July

Dilo ka moka tšeo Jesu a bego a di bolela le go di dira go akaretša le mehlolo yeo a e dirilego di be di bontšha gore o be a nagana le go ikwa go swana le Jehofa. (Joh. 14:9) Re ka ithuta’ng go mehlolo ya Jesu? Jesu le Tatagwe ba re rata kudu. Ge Jesu a be a le mo lefaseng, o ile a bontšha gore o rata batho kudu ka go diriša matla a gagwe go fediša dilo tšeo di bego di ba tshwenya. Ka nako e nngwe, banna ba babedi bao e bego e le difofu ba ile ba mo kgopela gore a ba thuše. (Mat. 20:​30-34) Hlokomela gore Jesu o ile a ba hlomogela pelo ke moka a ba fodiša. Lentšu la Segerika leo le fetoletšwego e le “go hlomoga pelo” le šupa go go ba le maikwelo ao a tseneletšego. Maikwelo ao a kwelobohloko e lego ao a bontšhago gore Jesu o rata batho, a mo dirile gore a fepe batho bao ba bego ba swerwe ke tlala le go fodiša motho yoo a bego a swerwe ke lephera. (Mat. 15:32; Mar. 1:41) Re kgodišegile gore Jehofa e lego Modimo yo a nago le lešoko le legolo le Morwa wa gagwe, ba re rata kudu, e bile ba kwa bohloko ge ba bona re tlaišega. (Luka 1:78; 1 Pet. 5:7) Ruri ba fela pelo ya go fediša mathata ka moka ao a tlaišago batho. w23.04 3 ¶4-5

Re ka dira sohle seo re ka se kgonago gore re se ke ra bala goba ra theetša dilo tšeo di lego lefaseng la Sathane, tšeo di ka tlatšago menagano ya rena ka dikgopolo tše di fošagetšego. Re ka tlatša menagano ya rena ka dikgopolo tšeo di hlwekilego ka go bala Beibele le go naganišiša ka seo e se bolelago. Go ba gona dibokeng ka mehla le go tšea karolo tšhemong go tlo thuša menagano ya rena gore e dule e hlwekile. Jehofa o re tshepiša gore a ka se re tlogele re lekwa go feta kamoo re ka kgonago go kgotlelela ka gona. (1 Bakor. 10:​12, 13) Yo mongwe le yo mongwe wa rena o swanetše go dula a rapela gore a botegele Jehofa mehleng ye e thata ya bofelo. Jehofa o nyaka gore re ‘tšhollele dipelo tša rena re le pele ga gagwe’ ka thapelo. (Ps. 62:8) Tumiša Jehofa gomme o mo leboge ka selo se sengwe le se sengwe seo a se dirago. Mo kgopele gore a go thuše go ba le sebete ge o le tšhemong, a go thuše go lebeletšana le mathata ka moka ao o nago le ona le gore a go thuše go gana diteko le ge e le dife. O se ke wa dumelela selo le ge e le sefe goba motho le ge e le ofe a go thibela go rapela Jehofa ka mehla. w23.05 7 ¶17-18

Ke ka baka la’ng re e ba gona dibokeng? Lebaka le legolo ke gore re nyaka go tumiša Jehofa. (Ps. 26:12; 111:1) Lebaka le lengwe ke gore re nyaka go kgothatšana, kudukudu dinakong tše tše thata. (1 Bathes. 5:11) Ge re emiša letsogo gore re arabe re bontšha gore re nyaka go dira dilo tše ka moka. Eupša go ka ba le dilo tšeo di ka re šitišago go araba. Re ka tšhoga. Goba re ka ba re nyaka go araba gantši eupša ba sa re kgethe ge re emiša letsogo. Re ka thušwa ke eng? Moapostola Paulo o itše: ‘Re swanetše go kgothatšana.’ Re ka se tšhoge kudu ge re gopola gore mediro ya go bontšha tumelo yeo re e dirago e kgothatša bana babo rena. Ge e ba ba sa re kgethe gantši re ka thabišwa ke gore bana babo rena le dikgaetšedi ba bangwe ka phuthegong ba tlo ba le sebaka sa go araba.—1 Pet. 3:8. w23.04 20 ¶1-3

Kgoši e ile ya ntšha taelo! Bajuda bao ba bego ba le bothopša Babilona ka mengwaga e ka bago e 70 ba be ba lokolotšwe gore ba ka boela gae Isiraele. (Esera 1:​2-4.) Ke Jehofa feela yo a bego a ka kgona go dira seo. Babilona e be e tsebja ka go se lokolle mathopša a yona. (Jes. 14:​4, 17) Eupša Babilona e be e fentšwe, gomme moetapele yo mofsa o be a boditše Bajuda gore ba ka tloga. Mojuda yo mongwe le yo mongwe, kudukudu hlogo ya lapa, o be a swanetše go dira phetho ya ge e ba o tla tloga Babilona goba o tla šala. Go be go ka se be bonolo go dira phetho yeo. Ba bangwe ba be ba tšofetše moo ba bego ba ka se kgone go tšea leeto le letelele. Le gona Bajuda ba bantši ba be ba belegetšwe Babilona, ka gona e be e le legae la bona leo ba le tsebago e bile ba se ba ka ba dula lefelong le lengwe. Ba be ba lebelela Isiraele e le naga ya borakgolokhukhu ba bona. Bajuda ba bangwe ba be ba humile kua Babilona, ka gona go be go ka ba thata gore ba tlogele magae a bona a mabotse goba dikgwebo tša bona ke moka ba ye go dula nageng yeo ba sa e tsebego. w23.05 14 ¶1-2

