Kansi mwakonzeka kupeleka moyo wanu kwa Yehova?

1-2. Kansi munthu ofunikila kuchita chinji akaliyebatizika?

PA VYAKA 5 vapita, ŵanthu okwanila wani miliyoni abatizika nonkhala Mboni za Yehova. Anyinji mwa ŵanthu amene aŵa ali monga ni wophunzila Timoteyo wamene ephunzila chonadi “kufumila ali ntontho.” (2 Tim. 3:14, 15) Ayakine mwa ove ephunzila chonadi akula kale, ndipo ayakine ephunzila ali achikulile. Mwanakazi muyakine wamene enzephunzila Baibolo na Amboni za Yehova ebatizika ali na vyaka 97!

² Keno mwewo nimwe wophunzila Baibolo kapena makolo ŵanu ni Amboni, kansi muganizila zobatizika? Kubatizika n’chinthu chiweme ngako! Koma mukaliyebatizika, mwewo mufunika kupeleka moyo wanu kwa Yehova poyamba. Nkhani ino, ifotokoze tanthauzo ya kulipeleka. Komasoti tikambilane chifukwa chake mwewo mufunikalini kuchita wowa kupeleka moyo wanu kwa Yehova nobatizika, malingana keno nimwe okonzeka kuchita vamene ivo.

KANSI KULIPELEKA N’KUCHITA TYANI?

3. Pelekani chisanzo cha ŵanthu amene enze olipeleka kwa Yehova.

³ M’Baibolo, kulipeleka kutanthauza kusankhiwa kuti ukotumikila Yehova mwanjila yapadela. Aisiraeli enze ntundu wolipeleka kwa Yehova, koma ayakine muntundu wawo enze olipeleka mwanjila yapadela. Mwachisanzo, Aroni enzevwala “chizindikilo chopatulika cha kulipeleka”—kamene kenze kamsimbi koyetimila ka golide kamene kenzenkhala kusogolo kwa duku yake. Kamsimbi kagolide kamene ako kenzechizindikilo chakuti yove ni wosankhiwa kuti akotumikila Yehova mwanjila yapadela—monga Nkulu wa ansembe wa Aisiraeli. (Lev. 8:9) Nawosoti Anaziri enze ŵanthu olipeleka kwa Yehova mwanjila iyakine yapadela. Mawu akuti “Mnazili,” ni ofumila ku mawu Achiheberi akuti nazirʹ, amene otanthauza “Wopatulika,” olo “Wolipeleka.” Anazili enzefunika kukonkheja malamulo a m’Chilamulo cha Mose amene enzeŵalesha kuchita vinthu viyakine.—Num. 6:2-8.

4. (a) Kansi kulipeleka kwa Yehova kupamikijapo kuchita chinji? (b) Kansi ‘kulikana’ kutanthauza chinji? (Onanisoti chithunzi.)

⁴ Munthu akapeleka moyo wake kwa Yehova onkhala wophunzila wa Yesu, ndipo kufumila pa nthawe yamene iyo kuluta kusogolo, chinthu chofunika ngako pamoyo wake chunkhala kuchita chifunilo cha Mulungu. Koma kansi kulipeleka kwa Mulungu kupamikijapo kuchita chinji? Yesu enena kuti: “Keno munthu ofuna kunikonkha alikane yeka.” (Mat. 16:24) Mawu Achigiriki ŵechimasulila kuti “alikane yeka” otanthauza soti kuti “kusalifuna.” Mukalipeleka kwa Yehova, mufunika kupewa ntima wofuna kuchita kanthu kalikonse kamene Mulungu angakondwelelini nako. (2 Ako. 5:14, 15) Vamene ivi vupamijapo kupewa ntima wofuna kuchita “ntchito zamuŵili,” monga chiwele-wele. (Agal. 5:19-21; 1 Ako. 6:18) Kansi kumvwila malamulo ŵakupeleka Mulungu kuzachitishe kuti vinthu vileke kukuyendelani luweme? Keno mwewo mukonda Yehova ndipo mukhulupilila kuti malamulo ŵake ni aweme kuli mwewo, yankho niyakuti yayi. (Sal. 119:97; Yes. 48:17, 18) M’bale muyakine zina yake Nicholas enena kuti, “Nthawe ziyakine munthu ungawone malamulo a Yehova monga ni mpanda wamsimbi kudjeli wamene ukangisha munthu kuchita vakufuna, payakine kuŵawona monga ni mpanda wamsimbi wamene uteteza munthu kuti osati alyewe na mphondolo.”

