Yehova Okukondani Ngako

1. N’cinji cuwela m’maganizo mwanu mukaganizila za Yehova?

KANSI mweyesapo kale kuganizila kuti Yehova ooneka tyani? Ngati mulaŵila naye m’pemphelo, n’cinji cuwela m’maganizo mwanu? Yehova tingamuone lini. Koma Baibo yumufotokoza m’njila zosiyanasiyana. Yove oitiwa kuti ni “zuŵa koma soti cishango” na kuti ni “mulilo woononga.” (Sal. 84:11; Aheb. 12:29) M’mensomphenya, Ezekieli efotokoza kuti Yehova olingana na mwala wa safilo, nsimbi yoŵeka koma soti utawaleza. (Ezek. 1:​26-28) Kafotokozedwe koteti ponena za Yehova nthawi ziyakine kangaticitishe cidwi, koma nthawi ziyakine kangaticitishe wowa.

2. N’cinji cingacitishe kuti cinkhale covuta kuvwendela pafupi na Yehova?

² Cifukwa cakuti Yehova tingamuone lini, nthawi ziyakine cingankhale covuta kukhulupilila kuti otikonda. Ayakine ovutika kukhulupilila kuti Yehova oŵakonda cifukwa ca zinthu zeŵacitikila kuvuli. Payakine cingankhale cifukwa cakuti aliye atata amene oŵakonda. Yehova omvwisha mwatumvwila koma soti mwazutikhuzila. Pofuna kutiyavya, otiuzhya minkhalidwe yake iweme kupitila m’Mau ŵake.

3. Ndaŵa yanji tufunika kuphunzila mosamala zokhuza cikondi ca Yehova?

³ Nkhalidwe ikulu ya Yehova ni cikondi. Baibo yulaŵila kuti “Mulungu ni cikondi.” (1 Yoh. 4:8) Zonse zakucita, ozicita cifukwa ca cikondi. Cikondi ca Mulungu n’cikulu koma soti n’cotang’a ngako cakuti ocionesha na kuli ŵanthu amene omukonda lini. (Mat. 5:​44, 45) M’nkhani ino, tiphunzile mosamala zokhuza Yehova na cikondi cake. Kuphunzila zokhuza Mulungu kutisonkhezele kuti tikulishe cikondi casu pali yove.

YEHOVA OTIKONDA NGAKO

4. Kansi cikondi ca Yehova cukupangishani kumvwa tyani? (Onani soti cithunzithunzi.)

⁴ “Yehova ali na cikondi cikulu.” (Yak. 5:11) M’Baibo, yove ozilinganizhya na amama acikondi. (Yes. 66:​12, 13) Ganizilani mwamene amama acikondi osamalilila mwana wao mtontho. Ove omunyamula, kumuika pamendo nolaŵila naye mwacikondi. Ngati walila olo kuzicita, omupasa zakufunikila. Molingana na izi, ngati takumana na mavuto tingankhale osimikizhya kuti Yehova otikonda. Wamasalimo elemba kuti: “Maganizo osausha peyenipakila mu mtima mwangu, Mau ŵanu otonthoza eyamba kusangalasa moyo wangu.”—Sal. 94:19.

5. Kansi cikondi cokhulupilika ca Yehova cukupindulishani tyani?

⁵ Yehova ni wokhulupilika. (Sal. 103:8) Yove oleka lini kutikonda olo pavuli pakuti tacita cinthu ciyakine ciipa. Aisiraeli ekhumudwisha Yehova nthawi zinyinji ngako. Koma pecilapa noleka kucita vinthu viipa, Yehova eŵasimikizhyila za cikondi cake cokhulupilika. Mwacisanzo, eŵauzhya kuti: “Niwe wamtengo wapatali kuli neo, nukulemekeza ndipo nukukonda.” (Yes. 43:​4, 5) Cikondi ca Mulungu ciliyocinje. Tetyo, tingankhale osimikizhya kuti nase otikonda. Olo pavuli pakuti tapanga colakwa cikulu, Yehova otisiya lini. Tikalapa nowelela kuli yove, tione kuti akalutikonda. Otilonjeza kuti ‘akotikhululukila na mtima wonse.’ (Yes. 55:7) Ngati watikhululukila, Baibo yulaŵila kuti tisangalale na “nyengo zosisimusa . . . kufumila kuli Yehova.”—Mac. 3:19.

