Lengwalo la Bobedi le le Yago go Bathesalonika

1 Nna Paulo ke ngwalela phuthego ya Bathesalonika lengwalo le ke na le Silibano* le Timotheo. Phuthego ye ke ya Modimo Tate le Morena Jesu Kriste. Ke re:

2 Eka Modimo Tate le Morena Jesu Kriste ba ka le bontšha botho bjo bogolo, ba ba ba dira gore le be le khutšo.

3 Banabešo, re swanetše go dula re leboga Modimo ka baka la lena. Re swanetše go dira bjalo ka gobane tumelo ya lena e tšwela pele e gola ebile lerato leo le ratanago ka lona le a oketšega. 4 Ka baka leo, re ikgantšha ka lena gare ga diphuthego tša Modimo ka gobane le ge le na le mathata ebile le tlaišega, le a kgotlelela ebile le bontšha gore le na le tumelo. 5 Se ke bohlatse bja gore Modimo o ahlola ka tsela e lokilego. Ka baka la se, le swanelega go hwetša Mmušo wa Modimo, woo le tlaišegago ka baka la wona.

6 Ka ge Modimo a lokile, o tla otla bao ba le tlaišago. 7 Eupša lena bao le tlaišegago, Modimo o tla le imolla gotee le rena ge go utollwa Morena Jesu. O tlo tla a etšwa legodimong a na le barongwa ba gagwe ba matla 8 ba le kgabong ya mollo. Nakong yeo, o tla otla bao ba sa tsebego Modimo le bao ba sa amogelego ditaba tše dibotse tša mabapi le Morena wa rena Jesu. 9 Morena wa rena o tla ba ahlola. Ba tla fedišetšwa sa ruri, gomme Morena a ka se sa ba le taba le bona goba a ba thuša ka matla a gagwe a magolo. 10 Letšatšing leo Morena a tlago le bakgethwa ba gagwe, ba tla tagafatšwa. Batho ka moka bao ba ilego ba bontšha tumelo go yena ba tla mo makalela. Ka ge le ile la dumela dilo tšeo re le boditšego tšona, le lena le tla ba gare ga bona.

11 Ke ka baka leo re dulago re le rapelela gore Modimo wa rena a bone le swanelwa ke bophelo bjo a le bileditšego gore le tle le bo phele, a be a dire gore dilo ka moka tšeo le nyakago go di dira di atlege ka gobane le na le tumelo. 12 Se se tla direga e le gore leina la Morena wa rena Jesu le tagafatšwe ka seo le se dirago, le gore le lena le tagafatšwe gotee le yena. Se se tla bontšha gore Modimo wa rena le Morena Jesu Kriste ba na le botho bjo bogolo.