Yehova akasubiraya ati oko misabe yetu?

1-2. Twangayibulyaki oko misabe yetu?

WANABIRIYIBULYA Yehova nga akasubiraya oko misabe yaghu? Kyamabya kitya, sighuli ighuwene. Abaghala n’abali betu bangyi bakabugha bati nabo bakanayibulaya ekyo, kutsibu-tsibu omughulu bali omo maligho. Twamabya itunemughalwa, netu twanganalengekania tuti alinga Yehova syalisubiraya oko misabe yetu.

² Tukendilangira ekyangaleka itwikirirya ngoko Yehova akasubiraya oko misabe y’abakamuramaya. (1 Yoa. 5:15) Kandi tukendisubirya oko mabulyo ano: Busanaki hakabya emighulu itwalangira Yehova nga syalisubiraya oko misabe yetu? Yehova akasubiraya ati oko misabe yetu munabwire?

YEHOVA ANGANAGHANA ERISUBIRYA OKO MISABE YETU OMO NZIRA EYO TUYILINDIRIREKO

3. Busanaki Yehova akatubwira ati tubye tukamusaba?

³ Amasoko akatubwira ati Yehova atwanzire kutsibu kandi tuli b’omughaso munene okw’iye. (Hag. 2:7; 1 Yoa. 4:10) Kyo kikaleka inyabugha ati tubye tukamusaba obuwatikya omo musabe. (1 Pet. 5:6, 7) Anzire itwayitunda hakuhi naye n’erikinda amaligho agho tukalabamo.

4. Tukaminya tuti ngoko Yehova akasubiraya oko misabe y’abaghombe biwe? (Ulebaye n’epitsa.)

⁴ Tukasoma kangyi-kangyi omo Biblia ngoko Yehova akasubiraya oko misabe ey’abaghombe biwe. Wanamibuka eky’erileberyako kighuma? Twimaye eky’erileberyako eky’Omwami Dawidi. Abya n’esyonzighu yingyi omo ngebe yiwe, neryo inyakasaba kangyi-kangyi obuwatikya bwa Yehova. Kiro kighuma mwasaba ati: “[Yehova] wowe erisaba lyage, uhulikirire erilaka lyage! Uli mutunganene, suliregula, neryo unyisubiraye!” (Esy. 143:1) Yehova mwasubirya oko misabe ya Dawidi ey’erimusabula. (1 Sam. 19:10, 18-20; 2 Sam. 5:17-25) Kyo kyaleka Dawidi iniabugha omwiyiketera ati: “[Yehova] ali hakuhi oko bosi abakamubirikira.” Netu twangayiketera ebinywa ebyo.​—Esy. 145:18.

5. Yehova iniakanasubiraya oko misabe y’abaghombe biwe ba kera ngoko babya banzire? Teta eky’erileberyako. (Ulebaye n’epitsa.)

⁵ Yehova anganaghana erisubirya oko misabe yetu omo nzira eyo tuyilindirireko. Ekyo kyo kyahikira omukwenda Paulo. Mwasaba oMungu ati amulusayeko “endwala yʼomubiri.” Paulo mwasaba ngendo kasatu oko mwatsi oyo owabya akamuhangya-hangya. Yehova mwanasubirya oko misabe yiwe? Inga, aliwe omo nzira eyo Paulo abya syayilindirireko. Omo mwanya w’eribughaho endwala yiwe, Yehova mwaha Paulo y’akaghala ak’erilola embere erimukolera butaleghula.​—2 Kor. 12:7-10.

6. Busanaki hanganabya omughulu ikyalangirika Yehova nga syalitasubirya oko misabe yetu?

⁶ Netu Yehova anganasubirya oko misabe yetu omo nzira eyo tutalwe tuyilindirireko. Twanganikirirya ngoko Yehova yo wasi obuwatikya obo tulaghireko. Kandi anganakola bingyi kulenga “ebyosi ebyo tukabulaya kutse ebyo tukalengekanaya.” (Efe. 3:20) Busana n’ekyo, kwesi anganasubirya oko misabe yetu oko ndambi kutse omo nzira eyo tutayilindirireko.