Lentšu la Modimo le re kgothaletša gore re dule re hlagolela go ba le kgotlelelo, kwelobohloko le lerato. Luka 21:19 e re: “Ka go kgotlelela ga lena, le tla rua meoya ya lena.” Bakolose 3:12 e re: “Aparang. . . lešoko.” 1 Bathesalonika 4:​9, 10 e re: “Lena ka bolena le rutwa ke Modimo gore le ratane. . . . Eupša bana bešo, re le eletša gore le tšwele pele le dira bjalo ka tekanyo e tletšego.” Ditemana tše ka moka di be di ngwaletšwe barutiwa bao ba bego ba šetše ba ena le kgotlelelo, kwelobohloko le lerato. Eupša ba be ba swanetše go dula ba ithuta go bontšha dika tše. Le rena re swanetše go dira bjalo. O tlo thušwa ke go bona gore Bakriste ba mehleng ya pele, ba ile ba bontšha bjang dika tše. Ke moka o tlo bona gore o ka ekiša bjang barutiwa bao, gomme wa kgona go bontšha gore o itokišeleditše masetlapelo a magolo. Ke moka ge masetlapelo a magolo a thoma o tla ba o ithutile go kgotlelela, gomme wa ikemišetša go tšwela pele o kgotlelela. w23.07 3 ¶4, 8

Go sa šetšwe gore re batlotšwa goba re ba “dinku tše dingwe,” re swanetše go dula re sepela ‘Tseleng e Kgethwa’ ka gobane e re iša paradeiseng ya moya, e bile e dira gore re tle re hwetše ditšhegofatšo tša Mmušo tša nakong e tlago. (Joh. 10:16) Ga e sa le go tloga ka 1919, banna, basadi le bana ba dimilione ba tlogetše Babilona o Mogolo, e lego mmušo wa lefase wa bodumedi bja maaka, gomme ba thoma go sepela tseleng ye ya seswantšhetšo. Jehofa o ile a kgonthišetša gore o tloša dilo tšeo di bego di ka šitiša Bajuda go sepela pele ba tloga Babilona. (Jes. 57:14) Na le lehono go diregile se se swanago “Tseleng e Kgethwa”? Mengwaga e mentši pele ga 1919, Jehofa o ile a diriša banna bao ba bego ba mo hlompha kudu gore ba lokiše tsela ya go tšwa go Babilona o Mogolo. (Bapiša le Jesaya 40:3.) Ba ile ba lokišetša tsela, e lego tsela ya moya gore bao ba nago le dipelo tše di lokilego ba tšwe go Babilona o Mogolo ke moka ba tsene paradeiseng ya moya moo borapedi bjo bo hlwekilego bo tsošološitšwego. w23.05 15-16 ¶8-9

Jehofa o nyaka gore re mo hlankele go tšwa pelong e bile re thabile. (2 Bakor. 9:7) Na re swanetše go šoma ka thata gore re fihlelele selo se itšego ka mokgatlong wa Jehofa le ge re ikwa re sa nyake go dira bjalo? Nagana ka mohlala wa moapostola Paulo. O itše: “Ke tula mmele wa ka gomme ka o laola bjalo ka lekgoba.” (1 Bakor. 9:​25-27) Paulo o ile a ikwa a gapeletšega go dira selo seo a bonago se lokile le ge a be a ikwa a se na matla a go dira bjalo. Na Jehofa o ile a amogela dilo tšeo Paulo a bego a mo direla tšona? Ee! Le gona Jehofa o ile a putsa maiteko a Paulo. (2 Tim. 4:​7, 8) Ka mo go swanago, Jehofa o a thaba ge re leka ka thata go fihlelela seo re nyakago go se dira le ge re se na matla a go dira bjalo. O a tseba gore le ge ka dinako tše dingwe re se na matla a go dira seo re se dirago, eupša re se dira ka gobane re mo rata. Jehofa o tla šegofatša maiteko a rena go swana le ge a ile a šegofatša a Paulo. (Ps. 126:5) Ge re dutše re bona Jehofa a re šegofatša, re ka thoma go ikwa re na le matla. w23.05 29 ¶9-10

Moapostola Paulo o ile a swantšha batho bao ba ka se kego ba phologa letšatši la Jehofa le bao ba robetšego. Batho bao ba robetšego ga ba tsebe dilo tšeo di diregago kgauswi le bona e bile ga ba tsebe gore ke nako mang. Ga ba bone ge selo se bohlokwa se direga e bile ga go na seo ba ka se bolelago ka selo seo. Batho ba bantši lehono ba robetše ka tsela ya seswantšhetšo. (Baroma 11:8) Ga ba bone gore re phela “mehleng ya bofelo” le gore masetlapelo a magolo a kgauswi le go fihla. (2 Pet. 3:​3, 4) Eupša letšatši le lengwe le le lengwe go rena le bohlokwa gomme seo se dira gore re dule re phafogile. (1 Bathes. 5:6) Ka gona, re swanetše go dula re išitše maswafo e bile re sa belaele. E le gore re se ke ra tla ra tšea karolo ditabeng tša dipolotiki. Ge letšatši la Jehofa le dutše le batamela go tlo ba thata gore re se ke ra tšea karolo ditabeng tša dipolotiki, eupša ga se ra swanela go belaela gore re tlo arabela bjang. Moya wa Modimo o tlo re thuša go dula re išitše maswafo fase, go se belaele le go dira diphetho tše dibotse.—Luka 12:​11, 12. w23.06 10 ¶6-7

