Mukonkhala Osimikizhya Kuti Yehova Okukondani

1. Ndaŵa yanji mwezitwala kwa Yehova? (Onani soti cithunzithunzi.)

KANSI mukumbukila nthawi pemwezipeleka kwa Yehova? Mosakaikila, mwepanga cosankha ici cifukwa cakuti mwefwika pomuziŵa bwino nomukonda. Mwemulonjeza kuti mukoika cifunilo cake pasogolo mu umoyo wanu na kuti mupitilizhye kumukonda na mtima wanu wonse, moyo wanu wonse, maganizo ŵanu onse na mphamvu zanu zonse. (Mko. 12:30) Kufumila pa nthawi iyi, cikondi canu pa yove cakulilako. Lomba kansi mungayankhe tyani ngati munthu muyakine angakukonsheni kuti: “Kansi mumukonda cendi Yehova?” Mosawayawaya mungamuyankhe kuti: “Eee, numukonda ngako kupambana mwanukondela munthu olo cinthu ciliconse.”

2-3. Kansi Yehova ofuna kuti tikonkhala osimikizhya za cinji, ndipo tilaŵizhyane cinji m’nkhani ino? (Yeremiya 31:3)

² Kansi mungayankhe tyani ngati munthu muyakine angakukonsheni kuti: “Kansi musimikizhyila kuti Yehova okukondani cendi?” Kansi mungawayewaye kuyankha poganiza kuti nimwe osayenelela kukondewa na Yehova? Kalongosi muyakine wamene ekula movutika, elaŵila kuti: “Nuziŵa kuti numukonda Yehova ndipo nukaikila lini. Koma nthawi ziyakine, nukonda kukaikila ngati Yehova onikonda cendi.” Lomba kansi n’cinji cingatiyavye kuziŵa mwakutionela Yehova?

³ Yehova ofuna kuti mukonkhala osimikizhya kuti okukondani. (Ŵelengani Yeremiya 31:3.) Cendi n’cakuti Yehova ekudonselani kuli yove. Ndipo pemwezipeleka kuli yove nobatizika, mwelandila cinthu camtengo wapatali camene ni cikondi cake cokhulupilika. Cikondi ici, n’cikulu ngako ndipo cumupangisha kunkhala wokatizhyana na mweo. Cumusonkhezela kuti akoona atumiki ŵake okhulupilika, kuyangizhyilapo na mweo kuti nimwe “cuma capadela.” (Mal. 3:17) Yehova ofuna kuti mukonkhala osimikizhya kuti yove okukondani monga ni mweenzele Paulo, wamene mwacidalilo elaŵila kuti: “Nasimikizhya mtima kuti imfwa, moyo, angelo, maboma, zinthu zilipo, zinthu zikuza, mphamvu, msinkhu, kunoka kapena colengewa ciliconse zikwanishe lini kutilekanisha na cikondi ca Mulungu.” (Aro. 8:​38, 39) Tetyo m’nkhani ino, tilaŵizhyane cifukwa cake tufunika kutang’isha cidalilo casu cakuti Yehova otikonda na zingatiyavye kusimikizhyila izi.

