“Sankhani lelo wamufuna kutumikila”

1. Kansi tufunikila kuchita tyani kuti tifwane chisangalalo ngacho-ngacho, ndipo ndaŵa yanji? (Yesaya 48:17, 18)

ATATA ŵasu akululu otikonda ngako komasoti ofuna kuti tikosangalala na moyo palipano komasoti kusogolo. (Mlal. 3:12, 13) Yove etilenga kuti tinkhale na maluso ayakine ochitisha chidwi ngako. Koma olo n’tetyo, Mulungu aliyetipase luso yolilamulila seka olo kulisankhila seka vinthu pankhani ya chiweme na chiipa. (Mlal. 8:9; Yer. 10:23) Yove oziŵa vinthu vamene vingatiyavye kufwana chisangalalo ngacho-ngacho. Kuti tinkhale osangalala tufunikila kutumikila yove komasoti kukonkheja mfundo zake.—Ŵelengani Yesaya 48:17, 18.

2. Kansi ni wenye wotyani wakufuna Satana kuti tikoukhulupilila, ndipo Yehova waushusha tyani?

² Satana ofuna kuti sewo tikokhulupilila kuti tingakwanishe kunkhala osangalala paliye kudalila Yehova kuti akotisogolela, komasoti kuti ŵanthu angakwanishe kulilamulila ŵeka. (Gen. 3:4, 5) Yehova washusha wenye wamene uyu pechilola kuti ŵanthu alilamulile ŵeka kwa nthawe itontho. Tufunikilalini kuchitaluta kutali kuti tiwone umboni wakuti ŵanthu akangiwa momvwisha chifundo kulilamulila ŵake. Koma mosiyana na vamene ivi, m’Baibolo muli visanzo va analume komasoti anakazi amene enze na moyo wosangalala ngako chifukwa chakuti esankha kutumikila Yehova. Chisanzo chikulu ngako, ni cha Yesu Khilisitu. Poyamba, tiyeni tikambilane chifukwa chechisankhila kuti akotumikila Yehova. Pavuli pake, tikambilane chifukwa chake sewo tufunikila kulambila Atata ŵasu akululu. Ndipo posilijila, tikambilane mwachidule vifukwa viyakine vetichitisha kusankha kuti tikotumikila Yehova.

CHIFUKWA CHECHITISHA KUTI YESU ASANKHE KUTUMIKILA YEHOVA

3. Kansi Satana enze epasa Yesu mwayi wotyani, ndipo Yesu esankha chinji?

³ Yesu penze pano pa chalo, enze na ufulu wosankha wangatumikile. Yesu pechingoti wabatizika, Satana emuuja kuti amupase maufumu onse apano pachalo akavomela kumulambila kamozi tyala. Poyankha, Yesu enena kuti: “Choka Satana! Chifukwa Malemba onena kuti, ‘Yehova Mulungu wako niye waufunikila kulambila ndipo ufunikila kutumikila yove yeka mphela.’” (Mat. 4:8-10) Ndaŵa yanji Yesu esankha vamene ivi? Tiyeni tikambilane viyakine mwa vifukwa vemuchitisha kuti asankhe tetyo.

4-5. Kansi ni vifukwa votyani vechitisha kuti Yesu asankhe kuti akotumikila Yehova?

⁴ Chifukwa chikulu chemuchitisha Yesu kuti asankhe kutumikila Yehova ni chikondi. Yesu oŵakonda ngako Atata ŵake. (Yoh. 14:31) Kuyangijila pamene apo, Yesu esankha kutumikila Yehova chifukwa chakuti niye vakufunikila kuchita munthu aliyense. (Yoh. 8:28, 29; Chiv. 4:11) Yove oziŵa kuti Yehova niye Munecho wa moyo komasoti kuti Mulungu ni wodalilika na wopasa. (Masal. 33:4; 36:9; Yako. 1:17) Yehova enzelaŵila vinthu vachendi nthawe zonse kuli Yesu, komasoti vinthu vonse venze navo venze vofumila kuli yove. (Yoh. 1:14) Koma mosiyana na vamene ivi, Satana niye eleta imfwa. Satana ni wachigolo komasoti wolikonda, n’chifukwa chake oŵatalija wenye ŵanthu. (Yoh. 8:44) Pokumbukila mfundo zamene izi, Yesu enzefunalini na patontho kumo kupandukila Yehova monga ni mwechichitila Satana.—Afil. 2:5-8.