7. Busanaki kyanganatolera eribindula ebyo tukasaba? Teka n’eky’erileberyako.

⁷ Omughulu tukaminya ndeke erisonda lya Yehova, twanganalangira ikyamatolera eribindula ebyo tukamusaba. Tulebaye eky’erileberyako kya mughala wetu Martin Poetzinger. Abere abilunga, mubalu bamubohera omo kambi ak’Abanazi. Oko nzuko, mwasaba Yehova ati amuwatikaye erilua omo kambi ako atoke eriyasulubirira omukali wiwe n’erisubira omubírí wiwe w’eritulira. Aliwe, habere halaba amayenga abiri, mwatalangira omwatsi wosi-wosi owakakanganaya ngoko Yehova akendimulusya omo kambi ak’amaghali ako. Neryo mwatsuka erisaba ati: “Yehova, kisi niwatikaye eriminya ekyo nangakola.” Neryo mwatsuka erilengekania okw’ebyo abandi baghala betu abali omo kambi ako banemulabamo. Abangyi ba kubo babya bakahangya-hangya kutsibu busana n’abakali babo n’abana babo. Neryo Mughala wetu Poetzinger mwabindula omusabe wiwe ati: “Yehova, wasingya oko mubírí muhya ono ogho wamamba. Uniwatikaye erisubya-mutima abaghala betu n’eriwatikyabo.” Mwabugha emyaka 9 omo kambi ako, akakola omubírí oyo!

8. Ni mwatsi wahi ow’omughaso ogho litolere itwibuka omughulu tukasaba?

⁸ Litolere itwibuka ngoko Yehova awite emipango eyo akendisyaberererya oko mughulu ogho abiriyihiriraho. Awite n’omupango ow’erisyabughaho koto-koto ebyosi ebikaleka itwaghalwa munabwire​—ng’ebitsinduli, amalwere, n’oluholo. Yehova akendisyaberererya erisonda liwe eryo erilabira Obwami bwiwe. (Dan. 2:44; Erib. 21:3, 4) Itunemulindirira omughulu oyo, Yehova anemulekera eSitani itabale kihugho kino.b (Yoa. 12:31; Erib. 12:9) Neryo Yehova amabibughaho amaligho wosi w’abandu, ikikendilangirika nga Sitani anemutabala ndeke. Neryo tukalindirira Yehova aberereraye esyondaghane siwe nyilebe, ekyo sikibughire kiti akatulekeranaya butsira buwatikya. Tulebaye emyatsi milebe eyo Yehova akakola erituwatikya.

NGOKO YEHOVA AKASUBIRAYA OKO MISABE YETU MUNABWIRE

9. Yehova akatuwatikaya ati omughulu tukasonda eriyisogha? Leta eky’erileberyako.

⁹ Akatuha amenge. Yehova akatulagha erituha amenge agho tulayireko tutoke eriyisogha ndeke. Tukalagha kutsibu oko menge wa Yehova omughulu tukasonda eriyisogha oko myatsi eyangabindula engebe yetu, ng’omughulu tukasonda eriyisogha nga tukendilunga kutse nga tukendisighala basimbi. (Yak. 1:5) Tulebaye eky’erileberyako kya mwali wetu musimbi oyukahulawamo Maria.c Abya inyanemutsemera kundu omubírí w’obupainia, neryo amahindana na mughala wetu mulebe. Akabugha ati: “Obwira bwetu bukaluma, mutwanzana kutsibu. Nabya nasi ngoko litolere eriyisogha. Neryo munasabira omwatsi oyo wo kutsibu. Nabya nilayire oko busondoli bya Yehova, aliwe ininasi ngoko Yehova syangayisogha omo mwanya waye.” Mwali wetu mwalangira ngoko Yehova mwasubirya oko musabe wiwe ow’erisaba amenge. Ati? Mwasondya-sondya emyatsi omo bitsapo bwetu, neryo mwabana emyatsi eyikasubiraya oko mabulyo aw’akayibulaya. Kandi mwakolesya n’amahano wa koyo wiwe mutaleghula. Amahano ayo mwawatikya Maria eriminya ng’ananzire kwenene-kwenene omulume oyo. Ebyo mubyamuwatikya eriyisogha ndeke.

10. Ngoko kiri omo Abanya Filipi 4:13, Yehova akakolaki eriwatikya abaghombe biwe? Leta eky’erileberyako. (Ulebaye n’epitsa.)

