Mohuta o Mofsa wa Dijo

NA O a tseba gore ke eng seo batho ba ba se topago mo fase? Se swana le phoka goba šobane. Ke se sešweu e bile ke mafoforana a masesanyane. Eupša ga se šobane; ke selo se itšego seo se jewago.

Go be go fetile mo e ka bago kgwedi feela ga e sa le Baisiraele ba tlogile Egipita. Ba be ba le lešokeng. Go be go sa mele dibjalo tše dintši tšeo di ka jewago moo, ka gona batho ba ile ba ngongorega ka gore: ‘Re duma ge nkabe Jehofa a ile a re bolaya kua Egipita. Ka gobane moo re be re na le dijo ka moka tšeo re bego re di nyaka.’

Ka gona Jehofa a re: ‘Ke tlo le nešetša dijo go tšwa magodimong.’ Se ke seo Jehofa a ilego a se dira. Mesong e latelago ge Baisiraele ba bona dilo tše tše ditšhweu tšeo di welego, ba ile ba botšišana ba re: “Ke eng tše?”

Moshe a re: ‘Tše ke dijo tšeo Jehofa a le neago tšona gore le di je.’ Setšhaba se ile sa di bitša MANNA. Tatso ya ona e be e le bjalo ka dinkgwa tše disesanyane tšeo di dirilwego ka todi ya dinose.

Moshe a re go setšhaba: ‘Yo mongwe le yo mongwe a tope ao a mo lekanego.’ Ka gona, se ke seo setšhaba se bego se se dira mesong e mengwe le e mengwe. Ke moka ge letšatši le fiša, manna ao a bego a šetše mo fase a be a tologa.

Moshe gape a re: ‘Go se be le yo a šadišago manna go fihlela letšatšing le le latelago.’ Eupša batho ba bangwe ba ile ba se theetše. Na o a tseba gore go be go direga eng? Mesong e latelago manna ao ba bego ba a šadišitše ba be ba hwetša a tletše diboko gomme a nkga.

Lega go le bjalo, go be go na le letšatši letee mo bekeng leo ka lona Jehofa a bego a boditše setšhaba gore se tope tekanyo yeo e lego gabedi ya manna. Letšatši leo e be e le la botshelela. E bile Jehofa o ile a botša setšhaba gore se boloke a mangwe a ona bakeng sa letšatši le le latelago, ka ge a be a ka se neše manna ka letšatši la bošupa. Ge setšhaba se be se a boloka go fihlela letšatšing la bošupa, a be a sa be le diboko e bile a sa nkge! Wo e bile mohlolo o mongwe!

Nywaga ka moka yeo Baisiraele ba e feditšego ba le lešokeng, Jehofa o ile a ba fepa ka manna.