Na Ruri Modimo o a go Tseba?

“Jehofa, . . . o thomile go tlwaelana gaešita le ditsela tša-ka tšohle.”—PSALME 139:1, 3, NW.

1. Maikwelo a gore ‘ba bangwe ga ba kwešiše’ dipelaelo, mathata le dikgateletšo tšeo re lebanago le tšona a atile gakaaka’ng?

NA RURI go na le motho lege e le ofe yo a tsebago dipelaelo tša gago, dikgateletšo le mathata ao o lebanago le ona? Lefaseng ka bophara go na le batho ba dimilione-milione, ba bafsa le ba bagolo, ba ba se nago lapa goba ba leloko bao ba nago le taba le seo se ba diragalelago. Gaešita le ka malapeng, basadi ba bantši—gotee le banna—ba ikwa gore balekane ba bona ba lenyalo ga ba tloge ba kwešiša dikgateletšo tšeo di ba gateletšego fase. Mabakeng a mangwe ka go ba kgakanegong, ba belaela ka gore: “Eupja ga o kwešiše!” Le gona, bafsa ba bantši ba phethile ka gore le bona ga go na motho yo a ba kwešišago. Lega go le bjalo, gare ga bao ba bego hlologetše go hwetša kwešišo e kgolwanyane go ba bangwe go na le bao maphelo a bona ka morago a ilego a hwetša morero wa kgonthe. Seo se kgonega bjang?

2. Ke’ng seo se ka dirago gore barapedi ba Jehofa ba kgone go ba le maphelo ao a kgotsofatšago ka mo go humišago?

² Ke ka gobane go sa šetšwe ge e ba magagabo bona a kwešiša maikwelo a bona ka botlalo goba go se bjalo, ba kgodišegile gore Modimo o kwešiša seo se ba diragalelago le gore bjalo ka bahlanka ba gagwe, ga ba swanela go lebeletšana le mathata a bona ba nnoši. (Psalme 46:1) Go feta moo, Lentšu la Modimo gotee le thušo ya bagolo ba Bakriste ba nago le temogo le dira gore ba kgone go bona ka kua ga mathata a bona ka noši. Mangwalo a ba thuša gore ba lemoge gore tirelo ya bona ya potego e bohlokwa mahlong a Modimo le gore go na le bokamoso bjo bo šireletšegilego bakeng sa bao ba beago kholofelo ya bona go yena le ditokišetšong tšeo a di dirilego ka Jesu Kriste.—Diema 27:11; 2 Ba-Korinthe 4:17, 18.

3, 4. (a) Go lemoga therešo ya gore “Jehofa ke Modimo” le gore “ke Yena a re dirilego” go ka re thuša bjang go hwetša lethabo tirelong ya gagwe? (b) Ke ka baka la’ng re e-na le kgodišego e feletšego ka tlhokomelo e lerato ya Jehofa?

³ Mo gongwe o ka ba o tlwaelane le Psalme 100:2, yeo e rego: “Hlankêlang Morêna Lè thabile; le fihlê pele xa xaxwe ka xo hlalala.” Ke ba bakae bao ruri ba neelago borapedi go Jehofa ka mokgwa woo? Mabaka a kwalago a go dira bjalo a newa go Ps 100 temana 3 (PK), yeo e re gopotšago gore: “Tsebang gobane Jehofa ke Modimo; ke Yena a re dirilego, ga ra itira, re setšhaba sa gagwe, re dinku tša mafulo a gagwe.” Temaneng ya Sehebere, moo o šupja e le ʼElo·himʹ, ka go rialo, e le go bontšha bogolo bja go phagama ga gagwe, bja seriti le bja bothakga bja gagwe. Ke yena Modimo wa therešo a nnoši. (Doiteronomio 4:39; 7:9; Johane 17:3) Bahlanka ba gagwe ba thoma go tseba Bomodimo bja gagwe, e sego feela bjalo ka therešo yeo ba rutilwego, eupja e le selo seo ba bago le boitemogelo bja sona le seo ba neago bohlatse ka sona ka go kwa, go bota le boineelo.—1 Koronika 28:9; Ba-Roma 1:20.