5. (a) Kansi munthu olipeleka tyani kwa Yehova? (b) Kansi pali kusiyana kotyani pakati pa kulipeleka na kubatizika? (Onanisoti chithunzi.)

⁵ Kansi n’chinji chakuchita munthu polipeleka kwa Yehova? Omulonjeza m’pemphelo kuti akolambila yove yeka komasoti akoika vakufuna yove pamalo oyamba pamoyo wake. N’chendi, mwewo mumulonjeza Yehova kuti muzapitilije kumukonda “na ntima wanu wonse, moyo wanu wonse, maganizo ŵanu onse, na mphamvu zanu zonse.” (Mko. 12:30) Kulipeleka kuchitika mwachisinsi pakati pa mwewo na Yehova. Koma mosiyana na vamene ivi, ubatizo uchitikila patuŵa; ŵanthu ayakine oziŵa kuti mwalipeleka kwa Yehova mukabatizika. Lumbilo yamuchita polipeleka kwa Mulungu ni yapadela ngako, chifukwa cha vamene ivi mwewo muzafunike kuchita vonse vamungakwanishe pokwanilisha lumbilo yanu, ndipo vamene ivi niye vakuyembekezela Yehova kuli atumiki ŵake onse.—Mlal. 5:4, 5.

NDAŴA YANJI MUFUNIKA KULIPELEKA KWA MULUNGU?

6. Kansi n’chinji chuchitisha munthu kupeleka moyo wake kwa Yehova?

⁶ Chifukwa chikulu chuchitisha munthu kuti alipeleke kwa Yehova, ni chikondi. Chikondi chamene icho ni maganizo lini osankhalisha, koma ni maganizo ozikiwa pa ‘kumuziŵa luweme Mulungu’ komasoti pa “kumvwishisha vinthu vauzimu,”—mwanjila iyakine tinganene soti kuti munthu oyamba kumukonda ngako Yehova chifukwa chomuziŵa luweme yove komasoti cholinga chake. (Akol. 1:9) Kuphunzila Baibolo kwakuyavyani kukhulupilila kuti (1) Yehova ni munthu ngaye-ngaye, (2) Baibolo iujiliwa na Mulungu, komasoti (3) Mulungu okatishila ntchito gulu yake pochita vakufuna.

7. Kansi munthu ofunikila kuchita chinji akaliye walipeleka kwa Mulungu?

⁷ Ŵanthu amene olipeleka kwa Yehova ofunika kulipeleka chifukwa chakuti oziŵa luweme mfundo zoyambilila zamene zili m’Mawu a Mulungu nozikonkheja pa moyo wawo. Ŵanthu otetyo, oyeja-yeja mwakhama kuujako ayakine vakuphunzila m’Baibolo. (Mat. 28:19, 20) Komasoti omukonda ngako Yehova ndipo ofuna kulambila Mulungu yeka na ntima wawo wonse. Kansi niye mwamumvwila namwe? Keno chikondi chanu kwa Yehova chakula kufwika pamene apo, muzabatizike chifukwa chokonda Mulungu, osati pofuna tyala kukondwelesha makolo olo munthu wamene okuphunzisani Baibolo; komasoti muzabatizikelini pofuna tyala kukonkheja azishamwali wanu.

8. Kansi ntima wotembeja ungakuyavyeni tyani kuti mulipeleke kwa Yehova? (Salimo 116:12-14)

⁸ Kuganizila vinthu vonse vawakuchitilani Yehova, kungakulimbikiseni kupeleka moyo wanu kwa Yehova pofuna kumutembeja. (Ŵelengani Salimo 116:12-14.) Baibolo yunena kuti Yehova niye wamene otipasa “mphaso iliyonse iweme komasoti yangwilo.” (Yako. 1:17) Mphaso ikulu pa zonse ni nsembe ya Mwana wake Yesu. Ganizilani ivi! Dipo yukupasani mwayi wonkhala paushamwali wotang’a na Yehova. Kuyangijila pamene apo, Yehova wakupasani mwayi wakuzankhala na moyo kosasila. (1 Yoh. 4:9, 10, 19) Kupeleka moyo wanu kwa Yehova n’chimozi mwa vinthu vikulu ngako vamungachite powonesha kuti mutembeja mphaso ya dipo komasoti madaliso onse awakupasani Mulungu. (Deut. 16:17; 2 Ako. 5:15) Niye vatuphunzila pa mutu 46, mfundo 4, m’buku ya Sangalalani na moyo kosasila!, mwamene mulisoti vidiyo ya 3 minesi yakuti Kutwala mphaso kwa Yehova.

KANSI NIMWE OKONZEKA KULIPELEKA KWA MULUNGU NOBATIZIKA?