CIFUKWA CAKE TUFUNIKA KUSIMIKIZHYILA KUTI YEHOVA OTIKONDA

4. Kansi tingalimbane tyani na zocita zacinyengo za Satana?

⁴ Ngati tusimikizhyila kuti Yehova otikonda, tikwanishe kulimbana na “zocita zacinyengo” za Satana. (Aef. 6:11) Satana angacite zilizonse zaangakwanishe kuti atikangishe kutumikila Yehova. Cimozi mwa zocita zake zacinyengo, ni kulimbikisha wenye wakuti Yehova otikonda lini. Mufunika lini kuluŵa kuti Satana oseŵenzesha mpata ulionse kuti atikangishe kutumikila Yehova. Yove ocita izi pa nthawi yakuti nise ofoka mwamaganizo cifukwa ca zinthu zeticitikila kuvuli. Kuyangizhyila apo, ocita izi patukumana na mavuto olo pa nthawi yakuti tili na nkhaŵa poganizila za zinthu zati zikaticitikile msogolo. (Miy. 24:10) Satana ali monga ni nkhalamu yamene yufuna kukata nyama yamene yuoneka kuti ni yosatetezeka. Tetyo, ocita zilizonse zaangakwanishe pa nthawi yamene nise ofoka kuti tileke kutumikila Yehova. Koma ngati tutang’isha cidalilo casu cakuti Yehova otikonda, tingankhale okonzeka ‘kulimbana naye’ Satana na zocita zake zacinyengo.—1 Pet. 5:​8, 9; Yak. 4:7.

5. Kansi n’cinji cingacitike ngati tukumvwa kuti Yehova otikonda?

⁵ Ngati tusimikizhyila kuti Yehova otikonda, tivwendele pafupi na yove. Ganizilani cifukwa cake talaŵila teti. Yehova etilenga m’njila yakuti tikokonda ayakine nokondewa. Mwacibadwa, ngati munthu otikonda, nase tumukonda. Tetyo ngati tukumvwa kuti Yehova otikonda, nase tikomukonda. (1 Yoh. 4:19) Cikondi casu pali yove pacukula, naye oyamba kutikonda ngako. Baibo yutiuzhya mosapita m’mbali kuti: “Vwendelani pafupi na Mulungu ndipo naye avwendele pafupi na mweo.” (Yak. 4:8) Lomba kansi tingatang’ishe tyani cidalilo casu cakuti Yehova otikonda?

KANSI N’CINJI CINGATIYAVYE KUSIMIKIZHYILA KUTI YEHOVA OTIKONDA?

6. Kuti musimikizhyile kuti Yehova okukondani cendi, kansi mufunika kumusenga cinji?

⁶ Nthawi zonse mukopemphela mosapita m’mbali. (Luka 18:1; Aro. 12:12.) Ngati n’poyenela, mukopemphela kwa Yehova mowelezhyawelezhya siku iliyonse nomusenga kuti akuyavyeni kuziona monga ni mwakukuonelani yove. Nthawi ziyakine, mungoziona atyalatyala cakuti cingankhale covuta kukhulupilila kuti Yehova okukondani cendi. Koma kumbukilani kuti Yehova ni mkulu kupambana mtima wanu. (1 Yoh. 3:​19, 20) Yove okuziŵani bwino kupambana mwamuziziŵila mweka, ndipo oona zinthu zamene mweo mukwanisha lini kuziona. (1 Sam. 16:7; 2 Mbi. 6:30) Tetyo, osawayawaya kumukhutulila zonse za mumtima mwanu nomusenga kuti akuyavyeni kusimikizhyila kuti okukondani cendi. (Sal. 62:8) Pavuli pake, mukocita zinthu mokatizhyana na mapemphelo ŵanu, mwa kuseŵenzesha malangizo aya yokonkhapo.

7-8. Kansi wamasalimo otisimikizhyila tyani za cikondi ca Mulungu?

⁷ Mukokhulupilila zakulaŵila Yehova. Yehova euzhyila olemba Baibo kufotokoza mwaalili yove. Mwacisanzo, ponena za Yehova, wamasalimo Davide efotokoza kuti: “Yehova ali pafupi na ŵanthu ovutika maganizo, yove opulumusa ŵanthu amene akhumudwa.” (Sal. 34:​18, ftn.) Ngati muvutika maganizo, mungozimvwa kuti muli mweka. Koma Yehova olonjeza kuti pa nthawi zoteti, onkhala ngako pafupi na mweo cifukwa oona kuti mufunikila ngako thandizo yake. Mu Salimo iyakine, Davide elemba kuti: “Sungani misozi yangu mthumba yanu yacikumba.” (Sal. 56:8) Yehova oona ngati muvutika. Zili monga kuti yove osunga misozi yanu noiona kuti ni yamtengo wapatali, monga ni mwamene manzi yali mthumba yacikumba yangankhalile yamtengo wapatali kuli munthu wamene oyenda m’cipululu. Pa lemba ya Salimo 139:​3, tuŵelenga kuti: “[Yehova] muziŵa ciliconse canucita.” Kulaŵila cendi, Yehova oona zinthu zonse zamucita, koma oika ngako maganizo ŵake pa zinthu zabwino zamucita. (Aheb. 6:10) Ndaŵa yanji? N’cifukwa cakuti yove oyamikila kuyesayesa kulikonse kwamucita kuti mum’kondweleshe.a