⁴ Ka gobane Jehofa e le Modimo yo a phelago, a kgona go bona gaešita le pelo ya rena, ga go na se se širetšego mahlong a gagwe. O lemoga ka botlalo seo se diregago maphelong a rena. O kwešiša seo se bakago mathata ao re lebanago le ona gotee le go dubega monaganong le maikwelong moo go ka bakwago ke mathata ao. Bjalo ka Mmopi, o re tseba go feta kamoo re itsebago ka gona. O bile o tseba le kamoo a ka re thušago ka gona go lebeletšana le boemo bja rena le kamoo a ka neago kimollo ya nako e telele ka gona. O tla re thuša ka lerato—go swana le modiši yo a rwalago kwana sehubeng sa gagwe—ge re dutše re mmota ka pelo ya rena ka moka. (Diema 3:5, 6; Jesaya 40:10, 11) Go ithuta Psalme 139 go ka dira go gontši go matlafatša kgodišego yeo.

Yo a Bonago Ditsela tša Rena Tšohle

5. Go ‘re fenyeka’ ga Jehofa go bolela’ng go rena, gomme ke ka baka la’ng seo e le se se kganyogegago?

⁵ Ka tebogo e kgolo, mopsalme Dafida o ngwadile gore: “Wene Jehofa, o mphenyekile, gomme o a ntseba.” (Psalme 139:1, NW) Dafida o be a kgodišegile gore tsebo ya Jehofa ya go mo tseba ga se feela ya ka ntle. Modimo o be a sa bone Dafida go etša kamoo batho ba bonago ka gona, a sa lemoge feela sebopego sa ka ntle sa mmele, bokgoni bja gagwe bja go bolela, goba bokgoni bja gagwe bja go bapala harepa. (1 Samuele 16:7, 18, PK) Jehofa o be a ‘fenyekile’ bokagare bja Dafida gomme a dirile bjalo ka go kgomega ka lerato ka boiketlo bja gagwe bja moya. Ge e ba o le o mongwe wa bahlanka ba ineetšego ba Jehofa, o go tseba bjalo ka ge a be a tseba Dafida. Na seo ga se tsoše maikwelo a tebogo le poifo ka go wena?

6. Psalme 139:2, 3 e bontšha bjang gore Jehofa o tseba sengwe le se sengwe seo re se dirago, gaešita le dikgopolo tšohle tša rena?

⁶ Mediro yohle ya Dafida e be e le molaleng go ka bonwa ke Jehofa, gomme Dafida o be a lemoga seo. Mopsalme o ngwadile gore: “O ntseba xe ke dula, le xe ke tsoxa; O ntemoxa tša pelong, xe di sa le kxolê. Xe ke sepela, le xe ke y’o lala. O a nthšetša; ditsela tša-ka tšohle O di êla thlôko [“o thomile go tlwaelana gaešita le ditsela tša-ka tšohle,” NW].” (Psalme 139:2, 3) Therešo ya gore Jehofa o kua magodimong, kgole-kgole le lefase, ga se ya mo šitiša go tseba seo Dafida a bego a se dira le seo a bego a se nagana. O ile a ‘šetša’ goba a lekodišiša mediro ya Dafida mosegare le bošego gore a tsebe kamoo e lego ka gona.

7. (a) Hlalosa dilo tše dingwe maphelong a rena tšeo Modimo a di lemogago, o diriša ditiragalo tše di tšwago bophelong bja Dafida e le motheo. (b) Go lemoga se go swanetše go re kgoma bjang?

