NKHANI YOPHUNZILA N.° 40
NYIMBO N.° 30 Atata ŵangu, Mulungu wangu, shamwali wangu
Yehova otonthoja “ŵanthu ofwaika ntima”
“Yove ochija ŵanthu ofwaika ntima ndipo omanga vilonda vawo.”—SAL. 147:3.
CHOLINGA CHANKHANI
Yehova osamalila ŵanthu amene ovutika maganizo. Nkhani ino, yufotokoza mwakutitonthojela Yehova tikankhala na chisoni, komasoti mwatingatonthojele ŵanthu ayakine.
1. Kansi Yehova akumvwa tyani akaganizila za atumiki ŵake?
KANSI Yehova oŵaona tyani atumiki ŵake amene alipano pachalo? Yove owona tikankhala osangalala komasoti tikankhala na chisoni. (Sal. 37:18) Akawona kuti tuchita vonse vatingakwanishe pomutumikila olo kuti tukumana na mavuto, yove osangalala! Kupambana pamene apo, yove niwofunishisha kutiyavya komasoti kutitonthoja.
2. Kansi Yehova oŵachitila chinji ŵanthu amene ni ofwaika ntima, ndipo sewo tupindula tyani na vakuchita potisamalila?
2 Lemba ya Salimo 147:3, yunena kuti Yehova ‘omanga vilonda’ va ŵanthu ofwaika ntima. Lemba yamene iyi yuwonesha kuti Yehova osamalila mwachikondi ŵanthu ŵake amene ovutika maganizo. Kansi tufunika kuchita tyani kuti tikopindula na chisamalilo cha Yehova? Ganizilani chisanzo ichi. Dokota waluso angakwanishe kuyavya munthu wamene walichita kuti apole. Koma kuti munthu wamene uyo apole, ofunika kukonkheja mosamala ngako malangizo ŵangamupase adokota. Munkhani ino, tiwone vakulaŵila Yehova kupitila m’Mawu ŵake kuli ŵanthu amene ovutika maganizo, ndipo tiwone mwatingakatishile ntchito malangizo ŵake achikondi.
YEHOVA OTISIMIKIJILA KUTI NISE OFUNIKA
3. Kansi ndaŵa yanji ayakine oliwona kuti ni osafunika ngako?
3 Masiku ŵano ŵanthu aliye chikondi, ndipo chomvwisha chisoni n’chakuti ŵanthu anyinji oliwona kuti ni osafunika. Kalongosi muyakine zina yake Helena enena kuti: “Nekulila m’banja yamene ŵanthu ŵake enzewoneshanalini chikondi. Atata ŵangu enze ankhanza ndipo nsiku iliyonse enzetichitila vinthu vowonesha kuti nise osafunika.” Payakine molingana na Helen, mwewo muchitiliwa vinthu mwankhanza, muzuzuliwa kaŵili-kaŵili, ndipo vamene ivi vukuchitishani kulimvwa kuti mukondewalini. Keno n’tetyo, mungavutike kukhulupilila kuti pali muyakine wamene okukondani ngako.
4. Mokatijana na Salimo 34:18, kansi Yehova otisimikijila chinji?
4 Olo kuti ŵanthu ayakine okuchitilani vinthu viipa, mungakhulupilile kuti Yehova okukondani ndipo okuwonani kuti nimwe antengo wapatali. Yove “ali pafupi na ŵanthu antima wofwaika.” (Ŵelengani Salimo 34:18.) Mukayamba ‘kulimvwila chisoni muntima mwanu,’ mukokumbukila kuti Yehova owona vinthu viweme muntima mwanu ndipo n’chifukwa chake ekudonselani kuli yove. (Yoh. 6:44) Mulungu niwokonzeka kukuyavyani nthawe zonse chifukwa chakuti okukondani ngako.
