NKHANI YOPHUNZILA N.° 2
NYIMBO N.° 19 Chakulya chanchingulo cha Ambuya
Kansi mwewo mwaikonzekela nsiku yofunika ngako pa chaka?
“Mukochita vamene ivi ponikumbukila.”—LUK. 22:19.
CHOLINGA CHANKHANI
Wonani chifukwa chake Chikumbukilo n’chochitika chapadela, vatingachite pokonzekela, komasoti mwatingayavyile ayakine kuti akapezekepo.
1. Ndaŵa yanji nsiku ya Chikumbukilo ni nsiku yofunika ngako pa chaka? (Luka 22:19, 20)
KULI atumiki a Yehova, nthawe yochita Chikumbukilo cha imfwa ya Khilisitu yunkhala nsiku yofunika ngako pachaka. Ni nsiku yamene iyi yeka yamene Yesu elamula ophunzila ŵake mosapita mmbali kuti akoikumbukila. (Ŵelengani Luka 22:19, 20.) Tili na vifukwa vinyinji votichitisha kuyembekezela mwachidwi nsiku ya Chikumbukilo. Tiyeni tikambilane viyakine mwa vifukwa vamene ivi.
2. Kansi n’vifukwa viyakine votyani vutichitisha kuyembekezela mwachidwi nsiku ya Chikumbukilo?
2 Mwambo wa Chikumbukilo utiyavya kuganizila za kufunika kwa dipo. Chochitika chamene ichi chutiyavya kuziŵa mwatingawoneshele kutembeja kwasu nsembe ya Yesu. (2 Ako. 5:14, 15) Chove chutipasa soti mwayi ‘wotang’ishana’ na abale ŵasu na alongo. (Alo. 1:12) Chaka chilichonse, anyinji amene efoka opezekapo pansiku yamene iyi. Ayakine afwika pojokela kwa Yehova chifukwa chakuti olondelewa na manja aŵili. Komasoti ŵanthu anyinji achidwi olimbikisiwa kuyamba kuyenda pa njila ya kumoyo chifukwa cha vinthu vakuwona komasoti kumvwa. Vinthu vonse vamene ivi vuchitisha Chikumbukilo kunkhala chinthu chapadela ngako kuli sewo!
3. Kansi nsiku ya Chikumbukilo yutang’isha tyani ubale wasu wapa chalo chonse? (Onanisoti chithunzi.)
3 Sewo tuiyembekezela soti mwachidwi nsiku ya Chikumbukilo chifukwa tuziŵa kuti pa nsiku yamene iyi tuchita vinthu mokatijana na abale na alongo ŵasu kuzenguluka pachalo chonse. Zuŵa ikoloŵa, Amboni za Yehova osonkhana pansiku yamene iyi kulikonse kwali kuti achite Chikumbukilo. Tonse tumvwishila nkhani yamene yufotokoza ngako za kufunika kwa dipo. Tuimba nyimbo ziŵili zotamanda Mulungu, poyendeshewa nkate na vinyu, komasoti kulaŵila mawu akuti “Ame” mofumila pansi pantima pa mapemphelo onse 4. Nkati mwa maawazi 24, mipingo yonse izakonkheje njila imo na imo yamene iyi pochita mwambo wamene uyu. Kansi mungakwanishe kuganizila mwakusangalalila Yehova na Yesu akatiwona tuŵatamanda mokatijana mwanjila yamene iyi?
Mwambo wa Chikumbukilo utang’isha ubale wasu wapa chalo chonse (Onani ndime 3.)f
4. Kansi tikambilane chinji munkhani ino?
4 Mu nkhani ino, tikambilane makonsho aŵa: Kansi tingaikonzekeleshe tyani mitima yasu ponena za nsiku ya Chikumbukilo? Kansi tingaŵayavye tyani ayakine kuti akapindule na nsiku yamene iyi? Na yakuti kansi tingayavye tyani aliyense mwa abale na alongo ŵasu amene eleka kusonkhana? Mayankho amakonsho amene aŵa atiyavye kunkhala okonzeka ponena za nsiku yamene iyi yapadela.
KANSI TINGACHITE TYANI KUTI TIZASANGALALE NA CHIKUMBUKILO?