⁷ Ge lerato la go rata Modimo le go holofela matla a Gagwe a go phološa di be di tutuetša Dafida e sa le lesogana gore a ithapele go lwa le senatla sa mo-Filisita Goliata, Jehofa o ile a tseba seo. (1 Samuele 17:32-37, 45-47) Ka morago ge bonaba bja batho bo dira gore pelo ya Dafida e kwe bohloko bjo bogolo, ge kgateletšo e be e le e kgolo kudu moo a ilego a ntšha megokgo bošego, o ile a homotšwa ke go tseba gore Jehofa o be a kwele topo ya gagwe. (Psalme 6:6, 9; 55:2-5, 22) Ka mo go swanago, ge pelo e tletšego tebogo e be e dira gore Dafida a naganišiše ka Jehofa bošegong bja go hlorega boroko, Jehofa o ile a lemoga seo gabotse. (Psalme 63:6; bapiša le Ba-Filipi 4:8, 9.) Mantšiboeng a mangwe ge Dafida a be a lebelela mosadi wa moagišani wa gagwe a hlapa, Jehofa o ile a tseba seo, gomme o bone seo se diregilego ge Dafida, gaešita le ka nakwana, a dumelela kganyogo ya gagwe ya sebe e pipetša Modimo ka dikgopolong tša gagwe. (2 Samuele 11:2-4) Ka morago, ge moporofeta Nathane a be a rometšwe gore a ye go lebantšha Dafida ka bogolo bja sebe sa gagwe, Jehofa ga se a kwa feela mantšu ao a tšwelego molomong wa Dafida, eupja o ile a ba a lemoga le pelo e sokologilego yeo a ilego a tšwa go yona. (2 Samuele 12:1-14; Psalme 51:1, 17) Na seo ga se sa swanela go re dira gore re nagane kudu ka moo re yago gona, seo re se dirago le seo se lego ka pelong ya rena?

8. (a) Ke ka tsela efe ‘polelo e tšwago lelemeng la rena’ e kgomago boemo bja rena le Modimo? (b) Mafokodi tirišong ya leleme a ka fenywa bjang? (Mateo 15:18; Luka 6:45)

⁸ Ka ge Modimo a tseba se sengwe le se sengwe seo re se dirago, gona ga se gwa swanela go re makatša gore o lemoga kamoo re dirišago ka gona setho sa mmele, gaešita le se senyenyane bjalo ka leleme. Kgoši Dafida o ile a lemoga se, gomme a ngwala gore: “Polêlô, le xe e sešo ya tšwa ’lemeng la-ka, Morêna, ké xe O šetše O e tseba yohle.” (Psalme 139:4) Dafida o be a tseba gabotse gore bao ba bego ba tla amogelwa e le baeng ka tenteng ya Jehofa e be e tla ba batho ba sa kago ba senya ba bangwe ka leleme le bao ba gannego go diriša leleme la bona go phatlalatša mabarebare ao a kwešago ditsebe bose a lesebo leo le tlago goboša motho yo a tlwaetšwego kudu. Bao Jehofa a ba lebeletšego ka botho e be e tla ba batho bao ba bolelago therešo gaešita le ka dipelong tša bona. (Psalme 15:1-3; Diema 6:16-19) Ga go le o tee wa rena yo a kgonago go laola leleme ka mo go feletšego, eupja Dafida ga se a re ka go fokola, a phetha ka gore go be go se na seo a ka se dirago go kaonefatša boemo bja gagwe. O feditše nako e ntši a hlama le go opela dipsalme tša go tumiša Jehofa. Le gona, o ile a amogela ka go rata go nyaka ga gagwe thušo gomme a e rapelelela go Modimo. (Psalme 19:12-14) Na go diriša ga rena leleme le gona go nyaka go elwa hloko ka thapelo?

9. (a) Tlhaloso ya Psalme 139:5 e bontšha’ng ge e le ka gore Modimo o tseba boemo bja rena gabotse? (b) Se se dira gore re kgodišege ka eng?

