NKHANI YOPHUNZILA N.° 28
NYIMBO N.° 123 Tikogonjela Mulungu mokhulupilika
Kansi mungakwanishe kusiyanisha pakati pa chonadi na wenye?
“Nkhalani otang’a mulimange ngako chonadi muluunda mwanu monga ni bande.”—AIFE. 6:14.
CHOLINGA CHANKHANI
Munkhani ino, tiwone kusiyana kwamene kulipo pakati pa chonadi chofumila kwa Yehova na wenye wofumila kwa Satana na ŵanthu oshusha.
1. Kansi mwewo muchiwona tyani chonadi?
ŴANTHU a Yehova okonda chonadi cha m’Mawu a Mulungu. Sewo tuchikhupilila chonadi chamene ichi. (Alo. 10:17) Tukhulupilila kuti Yehova enkhazikisha mpingo Wachikhilisitu kuti ‘ukolimbikisa noteteza chonadi.’ (1 Tim. 3:15) Ndipo tugonjela mosangalala ‘amene osogolela’ pakati pasu pakufotokoza mfundo za m’Baibolo komasoti kupeleka malangizo amene otiyavya kuchita chifunilo cha Mulungu.—Ahe. 13:17.
2. Mokatijana na Yakobo 5:19, kansi tingakumane na mavuto otyani pavuli pakuti taphunzila chonadi?
2 Koma olo pavuli pakuti talondela chonadi novomekeja kuti tufunika kusogolelewa na gulu ya Mulungu, tingaluŵilishiwe mphela. (Ŵelengani Yakobo 5:19.) Satana angawamijiwe ngako kuti sewo tileke kudalila Baibolo komasoti malangizo ŵayupeleka gulu ya Mulungu.—Aife. 4:14.
3. Ndaŵa yanji tufunika kupitilija kumvwila chonadi? (Aifenso 6:13, 14)
3 Ŵelengani Aifenso 6:13, 14. Kwalombapano ngako, Mdyelekezi akatishile ntchito nkhani ziipa ngako zawenye kuti ŵanthu aukile Yehova. (Chiv. 16:13, 14) Tingayembekezelesoti kuti Satana azachite vonse vangakwanishe kuti apatushe ŵanthu kwa Yehova. (Chiv. 12:9) N’chifukwa chake n’chinthu chofunika kuziŵa kusiyanisha pakati pa chonadi na wenye nomvwila chonadi. (Alo. 6:17; 1 Pet. 1:22) Kupulumuka kwasu pachisauso chikulu kuzadalile vamene ivi!
4. Kansi tikambilane chinji munkhani ino?
4 Munkhani ino, tikambilane minkhalidwe iŵili yatufunikila kunkhala nayo kuti tiziŵe chonadi cha m’Baibolo nokonkheja malangizo ŵayupeleka gulu ya Mulungu. Pavuli pake tikambilane vinthu vitatu vatingachite kuti tikate mwamphanvu chonadi.
MINKHALIDWE YATUFUNIKILA KUNKHALA NAYO KUTI TIZIŴE CHONADI
5. Kansi kuyopa Yehova kutiyavya tyani kuziŵa chonadi?
5 Kuyopa Yehova. Keno tuyopa Yehova moyenelela, tuyamba kumukonda ngako ndipo tingachitelini chilichonse chamene chingamukhumudwise. Sewo tufunishisha kuziŵa kusiyana kwa chiweme na chiipa, chonadi na wenye, na cholinga chakuti Yehova akokondwela nase. (Miy. 2:3-6; Ahe. 5:14) Tikopewa kuyopa ngako ŵanthu kupambana mwatuyopela Yehova, chifukwa vakukonda ŵanthu nthawe zinyinji Yehova okondwela navolini.