5. (a) Ndaŵa yanji tufunika kuganizila kufunika kwa dipo? (Salimo 49:7, 8) (b) Kansi mwaphunzila chinji mu vidiyo yakuti Ndaŵa yanji Yesu echifwa?
5 Imozi mwa njila zofunika ngako zatingakonzekeleshele mitima yasu ponena za nsiku ya Chikumbukilo ni mwakuganizila za kufunika kwa nsembe ya dipo ya Yesu Khilisitu. Sewo paseka sembe tiliyekwanishe kuliwombola kuuchimo na imfwa. (Ŵelengani Salimo 49:7, 8; lolelani soti vidiyo yakuti Ndaŵa yanji Yesu echifwa?)a Tetyo, Yehova epanga makonzedwe kuti Yesu apeleke moyo wake pofuna kutipulumusha. Pamene apa, onse aŵili Yehova na Yesu ewonesha kulitana kukulu ngako. (Alo. 6:23) Tikaganizila ngako za kulitana kwechichita Yehova na Yesu chifukwa cha sewo, tizayambe kuitembeja ngako mphaso ya dipo. Mu nkhani ino, tikambilaneko tyala vinthu vitontho vechichita Yehova na Yesu popeleka dipo. Koma chinthu choyamba n’chakuti, kansi dipo yupamikijapo chinji?
6. Kansi dipo yupamikijapo chinji?
6 Dipo ni ntengo wamene ulipiliwa pofuna kuwombola chinthu chiyakine. Munthu woyambilila Adamu, enze wangwilo pechingoti walengewa. Pavuli pakuti wachimwa, yove etaya mwayi wonkhala na moyo kosasila osati wake tyala, komasoti wa ŵana ŵake onse. Pofuna kuwombola mwayi wechitaya Adamu, Yesu epeleka moyo wake wangwilo monga nsembe. Pa moyo wake wonse pano pa chalo, Yesu “aliyechite chimo, ndipo mkamwa mwake muliyefwaniwe chinyego.” (1 Pet. 2:22) Pa nthawe yechimwalila, Yesu enze na moyo wangwilo monga nimwenzele Adamu akaliye chimwa. Tetyo, mwakupeleka moyo wake Yesu elipila moyo wechitaya Adamu.—1 Ako. 15:45; 1 Tim. 2:6.
7. Kansi ayakine mwa mayeselo ŵechikumana nawo Yesu penze pano pachalo ni otyani?
7 Pa moyo wake wonse wa pano pa chalo, Yesu epitilija kumvwila Atata ŵake akululu olo kuti enzekumana na mayeselo anyinji. Penze akali ntontho, enzegonjela makolo ŵake aliye ungwilo olo kuti yove evyalika wangwilo. (Luk. 2:51) Penze mulumbwana, yove enzefunikila kukana mayeselo ofumila kuli ayake amene payakine enzefuna kuti osati akoŵamvwila makolo ŵake olo kunkhala munthu wosakhulupilika kwa Yehova. Komasoti pechikula, Yesu enzefunika kulimbana na Satana Mdyelekezi wamene enzemuyesa kuti achimwe, mpaka efwika pomuuja mosapita mmbali kuti achite vinthu mosakhulupilika kwa Mulungu. (Mat. 4:1-11) Satana enzewosimikija ntima kumuchimwisha Yesu na cholinga chakuti akangiwe kulipila dipo.
8. Kansi ni mayeselo ayakine otyani ŵechipilila Yesu?
8 Pautumiki wake wapano pa chalo, Yesu epilila mayeselo ayakine anyinji. Adani ŵake emutamanisha komasoti enzeyeja-yeja kuti amupaye. (Luk. 4:28, 29; 13:31) Yove enzefunikila kupilila vophoniya va ophunzila ŵake. (Mko. 9:33, 34) Pa nthawe yenzekumana na mavuto pa moyo wake, ŵanthu emunzunza komasoti kumunyoza. Pavuli pake, yove echifwa imfwa yoŵaŵa ngako, komasoti yochitisha nsoni. (Ahe. 12:1-3) Yove enzefunikila kupilila mbali yosilijila ya mavuto ŵake payeka, mosadalila chitetezo cha Yehova.b—Mat. 27:46.
