‘Pitilijani kukonkhelela’ Yesu pavuli pakuti mwabatizika

1-2. Kansi ni madaliso otyani ŵakufwana munthu pavuli pakuti wabatizika?

N’CHINTHU chokondwelesha ngako kubatizika nonkhala m’banja ya Yehova. Wofalisa wobatizika komasoti wamene ali pa ushamwali wotang’a na Yehova angakatijane na vechilemba Davide kuti: “Wosangalala ni munthu wamene mwamuleta pafupi na mwewo [Yehova] kuti ankhale m’mabwalo ŵanu.”—Sal. 65:4.

² Yehova ochita vinthu mosamala posankha ŵanthu amene angankhale m’banja mwake. Molingana na mwatawonela mu nkhani yapita, Mulungu odonsa tyala ŵanthu amene ofuna kunkhala naye paushamwali wotang’a. (Yako. 4:8) Mukalipeleka kwa Yehova nobatizika, munkhala pa ushamwali wapadela ngako na yove. Ndipo mukokhulupilila kuti pavuli pakuti mwabatizika, Yehova ‘azakukhutulileni madaliso ndipo muzasoŵelini kalikonse.’—Mal. 3:10; Yer. 17:7, 8.

3. Kansi ni udindo wotyani ukulu wakunkhala nawo munthu akalipeleka kwa Mulungu nobatizika? (Mlaliki 5:4, 5)

³ Koma n’vowonekelatu kuti ubatizo n’chiyambi tyala. Mwewo muzafunike kuchita vonse vamungakwanishe kuti mupitilije kunkhala okhulupilika kwa Yehova pa nthawe yamukumana na mavuto olo mayeselo oyesa chikhulupililo chanu. (Ŵelengani Mlaliki 5:4, 5.) Monga wophunzila wa Yesu, muzafunike kuchita khama kuti mukokonkheja chisanzo chake komasoti vinthu vonse vechiphunzisa. (Mat. 28:19, 20; 1 Pet. 2:21) Nkhani ino, ikuyavyeni kuziŵa mwamungachitile vamene ivi.

‘PITILIJANI KUKONKHELELA’ YESU PAMUKUMANA NA MAVUTO KOMASOTI MAYESELO

4. Kansi ophunzila a Yesu ofunika kunyamula “chimuti chotamanilapo” mwanjila yotyani? (Luka 9:23)

⁴ Osati mukoganiza kuti pavuli pakuti mwabatizika niye kuti muzakumane linisoti na mavuto aliwonse pa moyo wanu. Kulaŵila chendi, Yesu efotokoza momvwika luweme kuli ophunzila ŵake kuti ofunika kunyamula “chimuti chotamanilapo.” Ndipo ove enzefunika kuchita vamene ivo “nsiku na nsiku.” (Ŵelengani Luka 9:23.) Kansi pamene apa Yesu enzefuna kutanthauza kuti ophunzila ŵake akonkhalila kutamana? Yayi, niyelini venzetanthauza. Koma mmalo mwake, yove enzetanthauza kuti ophunzila ŵake azafwane madaliso komasoti mavuto. Ndipo ayakine mwa mavuto amene awo ni ovuta kuŵapilila.—2 Tim. 3:12.

5. Kansi ni madaliso otyani ŵechilonjeza Yesu kuli ŵanthu amene olola kusiya vinthu viyakine chifukwa cha Mulungu?

⁵ Payakine mweshushiwapo kale na munthu wa m’banja mwanu, olo mwesiya vinthu viyakine vofunika vakuthupi kuti mukoika Ufumu pamalo oyamba. (Mat. 6:33) Pa nkhani yamene iyi, mukokhulupilila kuti Yehova oziŵa vonse vamuchita chifukwa cha yove. (Ahe. 6:10) Tukaikilalini kuti mwewo muwona kuti mawu okonkhapo ŵechilaŵila Yesu ni achendi, yove enena kuti: “Shuwa nukuujani mwewo analume, paliye esiya ng’anda, enekwake, azilongosi, amama, atata, ŵana, olo minda chifukwa cha newo na chifukwa cha uthenga uweme, wamene pali pano azafwanelini vinyinji kuwelejela maulwendo 100 nthawe ino. Yove azafwane ng’anda, enekwake, azilongosi, amama, atata, ŵana, na minda pamo na matamano, komasoti nthawe ikuza azafwane moyo wosasila.” (Mko. 10:29, 30) N’vosakaikisha kuti madaliso amwafwana ni anyinji ngako kupambana vinthu vemwisiya pa moyo wanu.—Sal. 37:4.