⁵ Chifukwa chiyakine chemuchitisha Yesu kuti asankhe kutumikila Yehova, n’chakuti enzeyembekezela mwachidwi vokonkhapo viweme venzeyembekezela akapitilija kunkhala wokhulupilika kwa Mulungu. (Ahe. 12:2) Yove enzeziŵa kuti akapitilija kunkhala wokhulupilika azatuŵishe zina ya Atata ŵake komasoti kupeleka njila yosilijila mavuto ŵechiyambisha Mdyelekezi.

CHIFUKWA CHAKE YEHOVA NIWOYENELELA KUMULAMBILA

6-7. Kansi ndaŵa yanji ŵanthu anyinji masiku ŵano otumikilalini Yehova, ndipo ndaŵa yanji yove niwoyenelela kumulambila?

⁶ Ŵanthu anyinji masiku ŵano otumikilalini Yehova chifukwa chakuti oziŵalini minkhalidwe iweme ya Mulungu komasoti kuti oŵayayva munjila zinyinji. Ŵanthu amene aŵa olingana na ŵanthu ŵechilalikila Paulo ku Atene.—Ntchi. 17:19, 20, 30, 34.

⁷ Paulo efotokozela ŵanthu enzemumvwishila ku Atene kuti Mulungu wachendi “opasa ŵanthu onse moyo, umphuye na vinthu vonse.” Yove enenasoti kuti: “Chifukwa cha yove tili na moyo, tuyenda ndipo tilipo.” Mulungu niye Nyamalenga wamene “kufumila muli munthu mmozi epanga mitundu yonse ya ŵanthu,” tetyo niwoyenelela kumulambila.—Ntchi. 17:25, 26, 28.

8. Kansi Yehova angachitelini chinji, ndipo wawonesha tyani kuti otikonda ngako?

⁸ Chifukwa chakuti Yehova ni Nyamalenga komasoti Wolamulila wa chilengedwe chonse, ali na ufulu wotikakamija kuti tikomutumikila. Koma olo kuti vili tetyo, Yehova angachitelini vamene ivi. Mmalo mwake, yove otipasa umboni wosashushika wakuti aliko chendi komasoti otikonda ngako aliyense payeka-payeka. Yove ofuna kuyavya ŵanthu anyinji kuti ankhale naye paushamwali mpaka kale-kale. (1 Tim. 2:3, 4) Pofuna kuti vamene ivi vikwanishike, Yehova otiphunzisa kuti tikoujako ayakine vokhuza cholinga chake komasoti vinthu viweme vakuti azachitile ŵanthu. (Mat. 10:11-13; 28:19, 20) Yove watipasa mpingo wamene tingaukatishile ntchito pomulambila komasoti kulondela thandizo kufumila kuli akulu amene otikonda.—Ntchi. 20:28.

9. Kansi ni njila zotyani zakuwoneshela Yehova kuti okonda ŵanthu onse?

⁹ Kukula kwa chikondi cha Yehova kuwonekela luweme tikawona mwakuchitila vinthu na ŵanthu amene okana kuti yove aliko chendi. Ganizilani vinthu ivi: Kwavyaka masauzande anyinji ŵanthu ankhala olisankhila ŵeka vinthu pankhani ya chiweme na chiipa paliye kudalila Yehova kuti akoŵasogolela. Olo n’tetyo, Yehova mowama ntima oŵapasa vinthu vakufunikila kuti apitilije kunkhala na moyo komasoti kuti akosangalala. (Mat. 5:44, 45; Ntchi. 14:16, 17) Yove oŵapasa nzelu kuti akwanishe kufwana azishamwali, kulela ŵana, komasoti kuti vinthu vikoŵayendela luweme patchito zakukata mwakhama. (Sal. 127:3; Mlal. 2:24) Vinthu monga ni vamene ivi vuwonesha kuti Atata ŵasu akululu okonda ŵanthu onse. (Eks. 34:6) Lomba tiyeni tikambilane vifukwa viyakine vamene vutichitisha kusankha kuti tinkhale atumiki a Yehova komasoti mwavumukhuzila Munecho.