O nagana’ng ge o ekwa leina Simisone? Go ka direga gore o nagana ka monna yo a bego a na le matla kudu. Seo ke therešo. Eupša Simisone o ile a dira phetho e mpe yeo e ilego ya ba le ditlamorago tšeo di kwešago bohloko. Lega go le bjalo, Jehofa o be a rata tumelo ya Simisone kudu moo a ilego a dira gore pego ya gagwe e ngwalwe ka Beibeleng gore re holege. Jehofa o ile a diriša Simisone go dira dilo tše di makatšago le go thuša setšhaba sa gagwe sa Baisiraele. Mengwaga e makgolo ka morago ga gore Simisone a hwe, Jehofa o ile a dira gore moapostola Paulo a ngwale leina la Simisone gare ga maina a banna bao ba bego ba e na le tumelo. (Baheb. 11:​32-34) Mohlala wa Simisone o ka re kgothatša. O ile a ithekga ka Jehofa le ge go be go le thata. Mohlala wa Simisone o ka re kgothatša le go re ruta dithuto tše bohlokwa. w23.09 2 ¶1-2

Re ka hlagolela go ba le kgotlelelo ka go dula re botša Jehofa ka dilo tšeo di re tshwenyago. (1 Bathes. 5:17) Mohlomongwe ga o na mathata a magolo gona bjale. Le ga go le bjalo ge o nyamile, o hlakahlakane goba o sa tsebe gore o dire eng, na o kgopela Jehofa gore a go thuše? Ge e ba o dula o kgopela Jehofa gore a go thuše ge o kopana le mathata letšatši le lengwe le le lengwe, o ka se palelwe ke go dira bjalo ge o kopana le mathata a magolo nakong e tlago. O tlo kgodišega gore Jehofa o dula a ikemišeditše go go thuša. (Ps. 27:​1, 3) Ge e ba re kgona go kgotlelela mathata lehono, re tlo kgona go a kgotlelela le nakong ya masetlapelo a magolo. (Baroma 5:3) Ke ka baka la’ng re re’alo? Bana babo rena ba bantši le dikgaetšedi ba hweditše gore teko e nngwe le e nngwe yeo e ba lekago tumelo gomme ba kgona go e kgotlelela, e ba thuša gore ba tle ba kgotlelele mathata a mangwe ao a latelago. Ge Jehofa a ba thuša go kgotlelela bothata bjo itšego, ba ba le tumelo ya gore Jehofa o tloga a nyaka go ba thuša. Ka gona ka ge ba na le tumelo go Jehofa, ba ka kgona go kgotlelela mathata a mangwe.—Jak. 1:​2-4. w23.07 3 ¶7-8

Boikokobetšo bja Jehofa le go kwela batho ba bangwe bohloko go dira gore a be le tekatekano. Ka mohlala, Jehofa o ile a bontšha gore o ikokobeditše nakong ya ge a tlo fediša batho ba kgopo ba Sodoma. Jehofa o ile a diriša barongwa ba gagwe go laela Lota yo a lokilego gore a tšhabele dithabeng. Lota o be a tšhaba go ya moo. Ka gona, o ile a kgopela gore yena le ba lapa la gagwe ba tšhabele Tsoare e lego motse o monyenyane woo o bego o tlo fedišwa. Jehofa o be a ka gapeletša Lota gore a latele ditaelo tša gagwe, eupša Jehofa o ile a mo dumelela gore a tšhabele motseng woo gomme a se fedišwe. (Gen. 19:​18-22) Ka morago ga mengwaga e makgolo Jehofa o ile a bontšha batho ba Ninife kwelobohloko. O ile romela moporofeta Jona gore a tsebiše batho ba Ninife gore o kgauswi le go ba fediša gotee le motse wa bona. Eupša ge batho ba Ninife ba be ba itshola, Jehofa o ile a ba kwela bohloko gomme a se ba fedišwe.—Jona 3:​1, 10; 4:​10, 11. w23.07 21 ¶5

Mohlala wa Jehoashe o ka re ruta’ng? O be a swana le sehlare seo medu ya sona e ithekgilego ka kota. Ka morago ga gore Jehoyada yo a bego a thekga Jehoashe a hlokofale, Jehoashe o ile a thoma go theetša bahlanogi gomme a se sa botegela Jehofa. Mohlala wo o bontšha gore ga se ra swanela go kwa Jehofa feela ka gobane ba gabo rena le batho ba bangwe ka phuthegong ba re beela mohlala o mobotse. Eupša e le gore re dule re na le segwera se sebotse le Jehofa, re swanetše go mo rata kudu le go mmoifa ka gore re dule re ithuta, re naganišiša le go rapela.(Jer. 17:​7, 8; Bakol. 2:​6, 7) Jehofa ga a re kgopele gore re dire dilo tše dintši. O re kgopela feela gore re dire seo se lego go Mmoledi 12:​13, yeo e rego: “Boifa Modimo wa therešo gomme o lote ditaelo tša gagwe. Ka gobane se ke sohle seo motho a tlamegilego go se dira.” Ge re boifa Modimo re tlo kgona go lebeletšana le diteko tšeo di ka re welago nakong e tlago gomme ra kgotlelela. Ga go selo seo se ka senyago segwera sa rena le Jehofa. w23.06 19 ¶17-19

