wa talawa göi ndra malaʼika si no molawa khö Lowalangi nifotöi bekhu. (Famaʼeleʼö 12:3, 4) Asese sibai laforomaʼö waʼabölö ira moroi ba niha. Lafakao-kao niha. (Mataiʼo 8:28-32; Mareko 5:1-5) Böi osiwawöi waʼabölö mbekhu hegöi samatörö yaʼira. (Mataiʼo 9:34) Na tenga fanolo moroi khö Yehowa tebai talawa Zatana.

AFAITO SIBAI ZATANA

8. (a) Hadia zomasi Zatana? (Faigi gambara ba ngaʼörö 9.) (b) Moloʼö yaʼugö, hewisa gulidanö andre wangoromaʼönia faʼafaito Zatana?

⁸ Iʼoʼamaedolagö Zatana andrö Fetero hulö ”zingo sindröndrö-ndröndrö”. So sambua mbuku sangombakha wa ba li ndrawa Heleni, eluaha ngawua wehede ”sindröndrö-ndröndrö” yaʼia daʼö ”urifö sangarö-ngarö ba waʼolofo”. Tefaudu gamaedola daʼö ba gamuata Zatana si lö sökhi ba safaito. No ifatörö gulidanö, ba lö abönö dödönia. Fakhili Zatana ba zingo solofo. (I Yohane 5:19) Sabölö igohi Satana enaʼö tobali tana khönia yaʼia daʼö niha nibayoini si toröi ba gulidanö nasa, awö ”mbiri-biri böʼö” si fao khöra. (Yohane 10:16; Famaʼeleʼö 12:17) Omasi Zatana ifakiko nono mbanua Lowalangi. Famakao si göna niha keriso si föföna irugi ba ginötöda andre daʼö zangoromaʼö waʼafaito Zatana.

9, 10. (a) Hewisa lala Gafökha ba wamaelungu iraono Gizaraʼeli? (Beʼe duma-duma.) (b) Hadia sibai mbörö wa igohi ndraono Gizaraʼeli Satana? (c) Moloʼö yaʼugö, hewisa dödö Gafökha me iʼila lafalua horö ono mbanua Lowalangi?

⁹ So danö böʼö nasa sangoromaʼö faʼafaito Zatana. Singo solofo lö ahakhö dödönia ba zi tobali önia. Lö khönia faʼahakhö dödö ba ginötö iraʼu gönia, ba lö khönia faniasa na no aefa ibunu. Simanö göi Zatana. Lö ahakhö dödönia ba niha. Duma-dumania, moloʼö yaʼugö, hewisa dödö Zatana me iʼila lafalua zala iraono Gizaraʼeli simane fohorö ba fakhögusa? Hadia tola ökhalaigö hewisa waʼomuso dödö Zatana me iʼila lua-lua horö nifalua Simeri ba fakhögusa Gehazi?—IV Moze 25:6-8, 14, 15; II Razo 5:20-27.

¹⁰ So mbörö wa igohi-gohi ndraono Gizaraʼeli Satana ba götö meföna. Börö me khöra tumbu Mesia, samakiko Satana ba samaduhuʼö wa Yehowa zinangea mamatörö. (I Moze 3:15) Omasi Zatana na lö iʼomasiö saʼae ndraono Gizaraʼeli Lowalangi, andrö oya lala nifaluania ba wangalani yaʼira enaö lafalua horö. Böi waʼö tödöu wa ahakhö dödö Zatana khö Dawido me mohorö ia. Böi waʼö tödöu ahakhö dödönia khö Moze me lö irugi danö amabuʼula. Omuso sibai dödö Zatana na iʼila so nono mbanua Lowalangi samalua horö. Daʼö zi tobali lala khö Gafökha ba wangoʼaya Yehowa.—Gamaedola 27:11.