9. Kansi tukumvwa tyani tikaganizila za nsembe ya Yesu? (1 Petulo 1:8)
9 N’vowonekelatu kuti Yesu etamana ngako kuti apeleke dipo. Tikaganizila vinthu vonse vechilolela Yesu kulitana chifukwa cha sewo, chikondi chasu kuli yove chukula ngako.—Ŵelengani 1 Petulo 1:8.
10. Kansi Yehova elitana chinji kuti dipo ipelekewe?
10 Lomba tyani ponena za Yehova? Ndaŵa yanji yove elola kulitana mwa njila yamene iyi pofuna kuti Yesu apeleke dipo? Yehova na Yesu enze paushamwali wotang’a ngako molingana na mwavingankhalile pakati pa tata na mwana wake. (Miy. 8:30) Lomba ganizilani tyala mwevimukhuzila Yehova penzewona Yesu olimbana na mayeselo anyinji penze pano pachalo. Mosakaikila, Yehova vemuŵaŵa ngako penzewona Mwana wake ochitiliwa vinthu viipa, kukaniwa, komasoti kumuwona otamana.
11. Katishilani ntchito chisanzo powonesha mwechimvwila Yehova Yesu penze paiwa.
11 Kolo iliyonse yamene iluzapo kale mwana mu imfwa, yuziŵa luweme ngako kukula kwa chisoni chakunkhala nacho munthu akafwiliwa. Sewo tukhulupilila ngako nkhani yakuti akufwa azauke, koma vamene ivi vusilijilatulini ululu wakunkhala nawo munthu chifukwa cha imfwa ya munthu wakukonda. Chisanzo chamene ichi, chutiyavya kumvwisha mwechimvwila Yehova penzewona mwana wake otamana komasoti kufwa mu 33 C.E.c—Mat. 3:17.
12. Kansi tingachite chinji mu nyengo ya Chikumbukilo?
12 Ikaliyefwika nsiku ya Chikumbukilo, tyani kuphunzilako vinyinji vokhuza dipo paphunzilo yanu yapamweka olo pa Kulambila kwa pabanja? Katishilani ntchito Buku ya Mboni za Yehova yofufuzila nkhani (keno yupezeka m’chilaŵilo chanu) olo mabuku ayakine oyavya pophunzila Baibolo kuti muziŵe vinyinji va nkhani yamene iyi.d Komasoti wonesheshani kuti mwakonkheja mndandanda ya kuŵelenga Baibolo pa nyengo ya Chikumbukilo, yamene yupezeka m’Kabuku ka misonkhano—komasoti moyo wasu wachikhilisitu. Ndipo pa nsiku ya Chikumbikilo osaluŵa kulolela pulogilamu ya Kulambila kwa mmawa pa nsiku ya Chikumbukilo. Tikakonzekelesha mitima yasu ponena za nsiku ya Chikumbukilo, tizankhale okonzeka kuyavyako ayakine kuti nawo azapindule na Chikumbukilo.—Ezara 7:10.
KUYAVYA AYAKINE KUTI APINDULE
13. Kansi n’chinthu choyamba chotyani chatufunika kuchita poyavya ŵanthu kuti azapindule pa nsiku ya Chikumbukilo?
13 Kansi tingaŵayavye tyani ŵanthu ayakine kuti azapindule na Chikumbukilo? Chinthu choyamba, ni kuŵaitila ku Chikumbukilo. Kuyangijila pa ŵanthu ŵatukumana nawo nthawe na nthawe muutumiki, tingalembe soti mndandanda wa mazina a ŵanthu ŵatuziŵa kuti tizaŵaitile. Ŵanthu amene awo angapamikejepo achibale ŵasu, ayasu akuntchito, akusikulu, komasoti ayakine. Olo kuti tiliye tumapepa twapamanja tokwanila toitila ŵanthu, tingaŵatumijile linki pa chipangizo chamakono. Ni ŵani angaziŵiletu za kupaka kwa ŵanthu amene angawele ku Chikumbukilo!—Mlal. 11:6.