Dilo tšeo Jehofa a di kgonthišetšago di thoma ka mantšu ao a rego: “Yo a dutšego sedulong sa bogoši a re.” (Kut. 21:5a) Mantšu a a bohlokwa ka gobane ke ka makga a mararo feela ka pukung ya Kutollo moo Jehofa a bolelago ka boyena. Eupša kgonthišetšo ye ga re e hwetše go morongwa yo matla, goba Jesu yo a tsošitšwego, eupša re e hwetša go Jehofa ka go lebanya! Se se re kgonthišetša gore re ka bota mantšu ao a a bolelago ka go lebanya. Ka baka la’ng? Ka gobane Jehofa ‘a ka se ke a aketša.’ (Tito 1:2) Ka gona mantšu ao re a balago go Kutollo 21:​5, 6 a tlo phethagala e le ka kgonthe. Nagana ka lentšu “Bonang!” Lentšu la Segerika leo le fetoletšwego e le “bonang!” le dirišwa gantšhi ka pukung ya Kutollo. Ke eng seo Modimo a se bolelago ka morago? O itše: “Dilo ka moka ke di dira tše mpsha.” Ke therešo gore Jehofa o bolela ka dilo tšeo di tlago go direga nakong e tlago. Eupša ka ge a kgodišegile gore dilo tšeo di tlo direga, o bolela ka tšona bjalo ka ge eka di šetše di direga.—Jes. 46:10. w23.11 3-4 ¶7-8

Moapostola Petro o be a lwantšhana le mafokodi a gagwe. Nagana ka mehlala ye e sego kae. Petro o ile a ganetša Jesu ge a be a hlalosa kamoo boporofeta bja mabapi le go tlaišwa le go hwa ga gagwe bo tlago go phethagala ka gona. (Mar. 8:​31-33) Le gona, Petro le baapostola ba bangwe ba be ba dula ba ngangišana ka gore ke mang yo mogolo gare ga bona. (Mar. 9:​33, 34) Bošegong bja pele ga lehu la Jesu, Petro o ile a hlasela monna yo mongwe gomme a mo kgaola tsebe. (Joh. 18:10) Bjona bošegong bjoo Petro o ile a tšhoga kudu ka baka la seo batho ba bego ba se nagana ka yena gomme a latola Jesu ka makga a mararo. (Mar. 14:​66-72) Seo se ile sa dira gore Petro a lle ga bohloko. Jesu ga se a ka a lahla moapostola yo yoo a bego a nyamile o šoro. Ka morago ga gore Jesu a tsošwe, o ile a nea Petro sebaka se sengwe sa gore a mmontšhe gore o tloga a mo rata. Jesu o ile a nea Petro tokelo ya gore a hlokomele dinku tša gagwe. (Joh. 21:​15-17) Petro o ile a dira seo Jesu a bego a mo kgopetše sona. O be a le Jerusalema ka letšatši la Pentekoste, gomme a ba gare ga batho ba mathomo bao ba ilego ba tlotšwa ka moya o mokgethwa. w23.09 22 ¶6-7

Moapostola Petro o ile a eletša bagolo gotee le yena gore, “Dišang mohlape wa Modimo.” (1 Pet. 5:​1-4) Ge e ba o le mogolo, re a tseba gore o rata bana beno le dikgaetšedi e bile o nyaka go ba hlokomela. Eupša ka dinako tše dingwe o ka ikwa o lapile goba o swaregile kudu moo o ka se kgonego go phetha kabelo yeo. O ka dira’ng? Botša Jehofa kamoo o ikwago ka gona. Petro o ngwadile gore: “Ge e ba motho a hlankela, a hlankele a ithekgile ka matla ao Modimo a a neago.” (1 Pet. 4:11) Bana beno le dikgaetšedi ba ka ba ba na le mathata ao a ka se rarollegego gona bjale. Eupša gopola gore “modiši yo mogolo,” e lego Jesu Kriste, a ka ba thuša go feta kamoo wena o ka ba thušago ka gona. A ka ba thuša gona bjale le lefaseng le leswa. Modimo o no kgopela bagolo gore, ba rate bana babo bona le dikgaetšedi, ba ba hlokomele e bile ba be “mehlala go mohlape.” w23.09 29-30 ¶13-14

