Go Thuša Bafsa go Phonyokga “Setšo sa Lehu”

Ke eng seo se ikarabelago bakeng sa go kgahlegela sehlogo sa lehu leo le bonwago magareng ga bafsa lehono? Henry Hyde, moemedi wa naga ya Illinois, U.S.A., o itše: “Go na le sekgoba sa moya go bafsa ba seo se tletšego setšo sa lehu le bošoro.”

MMADI wa Time o ngwadile gore: “Ke batswadi bao ba tšwafago, boithabišo bjo šoro le go hloka motheo wa tša boitshwaro le wa moya tšeo di ikarabelago bakeng sa setšo se se tswakanego sa lehu seo se lego gona gare ga bafsa ba rena lehono.”

Bodutu ke bjo bongwe bja mathata a magolo ao a hlaselago bafsa ba mahlalagading. Ba bangwe ba dula magaeng ao go ona batswadi ka bobedi ba šomago gomme ba sa be gona karolo e ntši ya letšatši; ba bangwe ba na le motswadi o tee feela. Go ya ka mothopo o mongwe, bafsa ba mahlalagading ba United States ba fetša diiri tše ka bago tše 3,5 ba nnoši letšatši le lengwe le le lengwe le go fetša diiri tše 11 bonyenyane ba e-na le batswadi ba bona beke e nngwe le e nngwe go phala kamoo bana ba dirilego ka gona nywageng ya bo-1960. Ge e le gabotse, bafsa ba bangwe ga ba na thekgo ya go ba le batswadi ba bona goba thekgo ya maikwelo le gatee.

Seo Batswadi ba ka se Dirago

Ka baka la “sekgoba sa moya” seo bafsa ba katanago le sona, tema yeo batswadi ba e kgathago e bohlokwa gakaaka’ng? Batswadi ba bohlale ba kwešiša gore ka lehlakoreng le lengwe, bana ba bona ba nyaka boithabišo bjo bo agago gomme ka go le lengwe, ba nyaka thekgo ya ka mehla ya motho ka noši. Ba tutueditšwe ke kgahlego e lerato, batswadi ba ka bolela le bona ka dikgetho tša bona tša mmino, mananeo a thelebišene, dibidio, dipadi, dipapadi tša bidio le difilimi. Gaešita le ge bafsa ba ka se e bolele, ba bantši ba bona ba kganyoga tlhahlo e borutho le e lerato ya batswadi ba bona. Ba nyaka dikarabo tše di lebanyago ka gobane ba phela lefaseng leo le tletšego dilo tše di belaetšago. Batho ba bagolo ba swanetše go kwešiša gore bana ba lebane le lefase le le raraganego kudu le go feta kamoo ba dirilego ka gona ge e be e sa le bafsa.

Batswadi bao ba kganyogago go šireletša bana ba bona ba tla boledišana le bona ka mehla, ba ba theetša e le ka kgonthe le go ba lemoša ka dikotsi tšeo di akaretšwago setšong sa mehleng yeno. Ge batswadi ba bea ditekanyetšo tše di tiilego gomme e le ba tsepamego le ba leka-lekanego gotee le go ba ba borutho baneng ba bona, ka tlwaelo ba tla ba le mafelelo a mabotse.—Mateo 5:37.

Batswadi bao e lego Dihlatse tša Jehofa ba dira boiteko bja go ba le dipoledišano tša ka mehla le bana ba bona, ba diriša Beibele le dikgatišo tše di theilwego Beibeleng le dibidio.a Ba diriša dibaka tše bjalo e sego go kgalemela bana ba bona, eupša go e na le moo ba ahla-ahla dihlogo tšeo di agago moyeng. Dipokanong tše tša lapa, ba theetša mathata goba ditlhohlo tšeo di kgomago yo mongwe le yo mongwe wa bana ba bona e le gore bafsa ba be le sebaka sa go hwetša tlhokomelo ya motho ka noši.