6. Kansi Zekariya 2:8 yutiphunzisanji ponena za Yehova?

⁶ Ŵelengani Zekariya 2:8. Cifukwa cakuti otikonda, Yehova omvwisha kamangu mwatumvwila ndipo ni wofunishisha kutiteteza. Yove okhumudwa ngati tukumana na mavuto. Cifukwa ca izi, tingankhale osimikizhya kuti atiyankhe tikamusenga kuti: “Nisungeni monga ni mwana wa linso yanu.” (Sal. 17:8) Linso yukhuzika kamangu ndipo ni ciwalo cofunika ngako ca muŵili. Tetyo, Yehova pakutilinganizhya na mwana wa linso yake, zili monga olaŵila kuti, ‘Aliyense wamene ocitila vinthu viipa mweo ŵanthu ŵangu, ocitila neo.’

7. Ndaŵa yanji tufunika kutang’isha cidalilo cakuti Yehova otikonda?

⁷ Yehova ofuna kuti tinkhale osimikizhya kuti otikonda aliyense payeka. Koma oziŵa kuti cifukwa ca zinthu zeticitikila kuvuli, tingokaikila ngati otikonda. Olo payakine pali lomba tukumana na mavuto amene oticitisha kukaikila kuti Yehova otikonda. Kansi n’cinji cingatiyavye kutang’isha cidalilo cakuti Yehova otikonda? Ni kuphunzila mwamene Yehova ooneshela kuti okonda Yesu, Akhristu ozozewa na seo tonse.

MWAMENE YEHOVA OONESHELA CIKONDI CAKE

8. Ndaŵa yanji Yesu enze wosimikizhya kuti Ausuwake enzomukonda?

⁸ Yehova na Yesu aseŵenzela pamozi kwa vyaka vinyinji ngako kululu. Izi zacitisha kuti ankhale pa ushamwali wotang’a ngako. Yehova efotokoza momvwika bwino kuti okonda Mwana wake, monga ni mwatuŵelengela pa Mateyu 17:5. Kuti efuna, Yehova sembe elaŵila tyala kuti, ‘Uyu niye munthu wanukondwela naye.’ Koma enzofuna kuti tiziŵe mwakukondela Yesu. Tetyo, emuita kuti “Mwana wangu wokondeka.” Yehova enzokondwela naye Yesu makamaka cifukwa cakuti enze wofunishisha kupeleka moyo wake. (Aef. 1:7) Yesu enze wosimikizhya kuti Ausuwake enzomukonda. Mowelezhyawelezhya, yove elaŵila kuti Ausuwake enzomukonda.—Yoh. 3:35; 10:17; 17:24.

9. Ni mau otyani oonesha mwamene Yehova okondela Akhristu ozozewa? Fotokozani. (Aroma 5:5)

⁹ Yehova oonesha soti kuti okonda Akhristu ozozewa. (Ŵelengani Aroma 5:5.) Onani mau eseŵenzeshewa pa lemba iyi akuti “wazuzhya” cikondi. Buku iyakine yefotokoza mau aŵa kuti cikondi “cuwela pali seo monga ni m’mana.” Cisanzo ici, cutionesha mwamene Yehova okondela ozozewa. Akhristu ozozewa oziŵa kuti “okondewa na Mulungu.” (Yuda 1) Mtumwi Yohane efotokoza mwakumvwila ozozewa pecilemba kuti: “Ganizilani za cikondi cikulu caationesha Atata. Otiita kuti nise ŵana a Mulungu.” (1 Yoh. 3:1) Kansi Yehova okonda tyala Akhristu ozozewa? Yai. Yehova waonesha kuti otikonda tonse.

10. Kansi njila ikulu ngako yawaoneshelamo Yehova kuti otikonda ni yotyani?

¹⁰ Kansi njila ikulu ngako yawaoneshelamo Yehova kuti otikonda ni yotyani? Ni mwa kupeleka dipo. Kupitila m’dipo, Yehova waonesha kuti otikonda ngako kupambana munthu aliyense. (Yoh. 3:16; Aro. 5:8) Yehova epeleka Mwana wake wokondeka nomulola kuti afwile ŵanthu onse, na colinga cakuti macimo ŵasu akhululukiwe na kuti tinkhale naye pa ushamwali. (1 Yoh. 4:10) Kusinkhasinkha pa mtengo wecilipila Yehova na Yesu, kungatiyavye kumvwisha kuti otikonda ngako aliyense payeka. (Aga. 2:20) Dipo iliyopelekewe, tyala pofuna kuti cilungamo cicitike. M’malo mwake, ni mphaso yacikondi. Yehova eonesha kuti otikonda mwa kupeleka cinthu camtengo wapatali ngako kuli yove. Yehova elola Mwana wake kuvutika na kufwa cifukwa ca seo.