Ga se ra swanela go ithekga ka dilo tšeo batho ba di bolelago. Ge re ka dira dilo go swana le batho bao ba sa kwego Jehofa, re ka feleletša re sa kwe melao ya gagwe. (1 Bakor. 3:19) “Bohlale bja lefase le” Gantši bo dira gore batho ba se ke ba kwa Modimo. Bakriste ba bangwe kua Peregamo le Theathera ba ile ba itshwara go swana le batho ba moo ka go rapela medingwana ya diswantšho le go itshwara ka tsela e sa hlwekago. Jesu o ile a kgalema diphuthego tšeo ka ge di be di amogela batho bao ba bego ba dira bootswa. (Kut. 2:​14, 20) Batho ba bangwe bao re phelago gare ga bona lehono ba nyaka gore re amogele dikgopolo tšeo di fošagetšego. Ba malapa a gabo rena le batho bao re ba tsebago ba ka dira gore re bone eka re latela melao ya Modimo ka mo go feteletšego gomme ba re kgothaletša gore re se ke ra e latela. Ka mohlala, ba ka bolela gore ga go bohlokwa gore re dule re hlwekile boitshwarong le gore melao ya Beibele ya boitshwaro ga e sa na mohola. Ka dinako tše dingwe re ka bona eka tlhahlo yeo Jehofa a re neago yona ga se ya lekana. Le gona re ka lekega “go fetela ka kua ga dilo tšeo di ngwadilwego.”—1 Bakor. 4:6. w23.07 16 ¶10-11

Maria mmago Jesu o be a hloka matla. O be a se a nyalwa eupša o be a tlo ima. O be a se na phihlelo ya go godiša bana bao e lego ba gagwe, eupša o be a swanetše go godiša ngwana wa mošemane yoo e bego e tlo ba Mesia. Ka ge a be a se a ka a robala le monna o be a tlo hlalosetša Josefa dilo tše bjang? (Luka 1:​26-33) Maria o ile a hwetša kae matla ao a bego a a hloka? O ile a kgopela thušo go ba bangwe. Ka mohlala, o ile a kgopela Gabariele gore a mo hlalosetše ka mo go oketšegilego ka seo a swanetšego go se dira. (Luka 1:34) Ke moka ka morago ga moo, o ile a tšea leeto la go ya “nageng ya dithaba” ya motseng wa Juda go etela motswala wa gagwe e lego Elisabetha. Elisabetha o ile reta Maria, gomme Jehofa a diriša Elisabetha gore a bolele ka molaetša wa boporofeta wo o kgothatšago mabapi le morwa wa Maria yo a bego a mo imile. (Luka 1:​39-45) Maria o itše Jehofa “o dirile mediro e matla ka letsogo la gagwe.” (Luka 1:​46-51) Jehofa o ile a diriša Gabariele le Elisabetha go matlafatša Maria. w23.10 14-15 ¶10-12

Go na le palo e lekanyeditšwego ya balatedi ba Kriste bao ba tloditšwego ka moya o mokgethwa e bile ba na le segwera seo se kgethegilego le Jehofa. Batho ba ba 144 000 ba tlo hlankela legodimong ba na le Jesu e le baperisita. (Kut. 14:1) Sekgethwa sa ka tempeleng se be se bontšha gore ba kgethilwe e le barwa ba Modimo ba moya ba sa dutše ba le mo lefaseng. (Baroma 8:​15-17) Sekgethwakgethwa sa ka taberenakeleng se be se emela legodimo moo Jehofa a lego gona. “Seširo” seo se bego se aroganya Sekgethwa le Sekgethwakgethwa, se be se emela mmele wa Jesu wa nama wo o bego o mo thibela go tsena legodimong e le Moperisita yo mogolo yo a Phagamego wa tempele ya moya. Jesu o dirile gore Bakriste ba tloditšwego ka moka ba kgone go tsena legodimong ka go neela mmele wa gagwe e le sehlabelo bakeng sa batho. Le bona ba swanetše go neela mebele ya bona ya nama gore ba kgone go hwetša moputso wa bona legodimong.—Baheb. 10:​19, 20; 1 Bakor. 15:50. w23.10 28 ¶13

Gideone o ile a bolela le Baefuraime gabotse le ge ba be ba mo swaya diphošo. (Baa. 8:​1-3) Ga se a ka a bolela le Baefuraime a galefile. O ile a bontšha gore o ikokobeditše ka go theetša seo ba se bolelago gomme a bolela le bona ka botho, ke moka seo sa dira gore ba iše maswafo fase. Bagolo ba bohlale ba ekiša mohlala wa Gideone ka go theetša gabotse ge batho ba bangwe ba bolela le go se arabe ba galefile ge ba bangwe ba ba swaya diphošo. (Jak. 3:13.) Ge ba dira bjalo, ba dira gore go be le khutšo ka phuthegong. Ge Gideone a be a retwa ka baka la ge a fentše Bamidiane, o ile a iša ditheto go Jehofa. (Baa. 8:​22, 23) Banna bao ba kgethilwego ba ka ekiša Gideone bjang? Ba ka reta Jehofa ka dilo tšeo ba di fihleletšego. (1 Bakor. 4:​6, 7) Ka mohlala, ge mogolo a retwa ka baka la bokgoni bja gagwe bja go ruta, a ka bolela gore o be a hlahlwa ke Lentšu la Modimo, goba o tlwaeditšwe ke mokgatlo wa Jehofa. Ka dinako tše dingwe bagolo ba swanetše go hlokomela ge e ba tsela yeo ba rutago ka yona e sa dire gore go retwe bona. w23.06 4 ¶7-8