6. Kansi kuyopa ŵanthu kwechitisha tyani akalonga 10 kusokoneza chonadi?
6 Keno tuyopa ŵanthu kupambana mwatuyopela Mulungu tingapatuke pa chonadi. Ganizilani chisanzo cha akalonga 12 amene echiyayendela chalo chechilonjeza Yehova kuli Aisiraeli. Akalonga 10 enzeyopa ngako Akanani kupambana mwenzeyopela Yehova. Ove euja Aisiraeli ayawo kuti: “Tingakwanishelini kuyaniyatana nawo ŵanthu amene aŵo, chifukwa ni amphamvu kupambana sewo.” (Num. 13:27-31) Mokatijana na kuwona kwaumunthu, Akanani enze amphamvu ngako kupambana Aisiraeli. Koma onse amene enzenena kuti Aisiraeli angakwanishelini kugonjesa adani ŵawo enzeganizilalini za mphanvu za Yehova. Akalonga 10 enzefunika kuganizila ngako vakufuna Yehova kuti Aisiraeli achite. Ove enzefunikasoti kuganizila vechiŵachitila yove kuvuli kwalombapano. Mwanjila yamene iyi, ove sembe eziŵa kuti mphamvu za Akanani zenzelini kanthu polinganija na Yehova wamphanvu zonse. Mosiyana na akalonga enzeve chikhulupilo, Yoswa na Kalebe enzefuna kuti Yehova akokondwela nawo. Ove euja ŵanthu amene awo kuti: “Keno Yehova osangalala nase, azatiloŵeshe chendi mu chalo chamene icho nochipeleka kuli sewo.”—Num. 14:6-9.
7. Kansi tingachite tyani kuti tikoyopa ngako Yehova? (Onanisoti chithunzi.)
7 Kuti tikoyopa ngako Yehova, tufunika kuganizila vinthu vingamukondweleshe nthawe zonse patupanga vosankha. (Sal. 16:8) Keno muŵelenga Baibolo mungalikonshe kuti: ‘Kuti vamene ivi vechitikila newo, kansi sembe nesankha kuchita tyani?’ Mwachisanzo, yelekezelani kuti mwenzepo akalonga 10 penzelaŵila vinthu viipa. Kansi sembe mwekhulupilila notaya ntima chifukwa choyopa ŵanthu, kapena sembe mweyamba kukonda ngako Yehova kupambana mwamuyopela ŵanthu? Ntundu wonse wa Aisiraeli uliyekwanishe kuziŵa kuti Yoswa na Kalebe olaŵila chonadi. Monga vokonkhapo vake, Yehova aliyeŵalole ŵanthu amene awo kuti aloŵe m’chalo cholonjezewa.—Num. 14:10, 22, 23.
Kansi mwewo sembe mwekhulupilila ŵani? (Onani ndime 7.)
8. Kansi tufunika kuyeja-yeja kunkhala na nkhalidwe yotyani, ndipo ndaŵa yanji?
8 Kulichefya. Yehova oulula chonadi chake kuli ŵanthu olichefya. (Mat. 11:25) Chifukwa cha ntima wolichefya, sewo tevomela kuti munthu muyakine atiyavye kuphunzila chonadi. (Mach. 8:30, 31) Koma olo n’tetyo, tufunika kunkhala osamala kuti tipewe ntima womeka. Ntima womeka ungachitishe munthu kuganiza kuti maganizo am’mutu mwake ni anzelu komasoti okatijana na mfundo za m’Malemba na malangizo ŵayupeleka gulu ya Yehova.
9. Kansi tingachite tyani kuti tipitilije kunkhala olichefya?
9 Kuti tipitilije kunkhala olichefya, tufunika kukumbukila kuti Yehova ni nkulu ngako polinganija na sewo. (Sal. 8:3, 4) Tingamusengesoti Mulungu kuti atiyavye kunkhala olichefya ngako komasoti ophunzisika. Yehova azatiyavye kuti tikowona kuti maganizo ŵake ŵatuphunzila m’Baibolo komasoti kupitila m’gulu yake niwofunika ngako. Keno muŵelenga Baibolo, mukoganizila ngako mfundo zamene zuwonesha kuti Yehova okonda ŵanthu olichefya ndipo ozondana na omeka, olikuja komasoti okulumija kukalipa. Ndipo mukonkhala osamala ngako kuti mupitilije kunkhala olichefya mukalondela mwayi wa utumiki wamene ungachitishe kuti ŵanthu akokulemekezani.