11. Kansi tuphunzilapo cinji pa Yeremiya 31:3?

¹¹ Monga ni mwataonela, Yehova akumvwa lini tyala kuti otikonda. M’malo mwake, otiuzhya mwakutikondela. (Ŵelengani Yeremiya 31:3.) Yove watilola kuvwendela pafupi na yove cifukwa otikonda. (Linganizhyani na Deuteronomo 7:​7, 8.) Paliye cinthu olo munthu angatilekanishe na cikondi ici. (Aro. 8:​38, 39) Kansi cikondi ici cukupangishani kumvwa tyani? Ŵelengani Salimo 23 noona mwamene cikondi ca Yehova na cisamalilo cake zekhuzila Davide na mwazingakhuzile seo tonse.

KANSI CIKONDI CA YEHOVA CUKUPANGISHANI KUMVWA TYANI?

12. Kansi lemba ya Salimo 23 yufotokozanji?

¹² Ŵelengani Salimo 23:​1-6. Salimo 23 ni nyimbo yamene yufotokoza cidalilo catingankhale naco pa cikondi ca Yehova na cisamalilo cake. Davide wamene elemba Salimo iyi, efotokoza za ushamwali wotang’a wenze pakati pa yove na Mciŵeta wake, Yehova. Davide enzolola Yehova kumusogolela, ndipo enzomudalila na mtima wonse. Yove enzoziŵa kuti Yehova akomuonesha cikondi mu umoyo wake wonse. N’cinji cemucitisha kunkhala na cidalilo coteti?

13. Ndaŵa yanji Davide enze wosimikizhya kuti Yehova akomusamalila?

¹³ “Nisoŵe lini kanthu.” Davide enzoona kuti Yehova enzomusamalila cifukwa cakuti enzomupasa zonse zofunikila nthawi zonse. Davide enzoziŵa kuti enze pa ushamwali wotang’a na Yehova na kuti yove enzokondwela naye. Niye cifukwa cake enze wosimikizhya kuti mosasamala kanthu za mavuto yaangakumane nayo msogolo, Yehova apitilizhye kum’samalila. Cifukwa cakuti enze wosimikizhya kuti Yehova enzomukonda nomusamalila, Davide enzocita lini nkhaŵa. M’malo mwake, enzonkhala wokondwela koma soti wokhutila.—Sal. 16:11.

14. Kansi Yehova angatisamalile tyani mwacikondi?

¹⁴ Yehova otisamalila mwacikondi makamaka ngati takumana na mavuto. Kalongosi Claire,a wamene watumikila pa Beteli kwa vyaka vopitilila 20, enze esoŵa cocita kuti ayavye banja yake peyenzokumana na mavuto mokonkhezhyana. Ausuwake elwala matenda a sitiloko, m’mozi mwa azisaza ŵake ecosewa mumpingo, banja yao yekumana na vuto ya zacuma ndipo elondewa ng’anda yao cifukwa enze na nkhongole ikulu ku banki. Kansi Yehova eŵasamalila tyani mwacikondi? Kalongosi Claire elaŵila kuti: “Yehova eoneshesha kuti banja yangu yenzonkhala na zinthu zonse zofunikila siku iliyonse. Mowelezhyawelezhya, Yehova etipasa zinthu zinyinji kupambana zetenzofunikila. Nthawi zinyinji nukonda kuganizila pa mwamene Yehova watiyavyila. Ndipo nikaluŵe lini cikondi cake. Izi zaniyavya kuti nipitilizhye kum’tumikila mwacimwemwe olo kuti nikumane na mayeselo ayakine.”

15. N’cinji cepangisha Davide kumvwa kuti enze wosisimuliwa? (Onani soti cithunzithunzi.)

¹⁵ “Osisimula moyo wangu.” Nthawi ziyakine, Davide enzocita nkhaŵa cifukwa ca mavuto koma soti mayeselo yeenzokumana nayo. (Sal. 18:​4-6) Koma cikondi ca Yehova koma soti cisamalilo cake, zenzomusisimula. Yehova esogolela shamwali wake wamene enze ecita nkhaŵa ku “malo a uzu wobiliŵila” koma soti ku “malo opumulila a manzi anyinji.” Izi zeyavya Davide kunkhala soti na mphamvu ndipo ekwanisha kupitilizhya kutumikila Yehova mwacimwemwe.—Sal. 18:​28-32.

16. Kansi cikondi ca Yehova cakusisimulani tyani?

¹⁶ Molingana na izi, nase masiku ŵano “cifukwa ca cikondi cokhulupilika ca Yehova,” tukwanisha kupilila tikakumana na mavuto. (Mlr. 3:22; Akol. 1:11) Ganizilani cisanzo ca Rachel. Evutika ngako maganizo mulume wake pecimusiya noleka kutumikila Yehova pa nthawi ya mlili wa COVID-19. Kansi Yehova emuyavya tyani? Yove elaŵila kuti: “Yehova enicitisha kuti nikokumvwa kuti nukondewa. Enipasa ashamwali amene enzotandala nane, kuniletela vakulya, kunitumila mameseji koma soti malemba acilimbikiso, kunimwetulila nopitilizhya kunikumbusha kuti Yehova onisamalila. Nuyamikila Yehova nthawi zonse cifukwa conipasa banja ikulu koma soti yacikondi.”