5. Kansi tingaphunzila chinji tikaganizila mwenzechitila Yesu na ŵanthu amene enzewoneka kuti ni osafunika?
5 Tingaziŵe mwakuganizila Yehova, tikaganizila chisanzo cha Yesu. Yesu penze pano pachalo, enzechita vinthu mowama ntima kuli ŵanthu amene enzeliwona kuti ni atyala-tyala chifukwa cha vinthu viipa venzechitiliwa na ayawo. (Mat. 9:9-12) Mwanakazi wamene enzelwala matenda akulu ngako otaya milopa pechikata malaya ŵake akunja kuti apole, Yesu emutang’isha komasoti emutembeja chifukwa chachikhulupililo chake. (Mko. 5:25-34) Yesu enzekonkheja luweme ngako minkhalidwe iweme ya Atata ŵake. (Yoh. 14:9) Tetyo mukokhulupilila kuti Yehova okuwonani kuti nimwe ofunika ngako, ndipo oziŵa minkhalidwe iweme yamuli nayo, kupamikijapo chikhulupililo chanu komasoti chikondi chanu kuli yove.
6. Kansi mwewo mungachite tyani keno muliwona kuti nimwe osafunika?
6 Kansi mungachite tyani keno mupitilija mphela kuliwona kuti nimwe osafunika? Mungachite luweme kuŵelenga mavesi am’Baibolo amene osimikijila kuti Yehova okukondani ngako noŵaganizila.b (Sal. 94:19) Mukopeŵa kuliyelekezela na ŵanthu ayakine, komasoti kuganizila vinthu vamene mungavikwanishelini. Yehova oyembekezelalini kuti mwewo muchite vinthu vamungaleke kwanisha. (Sal. 103:13, 14) Keno munthu muyakine ekuchitilani vinthu viipa, osati mukoganiza kuti mwewo niye mwephoniya! Mukokumbukila kuti ŵanthu amene ochita vinthu viipa niye akuti akayankhe mulandu kwa Yehova, osati amene achitiliwa vinthu viipa. (1 Pet. 3:12) Sandra, wamene embwitiliwa akali n’tontho enena kuti, “Numusenga Yehova nthawe zonse kuti aniyavye kuliwona mwanjila iweme monga nimwakuniwonela yove.”
7. Kansi vinthu viipa vetikumana navo pamoyo wasu vingatiyavye tyani potumikila Yehova?
7 Mukokhulupilila kuti Yehova angakukatishileni ntchito poyavya ayakine. Yove wakulemekezani pokupasani mwayi wokata naye ntchito pamozi muutumiki. (1 Ako. 3:9) Vinthu viipa vemwikumana navo pa moyo wanu, vingakuyavyeni kumvwisha mosavuta mwakumvwila ŵanthu amene okumana na mavuto. Mwewo mungachite vinyinji poŵayavya. Helen, watatomola poyamba elondela thandizo ndipo palipano niwokonzeka kuyavya ayakine. Yove enena kuti: “Poyamba, nenzeliwona kuti nine watyala-tyala. Koma Yehova waniyavya kuwona kuti nukondewa ndipo onikatishila ntchito poyavya ayakine.” Palipano, Helen osangalala kutumikila monga mpainiya wonkhazikika.
YEHOVA OFUNA KUTI TIKOKHULUPILILA KUTI YOVE OTIKHULULUKILA
8. Kansi lemba ya Yesaya 1:18 yutisimikijila chinji?
8 Atumiki ayakine a Yehova opitilija kiliimba mulandu chifukwa cha vinthu viipa vechichita akaliye batizika, olo pavuli pakuti abatizika. Koma tikokumbukila kuti Yehova otikonda ngako ndipo etipasa dipo kuti akotikhululukila machimo ŵasu. N’vosakaikisha kuti yove ofuna kuti sewo tiilondele mphaso yamene iyi. Yehova otisimikijila kuti ‘tikankhalasoti paushamwali uweme na yove’,c opitilijalini kukumbukila vinthu viipa vetichita. (Ŵelengani Yesaya 1:18.) N’vokondwelesha ngako kuti Atata ŵasu Yehova oluŵa vinthu viipa vetichita kuvuli! Koma panthawe imo na imo yamene iyo, yove oluŵalini vinthu viweme vetichita kuvuli.—Sal. 103:9, 12; Ahe. 6:10.
9. Ndaŵa yanji tufunikila kuganizila vinthu vatuchita palipano komasoti vatuyembekezela kusogolo m’malo moganizila vinthu vetichita kuvuli?