⁸ Yehova oseŵenzesha Malemba otonthoza oteti a m’Baibo, kukuuzhyani kuti osamala ngako za mweo na kuti okukondani ngako. Monga ni mwataphunzilila, Satana olimbikisha wenye wakuti Yehova okukondani lini. Tetyo ngati nthawi ziyakine mukaikila kuti Yehova okukondani, mungacite bwino kuzikonsha kuti: ‘Kansi nikhulupilile ŵani—“tata wawenye” olo “Mulungu wacendi”?’—Yoh. 8:44; Sal. 31:5.

9. Kansi Yehova oŵalonjeza cinji ŵanthu amene omukonda? (Ekisodo 20:​5, 6)

⁹ Mukoganizila mwamene Yehova okondela ŵala amene omukonda. Ganizilani mau yecilaŵila Yehova kuuzhya Mose na Aisiraeli. (Ŵelengani Ekisodo 20:​5, 6.) Yove elonjeza kuti apitilizhye kuonesha cikondi cokhulupilika kuli ŵala amene omukonda. Mau aŵa otisimikizhyila kuti Mulungu wasu wokhulupilika angaleke lini kukonda atumiki ŵake amene omukonda. (Neh. 1:5) Tetyo nthawi ziyakine ngati mufuna kusimikizhyila kuti Yehova okukondani cendi, mukozikonsha kuti: ‘Kansi numukonda cendi Yehova?’ Ngati mumukonda cendi ndipo muyesayesa kucita zilizonse zamungakwanishe kuti mum’kondweleshe, mukonkhala osimikizhya kuti naye okukondani ngako. (Dan. 9:4; 1 Akor. 8:3) M’mau ayakine tingalaŵile kuti ngati mukaikila lini kuti mumukonda cendi Yehova, mufunika lini kukaikila kuti naye okukondani. Tetyo, mungankhale osimikizhya kuti yove apitilizhye kukukondani na kuti akusiyeni lini.

10-11. Kansi Yehova ofuna kuti tikoiona tyani dipo? (Agalatiya 2:20)

¹⁰ Mukosinkhasinkha pa dipo. Nsembe ya dipo ya Yesu Khristu, niye mphaso ikulu ngako yecipeleka Yehova kuli ŵanthu onse. (Yoh. 3:16) Lomba kansi dipo ni mphaso kuli mweo pamweka? Eee. Ganizilani cokumana naco ca Paulo. Kumbukilani kuti yove enze ecita macimo akulu-akulu akaliyonkhala Mkhristu, ndipo enzofunika kupitilizhya kulimbana na kusoŵa ungwilo kwake. (Aro. 7:​24, 25; 1 Tim. 1:​12-14) Olo n’tetyo, yove enkhala wosimikizhya kuti Yehova epeleka dipo monga mphaso kuli yove payeka. (Ŵelengani Agalatiya 2:20.) Kumbukilani kuti Yehova euzhyila Paulo kulemba mau opezeka pa lemba iyi m’Baibo. Ndipo Mau onse ali m’Baibo elembewa kuti atilangize. (Aro. 15:4) Mau a Paulo oonesha kuti Yehova ofuna kuti mukoona dipo monga mphaso yecipeleka kuli mweo pamweka. Ngati muona dipo m’njila iyi, mutang’ishe cidalilo canu cakuti Yehova okukondani mweo pamweka.

