Fondrege Zabölö Hizaʼi Iʼosinangegö Nirasoi Niha Böʼö

1, 2. (a) Hadia gamaehuta lala nifalua Yehowa hegöi lala nifalua niha sebua kuaso ba wangosinangegö niha böʼö? (b) Hadia nitutunöda ba wamahaʼö daʼa?

NIHA sebua kuaso asese lafatörö mazui lafakao niha böʼö. (Mataiʼo 20:25; Zangombakha 8:9) Lö irai ifalua daʼö Yehowa! Hewaʼae Fondrege Zabölö ia ba mbanua si yawa awö danö, sindruhu-ndruhu iʼosinangegö nirasoi niha si lö moʼahonoa. Si sökhi tödö ia ba iʼameʼegö tödö hadia nirasoi hegöi soguna khöda. Itörö tödönia wa lö moʼahonoa ita, ba iʼila wa so zi tebai tafalua. Andrö wa lö irai iʼandrö khöda ba wamalua hadia zi tebai tafalua.​—Zinunö 103:13, 14.

² Ba Zura Niʼamoniʼö, tafahaʼö ita hewisa wangosinangegö Yehowa nirasoi nono mbanuania. Datatutunö tölu dumadumania: Si oföna, si fao faʼasökhi dödö itolo Zamueli si bohou ebua Yehowa ba wamaʼema turia fanguhuku khö Gere Sebua sotöi Eli. Si dua, iforomaʼö waʼebolo dödö Yehowa khö Moze me so ba dödö Moze wa tebai idöniaʼö ndraono Gizaraʼeli ba wofanö moroi ba Miserai. Si tölu, iʼosinangegö nirasoi ndraono Gizaraʼeli me aheta ira moroi ba Miserai. Hadia wamahaʼö nihalöda sanandrösa khö Yehowa moroi ba duma-duma daʼa, ba hewisa lalada ba woloʼö yaʼia?

IʼOSINANGEGÖ NIRASOI ZI SAMÖSA ONO MATUA

3. Samuza inötö ba zi bongi, hadia zalua khö Zamueli si bohou ebua, ba hadia wanofu si tumbu ba wangera-ngerada? (Faigi gambara ba wamobörö wamahaʼö.)

³ Iʼotarai me ide-ide, mohalöwö Zamueli ba nose Lowalangi. (1 Zamueli 3:1) Samuza inötö ba zi bongi, ba wemörönia so zalua si lö toʼölö.a (Faigi nisura ba gahe zura.) (Baso 1 Zamueli 3:2-10.) Irongo so zogaoni töinia. Iwalingagö Eli zogaoni yaʼia, Ere Sebua si no atua. Maoso ia ba ilau fagohi wamalukhaisi Eli ba imane, ”Yaʼe ndraʼodo, me no muʼaoʼö khögu.” Hizaʼi, imane khönia Eli, ”Lö siʼaodo khöu.” Me no tölu kali alua zimane daʼö, aboto ba dödö Eli wa Lowalangi zogaoni Samueli. Andrö, ifatunö Eli khö Zamueli hadia zinangea iwaʼö na ifuli alua daʼö. Igoʼö daʼö Samueli. Hana wa lö iʼanemaiʼö ifatunö Yehowa khö Zamueli wa yaʼia zogaoni Samueli? Lö itutunö Sura Niʼamoniʼö. Hizaʼi, tola manö ifalua daʼö Yehowa börö me iʼameʼegö tödö hadia nirasoi Zamueli.

4, 5. (a) Hadia nifalua Zamueli me iʼandrö khönia Yehowa ba wamaʼema turia khö Eli? (b) Ba zalua andre, hadia wamahaʼö nihalöda sanandrösa khö Yehowa?

⁴ Baso 1 Zamueli 3:11-18. Ba Goroisania, no ibeʼe fareta Yehowa ba ndraono enaʼö lafosumange niha sabölö atua moroi khöra, mendrua manö niha sangai halöwö. (2 Moze 22:28; 3 Moze 19:32) Börö me awuyu-wuyu Zamueli, tatu abua khönia weʼamöi ba wamalukhaisi Eli ba zi hulö wongi hegöi ba wamaʼema turia fanguhuku moroi khö Lowalangi si fao faʼabarani. Itutunö khöda Sura Niʼamoniʼö wa ”ataʼu Zamueli iʼombakhaʼö khö Eli niʼilania andrö”. Hizaʼi, ibeʼe waʼaboto ba dödö Lowalangi khö Eli wa yaʼia zogaoni Samueli. Andrö wa iʼandrö Eli khö Zamueli enaʼö lö ibiniʼö fefu nifaʼema Lowalangi khönia. Iʼoʼö Samueli niwaʼö Eli ba ”ahori iʼombakhaʼö khönia”.