9 Keno muliimba mulandu chifukwa cha vinthu vemwichita kuvuli, yeja-yejani kuti mukoganizila ngako vinthu vamuchita palipano komasoti vamuyembekezela kusogolo, m’malo moganizila ngako za vinthu vemwiphoniyesha kuvuli. Ganizilani chisanzo cha ntumwi Paulo. Yove enzeliimba ngako mulandu akaganizila kuti enzetamanisha Akhilisitu mwankhanza, koma yove enzeziŵa kuti Yehova emukhululukila. (1 Tim. 1:12-15) Kansi yove epitilija kuganizila vinthu viipa vechichita kuvuli? N’vowonekelatu kuti yove aliye chite tetyo, molingana na mwechichitila popewa kuganizila vinthu vechichita kuti ankhale mfalisi wolemekezeka. (Afil. 3:4-8, 13-15) M’malomwake, Paulo enzechita utumiki wake mwakhama ndipo enzeganizila vinthu vakusogolo. Molingana na Paulo, mwewo mungakwanishelini kuwamya vinthu vemwichita kuvuli. Koma mwewo mungakwanishe kumutamanda Yehova komasoti kuchita vinthu vomukondwelesha palipano. Komasoti mukoganizila sogolo iweme ngako yawakulonjezani yove.
10. Kansi tingachite tyani keno vinthu vetichita kuvuli vekhumudwisa ayakine?
10 Payakine mungakhumudwe chifukwa chakuti vinthu viipa vemwichita kuvuli vekhumudwisa ayakine. Kansi n’chinji chingakuyavyeni? Mungachite luweme kuyeja-yeja kuti muwamye vinthu vewonongeka, komasoti kupepesa mofumila pansi pa ntima. (2 Ako. 7:11) Musengeni Yehova kuti ayavye ŵanthu ŵemwikhumudwisa. Yehova angakuyavyeni mwewo komasoti ŵanthu ŵemwikhumudwisa kuti mukwanishe kupilila komasoti kuti mufwane ntendele wamuntima.
11. Kansi tingaphunzile chinji pa chisanzo cha mneneli Yona? (Onanisoti chapachikuto.)
11 Mukophunzilapo kanthu pa vinthu vemwiphoniyesha kuvuli, nonkhala okonzeka kuti Yehova akukatishileni ntchito pa vinthu vakufuna yove. Ganizilani chisanzo cha mneneli Yona. M’malo moluta ku Nineve kwechimutuma Yehova, Yona ethaŵa noluta kuchalo chiyakine. Yehova emupasa chilango Yona, ndipo yove ephunzilapo kanthu pa vinthu vechiphoniyesha. (Yon. 1:1-4, 15-17; 2:7-10) Yehova aliyeleke kumukatishila ntchito Yona monga mneneli wake. Mulungu emupasasoti mwayi uyakine Yona wakuti alute ku Nineve, ndipo panthawe yamene iyo yove emvwila na ntima wonse. Yove aliyelole kuti kuliimba Mulandu chifukwa cha vinthu vechiphoniyesha kuvuli, kumukangishe kulondela utumiki wamene uyu wechimupasa Yehova.—Yon. 3:1-3.
Mneneli Yona pechipulumuka m’mala mwachinsomba, Yehova emuujasoti kuti alute ku Nineve kuyalengeza uthenga wake (Onani ndime 11.)
YEHOVA OTIPASA MZIMU WAKE UTUŴA KUTI ATITANG’ISHE
12. Kansi Yehova otipasa tyani ntendele wamuntima keno ŵanthu ayakine atichitila vinthu viipa? (Afilipi 4:6, 7)
12 Kupitila muli mzimu wake utuŵa, Yehova otitang’isha tikakumana na mavuto akulu ngako. Ganizilani vechitikila Ron na Carol. Mwazizizi, mwana wawo munalume elipaya. Ove enena kuti: “Vamene ivi vikaliyechitika, sewo tenzekumana na mavuto osiyana-siyana, koma vuto yamene iyi yenze ikulu ngako. Kwamasiku anyinji usiku sewo tenzekwanishalini kuyona, tetyo tenzepemphela kwa Yehova ndipo yove etipasa ntendele utomolewa pa Afilipi 4:6, 7.” (Ŵelengani.) Keno nimwe okhumudwa ngako chifukwa chakuti mwakumana na vuto ikulu, mufotokozeleni Yehova mwamumvwila. Mukopemphela kwa Mulungu pafupi-pafupi komasoti kwa nthawe itali mwamungakwanishile. (Masal 86:3; 88:1) Mukomusenga Yehova pafupi-pafupi kuti akupaseni mzimu wake utuŵa. Yove azayankhe mapemphelo ŵanu.—Luk. 11:9-13.