Ge e ba re sa hwetše dilo tšeo re di rapelelago, re ka ipotšiša gore, ‘Na ke rapelela dilo tša maleba?’ Gantšhi re nagana gore re tseba dilo tšeo di re loketšego. Eupša dilo tšeo re di kgopelago di ka no se re hole. Ge e ba re rapelela bothata bjo itšego, o ka hwetša go na le tharollo e kaone kudu go feta yeo rena re e rapelelago. E bile dilo tše dingwe tšeo re di rapelelago, di ka no se sepedišane le thato ya Jehofa. (1 Joh. 5:14) Ka mohlala, nagana ka batswadi bao ba kgopetšego Jehofa gore a dire gore ngwana wa bona a dule a mo hlankela. Yeo e bonagala e le kgopelo ya maleba. Eupša Jehofa a ka se tsoge a re gapeleditše gore re mo hlankele. O nyaka gore ka moka ga rena, go akaretša le bana ba rena, re kgethe go mo hlankela. (Doit. 10:​12, 13; 30:​19, 20) Ka gona, batswadi ba ka kgopela Jehofa gore a ba thuše gore ba rute ngwana wa bona ka yena le gore yena a feleletše a e ba mogwera wa gagwe le go mo hlankela.—Die. 22:6; Baef. 6:4. w23.11 21 ¶5; 23 ¶12

Ke ka baka la eng go homotša batho ba bangwe e le tsela e bohlokwa ya go bontšha lerato? Go ya ka puku ya go ithuta Beibele, lentšu leo Paulo a le dirišitšego e le “homotšana” le bolela gore “go ba kgauswi le motho yo mongwe gomme wa mo kgothatša ge a na le mathata.” Ka gona, ge re homotša bana babo rena ge ba na le mathata re ba thuša gore ba tšwele pele ba hlankela Jehofa ka go botega. Ka mehla ge re homotša bana babo rena re ba bontšha gore re a ba rata. (2 Bakor. 7:​6, 7, 13) Go kwela batho bohloko le go ba homotša go a sepedišana. Bjang? Ge motho a kwela motho yo a tlaišegago bohloko, o nyaka go mo homotša le go dira selo se sengwe seo se ka mo thušago. Re thoma ka go kwela motho bohloko ke moka ra mo homotša. Bona kamoo Paulo a hlalosago tsela yeo Jehofa a kwelago batho bohloko ka yona ke moka ka morago a ba homotša. Paulo o hlalosa Jehofa e le “Tate wa dikgaugelo le Modimo wa khomotšo yohle.”—2 Bakor. 1:3. w23.11 9-10 ¶8-10

Balatedi ba Kriste ka moka ba swanetše go letela gore ba tlaišege. Nagana ka mohlala wa moapostola Paulo. O ile a botša Bakriste ba kua Thesalonika gore: “Ge re be re na le lena re be re fela re le botša e sa le pele gore re be re tla tlaišega gomme seo ke sona se diregilego feela bjalo ka ge le tseba.” (1 Bathes. 3:4) Le gona, o ile a ngwalela Bakriste ba kua Korinthe gore: “Bana bešo ga re rate gore le se tsebe ka tlaišego yeo e re wetšego . . . mo re bego re tloga re sa kgonthišege gaešita le ka maphelo a rena.” (2 Bakor. 1:8; 11:​23-27) Lehono Bakriste le bona ba ka tlaišega ka tsela e itšego. (2 Tim. 3:12) Ge o be o thoma go ba molatedi wa Jesu e bile o na le tumelo go yena, bagwera ba gago le ba leloko ba ka ba ba ile ba go swara gampe goba mongmošomo le batho ba o šomago le bona ba ka ba ba ile ba go tlaiša ka ge o bolela nnete. (Baheb. 13:18) Na o ile wa tlaišwa ke ba mmušo ka ge o botša batho ba bangwe ka kholofelo ye o nago le yona? Go sa šetšwe gore re tlaišwa bjang, Paulo o re re swanetše go dula re thabile. w23.12 10-11 ¶9-10

Jakobo o ile a kgotlelela mathata a mantši. Barwa ba babedi ba Jakobo e lego Simeone le Lefi, ba ile ba goboša lapa la gabo bona le go senya leina la Jehofa. Go oketša moo, mosadi yo Jakobo a bego a mo rata kudu e lego Ragele o ile a hlokofala ge a be a belega ngwana wa bona wa bobedi. Le gona, moo ba bego ba dula gona go ile gwa wa tlala ke moka Jakobo a swanelwa ke go hudugela Egipita le ge a be a tšofetše. (Gen. 34:30; 35:​16-19; 37:28; 45:​9-11, 28) Jakobo ga se a ka a lahla tumelo ya gagwe go Jehofa le ditshepišo tša Gagwe le ge a be a na le mathata. Gomme Jehofa o ile a bontšha Jakobo gore o a mo rata. Ka mohlala, Jehofa o ile a nea Jakobo mahumo a mantši. Le gona, nagana gore Jakobo o ile a thaba bjang ge a be a kopana le Josefa gape mola a be a nagana gore o hwile! Ka ge Jakobo a be a na le segwera sa kgauswi le Jehofa, o ile a kgona go kgotlelela mathata ao a bego a na le ona. (Gen. 30:43; 32:​9, 10; 46:​28-30) Le rena re ka kgona go lebeletšana le mathata ao re kopanago le ona ge e ba re gwerana le Jehofa. w23.04 15 ¶6-7