Bafsa bao ba sa hwetšego tlhahlo ya moya go tšwa go batswadi ba bona ba ka hwetša matla go tšwa go Psalme 27:10, yeo e rego: “Xobane tate le mmê bôná ba ntloxetše; ’me Wêna Morêna O a nkamoxêla.” Jehofa, Tate wa dikgaugelo tše lerato, o thuša bafsa bjang? Diphuthego tša Dihlatse tša Jehofa di bile botšhabelo moo ba bantši ba ilego ba hwetša maikwelo a borutho a batho ba bangwe gomme ba lokiša dipelaelo tša bona. Josías, lesogana leo le ilego la hwetša seo e le sa therešo le hlalosa gore: “Mokgatlo wa Jehofa o phetha karolo e bohlokwa. Ke be ke nagana gore bophelo e be e se bjo bohlokwa. Ke be ke phela ka ntle le morero, gomme ke se na kholofelo. Go tseba gore ga ke noši go ile gwa fetoša bophelo bja-ka ka mo go feletšego. Ke ile ka bona go banabešo ka phuthegong lapa leo le bego le ntahlegetše. Bagolo le malapa ka phuthegong ba swana le tshetledi maikwelong.”

Ge e le gabotse, bafsa ba bantši le batho ba bagolo ba kaonefaditše bophelo bja bona bjo bobotse bja monagano le bja moya ka go ba gona ka mehla dibokeng tša phuthego tša Dihlatse tša Jehofa. Moithuti wa setlogo sa batho Patricia Fortuny o ile a hlalosa ka mafelelo a a nepagetšego taodišong ya gagwe ya Los Testigos de Jehová: una alternativa religiosa para enfrentar el fin del milenio (Dihlatse tša Jehofa: Kgetho ya Bodumedi ya go Lebeletšana le Bofelo bja Ngwaga-kete): “Dihlatse tša Jehofa di nea tshepedišo e kwalago le e feletšego ya thulaganyo bakeng sa go dirišwa bophelong bja letšatši le letšatši, tshepedišo ya melao yeo e šomago e le tlhahlo bakeng sa go nagana le go dira.” “Tshepedišo ya thulaganyo” le “tshepedišo ya melao” tšeo go bolelwago ka tšona mo di theilwe Beibeleng. Ka gona, gaešita le ge Dihlatse tša Jehofa di lebana le mathata le dikgateletšo tše swanago go etša baagišani ba tšona, di matlafatšwa ke bohlale bja moswana-noši bja puku yeo ya bogologolo. Ee, Dihlatse di hwetša botšhabelo ditumelong le melaong ya motheo yeo e kwalago yeo e hwetšwago ka Beibeleng.

Ge “Lehu le ka se Hlwê le E-ba Xôna”

Thuto yeo e rutwago Diholong tša Mmušo tša Dihlatse tša Jehofa e gatelela leboelela kholofetšo ya Modimo ya lefase le lefsa leo le tlago go thoma go se go ye kae, moo “xo axilexo tokô” le moo ‘go ka se sa bago le yo a ba tšhošago.’ (2 Petro 3:13; Mika 4:4) Go oketša moo, moporofeta Jesaya o bega gore nakong yeo Modimo “lehu ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle.” Lehu le ile la hlasela moloko wa batho ka baka la mafelelo a phošo ya motho wa pele Adama, eupša kholofetšo ya Modimo ke gore kgaufsinyane “lehu le ka se hlwê le e-ba xôna.”—Jesaya 25:8; Kutollo 21:3, 4; Ba-Roma 5:12.

Ge e ba o mofsa yo a nyakago thušo, re go laletša gore o hwetše kholofelo le lebaka la go phela matlakaleng a Beibele. Ka thušo ya Dihlatse tša Jehofa, o ka ba le kholofelo ya gore dinako tša go phala tšohle di sa letše ka pele ga rena lefaseng le lefsa leo Modimo a le holofetšago.

[Mongwalo wa ka tlase]

[Seswantšho go letlakala 9]

Batswadi ba swanetše go ipha nako ya go theetša bana ba bona e le ka kgonthe gomme ba kwešiše mathata a bona

[Diswantšho go letlakala 10]

“Dihlatse tša Jehofa di nea tshepedišo e kwalago le e feletšego ya thulaganyo bakeng sa go dirišwa bophelong bja letšatši le letšatši”