VATINGACHITE KUTI TIPITILIJE KUMVWILA CHONADI
10. Kansi Yehova okatishila ntchito ŵani popeleka malangizo komasoti posogolela ŵanthu ŵake?
10 Pitilijani kudalila malangizo ofumila mugulu ya Yehova. Munthawe ya Aisiraeli wakale, Yehova enzekatishila ntchito Mose komasoti Yoswa kuti akopeleka malangizo kuli ŵanthu ŵake. (Yos. 1:16, 17) Aisiraeli enzedalisiwa penzewona analume amene awo monga opanamila Yehova. Pavuli pavyaka mahandiledi anyinji, mpingo Wachikhilisitu wenkhazikishiwa ndipo atumwi 12 eyamba kupeleka malangizo. (Mach. 8:14, 15) Pavuli pake, m’gulu yamene iyo mwenzesoti akulu aku Yerusalemu. Chifukwa chokonkheja malangizo ofumila kuli analume okhulupilika amene awo, “ŵanthu am’mipingo epitilija kunkhala na chikhulupililo chotang’a, ndipo chiŵelengelo chenzeyangijilika nsiku na nsiku.” (Mach. 16:4, 5) Nase masiku ŵano, tudalisiwasoti keno tumvwila malangizo ŵayupeka gulu ya Yehova. Koma kansi Yehova angamvwe tyani keno sewo tukana kugonjela ŵanthu ŵawasankha kuti akotisogolela? Kuti tiyankhe konsho yamene iyi, tiyeni tikambilane vechitikila Aisiraeli penze esala patontho kuti aloŵe m’Chalo cholonjezewa.
11. Kansi n’chinji chechitikila Aisiraeli amene enzeshusha Mose wamene echita kusankhiwa na Mulungu kuti akoŵasogolela? (Onanisoti chithunzi.)
11 Ali paulwendo woluta ku Chalo cholonjezeŵa, analume olemekezeka eyamba kushushana na Mose chifukwa cha udindo ŵechimupasa Yehova monga oŵasogolela. Ove enzelaŵila kuti: “Gulu yonse ni ituŵa [osati Mose yeka] ndipo Yehova ali pakati pawo.” (Num. 16:1-3) N’chendi kuti pamenso pa Mulungu, “gulu yonse” yenze ituŵa, koma Yehova esankha Mose kuti asogolele ŵanthu ŵake. (Num. 16:28) Penzeshushana na Mose, ŵanthu oukila amene awo enzeshushana na Yehova ngaye-ngaye. Ove enzeganizilalini ngako vinthu venzefuna Yehova; koma enzeganizila ngako venzefuna ove—enzefuna ngako udindo komasoti kutchuka. Mulungu epaya asogoleli oukila amene awo pamozi na masauzande anyinji aŵanthu amene enze kumbali yawo. (Num. 16:30-35, 41, 49) Tingankhalesoti osimikijila kuti masiku ŵano Yehova ozondana na ŵanhtu amene olemekezalini makonzedwe agulu yake.
Kansi mwewo sembe mwenkhala kumbali yaŵani? (Onani ndime 11.)
12. Ndaŵa yanji tufunika kupitilija kudalila gulu ya Yehova?
12 Sewo tingakwanishe kupitilija kudalila malangizo ŵayupeleka gulu ya Yehova. Tikawona kuti n’pofunika kuchinja vatukhulupilila pankhani iyakine ya chonadi cha m’Baibolo olo vatuchita pokata ntchito za Ufumu, ŵanthu osogolela owaya-wayalini kukonkheja malangizo. (Miy. 4:18) Ove ochita vamene ivi chifukwa ofuna kukondwelesha Yehova kupambana aliyense. Ove oyeja-yejasoti kuti vinthu vakusankha vikokatijana na Mawu a Mulungu. Ntumiki aliyense wa Yehova ofunika kukumbikila mfundo yamene iyi.
13. Kansi “chisanzo cha mawu aweme” ni chinji, ndipo tufunika kuchita nacho tyani?
13 “Pitilijani kukata mwamphamvu chisanzo cha mawu aweme.” (2 Tim. 1:13) “Chisanzo cha mawu aweme” chutanthauza viphunziso vachikhilisitu vamene vupezeka m’Baibolo. (Yoh. 17:17) Viphunziso vamene ivi niye maziko avinthu vonse vatukhulupilila. Gulu ya Yehova yutiphunzisa kukata mwamphanvu chisanzo cha mawu aweme. Keno tuchita vamene ivi tizafwane madaliso.