⁵ Lö tokea Eli me irongo duria daʼö, börö me ba zilalö ”so genoni Lowalangi” samaʼema turia si fagölö simane daʼö. (1 Zamueli 2:27-36) Ba zalua andre tafahaʼö ita hewisa wangosinangegö Yehowa hadia nirasoi niha hegöi faʼatua-tua niʼokhögönia.

6. Hadia manö wamahaʼö nihalöda ba lala wanolo Lowalangi Zamueli si bohou ebua?

⁶ Na samösa si bohou ebua ndraʼugö, salua khö Zamueli si bohou ebua andre zangoromaʼö wa aboto ba dödö Yehowa gabula dödö hegöi nirasoimö. Te aila ba abua khömö wanuriaigö ba niha salawa döfi, mazui ataʼu ndraʼugö faböʼö ba ndraono si fagölö döfi khömö. Yafaduhu dödömö wa omasi Yehowa itoloʼö. Angandrö khönia ba tutunö hadia nirasoimö. (Zinunö 62:9) Haogö angerönusi duma-duma ndra si bohou ebua si so ba Zura Niʼamoniʼö simane Samueli. Lau fahuhuo khö ndra talifusöda si fagölö döfi khömö mazui si no alawa döfi si no irai manaögö abula dödö simane daʼö me awuyu-wuyu ira. Tola manö latutunö khömö hewisa wanolo Yehowa ira ba lala si lö ikhamö fangera-ngerara.

IʼOSINANGEGÖ NIRASOI MOZE

7, 8. Hewisa wangoromaʼö Yehowa wa sindruhu-ndruhu iʼameʼegö tödö nirasoi Moze?

⁷ Me 80 fakhe ndröfi Moze, ibeʼe khönia Yehowa halöwö sabua, ba wangefaʼö ndraono Gizaraʼeli moroi ba wangosawuyu Miserai. (2 Moze 3:10) Te tokea Moze ba halöwö nitemania andre, börö me yaʼia ha samösa gubalo ba Midiano ba zi 40 fakhe. Imane Moze, ”Haniha ndraʼo, wa yaʼodo zi möi khö Waraʼo, awö wa yaʼodo zangeheta ba danö Miserai iraono Gizaraʼeli?” Imane Yehowa ba wamaduhuʼö tödö Moze, ”Utolo saʼae ndraʼugö!” (2 Moze 3:11, 12) Ifabuʼu göi Yehowa wa niha sondröniaʼö iraono Gizaraʼeli hasambalö ”lafondrondrongo” niwaʼö Moze. Hizaʼi manofu Moze, ”Ba na lö faduhu dödöra khögu, ba na lö lafondrondrongo khögu?” (2 Moze 3:18; 4:1) Hulö na iwaʼö Moze wa fasala Yehowa! Hizaʼi, ebolo dödö Yehowa khö Moze. Ibeʼe waʼabölö khö Moze ba wamalua tandra sahöli-höli dödö. Sindruhunia, niha si oföna nitutunö ba Zura Niʼamoniʼö sanema faʼabölö simane daʼa yaʼia daʼö Moze.​—2 Moze 4:2-9, 21.

⁸ Hewaʼae simanö, iʼalui nasa lala tanö böʼö Moze. Iwaʼö wa lö onekhe ia fahuhuo. Andrö wa imane khönia Lowalangi, ’Yaʼo zanolo yaʼugö ba wahuhuosa ba uʼombakhaʼö khöu, hadia niwaʼöu.’ Hadia faduhu dödö Moze ba gafuriata? Löʼö, iʼandrö khö Lowalangi enaʼö ifatenge niha böʼö! Mofönu Yehowa khönia. Hizaʼi, lö mamalö iʼameʼegö tödö hadia nirasoi Moze, andrö wa ifatenge Gaʼaroni tobali si fahuhuo salahi Moze.​—2 Moze 4:10-16.

