Oʼö zi Fahuwu khö Yehowa

1-3. (a) Hana wa faduhu dödöda wa tola tobali ita si fahuwu khö Lowalangi? (b) Hadia nifatunöda ba duho daʼa?

BA ZURA Niʼamoniʼö, tölu kali mutötöi Gaberahamo si fahuwu khö Lowalangi. (II Nga. 20:7; Yes. 41:8; Yak. 2:23) Hadia daʼö geluahania wa ha Aberahamo niha si no irai tobali si fahuwu khö Yehowa? Tenga. Ifatunö khöda Sura Niʼamoniʼö wa fefu ita tola tobali si fahuwu khönia.

² Oya waʼö-waʼö ba Daromali Lowalangi sanandrösa ba niha si lö faröi sangataʼufi Yehowa, samati ba si fahuwu khönia. (Baso Zinunö 25:14.) Yaʼira andrö fao ba gotalua ”lawuo samaduhuʼö” nitötöi Waulo. Fefu ira mufotöi si fahuwu khö Lowalangi.​—Heb. 12:1.

³ Datafaigi datölu zi fahuwu khö Yehowa si no musura ba Zura Niʼamoniʼö: (1) Ruti, lakha mbanua si lö faröi moroi ba mbanua Moabi, (2) Hisikia, razo samati moroi ba mado Yuda, ba (3) Maria, ina Yesu si so fangide-ngideʼö. Hadia zi tobali famahaʼö khöda moroi ba nifaluara me no tobali ira si fahuwu khö Lowalangi?

FAʼOMASI SI LÖ FARÖI NIFOROMAʼÖ RUTI

4, 5. Hadia gangetula sabua nihalö Ruti, ba hana abua khönia wangaʼi angetulania daʼö? (Faigi gambara ba wamobörö wamahaʼö.)

⁴ Naomi hegöi umönönia Ruti ba Orafa, mofanö ira iʼotarai mbanua Moabi numalö ba mbanua Gizaraʼeli. Ba dalu lala, mangawuli Gorafa ba mbanua Moabi. Hadia gangetula nihalö Ruti? Ihalö gangetula sabua sibai. Hadia mangawuli ia ba mbanua Moabi si so ira talifusönia, mazui lö iröi ninania matuania sotöi Naomi wefao ba Mbetilekhema?​—Rut. 1:1-8, 14.

⁵ Ba mbanua Moabi toröi ndra talifusö Ruti. Tola manö mangawuli ia ba daʼö ba latemaʼö ia ira talifusönia. Aboto ba dödönia niha si töröi ba mbanua Moabi, li niʼogunaʼöra hegöi si toʼölö lafalua. Na möi ia ba Mbetilekhema, lö iʼila ibeʼe khönia Naomi zimane daʼö. Ba aombö dödö Naomi na lö isöndra woʼomo Ruti hegöi omonia. Andrö, ifarou ia Naomi mangawuli ba mbanua Moabi, simane Gorafa ”ifuli ia ba niwara ba khö lowalangira”. (Rut. 1:9-15) Hizaʼi, lö ifuli ia Ruti ba mbanuania hegöi khö lowalangira si lö atulö.

6. (a) Hadia gangetula si sökhi nihalö Ruti? (b) Hana wa iwaʼö Mboasi khö Ruti wa ibaliʼö Yehowa tobali sawatönia?

⁶ Tola manö moroi khö Naomi mazui khö woʼomonia ifahaʼö ia Ruti sanandrösa khö Yehowa. Ifahaʼö ia wa lö fagölö Yehowa khö lowalangi nifosumange niha Moabi. Iʼomasiʼö göi Yehowa ba aboto ba dödönia wa no sinangea mufosumange ba muʼomasiʼö ia. Andrö, ihalö gangetula si sökhi. Imane khö Naomi, ”Iwau niwagu, ba Lowalangiu Lowalangigu.” (Rut. 1:16) Ahöli-höli dödöda na taʼangeraigö waʼomasi Ruti khö Naomi. Hizaʼi, sabölö ahöli dödöda yaʼia daʼö faʼomasinia khö Yehowa. Daʼö göi mbörö wa ahöli dödö Mboasi, sanuno yaʼia börö me ’iʼalui zawatönia, barö gafi Yehowa’. (Baso Ruti 2:12.) Moroi ba wehede Mboasi andrö itörö tödöda nono wofo sawena tumbu, ilumöʼö ia barö gafi ninania. (Zin. 36:8; 91:1-4) Simanö göi, ilumöʼö Ruti Yehowa ba ifahowuʼö ia börö wamatinia. Lö maniasa Ruti ba gangetula nihalönia andrö.