9. Ndaŵa yanji munthu ofunikalini kuchita kukakamijiwa kuti alipeleke kwa Yehova?

⁹ Payakine muliwona kuti mukaliyekonzekela kuti mulipeleke kwa Yehova nobatizika. Payakine pali vinthu vamufunika kuchinja pamoyo wanu kuti mukokonkheja mfundo za Yehova, payakinesoti mufunikila nthawe ikulu kuti mutang’ishe chikhulupililo chanu. (Akol. 2:6, 7) Ziŵani kuti ophunzila opita pasogolo mosiyana-siyana, ndipo nawo achilumbwana ni onselini amene obatizika ali na misinkhu yolingana. Chofunika ni kuwona vinthu vamungachinje pamoyo wanu nochita vonse vamungakwanishe paliye kulilinganija na ayanu.—Agal. 6:4, 5.

10. Kansi muwamila kuchita tyani keno muwona kuti nimwe osakonzekela kupeleka moyo wanu kwa Yehova nobatizika? (Onanisoti bokosi yakuti “Kuli amene olelewa m’chonadi.”)

¹⁰ Olo kuti palipano mukaliyekonzekela kuti mulipeleke kwa Yehova, osaleka kunkhala na maganizo ofuna kukwanilisha cholinga chamene ichi. Musengeni Yehova kuti akuyavyeni kuchinja vinthu vamufunikila kuchinja pamoyo wanu. (Afil. 2:13; 3:16) Mukokhulupilila kuti Yehova azamvwe pemphelo yanu ndipo azachitepo kanthu.—1 Yoh. 5:14.

VUKANGISHA ŴANTHU AYAKINE KUTI ALIPELEKE

11. Kansi Yehova azatiyavye tyani kuti tipitilije kunkhala okhulupilika kuli yove?

¹¹ Ŵanthu ayakine amene ni okonzeka kuti alipeleke kwa Mulungu nobatizika ali na vuto yolikaikila. Payakine ove alikonsha kuti, ‘Nizachite tyani keno pavuli pobatizika nachita chimo ikulu ndipo nachosewa mumpingo?’ Keno namwe vamene ivi niye vamuyopa, ziŵani kuti Yehova azakupaseni vonse vamufunikila “na cholinga chakuti munkhale na nkhalidwe yokatijana na vakufuna Yehova.” (Akol. 1:10) Yove azakupaseni soti mphamvu zamufunikila kuti mukochita vinthu viweme. Yehova wayavyapo kale ŵanthu anyinji kuti akomumvwila. (1 Ako. 10:13) N’chifukwa chake pali ŵanthu tyala atontho amene ochosewa mumpingo. Yehova otipasa vonse vatufunikila kuti tipitilije kunkhala okhulupilika kuli yove.

12. Kansi n’chinji chamungachite kuti mupewe kuchita chimo ikulu?

¹² Monga ŵanthu ochimwa, tonse tuyesewa kuti tichite vinthu viipa. (Yako. 1:14) Koma olo n’tetyo, mwewo muli na ufulu wosankha vamungachite mukayesewa. Kulaŵila chendi, ufulu wosankha vamungachite pamoyo wanu ni wanu. Ayakine onena kuti n’vosakwanishika kulamulila maganizo na vochita vasu, koma wamene uyu ni wenye. Mwewo mungakwanishe kulamulila chilako-lako chanu chiipa. N’chifukwa chake mukezekumana na chiyeso muzakwanishe kukana. Pali vinthu viyakine vamene vingakuyavyeni kuti mukwanishe kuchita vamene ivi. Mwachisanzo, mukopemphela kwa Yehova nsiku iliyonse, nkhalani na mndandanda iweme yophunzila Mawu a Mulungu pamweka, mukopezeka pamisonkhano yonse. Mukokatishila ntchito mpata uliwonse poujako ayakine vamukhulupilila. Mukaŵa na chiyoloŵezi chochita vinthu vamene ivi monkhazikika, muzafwane mphamvu zokuyavyani kupitilija kunkhala okhulupilika kwa Yehova. Komasoti mukokumbukila kuti Yehova akokuyavyani kuti mukwanishe kuchita vamene ivi.—Agal. 5:16.

