Talitonu Ni he Kitia
“Ko e tagata nakai talitonu na fai Atua (agnostic) ne manatu kua nakai maeke ke iloa e tala mooli ke he tau mena tuga e Atua mo e vahā anoiha he moui mo e tau mena ne kapaletu ki ai e tau lotu Kerisiano mo e falu lotu. Po ke, pete kua maeke ai, ka e nakai maeke ke he magaaho nei.”—PULOTU KO BERTRAND RUSSELL, 1953.
KO E tagata ne moua e kupu ma e “agnostic” ko e saienetisi ke he tau manu ne higoa ko Thomas Huxley. Ne fanau a Huxley he 1825, ne moui he magahala ha Charles Darwin mo e lalago lahi ke he fakaakoaga he tupumainoa. He 1863, ne tohia e Huxley kua nakai fai fakamooliaga na fai Atua ne “fakaalofa mo e leveki mai ki a tautolu tuga he talahau he faka-Kerisiano.”
Tokologa he vahā nei ne talia e tau manatu he tau tagata fakaohooho ia, ne talahau to talitonu ni a lautolu ke he tau mena ne maeke ia lautolu ke kitia. Ke tua ke he taha tagata po ke taha mena ne nakai fai fakamooliaga kitia mata ko e goagoa mooli, he liga talahau e lautolu.
Pehē kia e Tohi Tapu ke talitonu pouli a tautolu ke he Atua? Nakai pihia. Ne fakakite he Tohi Tapu ko e tau mena fakavai a ia—ti goagoa foki—ke tua ke he tau talahauaga ne nakai fai mena ke fakamooli aki. “Kua talia he tagata goagoa e tau kupu oti,” he talahau he Tohi Tapu, “ka ko e tagata lotomatala, kua manamanatu a ia ke he hana tau puhala.”—Fakatai 14:15.
Ka e kua e talitonu ke he Atua? Kua fai fakamooliaga nakai na fai Atua ti kua maeke foki ke fakaalofa mo e leveki a tautolu?
Kitia e Tau Mahani he Atua
Ko e tagata tohia he Tohi Tapu ko Paulo, ne talahau he fakatutalaaga ke he matakau pulotu i Atenai, ne pehē ko e Atua “ne eke e lalolagi mo e tau mena oti kana ha ha i ai.” Ne tala age a Paulo ke he tau tagata fanogonogo haana ne fakauaua, na fiafia e Atua ke he tau tagata ti “nakai ni mamao a ia mo tautolu takitokotaha.”—Gahua 17:24-27.
Ko e ha ne talitonu a Paulo ko e mena fai Atua ti fiafia foki ke he Haana tau tagata ne tufugatia? Ne fakakite e Paulo e taha kakano he tohi ke he tau matakainaga Kerisiano he maaga i Roma. Ne pehē a ia hagaao ke he Atua: “Ko e hana tau mena kua nakai kitia, tali mai he vaha ne eke e lalolagi, kua kitia ia he manamanatu e tau mena ne eke.”—Roma 1:20.
To fakakite mai he tau lau tohi i mua ke he tolu e mahani he Atua kua maeke ke kitia maaliali ha ko e tau mena ne tufugatia e ia. He kumikumi a koe ke he tau fakatai nei, hūhū ki a koe ni, ‘Lauia fēfē au he fakaako hagaao ke he tau mahani nei he Atua?’
[Blurb he lau 3]
Nakai pehē e Tohi Tapu ke talitonu pouli a tautolu ke he Atua