7. Hadia zi tobali fanolo ba niha si so faʼaombö-aombö dödö ba wolulu faʼaurira khö Yehowa?

⁷ Ato niha samahaʼö yaʼia sanandrösa khö Yehowa. Hizaʼi, lö lafili enaʼö ilumöʼö ira Yehowa. Aombö dödöra wolulu faʼaurira khö Yehowa hegöi ba wamayagö idanö. Na simane daʼö nirasoimö, angeraigö hana wa so khöu waʼaombö-aombö dödö. Ero samösa niha, samösa lowalangi nifosumangera. (Yos. 24:15) Andrö, moguna öfosumange Lowalangi sindruhu. Na ölulu waʼaurimö khö Yehowa, daʼö dandra wa mamati ndraʼugö khönia, ibeʼe khöu wolumöʼö. Itolo ndraʼugö enaʼö lö tebulö öfosumange ia hewaʼae oya gabula dödömö. Simanö nifalua Lowalangi khö Ruti.

”YEHOWA IʼOLEMBAI”

8. Tutunö hewisa waö-waö waʼauri Hisikia me iraono ia.

⁸ Aröu faehu waʼauri Hisikia moroi ba waʼauri Ruti. Yaʼia andrö moroi ba soi si tobali tana khö Lowalangi. Hizaʼi ato ndraono Gizaraʼeli si no faröi. Lö sökhi gamuata nama Hisikia, sotöi Razo Gahasi. Lö ifosumange gosali Lowalangi ba ifarou niha sato enaʼö lafosumange lowalangi tanö böʼö. Ifatörö ba galitö dalifusö Hisikia tobali sumange mbaʼali. Sindruhu-ndruhu wa lö baga waö-waö waʼauri Hisikia me iraono ia!​—II Raz. 16:2-4, 10-17; II Nga. 28:1-3.

9, 10. (a) Hana wa tola manö mofönu Hisikia? (b) Hadia mbörö wa tenga sinangea abao dödöda khö Lowalangi? (c) Hana wa böi tawaʼö tödöda wa salua khö ndra satuada daʼö zotatugöi waʼaurida dania?

⁹ Börö me lö sökhi duma-duma nifalua Gahasi, tola manö mofönu ba abao dödö Hisikia khö Yehowa. Ba ginötö andre ato göi zorasoi simane Hisikia, ba tola manö ’abao dödöra khö Yehowa’ hegöi ba gorahuania. (Gamd. 19:3) So göi zangumaʼö börö me ngaʼötö niha si lö sökhi ira, andrö wa lafalua zi lö sökhi. (Hez. 18:2, 3) Hadia sindruhu daʼö?

¹⁰ Löʼö! Oroma moroi ba waʼauri Hisikia. Tenga sinangea mofönu ita khö Yehowa. Tenga yaʼia mbörö waʼalua zi lö sökhi ba niha. (Yob. 34:10) Sindruhunia satua zamahaʼö iraonora ba wamalua si sökhi mazui si lö sökhi. (Gamd. 22:6; Kol. 3:21) Hizaʼi, tenga göi daʼö geluahania wa tobali sökhi ita mazui lö sökhi börö ndra satuada. Hadia mbörö? Börö me no itehegö khöda Yehowa wofili hadia zi sökhi mazui si lö sökhi. (V Moz. 30:19) Hadia nifili Hisikia?