11. Hadia mbörö wa igohi Zaraʼi Satana?

¹¹ Fatuwu sibai Zatana ba niha na ba ngaʼötöra dania tumbu Mesia. Duma-dumania, datafaigi hadia zalua khö Gaberahamo me no aefa iʼombakhaʼö khönia Yehowa wa tobali ia ”soi sebua”. (I Moze 12:1-3) Me inötö so Gaberahamo faoma Saraʼi ba danö Miserai, iʼohe Zaraʼi ba gödonia Faraʼo ibaliʼö foʼomonia. Hizaʼi ilumöʼö Yehowa Zaraʼi ba iʼefaʼö ia moroi ba gabula dödö. (Baso I Moze 12:14-20.) Alua göi zimane daʼö ba mbanua Gerara fatua lö tumbu Gizaʼaki. (I Moze 20:1-7) Salua ba zi dombua ngawalö andre hadia fao Zatana? No iröi mbanua Guri Saraʼi banua sohahau dödönia ba toröi ia ba nose-ose. Hadia itötöna Satana wa adöni dödö Zaraʼi ba wamaigi gödo sebua khö Waraʼo ba khö Gabimelekhi? Hadia imane dödönia Satana hasambalö iröi woʼomonia Saraʼi hegöi Yehowa ba mangowalu ia khö razo? Lö nifatunö Zura Niʼamoniʼö khöda hadia wanema li. Faduhu dödöda na tenga sinangea Zaraʼi andre ba ngaʼötönia tumbu Mesia, omuso sibai dödö Gafökha. Maʼifu lö maniasa Zatana na aetu wahuwusa Zaraʼi khö Yehowa hegöi na fabali ia khö ngambatönia. Si ndruhu-ndruhu waʼalö sökhi ba faʼafaito Zatana!

12, 13. (a) Hewisa wa oroma waʼamuʼi Zatana me no tumbu Yesu? (b) Moloʼö yaʼugö, hewisa dödö Zatana ba ndraono sangomasiʼö ba samosumange Yehowa iadaʼa?

¹² Ngaotu fakhe me no aefa Gaberahamo awena tumbu Yesu. Böi waʼö tödöu ahöli-höli dödö Zatana ba omuso dödönia me tumbu Yesu. Iʼila Satana wa daʼö zi tobali Mesia nifabuʼu na no ebua ia dania. Yesu andre daʼö ziaʼa maʼuwu Gaberahamo, yaʼia dania ”zamakiko halöwö Gafökha”. (I Yohane 3:8) Moloʼö Satana, Hadia amuata si lö sökhi wamunu iraono? Tenga. Lö ibe dödönia hezo zi ndruhu ba hezo zi sala. Iʼalui lala wamunu Yesu. Hewisa wamaluania?

¹³ Me irongo Razo Herode moroi khö ndra ere si otarai gatumbukha wa no tumbu ”razo niha Yehuda” mofönu sibai ia ba iʼalui lala wamunu ono andrö. (Mataiʼo 2:1-3, 13) Andrö ifatenge niha ba wamunu fefu ndraono matua si mendrua fakhe faʼebua numalö ba zide-ide ba Mbetilekhema ba bazifasui fefu. (Baso Mataiʼo 2:13-18.) Lö saʼozu mate Yesu meluo daʼö, hadia gamuata Zatana soroma khöda ba zalua andre? Lö alimagö khö Gafökha waʼauri niha. Lö ahakhö dödönia ndraono. Si ndruhu-ndruhu wa hulö ”zingo sindröndrö-ndröndrö” Zatana. Böi olifu ndraʼugö wa afaito sibai ia!

SATANA ANDRÖ SI FALIMO

14, 15. Hewisa wombawainö Zatana ”era-era zi lö mamati”?

¹⁴ Sambua lala niʼogunaʼö Zatana enaʼö talawa Lowalangi sangomasiʼö yaʼita sotöi Yehowa, yaʼia daʼö falimo ia khöda. (I Yohane 4:8) Ilimo niha Satana irege lö laʼameʼegö tödö gö ba wamati, mazui fehede tanö böʼö enaʼö lö taʼila wa moguna ahatö ita khö Lowalangi. (Mataiʼo 5:3) ”No imbawainö Afökha gera-era zi lö mamati” irege lö aboto ba dödöra zi ndruhu sanandrösa khö Yehowa.—II Korindro 4:4.

¹⁵ Sambua lala niʼogunaʼö Zatana ba wolimo niha yaʼia daʼö famahaʼö agama sofaya. Iʼila Afökha wa Yehowa andrö Lowalangi ”solohu”. (II Moze 20:5) Khalaigö atö hewisa waʼomuso dödö Zatana na iʼila niha lafosumange zi no mate, luo, baŵa, urifö mazui tanö böʼönia asala tenga Yehowa. Ato niha sangumaʼö wa itema Lowalangi zumange nibeʼera, si ndruhunia no iʼosawuyu ira famahaʼö selungu. Simanö göi zigöna ba ndraono Gizaraʼeli ba götö Yesaya. Isofu khöra Yehowa, ”Hana wa edöna mitulo ganaʼa, böli zi tenga ö, ba ölömi ba zi tebai abuso ami? Ba mifondro-ndrongo khögu, ba misöndra ömi zi sökhi ba möi fangokafu dödömi zatabö.”—Yesaya 55:2.