6. Ndaŵa yanji mufunika kupitilija kulimbana na “vilako-lako va muŵili” pavuli pakuti mwabatizika?

⁶ Pavuli pakuti mwabatizika, mwewo muzafunike kupitilija kulimbana na “chilako-lako chamuŵili.” (1 Yoh. 2:16) Molingana na mwamuziŵila kale, mwewo nimwe mbadwa ya Adamu ndipo muliye ungwilo. Komasoti nthawe ziyakine, mungolimvwa monga ni mwechimvwila ntumwi Paulo. Yove enena kuti: “Muntima mwangu nusangalala ngako na malamulo a Mulungu, koma nuwona lamulo iyakine m’muŵili mwangu yuniyatana na malamulo am’maganizo mwangu nonipanga kunkhala kapolo wa lamulo yauchimo yamene ili m’muŵili mwangu.” (Alo. 7:22, 23) Chifukwa chakuti muliye ungwilo, nthawe ziyakine mungakhumudwe. Koma mwewo mungafwane mphamvu zokuyavyani kupilila mayeselo aliwonse keno mukokumbukila za lonjezo yemwilonjeza Yehova pa nthawe yemwelipeleka kuli yove. Chifukwa cha lumbilo yemwichita kwa Yehova, muzakwanishe kupilila mayeselo mosavuta. Ndaŵa yanji tunena tetyo?

7. Kansi kulipeleka kwanu kwa Yehova kuzakuyavyeni tyani kupitilija kunkhala okhulupilika kuli yove?

⁷ Pa nthawe yemwipeleka moyo wanu kwa Yehova, mwewo mwelikana mweka. Kulipeleka kutanthauza kupewa ntima wofuna kuchita chilichonse chamene Yehova angakondwele lini nacho. (Mat. 16:24) Chifukwa cha vamene ivi, mukezekumana na chiyeso mwewo muzafunike lini kuwononga nthawe poganizila vamungachite, chifukwa muziŵa kale vamufunikila kuchita. Chifukwa chakuti mwasankhilatu vamungachite, muzafunike tyala—kupitilija kunkhala okhulupilika kwa Yehova. Muzapitilije kunkhala osimikija ntima kuchita vakukondwela navo Yehova nokonkheja chisanzo cha Yobu. Olo pa nthawe yenzekumana na vinthu vovuta ngako, yove enena kuti: “Mpaka nizamwalile, newo nizalekelini kunkhala wokhulupilika!”—Yobu 27:5.

8. Kansi kuganizila vemwilaŵila m’pemphelo pemwenzelipeleka kwa Yehova kungakuyavyeni tyani kupilila mayeselo?

⁸ Kuganizila vemwilaŵila m’pemphelo pemwenzelipeleka kwa Yehova, kungakuyavyeni kupilila mayeselo aliwonse. Machisanzo, kansi mwewo mungakumbwile kuyona na munthu wamene ali kale pabanja? N’vosakaikisha kuti mungachite lini tetyo! Mwelonjeza kwa Yehova m’pemphelo kuti muzachitelini vinthu monga ni vamene ivi. Keno mwewo mulolalini kuti muntima mwanu muloŵe maganizo aipa, muzafunikelini kukata ntchito yovuta ngako pochosa maganizo aipa m’maganizo mwanu pavuli pake. Mukachita tetyo, “muzayende lini munjila ya ŵanthu aipa.”—Miy. 4:14, 15.