13. Kansi mzimu utuŵa utiyavya tyani kuti tipitilije kulambila Yehova mokhulupilika? (Aifenso 3:16)
13 Kansi nimwe ofoka chifukwa cha mavuto ŵamukumana nawo ndipo mungakwanishelini kuchita vinyinji potumikila Yehova? Mzimu utuŵa ungakuyavyeni kuti mupitilije kutumikila Yehova mokhulupilika. (Ŵelengani Aifenso 3:16.) Ganizilani vechitikila kalongosi muyakine zina yake Flora. Yove pamozi na mwanalume wake enzetumikila monga amishonale, koma pavuli pake mwanalume wake eyamba kuchita vinthu mosakhulupilika ndipo esuzulana. Yove enena kuti: “Nechimvwa chisoni ngako chifukwa cha kusakhulupilika kwake, ndipo nthawe zonse nenzengoganizila za vinthu vechichita. Nipemphela kwa Yehova kuti anipase mzimu wake utuŵa kuti nikwanishe kupilila. Olo kuti poyamba venzewoneka monga nikwanishelini kupilila, Yehova eniyavya kuti nikwanishe kupilila komasoti kuti ninkhale wotang’a.” Panthawe yamene iyo, Flora ewona kuti Mulungu wamuyavya kuti akomudalila ngako komasoti kuti akomuyavya pamavuto ŵake onse. Yove enena kuti: “Newona kukwanilishiwa kwa lemba ya Salimo 119:32 pamoyo wangu, yamene yunena kuti: ‘Nizakonkheje malamulo ŵanu na ntima wangu wonse chifukwa mwaniyavya kuti niŵamvwishe luweme.’”
14. Kansi tingachite tyani kuti mzimu wa Mulungu ukokata ntchito pa moyo wasu?
14 Kansi n’chinji chamungachite mukasenga Yehova kuti akupaseni mzimu wake utuŵa? Mukochita vinthu vamene vingayavye kuti mzimu wa Mulungu ukokata ntchito pa moyo wanu. Vamene ivi vupamikijapo kupezeka pamisonkhano komasoti kukata ntchito yolalikila. Mukoŵelenga Mawu a Mulungu nsiku iliyonse. Vamene ivi vingakuyavyeni kuziŵa maganizo ŵake. (Afil. 4:8, 9) Pamuŵelenga, mukoganizila za ŵanthu otomolewa m’Baibolo amene ekumana na mavuto noganizila mwechiŵayavyila Yehova kuti apilile. Sandra, watatomola poyamba, ekumana na mavuto anyinji pamoyo wake. Yove enena kuti: “Nkhani ya Yosefe yenikhuza ngako muntima. Yove aliyelole kuti mavuto komasoti kusoŵa chilungamo kuwononge ushamwali wake na Yehova.”—Gen. 39:21-23.
YEHOVA ANGAKATISHILE NTCHITO AKHILISITU AYASU KUTI ATITANG’ISHE
15. Kansi niŵani angatitonthoje tikakumana na mavuto, ndipo angatiyavye tyani? (Onanisoti chithunzi.)
15 Tikakumana na mavuto, Akhilisitu ayasu ‘angatitang’ishe ngako.’ (Akol. 4:11) Enekwasu na akalongosi ni umboni wamphamvu wakuti Yehova otikonda. Akhilisitu ayasu angatitonthoje potimvwishila mwachifundo olo kuwela kuzatiwona tikakumana na mavuto. Ove angatitang’ishe na lemba ya m’Baibolo olo kupenphela nase pamozi.d (Alo. 15:4) Nthawe ziyakine mkwasu olo kalongosi, angatikumbushe mwakuganizila Yehova, ndipo vamene ivi vingatiyavye kuti tipitilije kupilila. Akhilisitu ayasu angatiyavyesoti munjila ziyakine monga kutiletela chakulya panthawe yatukumana na mavuto.