14. Pelekani chisanzo chuwonesha ubwino woitila ŵanthu ku Chikumbukilo.
14 Mukoyaŵila tumapepa toitila ŵanthu kulikonse kwamwaluta. Nsiku iyakine, mulongo wamene onkhala m’banja ya ŵanthu osiyana vipembezo, edabwa mwanalume wake penzemuuja momekela kuti ofuna kuyapezeka naye pamozi ku Chikumbukilo. Ndaŵa yanji yove enzewodabwa? Chifukwa chakuti nthawe zinyinji kuvuli, mulongo wamene uyo enzemulimbikisa mwanalume wake kuti akapezekepo koma yove enzekwanishalini. Kansi n’chinji chechitika pa nthawe yamene iyi? Mwanalume wala enena kuti “Nalondela kapepa koitila ŵanthu ku Chikumbukilo,” pofotokoza vechimuchitila nkulu muyakine wamene enzenkhala mudela yamene iyo. Mwanalume wa mulongo wamene uyo epezeka pa Chikumbukilo chaka chamene icho komasoti vyaka vinyinji vokonkhapo.
15. Kansi tufuna kuti tikokumbukila chinji pa nthawe yoitila ŵanthu ku Chikumbukilo?
15 Tikokumbukila kuti ŵanthu ŵatuitila angankhale na makonsho—maka-maka keno ove akaliyefwikapo pa misonkhano yasu. Tetyo, tingachite luweme kuganizila za makonsho ŵangakonshe nokonzekela mwatingezeŵayankhila. (Akol. 4:6) Mwachisanzo, ayakine angakonshe kuti: ‘Kansi pa chochitika chamene ichi pazachitike votyani?’ ‘Kansi chizatole nthawe itali tyani?’ ‘Kansi pali malamulo akavwalidwe?’ ‘Kansi ŵanthu azalipile ndalama?’ ‘Kansi ŵanthu azachite chopeleka?’ Patuitila munthu ku Chikumbukilo tingachite luweme kumukonsha konsho yachidule kuti, “Kansi muli na konsho iliyonse?” pavuli pake yankhani konsho iliyonse yangankhale nayo munthu wamene uyo. Tingakatishilesoti ntchito vidiyo yakuti Kumbukilani imfwa ya Yesu na yakuti N’chinji chuchitika ku Ng’anda ya Ufumu?, kuti tiyavye munthu wamene uyo kumvwisha mwayuchitikila misonkhano yasu. Komasoti mutu 28 wa Sangalalani na moyo kosasila!, uli na mfundo ziweme zamungafotokoze.
16. Kansi ni makonsho ayakine otyani ŵangankhale nawo ŵanthu opezeka pa Chikumbukilo?
16 Pavuli pa Chikumbukilo, ŵanthu achidwi amene n’kuyamba angankhalesoti na makonsho ayakine. Ove payakine angadabwe kuti ndaŵa yanji ŵanthu oŵelengeka tyala (keno alipo) niye alya vizindikilo. Payakine angakonshe kuti tuchita kangani Chikumbukilo pa chaka. Komasoti angafune kuziŵa keno misonkhano yonse ya Mboni za Yehova yuchitika monga nimwachuchitikila Chikumbukilo. Olo kuti zinyinji mwa mfundo zamene izi zufotokozewa mu nkhani ya Chikumbukilo, ŵanthu amene n’kuyamba kupezekapo angafune kumvwa vinyinji. Nkhani yapa jw.org ya mutu wakuti, “N’chifukwa Chiyani a Mboni za Yehova Mumachita Mwambo wa Mgonero wa Ambuye Mosiyana ndi Zipembedzo Zina?”, ingatiyavye kuyankha ayakine mwa makonsho ŵawo. Sewo tufuna kuchita chilichonse chatingakwanishe—Chikumbukilo chikaliyechitika, chili nkati, komasoti pavuli pake—kuti tiyavye ŵala “antima uweme” kuti apindule na chochitika chamene ichi.—Mach. 13:48.