CHIFUKWA CHATUSANKHILA KUTUMIKILA YEHOVA

10. (a) Kansi ni chifukwa chotyani chikulu chamene chutichitisha kuti tikotumikila Yehova? (Mateyo 22:37) (b) Kansi mwewo mwapindula tyani na kuleza ntima kwa Yehova? (Salimo 103:13, 14)

¹⁰ Molingana na Yesu, sewo tusankha kutumikila Yehova chifukwa chakuti tumukonda ngako. (Ŵelengani Mateyo 22:37.) Tikayamba kuphunzila vokhuza minkhalidwe iweme yali nayo Yehova, tulimvwa kuti tili naye pafupi ngako. Mwachisanzo, ganizilani kuleza ntima kwakutiwonesha Yehova. Aisilaeli pechileka kumvwila Yehova, yove eŵasenga mopapatila kuti: “Pulizi, jokelani noleka njila zanu ziipa.” (Yer. 18:11) Yehova okumbukila kuti sewo tiliye ungwilo komasoti nise lito. (Ŵelengani Salimo 103:13, 14.) Mukaganizila kuleza ntima kwa Yehova komasoti minkhalidwe yake iyakine, kansi vukulimbikisanilini kufuna kumutumikila mpaka kale-kale?

11. Kansi ni vifukwa votyani vutichitisha kuti tikotumikila Atata ŵasu akululu?

¹¹ Sewo tufuna kutumikila Yehova chifukwa niye chinthu chakufunikila kuchita munthu aliyense. (Mat. 4:10) Kupambana vonse, sewo tuziŵa kuti tikapitilija kutumikila Yehova mokhulupilika ponkhala vokonkhapo viweme ngako. Kukhulupilika kwasu kuyavya kuti zina ya Yehova ituŵishiwe, kuwonesha kuti Satana ni wawenye, komasoti Atata ŵasu Yehova okondwela ngako. Ndipo tikasankha kuti tikotumikila Yehova palipano, tizankhale na mwayi womutumikila mpaka kale-kale!—Yoh. 17:3.

12-13. Kansi tuphunzila chinji kufumila pa vechitikila Jane na Pam?

¹² Olo ŵana atontho angaphunzile kukonda Yehova vamene vingaŵayavye kuti akomukonda ngako akezekula. Ganizilani vechitikila akalongosi aŵili paukwawo, amene oitiwa kuti Jane na Pam.a Jane enze na vyaka 11 ndipo Pam enze na vyaka 10 pechiyamba kuphunzila Baibolo. Olo kuti makolo ŵawo enzeve chidwi chophunzila Baibolo eŵalola ŵana ŵawo kuti akophunzila Baibolo na Amboni, ndipo enzengofuna tyala kuti apitilije kuluta ku tchetchi pamozi na makolo ŵawo. Jane enena kuti: “Vinthu vechiniphunzisa a Mboni za Yehova pokatishila ntchito Baibolo, veniyayva kuti nikwanishe kupilila ayangu penzenikakamija kuti nikokatishila ntchito mankhwala osokoneza tonfwe komasoti minkhalidwe yachiwele-wele.”

¹³ Papita tyala vyaka vitontho, asimbi onse aŵili amene aŵa enkhala ofalisa. Pavuli pake, eyamba kuchita upainiya uku osamalila makolo ŵawo achikulile. Pokumbukila vinthu veŵachitikila, Jane enena kuti: “Newona neka na menso ŵangu kuti Yehova oŵasamalila mokhulupilika azishamwali ŵake, mokatijana na mwayunenela lemba ya 2 Timoteyo 2:19, kuti ‘Yehova oziŵa ŵanthu ŵake.’” N’vowonekelatu kuti Yehova oŵasamalila ŵanthu amene asankha kunkhala naye paushamwali komasoti kumutumikila!