14. Kansi Akhilisitu ayakine eleka tyani kukatishisha “chisanzo cha mawu aweme”?
14 Kansi chinji chingachitike tikapatuka pa “chisanzo cha mawu aweme”? Ganizilani chisanzo ichi. Munthawe ya Akhilisitu oyambilila, Akhilisitu ayakine enzefalisa nkhani yawenye yakuti nsiku ya Yehova yafwika. Vuwoneka kuti kalata iyakine niye inena vamene ivi, ndipo ŵanthu enzeganiza kuti yafumila kuli ntumwi Paulo. Akaliye nofufuza umboni wake, Akhilisitu ayakine aku Tesalonika eyamba kukhulupilila noujako ayakine za wenye wamene uyo. Ove sembe aliyesemphewe kuti enzekumbukila vinthu vechiŵaphunzisa Paulo penze akali nawo pamozi. (2 Ates. 2:1-5) Paulo elangiza enekwasu amene awo kuti osati akhulupilile vinthu vonse vechimvwa. Komasoti pofuna kuŵayavya pavinthu vakusogolo, Paulo esilija kalata yake yachiŵili yoluta kuli Atesalonika na mawu akuti: “Londelani moni wangu wanalemba na kwanja yangu newo Paulo. Nthawe zonse nulemba teti m’makalata ŵangu onse, kuti muziŵe kuti ninewo chendi nalemba. Umu niye mwanulembela.”—2 Ates. 3:17.
15. Kansi tingaliteteze tyani kuli vinthu vawenye vamene vuwoneka monga n’vachendi? Pelekani chisanzo. (Onanisoti vithunzi.)
15 Kansi tingaphunzile chinji pavechilaŵila Paulo kuli Atesalonika? Tikamvwa nkhani iyakine yosakatijana na vatuphunzila m’Baibolo olo tikamvwa nkhani yodabwisa, tufunika kuchita vinthu mwanzelu. Mu ulamulilo wakale wa Soviet Union, adani ŵasu epasa enekwasu kalata iyakine ndipo eŵauja kuti yafumila kulikulu yasu. Kalata yamene iyo ilimbikisa enekwasu ayakine kupanga kagulu kampatuko ndipo eleka kudalila gulu ya Mulungu. Veyenzenena kalata yamene iyo venzewoneka monga ni vachendi. Koma enekwasu okhulupilika aliyepusishiwe na wenye wamene uyo. Ove ekwanisha kuziŵa kuti uthenga wa m’kalata yamene iyo wenze wosakatijana na vinthu vechiphunzila. Masiku ŵano, adani achonadi okatishila ntchito vipangizo vamakono pofuna kuti atisokoneze notiyaŵanisha. M’malo molola kuti ‘munthu achinje maganizo ŵasu’, tingaliteteze ku wenye mwakuganizila keno vinthu vatamvwa olo kuŵelenga vukatijana na chonadi chetiphunzila.—2 Ates. 2:2; 1 Yoh. 4:1.
Osalola kupusishiwa na uthenga wamene uwoneka monga ni wachendi (Onani ndime 15.)a
16. Mokatijana na Aloma 16:17, 18, kansi tufunika kuchita chinji munthu muyakine akaleka chonadi?
16 Pitilijani kukhala okatijana na ŵanthu amene ni okhulupilika kwa Yehova. Mulungu ofuna kuti sewo tikomulambila mokatijana. Tizakwanishe kunkhala okatijana keno tuchikata mwamphanvu chonadi. Ŵanthu akapatuka panjila ya chonandi, oyambisha mikangano mumpingo, n’chifukwa chake Mulungu otichenjeja kuti “mukoŵapewa.” Kuleka kuchita vamene ivi, tingapatuke noleka kuyenda panjila yachonadi—Ŵelengani Aloma 16:17, 18.
17. Kansi tupindula tyani chifukwa choziŵa chonadi nochikatishisha?
17 Keno tukwanisha kuziŵa chonadi, tizankhale paushamwali uweme na Yehova ndipo chikhulupililo chasu chizapitilije kunkhala chotang’a. (Aife. 4:15, 16) Mulungu azatiteteze kuviphunziso vawenye vofumila kwa Satana komasoti kunkhani zawenye, ndipo tizankhale otetezeka m’manja mwa Yehova panthawe yachisauso chikulu. Pitilijani kukata mwamphanvu mawu achendi, “ndipo Mulungu wantendele azankhale namwe.”—Afil. 4:8, 9.
NYIMBO N.° 122 Nkhalani otang’a ntima!
a MAWU OFOTOKOZA CHITHUNZI: Chithunzi chuwonesha vinthu vechitika m’vyaka vinyinji kuvuli, mu ulamulilo wakale wa Soviet Union, enekwasu elondela kalata yamene yenzewoneka monga yafumila kulikulu yasu yapachalo chonse, koma chendi chake chakuti yenze yofumila kuli adani ŵasu. Masiku ŵano, adani ŵasu okatishila ntchito intaneti pofalisa nkhani zamene zingachitishe kuti tichoke m’gulu ya Yehova.