Psalme 23 ke koša yeo e bontšhago kamoo Jehofa a re ratago ka gona le go re hlokomela. Mongwadi wa psalme ye e lego Dafida, o hlalosa kamoo yena le Modiši wa gagwe e lego Jehofa ba ratanago ka gona. Dafida o be a ikwa a bolokegile le go dumelela Jehofa a mo hlahla, le gona o be a dula a ithekga ka yena. Dafida o be a tseba e bile a kgodišegile gore Jehofa o tlo mo rata bophelo bja gagwe ka moka. Ke eng seo se bego se dira gore a kgodišege ka tsela ye? Dafida o be a kgodišegile gore Jehofa o a mo rata ka gobane o be a dula a mo nea seo a se hlokago. Dafida o be a tseba gore Jehofa ke mogwera wa gagwe e bile o dula a mo amogela. O be a kgodišegile gore go sa šetšwe dilo tšeo di ka diregago bophelong bja gagwe, Jehofa o tlo dula a mo hlokomela. Dafida o be a tshepa gore Jehofa o a mo rata e bile o tlo dula a mo hlokomela gomme seo se ile sa mo thuša gore a dule a thabile le go kgotsofalela dilo tšeo a bego a na le tšona.—Ps. 16:11. w24.01 29 ¶12-13

Ga e sa le go tloga ka Ntwa ya Bobedi ya Lefase, bahlanka ba Jehofa ba be ba dutše ba thabela go bolela ditaba tše dibotse dinageng tše dintšhi. Ge e le gabotse batho ba bantšhi ba ile ba kgona go ithuta ka Jehofa. Lehono ditho tša Sehlopha se Bušago di sa tšwela pele di hlahlwa ke Kriste. Ba nyaka gore go bonagale gore ditaelo tšeo ba di neago bana babo bona le dikgaetšedi di tšwa go Jehofa. Ka morago, balebeledi ba tikologo le bagolo ba nea diphuthego ditaelo tšeo. Bagolo bao ba tloditšwego ba ka “seatleng sa le letona” sa Kriste. (Kut. 2:1) Re a tseba gore bagolo ba ga se ba phethagala e bile ba fela ba dira diphošo. Moshe, Joshua le baapostola le bona ba be ba fela ba dira diphošo. (Num. 20:12; Josh. 9:​14, 15; Baroma 3:23) Le ga go le bjalo, Kriste o hlahla mohlanka yo a botegago le bagolo, e bile o tlo tšwela pele a dira bjalo . Re na le mabaka a kwagalago a go bota tlhahlo yeo a re neago yona a diriša bao a ba kgethilego gore ba re etelele pele. w24.02 23-24 ¶13-14

Lehono, re ka kgahliša Jehofa ka go bolela ka yena ka borutho, ka go mo leboga le go mo rata. Ge re le tšhemong, re gopola gore morero wa rena o mogolo ke go dira gore batho ba gwerane le Jehofa le go ba thuša go lebelela Tatago rena yo lerato kamoo rena re mo lebelelago ka gona. (Jak. 4:8) Re thabela tsela yeo Beibele e hlalosago Jehofa ka yona ge e bolela ka lerato, toka, bohlale, matla le dika tše dingwe tša gagwe tše di kgahlišago. Le gona re tumiša Jehofa ka go lwela go mo kgahliša le go ekiša dika tša gagwe. (Baef. 5:1) Ge re dira bjalo re fapana le batho bao ba phelago mo lefaseng le le lebe. Batho bao ba ka bona gore ga re swane le bona ke moka ba ipotšiša gore ke ka baka la’ng re fapana le bona. (Mat. 5:​14-16) Ge re kopana le bona letšatši le lengwe le le lengwe, re ka ba hlalosetša gore ke ka baka la’ng re phela ka tsela yeo re phelago ka yona. Seo se tlo dira gore ba dipelo tšeo di lokilego ba feleletše ba gwerane le Modimo wa rena. Ge re tumiša Jehofa ka ditsela tše, re tloga re mo thabiša kudu.—1 Tim. 2:​3, 4. w24.02 10 ¶7

E le gore o be Mokriste yo a godilego moyeng, o tlo swanelwa ke go ithuta go dira dilo tše di ka go thušago. Se se tlo go thuša gore o amogele dikabelo ka phuthegong, o hwetše mošomo wo o tlago go go thuša go itlhokomela le go hlokomela ba lapa la gago, le go ba le segwera se sebotse le batho ba bangwe. ka mohlala, ithute go bala le go ngwala gabotse. Beibele e re monna yo a thabilego le yo a atlegilego, o bala Lentšu la Modimo ka mehla le go naganišiša ka lona. (Ps 1:​1-3.) Ge o bala Beibele letšatši le lengwe le le lengwe, o tlo tseba tsela yeo Jehofa a naganago ka yona gomme seo sa go thuša gore o ithute go diriša Mangwalo gabotse. (Die. 1:​3, 4) Bana babo rena le dikgaetšedi ba hloka banna bao ba nago le bokgoni bja go ruta gore ba ba nee keletšo yeo e tšwago ka Beibeleng. Ge e ba o kgona go bala le go ngwala gabotse, o tlo kgona go lokišeletša dipolelo le di karabo tše di kgothatšago. O tlo kgona le go ngwala dintlha. Go dira bjalo go tlo go thuša gore o tiiše tumelo ya gago le go kgothatša batho ba bangwe. w23.12 26-27 ¶9-11