14. Kansi vinthu vatulaŵila komasoti vatuchita vuyavya tyani kuti zina ya Yehova ituŵishiwe? (Onanisoti vithunzi.)

¹⁴ Sewo tufuna kuyavya pantchito yotuŵisha zina ya Yehova ku vinthu vawenye. Ganizilani ivi: Tiyelekezele kuti mwewo muli na muyanu wamukonda wamene ni muweme ntima, wopasa komasoti wokhululukila ayakine. Lomba nsiku iyakine mukumvwa munthu muyakine oyopejela muyanu wamene uyo vinthu viipa ponena kuti ni wankhanza komasoti aliye chilungamo. Kansi mwewo mungachite tyani? Mwewo mungayeje-yeje kuteteza zina yake. Molingana na vamene ivi, Satana pamozi na ŵanthu amene ali kumbali yake akayamba kuifya mbili ya Yehova pofalisa nkhani zawenye zokhuza yove, sewo tuchitapo kanthu motang’a ntima polaŵila vinthu vachendi vokhuza Yehova kuti titeteze zina yake. (Sal. 34:1; Yes. 43:10) Sewo tuwonesha kuti tufuna kutumikila Yehova na moyo wasu wonse kupitila muvinthu vatulaŵila komasoti vatuchita.

15. Kansi ni madaliso otyani ŵechifwana Paulo pechichinja volinga venze navo pa moyo wake? (Afilipi 3:7, 8)

¹⁵ Sewo tuchinja mofunishisha volinga vatili navo pamoyo wasu kuti tikotumikila Yehova movomelejeka komasoti kuti tikochita vinyinji pomutumikila. Mwachisanzo, ntumwi Paulo enze na udindo ukulu m’chipembezo cha Ayuda, koma eleka chipembezo chamene icho nonkhala wophunzila wa Yesu. (Agal. 1:14) Chifukwa cha vamene ivi, Mulungu emudalisa ngako komasoti emupasa mwayi wakuyalamulila na Yesu kululu. Yove aliyedandaule chifukwa chakuti esankha kutumikila Yehova, ndipo nase tizadandaulelini tikasankha kuchita vamene ivi.—Ŵelengani Afilipi 3:7, 8.

16. Kansi tuphunzila chinji kufumila pa vechitikila Julia? (Onanisoti vithunzi.)

¹⁶ Keno tuwona kuti kutumikila Yehova ni chinthu chofunika ngako pamoyo wasu, Mulungu azatidalise palipano komasoti kusogolo. Ganizilani vechitikila kalongosi muyakine zina yake Julia. Penze akali msimbi komasoti akaliyephunzila chonadi, Julia enze m’gulu ya oimba khwaya ku tchechi kwawo. Yove enzeimba luweme ngako mwakuti eyamba kumuphunzisa kuti azankhale kaswili woimba. Pakaliye pita nthawe itali, Julia enkhala wotchuka ngako mwakuti eyamba kuluta ku malo osiyana-siyana otchuka kuyaimba nyimbo. Panthawe yenze ku sikulu yophunzisa kuimba nyimbo, muyake wapa sikulu yamene iyo eyamba kulaŵila naye vokhuza Mulungu komasoti emufotokozela kuti Mulungu ali na zina, ndipo zina yake ni Yehova. Pakaliye pita nthawe itali, Julia eyamba kuphunzila Baibolo maulwendo aŵili sondo iliyonse. Pavuli pake, yove esankha kuti akokatishila ntchito moyo wake potumikila Yehova mmalo mwakuti ankhale wotchuka pankhani yoimba. Chosankha chamene icho chenzelini chipepu. Yove enena kuti: “Ŵanthu anyinji enzeninena kuti nine wopusa chifukwa chakuti nileka kuimba nyimbo nosankha kuti nikotumikila Yehova.” Kansi yove akumvwa tyani palipano akaganizila vinthu vechisankha vyaka 30 kuvuli? Yove enena kuti: “Newo nili na ntendele wam’maganizo, ndipo nukaikilalini kuti Mulungu azanipase vinthu vonse vaufuna ntima wangu.”—Sal. 145:16.