11. Hana wa razo si sökhi sibai Hisikia ba mado Yuda?

¹¹ Hewaʼae namania andrö razo si lö sökhi sibai ba mado Yuda, hizaʼi ononia Hisikia no razo sabölö sökhi. (Baso II Razo 18:5, 6.) Lö itara lahe namania ba ihaogö ifondro-ndrorongo mene-mene hegöi degu-degu nifaʼema ndra samaʼeleʼö khö Yehowa, simane Yesaya, Mikha, ba Hosea. Daʼa zamarou tödönia ba wangaʼatulöʼö ngawalö zala nifalua namania. Iʼandrö khö Lowalangi ba wangefaʼö zala nono mbanuania ba ihori nadu si so ba gosali. (II Nga. 29:1-11, 18-24; 31:1) Me isuwö Yeruzalema Zaneribi, Razo Asiria, lö ataʼu Hisikia ba mamati ia. Faduhu dödönia wa ilumöʼö ba iʼabölöʼö nono mbanuania Yehowa. (II Nga. 32:7, 8) No irai so wayawasa khö Hisikia, hizaʼi ba ginötö ibeʼe khönia Yehowa degu-degu so khönia wangide-ngideʼö. (II Nga. 32:24-26) Oroma sibai wa Hisikia andre tobali duma-duma si sökhi sinangea taʼoʼö. Lö itehe ifakiko waʼaurinia ha börö-börö zalua moroi ba nösi nomonia. Iforomaʼö wa si fahuwu khö Yehowa ia.

12. Simane Hisikia, hewisa niha Keriso ba ginötö andre laforomaʼö wa si fahuwu khö Yehowa ira?

¹² Ulidanö ba ginötö andre lö sökhi ba lö faʼomasi. Ato ndraono ba ginötö iadaʼa lö larasoi waʼomasi moroi khö zatuara iʼotarai me ide-ide irugi ba waʼebuara. (II Tim. 3:1-5) Hewaʼae no faböʼö-böʼö lala waʼauri niha Keriso ero sambu-sambua omo, hizaʼi laʼodödögö wahuwusara khö Yehowa. Simane Hisikia, hewaʼae lö sökhi gamuata zatuada tenga daʼö zotatugöi na sökhi waʼaurida ba zi so föna mazui löʼö. No itehegö khöda Lowalangi wotatugöi hadia zinangea tafili. Simane nifalua Hisikia, tafili ba wamosumange Lowalangi.

’HIZA, ENONI YEHOWA NDRAʼO’

13, 14. Hana wa abua halöwö nitema Maria, ba hadia niwaʼönia khö malaʼika Gaberieli?

¹³ Me no haʼuga fakhe mate Hisikia, so samösa ndra alawe sawuyu-wuyu, si so fangide-ngideʼö sotöi Maria. Fahuwu sibai ia khö Yehowa ba no tebeʼe khönia halöwö sahöli-höli dödö. Manabina ia ba tumbu khönia nono Lowalangi ba yaʼia zangebuaʼö! Tatu manö iʼomasiʼö ba ifaduhusi tödö ia Yehowa, andrö wa ibeʼe khönia halöwö si sökhi. Hizaʼi, hadia nifalua Maria me tebeʼe khönia halöwö andrö?

¹⁴ Asese tafatunö-tunö halöwö sebua si no labeʼe khö Maria, hizaʼi hadia no irai taʼangeraigö hadia zi tobali abula dödönia? Duma-dumania, imane khönia malaʼika Gaberieli wa manabina ia dania hewaʼae lö irai orudu ia ba ndra matua. Lö ifatunö Gaberieli ba nösi nomo Maria hegöi ba zi faola omo khönia, hewisa wa tola manabina ia. Hadia dania zi so ba wangera-ngerara? Hewisa Maria ba wamaduhuʼö khö Yosefo wa lö si faröi ia khönia? So nasa noro dödönia ba wangebuaʼö ono Lowalangi tobali ono niha! Lö taʼila hadia zi tobali abula dödö Maria, hizaʼi taʼila hadia nifaluania me no aefa fahuhuo ia khö malaʼika Gaberieli. Imane, ’Hiza, enoni Yehowa ndraʼo, yaʼitörö khögu niwaʼöu.’​—Luk. 1:26-38.