13. Kansi n’chisanzo chiweme chotyani chechitisiila Yosefe?

¹³ Muzavutikelini kupitilija kunkhala okhulupilika kwa Yehova keno mungasankhiletu kukali nthawe vamukuti muzachite mukezekumana na chiyeso. Baibolo, yufotokoza za ŵanthu anyinji amene ekwanisha kupilila mayeselo, ndipo molingana na sewo, nawo enze ŵanthu aliye ungwilo. Mwachisanzo, mwanakazi wa Potifara penzenyengelela Yosefe moweleja-weleja, yove enzeziŵilatu vakuti azachite. Baibolo yunena kuti “Yosefe enzekana,” ndipo enena kuti: “Ningachitilenji chiipa chikulu teti nochimwila Mulungu?” (Gen. 39:8-10) N’vowonekelatu kuti Yosefe enze esankhilatu kukali nthawe vangachite mwanakazi wa Potifara akaliye wayamba kumunyengelela kuti ayone naye, n’chifukwa chake yove ekwanisha kukana.

14. Kansi n’chinji chatingachite kuti tikane mayeselo?

¹⁴ Kansi tingachite tyani kuti tinkhale otang’a monga ni Yosefe? Ganizilani lomba teti vamungachite mukezekumana na mayeselo. Mukokana mokulumija kuchita vinthu vasakondwela navo Yehova, ndipo osapitilija kuviganizila. (Masal. 97:10; 119:165) Mukachita tetyo, muzakwanishe kupilila mayeselo—muzachite vinthu vemwisankhilatu kukali nthawe.

15. Kansi munthu angawoneshe tyani kuti ‘osakila-sakila Yehova na ntima wonse’? (Aheberi 11:6)

¹⁵ Payakine mwewo mukhulupilila kuti mwafwana chonadi ndipo mufuna kutumikila Yehova na ntima wanu wonse. Koma mungoganiza kuti nimwe osakonzekela kupeleka moyo wanu kwa Yehova nobatizika. Keno n’tetyo, mungakonkheje chisanzo cha Mfumu Davide. Yove epapatila Yehova ponena kuti: “Nifufuzeni mwewo Mulungu, ndipo muziŵe ntima wangu. Nifufuzeni ndipo muziŵe maganizo ŵangu amene onidesa nkhaŵa. Muwone keno nkati mwangu muli chilichonse chiipa, ndipo munisogolele m’njila yosasila.” (Sal. 139:23, 24) Yehova odalisa ŵanthu amene “omusakila-sakila na ntima wonse.” Khama yamuchita kuti mulipeleke kwa Mulungu nobatizika yuwonesha kuti musakila-sakila Mulungu na ntima wanu wonse.—Ŵelengani Aheberi 11:6.

PITILIJANI KUVWENDELA KWA YEHOVA

16-17. Kansi amene ekulila m’chonadi angachite tyani kuti avwendele kwa Yehova? (Yohani 6:44)

¹⁶ Yesu enena kuti Yehova niye odonsa ŵanthu kuti ankhale ophunzila ŵake. (Ŵelengani Yohani 6:44.) Vamene ivi n’vodabwisa ngako komasoti vukhuza moyo wanu. Yehova owona viweme muli munthu aliyense wakudonsela m’chonadi. Yove owona aliyense mwa ŵanthu amene aŵa monga “chuma chake chapadela.” (Deut. 7:6) Niye mwamulili namwe m’menso mwa Yehova.

¹⁷ Payakine mwewo nimwe wachilumbwana ndipo mulelewa na makolo Amboni. Payakinesoti muwona kuti mutumikila Yehova chifukwa cha makolo ŵanu, osati chifukwa chakuti Yehova ekudonsani mwewo. Koma Baibolo yunena kuti: “Vwendelani kuli Mulungu, ndipo yove naye azakuvwendeleleni.” (Yako. 4:8; 1 Mbiri 28:9) Mwewo mukachitapo kanthu kuti muvwendele kwa Yehova, naye Mulungu ochitapo kanthu povwendela kuli mwewo. Yehova okuŵelengelani mwewo monga munthu pamweka osati tyala mukankhala pagulu. Yehova ovwendela kuli munthu aliyense payeka-payeka—kupamikijapo kuli amene ekulila m’banja ya Mboni. Munthu akachitapo kanthu kuti avwendele kwa Yehova, yove ochita mokatijana na vilembewa pa Yakobo 4:8.—Yelekezelani na 2 Atesalonika 2:13.

18. Kansi tizakambilane chinji munkhani ikuza? (Salimo 40:8)

¹⁸ Mukapeleka moyo wanu kwa Yehova nobatizika, mukonkheja chisanzo cha Yesu. Molifunila yeka, Yesu enzewokonzeka kuchita chilichonse changamusenge Atata ŵake. (Ŵelengani Salimo 40:8; Ahe. 10:7) Mu nkhani yokonkhapo, tizakambilane vingakuyavyeni kupitilija kutumikila Yehova mokhulupilika pavuli pakuti mwabatizika.