Ge o ikwa o tšhogile, naganišiša ka dilo tšeo Jehofa a tlago go di dira nakong e tlago ge Sathane a se sa le gona. Pontšho yeo e tšweletšego kopanong ya selete ya 2014 e bontšhitše kamoo re ka naganišišago ka bokamoso bja rena ka gona. Tate o be a boledišana le lapa la gagwe ka lengwalo la 2 Timotheo 3:​1-5. O itše mantšu a lengwalo le nkabe a be a bolela kamoo Paradeise e tlo bago ka gona. Le be le tlo balega ka tsela ye: “Lefaseng le leswa go tla ba le dinako tše di thabišago kudu. Gobane batho ba tla rata ba bangwe, ba rata dilo tša moya, ya ba bao ba ipoeditšego, bao ba ikokobeditšego, bao ba tumišago Modimo, bao ka kwago batswadi, bao ba botegago, bao ba ratago malapa a bona kudu, bao ba dumelelanago, bao ba bolelago botse ka batho ba bangwe, bao ba nago le boitshwaro, bao ba lego boleta, bao ba ratago dilo tše dibotse, bao ba tshepagalago, ba bonolo, bao ba sa ikgantšhego, bao ba ratago Modimo go e na le go rata maipshino, bao ba ineetšego go Modimo ka mo go feletšego, ba bjalo o be kgauswi le bona.” Na o boledišana le ba lapa la gago goba bana beno le dikgaetšedi ka gore lefaseng le leswa go tla be go le bjang? w24.01 6 ¶13-14

Go tloga go kgothatša go tseba gore Jehofa o amogela batho ba gagwe e le sehlopha! Beibele e re: “Jehofa o kgahlwa ke batho ba gagwe.” (Ps. 149:4) Ka dinako tše dingwe batho ba bangwe ba ikhwetša ba nyamile kudu mo ba feleletšago ba ipotšiša ge e ba Jehofa a ba amogela. Bahlanka ba bangwe ba botegago ba Jehofa ba mehleng ya Beibele, ba ile ba thatafalelwa ke go dumela gore Jehofa o a ba amogela. (1 Sam. 1:​6-10; Jobo 29:​2, 4; Ps. 51:11) Beibele e bontšha gabotse gore batho ba sa phethagalago ba ka amogelwa ke Jehofa. Bjang? Re swanetše go bontšha tumelo go Jesu Kriste gomme re kolobetšwe. (Joh. 3:16) Ge re dira bjalo re tla be re bontšha phatlalatša gore re itsholela dibe tša rena e bile re tshepiša go dira thato ya Modimo. (Dit. 2:38; 3:19) Jehofa o thaba kudu ge re dira se gore re kgone go ba bagwera ba gagwe. Jehofa o a re amogela le go re lebelela re le bagwera ba gagwe ge e ba re dira sohle seo re ka se kgonago go phelela keno yeo re e dirilego ge re be re ineela gore yena.—Ps. 25:14. w24.03 26 ¶1-2

Re ka ekiša barutiwa ka go tšwela pele re bolela ditaba tše dibotse le ge ba mmušo ba re laela gore re tlogele go di bolela. Re ka kgodišega gore Jehofa o tlo re thuša ge re le tšhemong. Ka gona, mo kgopele gore a go nee bohlale, sebete le gore a go thuše go kgotlelela mathata. Ba bantši ba rena, re kgotleletše malwetši goba go imelwa maikwelong, go lahlegelwa ke batho bao re ba ratago, mathata a ka lapeng, go tlaišwa goba mathata a mangwe. Le gona, dilo tša go swana le mauba a malwetši le dintwa, di dira gore go be boima le go feta go lebeletšana le mathata a. Botša Jehofa kamoo o ikwago ka gona. Bolela le yena go swana le ge eka o bolela le mogwera wa gago wa kgauswi. Kgodišega gore Jehofa “o tla go thuša.” (Ps. 37:​3, 5) Go dula re rapela go tla re thuša go ‘kgotlelela tlaišego.’ (Baroma 12:12) Jehofa o a tseba gore bahlanka ba gagwe ba kgotleletše mathata gomme “o tla ba kwa ge ba mo llela gore a ba thuše.”—Ps. 145:​18, 19. w23.05 5-6 ¶12-15

Ge e ba go na le phetho e bohlokwa yeo re swanetšego go e dira, re swanetše go “kwešiša seo Jehofa a nyakago [re] se dira” gomme re se dire. (Baef. 5:17) Ge re diriša melao ya motheo maemong ao re kopanago le ona, go swana le ge re nyaka tsela ya Modimo ya go nagana. Ge re diriša melao yeo ya motheo, re tlo kgona go dira diphetho tše dibotse. Sathane e lego lenaba la rena, o nyaka gore re dule re swaregile ka mediro ya lefase le, moo mafelelong re ka ikhwetšago re se sa na nako ya go hlankela Jehofa. (1 Joh. 5:19) Se se ka dira gore go be bonolo gore Mokriste a thome go nagana kudu ka dilo tše di bonagalago, thuto goba mošomo go e na le go hlankela Jehofa. Ge e ba seo se ka direga, seo se tla ba se bontšha gore Mokriste o thoma go nagana go swana le batho ba lefase bao ba sa hlankelego Jehofa. Ke nnete gore ga se phošo go ba le dilo tše, eupša ga se tša swanela go tla pele maphelong a rena. w24.03 24 ¶16-17