FAMAHAʼÖ 6

Tutunö Hadia Mbörö Wa Muʼogunaʼö Ayati Zura Niʼamoniʼö

Yohane 10:33-36

RAHU-RAHU: Tenga ha asala öbaso ayati Zura Niʼamoniʼö aefa daʼö ötohugö ba duho tanö böʼö, hizaʼi tatugöi enaʼö aboto ba dödöra hadia gamakhaita ayati nibasomö ba duho nifatunömö.

LALA WAMALUA YAʼIA:

Fasafi ngawua wehede si tohude. Na no aefa öbaso ayati Zura Niʼamoniʼö, tutunö ngawua wehede soʼamakhaita ba duho nifatunömö. Tola öfalua daʼa na öfuli ötötöi ngawua wehedenia mazui beʼe wanofu khö ndra samondrongo irege laʼila hadia zi tobali ngawua wehede si tohude.

Ba ginötö öʼogunaʼö ngawua wehede si faböʼö na öfuli ötutunö geluaha zi sambua ayati, tatugöi enaʼö tola iʼila samondrongo hadia gamakhaita ayati Zura Niʼamoniʼö daʼö ba duho nifatunömö.
Abakhaiʼö wanutunö tuhonia. Na so khöda dane-dane ba wombaso ayati Zura Niʼamoniʼö, ombakhaʼö hewisa wa moʼamakhaita ngawua wehede si tohude ba ayati daʼö ba dane-dane nibeʼeda.

Ba ginötö ötutunö zi sambua ayati, böi aösö duhö Zura Niʼamoniʼö. Daʼa zi möi fanolonia ba wamakhai fehedemö ba ayati sawena mibaso.
Fatunö hewisa wamalua yaʼia. Böi fatunö hadia ia zi lö moʼamakhaita ba duho nifatunömö. Hawaʼoya niʼilania sanandrösa ba duho nifaʼemamö andrö, daʼö zotatugöi hawaʼoya zinangea öfatunö khönia irege tola aboto ba dödönia.