¹¹ Tuyamikila ngako Yehova cifukwa copeleka Mwana wake kuti atifwile. Koma cifukwa ciyakine ceciwelela Yesu pa calo, ni kuzouzhya ŵanthu cendi cokhuza Mulungu. (Yoh. 18:37) Cendi ici, cuyangizhyilapo mwamene Yehova okondela ŵana ŵake.

MWAMENE YESU OTIYAVYILA KUSIMIKIZHYILA KUTI YEHOVA OTIKONDA CENDI

12. Ndaŵa yanji tingakhulupilile zecilaŵila Yesu zokhuza Yehova?

¹² Yesu peenze pa calo, enzosangalala kuuzhya ŵanthu zokhuza mwaalili Yehova. (Luka 10:22) Tetyo, tingakhulupilile zecilaŵila Yesu zokhuza Yehova. Ndaŵa yanji? N’cifukwa cakuti Yesu enkhala kululu na Yehova kwa nthawi itali akaliyowela pa calo. (Akol. 1:15) Yove oziŵa bwino mwakumukondela Ausuwake. Yesu enzoona mwamene Yehova enzooneshela cikondi kuli angelo na ŵanthu onse okhulupilika pa calo. Kansi Yesu oyavya tyani ayakine kunkhala osimikizhya kuti Yehova oŵakonda?

13. Kansi Yesu ofuna kuti tikomuona tyani Yehova?

¹³ Yesu ofuna kuti tikoona Yehova monga ni mwakumuonela yove. M’Mabuku a Uthenga Wabwino, Yesu eita Yehova kuti “Atata” kwa maulwendo opitilila 160. Ndipo ngati olaŵila na okonkha ŵake, enzokonda kuseŵenzesha mau monga akuti “Ausuwanu” kapena “Ausuwanu akululu.” (Mat. 5:16; 6:26) Yesu akaliyowela pa calo, atumiki a Yehova okhulupilika enzoita Yehova kuti ‘Nyamalenga,’ ‘Wapalulu Ngako,’ ‘Nyamalenga Mkulu’ na mazina ayakine audindo. Koma kanyinji-kanyinji, Yesu enzoita Yehova kuti Atata. Mau aŵa oonesha kuti Yehova ofuna kuti atumiki ŵake akozimvwa kuti ali pafupi na yove monga ni mwamene mwana angamvwile, ngati ali pafupi na ausuwake acikondi. Tetyo, Yesu enzotiphunzisa kuti Yehova otikonda monga ni mwamene atata aumunthu okondela ŵana ŵao. Lomba, tiyeni tilaŵizhyane visanzo viŵili vamene vuonesha nthawi pamene Yesu eseŵenzesha mau akuti “Atata.”

14. Kansi Yesu eonesha tyani kuti Ausuwasu akululu otiona kuti nise amtengo wapatali? (Mateyu 10:​29-31) (Onani soti cithunzithunzi.)

¹⁴ Coyamba, tiyeni tione mau yecilaŵila Yesu pa Mateyu 10:​29-31. (Ŵelengani.) Tunthaki, ni tunyoni tutontho-tutontho ngako ndipo tukonda lini Yehova olo kumulambila. Olo n’tetyo, Ausuwasu oona tunyoni utu kuti ni twamtengo wapatali cakuti oziŵa ngati kamozi kapona pansi. Ngati Yehova oona tunyoni tutontho-tutontho teti kuti ni twamtengo wapatali, tingankhale osimikizhya kuti yove osamala ngako za seo aliyense payeka cifukwa cakuti tumukonda nomulambila. Yesu elaŵila soti kuti Ausuwasu, okwanisha kuŵelenga sisi ya m’mutu mwasu. Tetyo ngati Yehova okwanisha kuziŵa tunthu tutontho-tutontho tokhuza seo, niye kuti tingankhale soti osimikizhya kuti yove osamala ngako za seo. Kulaŵila cendi, Yesu ofunishisha kuti tikonkhala osimikizhya kuti Ausuwasu akululu otiona kuti nise amtengo wapatali.