9. Kansi kuganizila vinthu vemwilaŵila m’pemphelo pemwenzelipeleka kwa Yehova kungakuyavyeni soti tyani kuika vinthu vauzimu pa malo oyamba pa moyo wanu?

⁹ Tiyelekezele kuti mwafwana ntchito koma yamene ingokukangishani kupezeka pa misonkhano, kansi mungachite tyani? N’kosavuta kuziŵa vamungafunike kuchita. Ziŵani kuti mwewo mwemulonjeza kale Yehova kuti muzalolelini chinthu chilichonse, kupamikijapo ntchito kukukangishani kupezeka pa misonkhano yonse monkhazikika. Ntima wanu uzakukakamijeni lini kuvomela ntchito yamene iyo, pavuli pake noyamba kuchita vinthu vauzimu mwanjila yanu-yanu. Kuganizila chisanzo cha Yesu kungatiyavye ngako pa nkhani yamene iyi. Yove enze wosimikija ntima kuti nthawe zonse akokondwelesha Atata ŵake, ndipo molingana na Yesu, nase tufunishisha kuti nthawe zonse tikochita vinthu vakukondwela navo Atata ŵasu.—Mat. 4:10; Yoh. 8:29.

10. Kansi Yehova azakuyavyeni tyani ‘kupitilija kukonkhelela’ Yesu pavuli pakuti mwabatizika?

¹⁰ Kulaŵila chendi, mavuto komasoti mayeselo azakupaseni mwayi wowonesha kuti mufuna ‘kupitilija kukonkhelela’ Yesu. Komasoti mukokhulupilila kuti Yehova azakuyavyeni kuchita vamene ivi. Pa lemba ya 1 Akorinto 10:13, Baibolo yunenena kuti: “Koma Mulungu ni wokhulupilika, ndipo angalolelini kuti muyesewe mpaka kufwika pamungaleke kupilila. Koma pamukumana na mayeselo amene awo yove azapeleke njila yopulumukila kuti mukwanishe kuŵapilila.”

VINGATIYAVYE KUTI TIPITILIJE KUKONKHELELA YESU

11. Kansi njila imozi iweme ngako yamungakonkhelele Yesu ni yotyani? (Onanisoti chithunzi.)

¹¹ Yesu enzetumikila Yehova na ntima wake wonse, ndipo nthawe zonse enzepemphela kwa Yehova. (Luk. 6:12) Keno mufuna kupitilija kukonkhelela Yesu pavuli pakuti mwabatizika, chinthu chofunika ngako n’kuchita vinthu vamene vingakuyavyeni kunkhala pa ushamwali wotang’a ngako na Yehova. Baibolo yunena kuti: “Mulimonse mwatapitila kale pasogolo tiyeni tipitilije kupita pa sogolo pochita vinthu vatuchita kale vamene ivo.” (Afil. 3:16) Nthawe ziyakine, mwewo mungamvwe vakukumana navo abale na alongo amene esankha kuchita vinyinji potumikila Yehova. Payakine mungamvwe vechikumana navo abale na alongo amene eloŵa mu Sikulu ya Akhilisitu olalikila za Ufumu, olo ŵanthu amene efulukila kudela yamene kwenzefunikila thandizo. Keno vinthu pa moyo wanu vukulolani, namwe mungachite luweme kuchita chimozi-mozi. Ŵanthu a Yehova nthawe zonse osakila njila kuti achite vinyinji potumikila Mulungu. (Mach. 16:9) Kansi mungachite tyani keno mwewo mungakwanilishelini volinga monga ni vamene ivi chifukwa cha mwavilili vinthu pamoyo wanu? Mukopewa kuganiza kuti nimwe atyala-tyala chifukwa chakuti mukwanishalini kuchita vinyinji monga ni mwakuchitila abale ayanu. Chofunika n’kupitilija kupilila. (Mat. 10:22) Osaluŵa kuti Yehova osangalala ngako na vinthu vamukwanisha kuchita molingana na mwavilili vinthu pa moyo wanu komasoti luso yanu. Vamene ivi vizakuyavyeni kupitilija kukonkhelela Yesu pavuli pakuti mwabatizika.—Sal. 26:1.