15. Hana wa ahöli-höli dödöda wamati niʼokhögö Maria?

¹⁵ Sindruhu-ndruhu aro wamati niʼokhögö Maria! Simane sawuyu, tola ifalua gofu hadia ia niʼandrö khönia. Faduhu dödönia wa hasambalö itolo ba ilumöʼö ia Yehowa. Hana wa tola aro wamati Maria? Lö niʼokhögöda famati me awena tumbu ita, hizaʼi tola tafatumbuʼö wamatida ba taʼandrö enaʼö ifahowuʼö Lowalangi. (Gal. 5:22; Ef. 2:8) Iforege Maria ba wangaʼaroʼö famatinia. Hezo taʼila daʼö? Datafaigi hewisa lala wamondro-drongonia hegöi ba nifadunö-dunönia.

16. Hadia zangoromaʼö wa Maria andrö niha samondro-ndrongo si sökhi?

¹⁶ Lala wamondro-ndrongo Maria. Imane Sura Niʼamoniʼö, ”Ba ndra muʼaliʼoʼö wamondrongo, böi ndra mufahulö wehede.” (Yak. 1:19) Maria andrö no niha samondro-ndrongo si sökhi. Ifatunö khöda Sura Niʼamoniʼö wa iʼameʼegö tödö ba iʼangerönusi hadia zi no irongo, mendrua manö ba zi no ifahaʼö yaʼia sanandrösa khö Yehowa. Duma-dumania me no tumbu Yesu, ira kubalo lafaʼema khö Maria hadia zi no iwaʼö malaʼika. Me 12 fakhe ndröfi Yesu, iwaʼö wehede si möi faʼahöli-höli dödö Maria. Moroi ba duma-duma si dombua andre, oroma wa ihaogö ifondro-ndrongo Maria hadia manö zi no irongo, lö olifu ia, ba iʼameʼegö tödö sibai.​—Baso Luka 2:16-19, 49, 51.

17. Hadia zi tola tafahaʼö ita moroi khö Maria sanandrösa ba nidunö-dunönia?

¹⁷ Nidunö-dunö Maria. Lö ifatunö khöda fefu Zura Niʼamoniʼö hadia manö nidunö-dunö Maria. Hizaʼi, fehedenia soya no tesura ba zura Luka 1:46-55. Moroi ba wehedenia andre zangoromaʼö wa so khö Maria waʼaboto ba dödö sanandrösa ba Gamabuʼula Li si Föföna. Hana wa tola? Fagölö ngawua wehede Maria ba wangandrö Khana, ina Zamueli. (I Zam. 2:1-10) Te 20 kali itötöi Maria ayati zura Gamabuʼula Li si Föföna. Tatu manö omasi ifatunö zindruhu si no isöndra moroi khö Yehowa si no tobali si fahuwu khönia.

18. Hewisa wa tola taʼoʼö wamati Maria?

¹⁸ Simane Maria, tola manö tatema halöwö moroi khö Yehowa, ba tamane wangumaʼö abua khöda wamalua yaʼia. Dataoʼö duma-duma Maria, tatema halöwö andrö si fao fangide-ngideʼö ba faduhu dödöda wa hasambalö itolo ita Yehowa. Tola göi taʼoʼö wamati Maria na tahaogö tafondro-ndrongo niwaʼö Yehowa ba taʼangerönusi zi no tafahaʼö yaʼita sanandrösa khönia hegöi ohitö dödönia. Ba tasöndra waʼomuso dödö na tadunö-dunö daʼö ba niha fefu.​—Zin. 77:12, 13; Luk. 8:18; Rom. 10:15.

19. Na taʼoʼö wamati niha si no musura ba Zura Niʼamoniʼö, hadia zi faduhu dödöda?

¹⁹ Ruti, Hisikia, hegöi Maria, yaʼira andre si fahuwu khö Yehowa, fagölö simane Aberahamo. Baero daʼö, so ”lawuo samaduhuʼö” si no tobali si fahuwu khö Lowalangi göi. Dataʼoʼö wamatira saro andrö. (Heb. 6:11, 12) Na tafalua daʼö, faduhu dödöda wa tola tobali si fahuwu khö Yehowa ita irugi zi lö aetu!