⁹ Jehofa ga a re bone goba a bona boemo bja rena ka pono e lekaneditšwego feela. O na le pono e feletšego, e lego go tšwa mahlakoreng ka moka. Ka go diriša motse wo o bego o rakeletšwe e le mohlala, Dafida o ngwadile gore: “O ntika ka pele le ka moraxo.” Tabeng ya Dafida, Modimo e be e se lenaba leo le hlomarago; go e na le moo, e be e le mohlokomedi yo a hlapeditšego. Dafida o okeditše ka gore, “Ka xodimo xa-ka O bea seatla sa xaxo,” ka go rialo a bontšha taolo le tšhireletšo tša Modimo tšeo di bontšhitšwego bakeng sa mohola wa nako e telele go bao ba mo ratago. O ile a dumela ka gore: “Xo hlaoloxanya matete ao xo mpaletše; di nkxoletše; [ka] se di kxônê.” (Psalme 139:5, 6) Tsebo ya Modimo ya go tseba bahlanka ba gagwe ke ye e phethagetšego kudu le ye e feletšego kudu, moo re ka se kgonego go e kwešiša ka botlalo. Eupja re tseba ka mo go lekanego go ka kgodišega gore ruri Jehofa o a re kwešiša le gore thušo yeo a e neago e tla ba e phalago tšohle.—Jesaya 48:17, 18.

Go sa Šetšwe Moo re Lego Gona, Modimo a ka re Thuša

10. Ke therešo efe e kgothatšago yeo e fetišetšwago ke tlhaloso e matla ya Psalme 139:7-12?

¹⁰ Ge a lebelela tlhokomelo e lerato ya Jehofa go tšwa ka lehlakoreng le lengwe, mopsalme o tšwela pele ka gore: “Môya wa xaxo nka o efoxa kae? ’Fahloxô sa xaxo nka se thšaba ka ya kae?” O be a sa kganyoge go leka go tšhabela kgole le Jehofa; go e na le moo, o be a tseba gore gohle moo a bego a ka ba gona, Jehofa o be a tla tseba, gomme o be a tla mo thuša ka moya o mokgethwa. O ile a tšwela pele ka gore: “Xe nka rotoxêla xodimong, ke y’o hwetša Ò le xôna. Xe nka y’O ikalêla kwa bo-dula-bahu, O tlo ba Ò le xôna-moo. Xe nka phurolla diphêxô tša mahuba, ka y’o dula kwa maxómong a lewatle, le xôna-kua ke tlo hlahlwa ke seatla s’axo; letsôxô l’axo le letona le tlo nthswara. Le xe nka re: Lefsifsi a le nkutê ruri! Ka re: Seetša se bê bošexo ka ’baka la-ka, xo Wene lefsifsi le ka se fifatše, bošexo bo bônêxa byalo ka mosexare; lefsifsi le seetša e fo ba setee.” (Psalme 139:7-12) Ga go na moo re ka yago gona, ga go na boemo bjo re ka lebanago le bjona, bjo go bjona Jehofa a bego a ka se kgone go re bona goba moo moya wa gagwe o sa fihlego bakeng sa go re thuša.

11, 12. (a) Gaešita lege Jona a ile a lebala therešo ye ka nakwana, bokgoni bja Jehofa bja go bona le go thuša bo bontšhitšwe bjang tabeng ya Jona? (b) Phihlelo ya Jona e swanetše go re hola bjang?