¹⁰ Akatuha akaghala ak’eriyiyinia. Ngoko Yehova mwaha Paulo y’akaghala ak’eriyiyinia omo maligho, netu kw’akenditukolera atya. (Soma Abanya Filipi 4:13.) Tulebaye ngoko Yehova mwawatikya mughala wetu oyukahula mo Benjamin eriyiyinia omo mubere owakalire. Hakuhi omo bulwana bwiwe bosi, iye n’ekihanda kiwe ibikere omo kambi kabasayi omo Afrika. Mughala wetu Benjamin akabugha ati: “Iningasaba kangyi-kangyi Yehova, niti ambe akaghala ak’erikola ebikamutsemesaya. Yehova mwasubirya oko misabe yaghe. Mwaniha eritulera omo mutima, akaghala ak’erilola embere eritulira, n’ebitsapo eby’eriniwatikya erisighala ininakalire.” Kandi akatomekako ati: “Eribya ngasoma emyatsi eyo baghala n’abali betu bakalola n’erigha ngoko Yehova anemubawatikya eriyiyinia mubyaniwatikya erisighala mutaleghula okw’iye.”

11-12. Yehova anganakolesya ati abaghala n’abali betu erisubirya oko misabe yetu? (Ulebaye n’epitsa.)

¹¹ Akakolesaya abaghala n’abali betu. Omo kiro ky’ekiro ekyatangirira oluholo lwiwe, Yesu mwasaba kutsibu. Mwasaba Yehova ati amuwatikaye syahole nga mukola nabi. Yehova mwatakola atya, aliwe mwamuwatikya omwimutumira mughala wabo, omumalaika mughuma, amusikaye mutima. (Luka 22:42, 43) Netu, Yehova anganatuwatikya erilabira abaghala n’abali betu. Banganatulenderera kutse ibatubirikira. Itwe bosi twanganabya tukasondya ehyanya ehy’eribwira “ekinywa kibuya” abaghala n’abali betu.—Emi. 12:25.

¹² Tulebaye eky’erileberyako kya mwali wetu oyukahulawamo Miriam. Amayenga malebe enyuma sy’oluholo lwa mwira wiwe, Miriam abya eka wiwe iyuwene iniabirihandabuka n’eribunika-mutima. Iniakasiba akalira, isyawite omundu w’erimubuya-buya. Akabugha ati: “Nabya isiniwite akaghala ak’eribirikira n’omundu, neryo munasaba Yehova. Ininemusaba ngalira, etefone yaghe muyalira. Oyuwabirikira abya musyakulu w’endeko. Ituli bira.” Mughala wetu musyakulu oyo kughuma n’omukali wiwe mubakirania mwali wetu Miriam. Mwalangira ngoko Yehova yo watuma mughala wetu oyo abirikire.

13. Leta eky’eriberyako ekikakanganaya ngoko Yehova anganakolesya abatemukolera erisubirya oko misabe yetu.

¹³ Anganakolesya n’abandu abatemukolera. (Emi. 21:1) Yehova anganasubirya oko misabe y’abandu biwe omwikuna abatemukolera bawatikayebo. Ng’eky’erileberyako mwakuna Omwami Artasasta alighire Nehemia eriyatasyahimba omuyi we Yerusalema. (Neh. 2:3-6) Na munabwire, Yehova anganakuna abatemukolera erituwatikya omughulu twamalagha oko buwatikya.

14. Ekyahikira mwali wetu Soo Hing kyamakusikya-mutima kiti? (Ulebaye n’epitsa.)

¹⁴ Mwali wetu oyukahulawamo Soo Hing mwayilangirira ngoko Yehova mwamuwatikya erilabira omunganga wiwe. Mughala wiwe iniakalwalira kangyi-kangyi omo mutwe. Omwana wabo oyo mwakola ekisida ekikalire, neryo mwali wetu n’omwira wiwe mubayisogha erileka omubírí wabo bamusulubirire. N’ekyo mukyaleka ibabula esyofranga. Mwali wetu Soo Hing akabugha ati eriyiyinia liwe mulyahika oko ndulya. Mwalilira Yehova, akamusaba obuwatikya. Omunganga oyo abya akabatunza mwasondya eyindi nzira y’eriwatikya mwali wetu oyo n’ekihanda kiwe. Omunganga oyo mwabasondera obuwatikya bw’eleta, yamabaha n’enyumba ey’erikalamo. Enyuma, mwali wetu Soo Hing mwabugha ati: “Mutwalangira ebyala bya Yehova omo mwatsi oyo. Kwenene Yehova ‘akasubiraya erisaba.’”—Esy. 65:2.