12-13. Kansi mungachite tyani mukawona kuti mwaleka kutumukila Mulungu mwakhama? (1 Akorinto 9:16, 17) (Onani soti bokosi yakuti “Pitilijani kuutuka pa mpikishano.”)

¹² Kansi mungachite tyani keno m’kupita kwa nthawe mapemphelo olo utumuki wanu vayamba kunkhala mwachiyoloŵezi? Payakine soti musangalalalini kuŵelenga Baibolo monga ni mwevenzele kale? Vamene ivi vikakuchitikilani pavuli pakuti mwabatizika mukopewa kuganiza kuti Yehova wakuchoselani mzimu wake utuŵa. Monga wanthu ochimwa, maganizo ŵasu ochinja nthawe na nthawe. Mukawona kuti mwaleka kuchita vinthu mwakhama, mukoganizila chisanzo cha Paulo. Yove enzekonkheja Yesu mwakhama, koma Paulo enzeziŵa kuti nthawe ziyakine ntima wake wenzefunishisha lini kuchita vinthu venzefunika kuti achite. (Ŵelengani 1 Akolinto 9:16, 17.) Paulo enena kuti: “Olo kuti nichite vinthu molikakamija nine mphela wopanamila mokatijana na udindo wenipasiwa.” M’mawu ayakine tinganene kuti Paulo enze wosimikija ntima kuchita utumiki wake mosasamala kanthu za mwenzemvwila muntima mwake.

¹³ Namwe soti mungachite luweme kupewa kusankha vinthu mokatijana na mwamumvwila muntima mwanu. Nkhalani osimikija ntima kuti mukochita vinthu viweme olo kuti ntima wanu nthawe ziyakine ufunalini kuti muchite vamene ivo. Keno mungapitilije kuchita vinthu viweme, m’kupita kwa nthawe nawo maganizo ŵanu azachinje. Kupitilija kuchita vinthu vauzimu monga kuphunzila pamweka, kupemphela, kusonkhana, komasoti kukata ntchito yolalikila, kuzakuyavyeni kupitilija kukonkhelela Yesu pavuli pakuti mwabatizika. Kuyangijila pamene apo, abale akezewona kupilila kwamuchita potumikila Yehova, nawo azatang’ishiwe ngako.—1 Ates. 5:11.

“PITILIJANI KULIYESA . . . PITILIJANI KULIYESA KUTI MUZIŴE KUTI NIMWE MUNTHU WOTYANI”

14. Kansi n’chinji chatufunikila kufufuza kuti tiziŵe, ndipo ndaŵa yanji? (2 Akolinto 13:5)

¹⁴ Chinthu chiyakine chamene chingakuyavyeni pavuli pakuti mwabatizika ni kulifufuza pamweka nthawe na nthawe mofumila pansi pa ntima. (Ŵelengani 2 Akolinto 13:5.) Nthawe ziyakine vingankhale luweme kupatula nthawe yoganizila vinthu vamukonda. Mwachisanzo, mungalifufuze kuti muziŵe keno mukwanisha kupemphela, kuŵelenga Baibolo, kupezeka pa misonkhano, komasoti kukata ntchito yolalikila. Mungachite luweme kuwona vamungachite kuti mukopindula ngako na vinthu vamene ivi. Mwachisanzo, likonsheni kuti: ‘Kansi newo nukwanisha kufotokoza viphunziso voyambilila va m’Baibolo kuli ŵanthu ayakine? Kansi pali vaningafunike kuchinja kuti nikosangalala ngako polalikila? Kansi mapemphelo ŵangu ni ofumila pansi pa ntima ndipo owonesha kuti nukhulupilila Yehova na ntima wangu wonse? Kansi newo nusonkhana monkhazikika? Kansi ningachite tyani kuti nikomvwishila mwatchelu ngako pa misonkhano nopeleka ndemanga ziweme?’

15-16. Kansi mwaphunzila chinji kuli Robert pankhani yokana mayeselo?