¹¹ Ka nako e nngwe moporofeta Jona o ile a lebala seo. Jehofa o be a mo abetše gore a ye go yo bolela bathong ba Ninife. Ka lebaka le itšego o ile a ikwa gore a ka se kgone go dira kabelo yeo. Mohlomongwe ka baka la go tuma ka bošoro ga ba-Asiria, kgopolo ya go yo hlankela Ninife e ile ya tšhoša Jona. Ka gona o ile a leka go khuta. Lebopong la lewatle la Jafo o ile a tšea leeto la sekepe seo se bego se e-ya Tarisisi (ye ka kakaretšo e tswalanywago le Sepania, e lego dikhilomithara tše di fetago 3 500 ka bodikela bja Ninife). Lega go le bjalo, Jehofa o ile a mmona ge a namela sekepe gomme a e-ya go robala ka phapošaneng ya ka tlase. Le gona Modimo o tsebile moo Jona a bego a le gona ge ka morago a be a lahlelwa ka ntle ga sekepe, gomme Jehofa o ile a kwa Jona ge a be a holofetša a le ka gare ga mpa ya hlapi e kgolo gore o tla phetha dikeno tša gagwe. Ge a bušeditšwe nageng e omilego, Jona o ile a buša a newa sebaka sa go phetha kabelo ya gagwe.—Jona 1:3, 17; 2:1–3:4.

¹² Go ka be go bile kaone gakaakang ge nkabe Jona a ile a ithekga ka moya wa Jehofa di sa tloga fase gore o mo thuše go phetha kabelo ya gagwe! Lega go le bjalo, ka morago Jona ka boikokobetšo o ile a ngwala phihlelo ya gagwe, gomme ga e sa le go tloga nakong yeo pego yeo e ile ya thuša ba bantši go bontšha go holofela Jehofa moo go bonagetšego go be go le thata kudu go Jona.—Ba-Roma 15:4.

13. (a) Eliya o be a phethile dikabelo dife ka potego pele a tšhaba Mohumagadi Isabele? (b) Jehofa o ile a thuša Eliya bjang gaešita lege a be a nyaka go yo khuta lefelong la ka ntle ga Isiraele?

¹³ Phihlelo ya Eliya e be e le e fapanego ka tsela e itšego. O be a fetišitše ka potego taelo ya Jehofa ya gore Isiraele e be e tla welwa ke komelelo e le kotlo bakeng sa dibe tša bona. (1 Dikxoši 16:30-33; 17:1) O be a ile a thekga borapedi bja therešo ka sebete ntweng yeo e lego magareng ga Jehofa le Baali Thabeng ya Karamele. Le gona, o be a phegelela polao ya baporofeta ba Baali ba 450 moeding wa meetse wa Kisoni go fihla e fela. Eupja ge Mohumagadi Isabele ka go galefa a be a ikanela go bolaya Eliya, Eliya o ile a ngwega nageng. (1 Dikxoši 18:18-40; 19:1-4) Na Jehofa o be a le gona moo gore a mo thuše nakong yeo e thata? Ee, ruri o be a le gona. Ge Eliya nkabe a ile a namela thabeng e telele, bjalo ka ge eka o legodimong; ge a ka be a ile a iphihla leweng leo le išago ka gare ga lefase, bjalo ka ge eka o ka lebitleng; ge a ka be a ile a tšhabela sehlakahlakeng sa kgole ka lebelo la seetša sa mahuba ge se apeša lefaseng ka moka—seatla sa Jehofa se be se tla ba moo bakeng sa go mo matlafatša le go mo hlahla. (Bapiša le Ba-Roma 8:38, 39.) Le gona, Jehofa ga se a matlafatša Eliya feela ka mphago bakeng sa leeto la gagwe, eupja le ka diponagatšo tše di makatšago tša matla a Gagwe ao a šomago. Ka ge a be a matlafaditšwe ka tsela yeo, Eliya o ile a dira kabelo ya gagwe yeo e latetšego ya boporofeta.—1 Dikxoši 19:5-18.

14. (a) Ke ka baka la’ng e be e tla ba phošo go phetha ka gore Modimo o gohle? (b) Jehofa o ile a thekga bahlanka ba gagwe ba mehleng yeno ka lerato ka tlase ga maemo afe? (c) Go ka ba bjang gore gaešita le ge e ba re be re ka ba bodula-bahu Modimo a ka ba fao?