9. Hewisa waʼebolo dödö ba faʼasökhi dödö Yehowa möi fanolo Moze tobali sondröniaʼö si sökhi?

⁹ Hadia wamahaʼö nihalöda sanandrösa khö Yehowa ba zalua andre? Börö me Fondrege Zabölö Yehowa, tola iʼogunaʼö waʼabölönia ba wametaʼu Moze enaʼö moloʼö ia. Hizaʼi, ebolo dödö Yehowa ba iforomaʼö waʼasökhi dödö. Ifaduhuʼö wa hasambalö fao ia khö genoninia andrö, sangokhögö fangide-ngideʼö. Hadia mofozu lala daʼa? Mofozu! Tobali sondröniaʼö si sökhi Moze ba nono mbanua Lowalangi. Simane Yehowa, iforege ba wangokhögö faʼebolo dödö ba iʼosinangegö nirasoi niha böʼö.​—4 Moze 12:3.

10. Hadia mbuania na taʼosinangegö nirasoi niha böʼö simane nifalua Yehowa?

¹⁰ Hadia wamahaʼönia khöda? Na samösa foʼomo ira matua ndraʼugö, satua mazui satua sokubaloi, so zi tola öfalua ba niha böʼö. Börö daʼö, moguna sindruhu-ndruhu öʼoʼö Yehowa. Si fao faʼasökhi dödö ba faʼebolo dödö osinangegö nirasoi woʼomomö ira alawe, iraonomö hegöi ira talifusö ba mbanua niha Keriso. (Kolose 3:19-21; 1 Fetero 5:1-3) Na öʼoʼö Lowalangi Yehowa hegöi Yesu Keriso si no tobali Moze Fondrege Zebua, tola aoha ba niha ba wangondrasi hegöi ba wahuhuosa khömö, ba tola öfarou dödöra. (Mataiʼo 11:28, 29) Tola göi tobali ndraʼugö duma-duma si sökhi khöra.​—Heberaiʼo 13:7.

IʼOSINANGEGÖ NIRASOI NIHA BA GINÖTÖ IBEʼE WOLUMÖʼÖ

11, 12. Hadia nifalua Yehowa enaʼö larasoi waʼahono dödö iraono Gizaraʼeli me aheta ira moroi ba Miserai?

¹¹ Tola manö, töra tölu zuta ndraono Gizaraʼeli me aheta ira moroi ba Miserai me döfi 1513 SM. Ba gotaluara so ndraono, niha si no alawa döfi, ba te so göi zofökhö mazui si no cacat. Börö me ato sibai ira, moguna so Zondröniaʼö yaʼira soʼameʼegö tödö ba sangila hadia nirasoira. Simane daʼö wondröniaʼö Yehowa ira, ba ifili Moze tobali salahinia. Buania, so waʼahono dödö ba ndraono Gizaraʼeli me laröi nahia waʼatoröira.​—Zinunö 78:52, 53.

¹² Hadia nifalua Yehowa enaʼö larasoi waʼahono dödö ono mbanuania? No ihaogö ifaʼanö enaʼö toföfö wofanö ndraono Gizaraʼeli moroi ba Miserai simane na ”lafaʼanö ira ba wanuwö”. (2 Moze 13:18) Börö me toföfö wofanöra, ba daʼö laʼila wa tola ifatörö ngawalö zalua Lowalangi. Ibeʼe göi khöra Yehowa ”lawuo, na maʼökhö” hegöi ”haga galitö” ba zi bongi, enaʼö latörö tödöra wa fao khöra Lowalangi, ibeʼe wanuturu lala ba ilumöʼö ira. (Zinunö 78:14) Moguna mubeʼe waʼafaduhu dödö ba ndraono Gizaraʼeli börö zalua nitöröra dania.

13, 14. (a) Hadia nifalua Yehowa ba wolumöʼö iraono Gizaraʼeli ba Nasi Soyo? (b) Hewisa wangoromaʼö Yehowa wa abölö ia moroi ba niha Miserai?

¹³ Baso 2 Moze 14:19-22. Khalaigö na so ndraʼugö ba gotalua ndraono Gizaraʼeli. No teʼuʼu ndraʼugö. So furimö zaradadu Miserai, ba tanö fönamö so Nasi Soyo. Hizaʼi so nifalua Lowalangi. Ifawuʼa lawuo si so tanö fönamö ibeʼe tanö furi ba nose, ba gotaluamö faoma niha Miserai. Tobali faʼogömi-gömi ba niha Miserai hizaʼi tobali haga ba nosemö! Aefa daʼö, öʼila wa ifazawa ziʼonia Moze tanö ba nasi, ba alua nangi sabölö-bölö moroi ba gatumbukha irege fabali nasi andrö ba so lala sebolo ba gotaluania. Yaʼugö, ösi nomomö, urifömö hegöi iraono Gizaraʼeli tanö böʼö mowaö-waö ami ba danö sabeʼe. Toföfö wofanömi. Ahöli-höli dödömö börö me lö fatambu ba lö aelo danö nitörömö. Oköli ba abeʼe danö daʼö irege aoha wanörö yaʼia. Buania, niha si tebai manö tola larugi ba zi tambai.