Ayasu aweme komasoti odalilika amene okonda Yehova, angatitang’ishe ngako komasoti kutiyavya. (Onani ndime 15.)
16. Kansi nthawe ziyakine tingafunikile kuchita tyani kuti Akhilisitu ayasu atiyavye?
16 Kuti Akhilisitu ayasu atiyavye, nthawe ziyakine tingafunikile kuchita kuŵauja. Enekwasu na akalongosi otikonda ndipo ofuna kutiyavya. (Miy. 17:17) Koma nthawe ziyakine ove angaziŵelini mwatumvwila komasoti vinthu vatufunikila. (Miy. 14:10) Keno muvutika maganizo, mukofotokozela ayanu otang’a mwauzimu mwamumvwila. Mukoŵafotokozela thandizo yamufunikila. Mungachite luweme kulaŵila na nkulu m’mozi olo aŵili ŵamumasuka nawo. Akalongosi ayakine owona kuti n’koyavya kufotokozelako kalongosi muyakine wamene niwotang’a mwauzimu.
17. Kansi ni mavuto otyani amene angatikangishe kulondela thandizo yofumila kuli ayakine, ndipo tingalimbane nawo tyani?
17 Mukopewa kunkhala pamweka. Chifukwa cha mavuto ŵamukumana nawo, payakine mungafunelini kutandala na ayakine. Nthawe ziyakine enekwasu na akalongosi angaziŵelini mavuto ŵamukumana nawo olo kulaŵila vinthu viyakine vamene vingakukhumudwiseni. (Yako. 3:2) Koma olo n’tetyo, osati mukolipatula kuli enekwasu na akalongosi. Yehova angakatishile ntchito ove kuti akutang’isheni. Nkulu muyakine zina yake Gavin, wamene olwala matenda ovutika maganizo, enena kuti: “Nthawe zinyinji newo nenzefunalini kulaŵila olo kutandala na ayangu.” Koma Gavin eyeja-yeja kuti akofwana nthawe yotandala nenekwasu. Ndipo nthawe zinyinji yove enzenkhala wosangalala akakwanisha kuchita vamene ivi. Kalongosi muyakine zina yake Amy enena kuti: “Newo venzenivuta kukhulupilila ŵanthu chifukwa cha vinthu viipa venikumana navo kuvuli. Koma naphunzila kukonda enekwasu na akalongosi komasoti kuŵadalila monga nimwakuchitila Yehova. Newo nuziŵa kuti vamene ivi vumukondwelesha Yehova, ndipo newo nane nunkhala wosangalala.”
VINTHU VAWATILONJEZA YEHOVA VINGATITANG’ISHE
18. Kansi tingachite tyani kuti tikoganizila ngako vinthu vakusogolo, ndipo n’chinji chatingachite palipano?
18 Kwalombapano, Yehova azafumyepo vinthu vonse vutivutisha maganizo komasoti mavuto onse ŵatukumana nawo. (Chiv. 21:3, 4) Panthawe yamene iyo vinthu vonse viipa vatukumana navo masiku ŵano “vizakumbukiliwelinisoti.” (Yes. 65:17) Monga nimwatawonela, Yehova ‘omanga vilonda vasu’ olo palipano. Yehova wapeleka vinthu vinyinji kuti atitang’ishe komasoti kuti atiyavye. Mukowoneshesha kuti mulondela thandizo yake ndipo osati mukokaikila kuti yove “okufunilani viweme.”—1 Pet. 5:7.
NYIMBO N.° 7 Yehova, niye mphamvu zasu
a Mazina achinjiwa.
b Onani bokosi yakuti “Yehova owona kuti mwewo nimwe ofunika.”
c Kuti ‘tinkhalesoti paushamwali uweme’ na Yehova tufunika kuwonesha kuti talapa chendi pomusenga kuti atikhululukile nochinja vochita vasu. Keno tachita chimo ikulu, tufunikasoti kusakila thandizo kuli akulu ampingo.—Yako. 5:14, 15.
d Mwachisanzo, ganizilani malemba amene andandalikiwa pa mutu wakuti “Nkhaŵa” komasoti “Chitonthojo” m’buku ya Malemba a Moyo wachikhilisitu.