15. Kansi mau a Yesu opezeka pa Yohane 6:44 yokuuzhyani cinji ponena za Ausuwanu acikondi?

¹⁵ Onani cisanzo ciyakine cuonesha pamene Yesu eseŵenzesha mau akuti “Atata.” (Ŵelengani Yohane 6:44.) Ausuwanu akululu ekuyavyani kuti muziŵe cendi cokhuza yove. Ndaŵa yanji ecita izi? N’cifukwa cakuti eona minkhalidwe yabwino muli mweo. (Mac. 13:48) Tetyo Yesu pecilaŵila mau opezeka pa Yohane 6:​44, payakine enzolaŵila za Mau a Yehova opezeka pa Yeremiya 31:3. Pa lemba iyi, Yehova euzhya atumiki ŵake kuti: “Nakudonsela kuli neo na cikondi cokhulupilika.” (Yer. 31:3; Linganizhyani na Hoseya 11:4) Izi zutanthauza kuti nthawi zonse Ausuwasu acikondi oona minkhalidwe yabwino muli seo, yamene tingazindikile lini kuti tili nayo.

16. (a) Kansi Yesu otiuzhyanji, ndipo ndaŵa yanji tufunika kumukhulupilila? (b) Kansi tingatang’ishe tyani cidalilo casu cakuti Yehova niye Atata ŵatufunikila? (Onani soti kabokosi kakuti “Atata Ŵatufunikila Tonse.”)

¹⁶ Yesu pecilaŵila kuti Yehova ni Ausuwasu, zili monga kuti olaŵila kuti: “Yehova ni Ausuwangu lini tyala, namwe ni Ausuwanu ndipo nukusimikizhyilani kuti yove okukondani koma soti osamala ngako za mweo pamweka.” Tetyo ngati nthawi ziyakine mukonda kukaikila kuti Yehova okukondani, mukokumbukila zecilaŵila Yesu ndipo mukomukhulupilila cifukwa cakuti yove nthawi zonse olaŵila zacendi koma soti oŵaziŵa bwino Ausuwasu.—1 Pet. 2:22.

PITILIZHYANI KUTANG’ISHA CIDALILO CANU CAKUTI YEHOVA OKUKONDANI

17. Ndaŵa yanji tufunika kupitilizhya kutang’isha cidalilo casu cakuti Yehova otikonda?

¹⁷ Tufunika kupitilizhya kutang’isha cidalilo casu cakuti Yehova otikonda. Monga ni mwataphunzilila, mdani wasu wacinyengo Satana aleke lini kuticitisha kuti tileke kutumikila Yehova. Yove ofuna kuti tifoke. Tetyo, apitilizhye kucita zilizonse zaangakwanishe kuti tikhulupilile kuti Yehova otikonda lini. Koma tufunika lini kulola Satana kuti atigonjese.—Yobu 27:5.

18. Kansi mungatang’ishe tyani cidalilo canu cakuti Yehova okukondani?

¹⁸ Kuti mutang’ishe cidalilo canu cakuti Yehova okukondani, mufunika kupitilizhya kumusenga kuti akuyavyeni kuti mukoziona monga ni mwakukuonelani yove. Mukosinkhasinkha pa mwamene olemba Baibo efotokozela zokhuza cikondi cake. Mukokumbukila kuti nthawi zonse Yehova okonda ŵala amene omukonda. Mukosinkhasinkha soti cifukwa cake mufunika kuona dipo monga mphaso kuli mweo. Kuyangizhyila apo, mukokhulupilila mau yecikamba Yesu yakuti Yehova ni Ausuwanu akululu. Tetyo ngati munthu muyakine angakukonsheni kuti: “Kansi mukhulupilila kuti Mulungu okukondani cendi?” Mungamuyankhe mwacidalilo kuti, “eee onikonda ndipo siku iliyonse nucita zilizonse zaningakwanishe kuti nioneshe kuti nane numukonda.”