17. Ndaŵa yanji Davide ‘enzoyopa lini kanthu’?

¹⁷ “Niyope lini kanthu, cifukwa mweo muli nane.” Umoyo wa Davide wenzonkhala pangozi nthawi zinyinji, ndipo enze na adani anyinji amphamvu. Koma cikondi ca Yehova cemupangisha kuzimvwa kuti enze wotetezeka. Davide enzokumvwa kuti Yehova enze naye pa cocitika ciliconse, ndipo izi zenzomulimbikisha. Niye cifukwa cake eimba kuti: “[Yehova] enipulumusa pa kuthaŵathaŵa kwangu.” (Sal. 34:4) Olo kuti nthawi ziyakine Davide enzocita wowa, ekwanisha kugonjesa wowa wake cifukwa enzoziŵa kuti Yehova enzomukonda.

18. Kansi kuziŵa kuti Yehova okukondani kungakutang’isheni tyani ngati mwacita wowa?

¹⁸ Kansi kuziŵa kuti Yehova okukondani kungakutang’isheni tyani mukakumana na mavuto ocitisha wowa? Mpainiya muyakine wa zina yakuti Susi efotokoza mwecimvwila yove na mulume wake, mwana wao pecizipaya. Elaŵila kuti: “Cinthu ciipa cikacitika mu umoyo wako, cukukhuza ngako, cukusoŵesha cocita ndipo cukucitisha wowa poona monga kuti vinthu viyakine viipa vikucitikile soti. Koma cikondi ca Yehova cetiyavya kumvwa kuti tenze otetezeka.” Kalongosi Rachel watatomola lombapano elaŵila kuti: “Usiku uyakine penecimvwa cisoni, nkhaŵa koma soti wowa, nepemphela kwa Yehova mokuwa. Nthawi yamene iyo, necimvwa kuti eninkhazika mtima pansi monga ni mwakucitila amama kuli lucece, ndipo neyona tulo. Nikaluŵe lini nthawi iyi.” Mkulu muyakine wa zina yakuti Tasos enkhala m’jele kwa vyaka 4 cifukwa cokana kuloŵa usoja. Kansi eona tyani kuti Yehova enzomukonda nomusamalila? Elaŵila kuti: “Yehova enzonipasa zinthu zinyinji kupambana zenenzofunikila. Izi zetang’isha cidalilo cangu cakuti ningamukhulupilile na mtima wonse. Kuyangizhyila apo, na mzimu wake utuŵa enzoniyavya kunkhala wosangalala olo kuti m’jele ni malo lini abwino. Zeniyavya kuona kuti ngati ningamudalile ngako Yehova, niye paningaone kuti onikonda ngako. Tetyo, neyamba kutumikila monga mpainiya wanthawi zonse penenze m’jele.”

VWENDELANI PAFUPI NA MULUNGU WANU WACIKONDI

19. (a) Kansi kuziŵa kuti Mulungu otikonda kukhuza tyani zatulaŵila m’mapemphelo ŵasu? (b) Kansi ni mau otyani ofotokoza cikondi ca Yehova amene okukhuzani ngako mweo pamweka? (Onani kabokosi kakuti “Mau Amene Otiyavya Kumvwa Kuti Yehova Otikonda.”)

¹⁹ Visanzo vatalaŵizhyana, vutisimikizhyila kuti Yehova wamene ni “Mulungu wacikondi,” ali nase. (2 Akor. 13:11) Ocita cidwi na aliyense wa seo payeka. Nise osimikizhya kuti nise “ozunguliliwa na cikondi cake cokhulupilika.” (Sal. 32:10) Ngati tusinkhasinkha pa mwamene Yehova otioneshela cikondi, tione kuti osamala za seo ndipo tivwendele pafupi na yove. Tingapemphele kwa yove momasuka nomuuzhya mwatufunikila cikondi cake. Tingamuuzhye nkhaŵa zasu zonse apo tili na cidalilo cakuti otimvwisha na kuti ni wofunishisha kutiyavya.—Sal. 145:​18, 19.

20. Kansi cikondi ca Yehova cutiyavya tyani kuvwendela pafupi na yove?

²⁰ Monga ni mwatuvwendelela pafupi na mulilo pa siku yakuti kwazizila ngako, tuvwendela ku cikondi ca Yehova. Cikondi ca Yehova n’camphamvu ngako. Tetyo, mukosangalala kuti Yehova okukondani. Ndipo lekani kuti tonse tikoonesha kuti tumukonda mwa kukamba kuti: “Nukonda Yehova.”—Sal. 116:1.