ERIMINYA N’ERILIGHA EBISUBIRYO BYA YEHOVA OKO MISABE YETU KIKASABA OBWIKIRIRYA

15. Niki kyo kyawatikaya mwali wetu eriminya ngoko emisabe yiwe inemusubibwako?

¹⁵ Yehova syalisubiraya oko misabe yetu omo nzira ey’eriswekya. Aliwe ebisubiryo ebyo akatuha bikabya ibyo tutolere eribana tutoke erisighala bataleghula oko Tata wetu w’elubula. Neryo ubye akasonda eriminya ebisubiryo bya Yehova oko misabe yaghu. Mwali wetu oyukahulawa mo Yoko, inyakalangira Yehova nga syalisubiraya oko misabe yiwe. Aliwe abere abitsuka eribya akahandika ebyo akasaba Yehova omo libuku mwalangira ngoko Yehova abirisubirya oko bingyi ebyo amusaba. Nibya n’ebyo abya abiribirirwa. Litolere itwabya tukalengekania kangyi-kangyi ngoko Yehova anemusubirya oko misabe yetu.​—Esy. 66:19, 20.

16. Twangakangania tuti obwikirirya omughulu tukasaba? (Abaebrania 11:6)

¹⁶ Tukakanganaya obwikirirya bwetu omwisaba Yehova, aliwe kandi omwiligha ebisubiryo byosi ebyo akendituha oko misabe yetu. (Soma Abaebrania 11:6.) Tulangire eky’erileberyako kya mughala wetu Mike n’omukali wiwe, ye Chrissy. Babya n’omuradi w’eriyakolera oko Beteli. Mughala wetu Mike akabugha ati: “Mutwasulya esyofomu oko myaka mingyi n’erisaba kangyi-kangyi oko Yehova busana n’omuradi oyo, aliwe mubatatubirikira.” Mike n’omukali wiwe mubaminya ngoko Yehova yowasi enzira eyuwene ey’erikolesyabo omo mubírí wiwe. Mubalola embere erikola ebyosi ebyo bangatoka, bakakola nga bapainia b’omughulu wosi eyiri obwagha bw’abatuliri n’erikola oko mubírí w’obuhimbe. Munabwire banemukola nga balebererya b’omutimbo. Mike akabugha ati: “Mughulu wosi Yehova isyalisubiraya oko misabe yetu ngoko twanzire, aliwe Yehova mwasubirya oko misabe yetu omo nzira eyuwene kutsibu eyo sitwabya tuyilindirireko.”

17-18. Ngoko kiri omo Esyonyimbo 86:6, 7, twanganabya n’obwikirirya okuki?

¹⁷ Soma Esyonyimbo 86:6, 7. Omuhandiki w’esyonyimbo ye Dawidi abya ikirirye ngoko Yehova akahulikirira n’erisubirya oko misabe yiwe. Naghu wanganikirirya ngoko Yehova akasubiraya oko misabe. Eby’erileberyako ebyo tulyalangira omo mwatsi ono byamatukangania ndeke-ndeke ngoko Yehova anganatuha amenge n’akaghala ako tulaghireko tutoke eriyiyinia. Kandi anganakolesya abaghala n’abali betu kutse abatemukolera erituwatikya omo nzira nyilebe.

¹⁸ N’omo Yehova syalisubiraya mughulu wosi oko misabe yetu ngoko twanzire, twikirirye ngoko akasubiraya kuyo. Akendituha ebyo tulaghireko oko mughulu owatolere. Kwesi ubye ukasaba ughunikirirye ngoko Yehova akendikuhulikirira. Uyiketere ngoko Yehova akendikuteya lino kandi ngoko akendisyaghutya “obwaga bwʼabosi” omo kihugho kihya-kihya ekikasa.​—Esy. 145:16.