PITILIJANI KUTUMIKILA YEHOVA

17. Kansi kufupika kwa nthawe yasala kuti chino chalo chiwonongewe, kutikhuza tyani sewo komasoti ŵanthu asatumikila Mulungu?

¹⁷ Sewo tili kumapeto ngako-ngako kwa chino chalo chiipa. Ntumwi Paulo elemba kuti: “‘Kwasala kanthawe katontho’ ndipo ‘wamene uyo akuza afwike chendi achelwelini.’” (Ahe. 10:37) Kansi vamene ivi vutikhuza tyani? Vutikhuza chifukwa chakuti mwayi wakuti ŵanthu ayambe kutumikila Yehova wasala patontho kusila. (1 Ako. 7:29) Ndipo sewo amene nise atumiki a Yehova palipano, tuziŵa kuti olo tikumane na mavuto, azankhale tyala “akanthawe katontho.”

18. Kansi Yehova na Yesu ofuna kuti tikochita chinji?

¹⁸ Yesu aliyelimbikise tyala ophunzila ŵake kuti akomukonkhelela, koma eŵaujasoti kuti apitilije kumukonkhelela. (Mat. 16:24) Tetyo, keno tankhala tutumikila Yehova kwa vyaka vinyinji, tiyeni tipitilije kumutumikila mwakhama. Tufunikila kuyeja-yeja mwakhama kuti tikochita vinthu mokatijana na chosankha chetipanga kuti tikotumikila Mulungu. Kuchita vamene ivi n’kupepulini, koma Mulungu azatidalise ngako komasoti tizankhale na moyo wokhutila olo palipano!—Sal. 35:27.

19. Kansi tuphunzila chinji kufumila pa vechitikila Gene?

¹⁹ Ŵanthu ayakine owona kuti kutumikila Yehova kufuna kulitana vinthu vinyinji ngako. Keno nimwe wachilumbwana, kansi muwona kuti muluza vinthu viyakine chifukwa chakuti mutumikila Yehova? Mkwasu muyakine wachilumbwana zina yake Gene enena kuti: “Newo nenzewona kuti kunkhala wa Mboni za Yehova kunipaila chifunilo. Nenzewona monga ŵana anyinji ansinkhu wangu enzesangalala na vinthu vosiyana-siyana monga maphwando, kuchita vibwenzi komasoti kutchaya magemu andewo apa kompiyuta pamene newo nenzekatishila ntchito nthawe yangu poluta kumisonkhano komasoti muutumiki.” Kansi maganizo amene aŵa emukhuza tyani Gene? Yove enena kuti: “Newo neyamba kuchita vinthu viyakine viipa venzechita ayangu ndipo poyamba nenzesangalala. Koma chisangalalo chamene icho chiliyenkhalishe. Neyamba kuganizila mfundo za m’Baibolo zenenzefwaya ndipo nesankha kuti niyambe kutumikila Yehova na ntima wonse. Komasoti kufumila panthawe yamene iyo, neyamba kuwona kuti Yehova oyankha mapemphelo ŵangu onse.”

20. Kansi tufunikila kunkhala osimikijila ntima kuchita chinji?

²⁰ Wamasalimo muyakine eimbila Yehova kuti: “Wosangalala ni munthu wamene mwewo mwamusankha nomuleta pafupi na mwewo kuti ankhale m’mabwalo ŵanu.” (Sal. 65:4) Tiyeni tonse tisimikije ntima monga ni mwechichitila Yoswa wamene enena kuti: “Koma newo na banja yangu tikotumikila Yehova.”—Yos. 24:15.