¹⁵ Chinthu chiyakine chofunika ngako ni kuziŵa mbali yamusachita luweme. M’bale muyakine zina yake Robert, efotokoza chochitika chiyakine chamene chusimikijila ngako mfundo yamene iyi. Yove enena kuti: “Penenze na vyaka 20, nenzekata ntchito iyakine ya maawazi atontho. Nsiku iyakine, nsimbi wenenzekata naye ntchito eniuja kuti tilute kung’anda kwawo pavuli pa ntchito. Yove enena kuti tikaŵeko seka paliye munthu aliyense ndipo tikasangalale ngako. Chapansi pa ntima, poyamba nenzefuna kuti nilute, koma pavuli pake newo nekana ndipo nefotokoza chifukwa chake.” Tutembeja ngako kuti Robert, ekwanisha kukana chiyeso chamene icho. Koma pavuli pakuti waiganizilasoti nkhani yamene iyo, Robert ewona kuti enzefunika kuchita vinthu mwanjila iyakine yosiyanako. Yove enena kuti: “Newo nenzefunika kukana mokulumija monga ni mwechichitila Yosefe kuli mwanakazi wa Potifara. (Gen. 39:7-9) N’vodabwisa kuti venivuta kuti nikane chiyeso chamene icho. Vamene ivi veniyavya kuwona kuti nufunika kutang’isha ushamwali wangu na Yehova.”

¹⁶ Molingana na Robert, n’chinthu chofunika ngako kulifufuza mofumila pansi pa ntima kuti muziŵe mwamuganizila. Olo pavuli pakuti mwakwanisha kukana chiyeso chiyakine, mungalikonshe kuti: ‘Kansi vanitolela nthawe ikulu kuti nikwanishe kunena kuti nufuna lini?’ Keno mwawona kuti mufunika kuchinja, osaliimba mulandu. Mmalo mwake, kondwelani chifukwa mwakwanisha kuwona mbali yamusachita luweme kukali nthawe. Muujeni Yehova m’pemphelo mbali yamusachita luweme, ndipo chitamponi kanthu kuti munkhale na ntima wofuna kumvwila Yehova.—Sal. 139:23, 24.

17. Kansi vinthu vechikumana navo Robert vekhuza tyani zina ya Yehova?

¹⁷ Kufumila pa vechitikila Robert, sewo tingaphunzilepo kanthu kayakine. Yove enena kuti: “Pavuli pakuti nakana kuluta kung’anda kwa nsimbi wala, yove enena kuti: ‘Wewo waphasa mayeso!’ Newo nemukonsha vechinenela tetyo. Yove enifotokozela vechimuuja nsimbi muyakine wamene kale enze wa Mboni kuti achilumbwana onse Amboni ni ŵanthu achinyengo, mwayi ukapezeka kuti achite chinthu chiipa ove angakwanishelini kukana. Yove efotokoza nkhani yamene iyi kuli nshamwali wangu wenenzeyembekezela kulemba naye mayeso. Newo nikondwela ngako peniziŵa kuti nalemekezesha zina ya Yehova.”

18. Kansi mwewo nimwe osimikija ntima kuchita chinji pavuli pakuti mwabatizika? (Onanisoti bokosi yakuti “Nkhani ziŵili zamene ni zofunika ngako kuli mwewo.”)

¹⁸ Panthawe yolipeleka kwa Yehova nobatizika, mwewo mwewonesha kuti mufuna kulemekeza zina ya Yehova mosasamala kanthu za vinthu vamungakumane navo. Ndipo ziŵani kuti Yehova oziŵa luweme ngako za mavuto komasoti mayeselo onse ŵamukumana nawo. Ndipo yove azadalise khama yamuchita popitilija kunkhala okhulupilika kuli yove. Mukokhulupilila kuti kupitila muli mzimu wake utuŵa, Yehova azakupaseni mphamvu zamufunikila kuti mukwanishe kupilila. (Luk. 11:11-13) Na thandizo ya Yehova, mwewo mungakwanishe kupitilija kukonkhelela Yesu pavuli pakuti mwabatizika.