KUYAVYA ŴANTHU ANTIMA UWEME
17. Kansi akulu angayavye tyani ŵanthu amene efoka? (Ezekieli 34:12, 16)
17 Kansi akulu angachite tyani kuti ayavye ŵanthu amene efoka mu nyengo ya Chikumbukilo? Mukochita vinthu vuwonesha kuti muŵaganizila. (Ŵelengani Ezekieli 34:12, 16.) Chikumbukilo chikaliyechitika, wonesheshani kuti mwaitila ŵanthu anyinji amene efoka mwamungakwanishile. Asimikijileni kuti muŵakonda komasoti kuti nimwe okonzeka kuŵayayva mwanjila iyakine iliyonse yamungakwanishe. Aitileni kuti akapezekepo pa Chikumbukilo. Akezepezekapo muzaŵalondele na manja aŵili. Pavuli pa Chikumbukilo, pitilijani kukatijana nawo abale na alongo okondewa amene aŵa, komasoti kuŵapasa thandizo yauzimu iliyonse yangafunikile kuti ajokele kwa Yehova.—1 Pet. 2:25.
18. Kansi tonse tingaŵayavye tyani ŵanthu amene efoka? (Aloma 12:10)
18 Onse mumpingo angakwanishe kuyavya ŵanthu amene efoka akafwika pa Chikumbukilo. Mwanjila yotyani? Mwakuchita nawo vinthu mwachikondi, mowama ntima, komasoti mwaulemu. (Ŵelengani Aloma 12:10.) Kumbukilani kuti payakine venzelini vipepu kuti okondewa ŵasu amene aŵa akwanishe kufwika pa misonkhano. Payakine enzeyopa kuti angalondelewe lini luweme.e Chifukwa cha vamene ivi, mukopewa kuŵakonsha makonsho amene angaŵachitishe nsoni olo kulaŵila vinthu vamene vingaŵakhumudwise. (1 Ates. 5:11) Abale na alongo amene aŵa ni olambila ayasu. Sewo tusangalala tikayambasoti kulambila nawo pamozi!—Sal. 119:176; Mach. 20:35.
19. Kansi kukumbukila imfwa ya Yesu kuleta madaliso otyani?
19 Kansi tingafunike kudabwa kuti Yesu elinganija kuti tikochita Chikumbukilo cha imfwa yake chaka chilichonse? Tikapezekapo pa chochitika chamene ichi, tulimpindulisha seka, komasoti tupindulisha ayakine munjila zinyinji. (Yes. 48:17, 18) Tukulisha chikondi chasu kwa Yehova na Yesu. Tuwonesha kuti tutembeja ngako vinthu vetichitila. Tutang’isha ushamwali wasu na abale komasoti alongo ŵasu. Komasoti tingayavye ayakine kuziŵa mwangasangalalile ngako na madaliso ŵayupeleka dipo. Tetyo, tiyeni tichite vonse vatingakwanishe pokonzekela Chikumbukilo cha chino chaka—nsiku yofunika ngako pa chaka!
KANSI . . .
tingakonzekeleshe tyani mitima yasu ponena za Chikumbukilo?
tingayavye tyani ayakine kuti akapindule na chochitika chamene ichi?
tingaŵayavye tyani ŵanthu amene efoka?
NYIMBO N.° 18 Tutembeja chifukwa cha dipo
a Kuti mufwane nkhani na mavidiyo atomolewa munkhani ino, lutani pa jw.org nolemba mutu wake mukabokosi kofufuzila.
b Onani nkhani yakuti “Makonsho ofumila kuli oŵelenga” mu Nsanja ya Mulonda ya Epulayelo 2021.
c Onani buku yakuti Yandikirani kwa Yehova, mutu 23, ndim. 8-9.
d Onani bokosi yakuti “Nkhani zamungafufuze.”
e Onani chithunzi na bokosi yakuti “Kansi mpingo wechita chinji?” M’bale wamene efoka oloŵa m’Ng’anda ya Ufumu olo kuti akumvwa nsoni. Yove olondelewa na manja aŵili komasoti osangalala kunkhala pamozi na abale na alongo.
f MAWU OFOTOKOZA CHITHUNZI: Ŵanthu a Yehova pakuchita Chikumbukilo ku kumbali iyakine ya chalo, abale na alongo ŵawo ku mbali ziyakine za chalo, nawo okonzekela chochitika chamene ichi chapadela.