¹⁴ Baso 2 Moze 14:23, 26-30. Me alua daʼö fefu, Faraʼo si bodo ba sasiliyawa, igohi ndraʼugö hegöi iraono Gizaraʼeli tanö böʼö. Hizaʼi, ifuli ifazawa ziʼonia Moze tanö ba nasi, ba izumaigö fahalö nasi andrö si no tobali towa ba gambölö hegöi ba gabera. Ihawui Waraʼo hegöi saradadunia irege ahöndrö ira ba samösa lö sauri!​—2 Moze 15:8-10.

15. Hadia wamahaʼö nihalöda sanandrösa khö Yehowa ba zalua andre?

¹⁵ So nasa wamahaʼö tanö böʼö nihalöda sanandrösa khö Yehowa ba zalua andre. Yaʼia Lowalangi si toföfö, daʼa zanolo yaʼita ba worasoi faʼahono dödö. (1 Korindro 14:33) Simane samösa kubalo sangomasiʼö ba soʼameʼegö tödö biri-birinia, iʼameʼegö tödö nono mbanuania Yehowa ba ngawalö lala. Ibeʼe khöra waʼahono dödö ba ilumöʼö ira moroi ba nudura. Daʼa zamaduhuʼö ba sondrara tödöda börö me taʼila wa no itugu ahatö wangohori ulidanö daʼa.​—Gamaedola 1:33.

16. Hewisa wa tola tatema mbua na tafahaʼö ita lala nifalua Yehowa ba wangorifi iraono Gizaraʼeli?

¹⁶ Iadaʼa, lö mamalö iʼameʼegö tödö nono mbanuania Yehowa tobali sambua ngawawa. Itolo ira enaʼö laʼokhögö wahuwusa si sökhi khönia ba ilumöʼö ira moroi ba nudura. Lö mamalö ifalua daʼö sagötö alua wamakao sabölö-bölö si lö ara tö alua. (Famaʼeleʼö 7:9, 10) Andrö, fefu nono mbanua Lowalangi, he sawuyu-wuyu mazui satua, sehat mazui cacat, lö moguna aombö dödöra ba ataʼu ira na alua wamakao sabölö-bölö.b (Faigi nisura ba gahe zura.) Sindruhunia, laʼokhögö waʼabarani! Hasambalö itörö tödöra wehede Yesu, ”Miʼosindro ba mifaöga mbawami börö me lö aratö ginötö wangefaʼö yaʼami.” (Luka 21:28) Hewaʼae ilawa ira Gogi, yaʼia daʼö angowuloa soi sabölö moroi ba waʼabölö Waraʼo, lö mamalö faduhu dödö nono mbanua Lowalangi wa hasambalö ilumöʼö ira Yehowa. (Hezekieli 38:2, 14-16) Hadia mbörö? Börö me laʼila wa lö irai tebulö Yehowa. Hasambalö ifuli iforomaʼö wa Solumöʼö safönu faʼomasi ia ba soʼameʼegö tödö ono mbanuania.​—Yesaya 26:3, 20.

17. (a) Hewisa wa tola tasöndra mbua na tafahaʼö ita ba waö-waö si so ba Zura Niʼamoniʼö sanandrösa ba lala woʼameʼegö tödö Yehowa nono mbanuania? (b) Hadia nitutunöda ba wamahaʼö aefa daʼa?

¹⁷ Ba wamahaʼö daʼa, so ösa duma-duma si no tatutunö sangoromaʼö hewisa wangosinangegö hegöi faʼasökhi dödö Yehowa ba ginötö iʼameʼegö tödö, ibeʼe wanuturu lala hegöi na ibeʼe wangefa ba nono mbanuania. Na öʼangerönusi waö-waö simane daʼö, alui hadia wamahaʼö si bohou nihalöu sanandrösa khö Yehowa, haogö faigi hadia manö zalua si no ötaluʼi ba zilalö. Na önönö wamahaʼö yaʼugö ba mbua-bua Yehowa, itugu öʼomasiʼö ba aro wamatimö khönia. Ba wamahaʼö fönada, tatutunö lala nifaluada ba woloʼö Yehowa ba wangosinangegö nirasoi nösi nomoda, ira talifusöda ba mbanua niha Keriso hegöi niha nifalukhaisida ba wanuriaigö.