16, 17. (a) Hana wa iwaʼö Yesu khö Wetero, ”Ae furigu Satana”? (b) Hewisa wa tola ilimo ita Satana irege lö khöda fangelama?

¹⁶ Tola ilimo Satana zowölö-ölö ba wamosumange Yehowa. Duma-dumania, faigi hadia zalua me inötö iʼombakhaʼö Yesu khö ndra nifahaʼönia wa lö aratö labunu ia. Börö me laʼomasiʼö Yesu ira nifahaʼönia, andrö imane Fetero ”Ya mutimba khöu Lowalangi Tua; böi göna ndraʼugö simanö.” Imane Yesu khö Wetero, ”Ae furigu Satana!” (Mataiʼo 16:22, 23) Hana wa ibaliʼö ”Satana” Wetero Yesu? Börö no iʼila Yesu hadia ia zalua. Ba zi lö aratö, mate Yesu ba wangöhöli niha ba horö ba ifaduhuʼö wa sofaya Zatana andrö. Daʼö ginötö sabölö moguna ba waʼauri niha gulidanö, tenga inötö khö Yesu ba wohakhösi tödö faʼaurinia. Omuso dödö Zatana na lö mangelama Yesu.

¹⁷ No ahatö waʼatua danö, ba no so ita ba ngaluo safuria. Omasi Zatana na tahakhösi tödö waʼaurida yaʼia daʼö ifarou dödöda ba wolohi töi sebua ba gulidanö andre. Omasi ia na lö khöda fangelama, enaʼö olifu ita wa no ba ngaluo safuria so ita. Böi telimo ami! Moguna mangelama ita. (Mataiʼo 24:42) Böi faduhu dödöu ba niwaʼö Zatana wa ara nasa ginötö waʼatua danö, mazui lö alua.

18, 19. (a) Tutunö hewisa lala Zatana wameʼe ba wangera-ngerada wa tenga sinangea iʼomasiʼö ita Yehowa. (b) Hewisa wanolo Yehowa yaʼita enaʼö so khöda wangelama?

¹⁸ So lala tanö böʼö nifalua Zatana ba wolimo yaʼita. Omasi ia na so ba wangera-ngerada wa tenga sinangea iʼomasiʼö ita Yehowa, ba wa lö iʼefaʼö horöda Lowalangi. Fefu daʼa no falimosa Zatana. Angeraigö atö, haniha zi ndruhu-ndruhu zi tenga sinangea iʼomasiʼö Yehowa? Satana. Haniha zi lö irai iʼefaʼö horö Lowalangi? Satana. Ifaduhuʼö khöda Sura Niʼamoniʼö, wa ”tenga sa si lö atulö Lowalangi faʼolifu ia enaʼö mbua-buami awö waʼomasi andrö, nifaʼeleʼömi, faʼomasimi döinia.” (Heberaiʼo 6:10) Iʼandrö saohagölö khöda Yehowa ba zi no tafalua simöi fangomuso dödönia, fangaʼida halöwönia tenga zaya-zaya gölö. (Baso I Korindro 15:58.) Böi telimo ami khö Zatana.

¹⁹ Simane si no taʼila, abölö sibai Zatana, afaito, ba onekhe ia ba wolimo niha. Hewisa wolawada sifaʼudu simane daʼö? Ibeʼe khöda wanolo Yehowa. Iʼombakhaʼö khöda taromalinia hadia lala niʼogunaʼö Zatana ba wamaelungu yaʼita ”aboto ba dödöda gera-erania”. (II Korindro 2:11) Na aboto ba dödöda lala niʼogunaʼö Zatana ba wamaelungu niha, tola mangelama ita. Tenga haʼasala no taʼila. Imane Sura Niʼamoniʼö, ”Mitimba Gafökha ba moloi ia iröi ami.” (Yakobo 4:7) Ba migu fönada tafatunö hewisa lala enaʼö möna ita ba wolawa Satana ba zi tölu ngawalö nifaluania ba wamaelungu yaʼita.