¹⁴ Mantšu a boporofeta a Psalme 139:7-12 ga a bolele gore Modimo o gohle, e lego gore yena ka noši o gona mafelong ohle ka dinako tšohle. Mangwalo a bontšha gabotse seo se fapanego. (Doiteronomio 26:15; Ba-Hebere 9:24) Lega go le bjalo, bahlanka ba gagwe le ka mohla ba ka se be moo a ka se ba fihlelelego. Go bjalo ka bao dikabelo tša bona tša pušo ya Modimo di ba išitšego mafelong a kgole. Go bile bjalo ka Dihlatse tše di botegago dikampeng tša tshwenyo tša Nazi nakong ya Ntwa ya II ya Lefase, le gona go bjalo ka baromiwa ba bego ba tswaleletšwe gore ba dule ba nnoši kua China mafelelong a bo-1950 le mathomong a bo-1960. Go bile bjalo ka banababo rena le dikgaetšedi ba rategago ba nageng ya Bogareng bja Afrika bao ba ilego ba swanelwa ke go ngwega leboelela metseng ya gabo bona, gaešita le nageng ya gabo bona. Ge e ba go nyakega, Jehofa a ka fihla le gona bodula-bahu, e lego lona le lebitla leo le tlwaelegilego, gomme a ntšha batho ba gagwe ba botegago ka tsogo.—Jobo 14:13-15; Luka 20:37, 38.

Motho Yoo a re Kwešišago e le ka Kgonthe

15. (a) Ke go tloga neng moo Jehofa a kgonago go bona go gola ga rena? (b) Tekanyo ya tsebo ya Modimo ya go re tseba yeo e bontšhitšwego ke go bolela ga mopsalme ka dipshio ke e kaaka’ng?

¹⁵ Ka tlase ga pudulelo, mopsalme o lebiša tlhokomelo tabeng ya gore Modimo o re tseba gaešita le pele re ka belegwa ge a re: “Ka gobane ke wena ka noši o tšweleditšego dipshio tša-ka; o tšwetše pele o mpolokile ke šireletšegile ka mpeng ya mma. Ke tla go reta ka gobane ke dirilwe ka tsela yeo e boifišago ka mo go makatšago. Mediro ya gago e a makatša, bjalo ka ge moya wa-ka o tloga o lemoga seo.” (Psalme 139:13, 14, NW) Go kopana ga dikarolwana tša leabela tše di tšwago go tatago rena le go mmago rena nakong ya go ima di tšweletša thulaganyo yeo e kgomago kudu bokgoni bjoo mmele le monagano di ka bago le bjona. Modimo o kwešiša bokgoni bjoo. Psalmeng ye go bolelwa ka mo go kgethegilego ka dipshio, tšeo gantši ka Mangwalong di dirišwago go emela dibopego tša ka gare-gare tša semelo.a (Psalme 7:9, NW; Jeremia 17:10, NW) Jehofa o be a tsebile ditaba tše ka botlalo mabapi le rena pele re ka belegwa. Le gona ke yoo ka go kgomega ka lerato a hlamilego mmele wa motho e le gore sele e nontšhitšwego ka gare ga popelo ya mma e tšweletše lefelo la bodulo leo le šireletšegilego bakeng sa go ‘šireletša’ leseana ge le dutše le gola.

16. (a) Psalme 139:15, 16 e gatelela matla a tseneletšego a pono ya Modimo ka tsela efe? (b) Ke ka baka la’ng se e swanetše go ba seo se kgothatšago go rena?

¹⁶ Ke moka, ge a gatelela matla ao a tsenelelago a pono ya Modimo, mopsalme o oketša ka gore: “Marapo a-ka a be a se a širela go wena ge ke be ke bopega ka sephiring, ge ke be ke logega dikarolong tša tlase-tlase tša lefase [tšeo go bonalago e le tšhupetšo ya sereto yeo e šupago popelong ya mmagwe eupja a bolela a lebišitše go bopjeng ga Adama ka lerole]. Mahlo a gago a bone gaešita le leseana le e bego e le nna, gomme ka pukung ya gago ditho tša lona ka moka di be di ngwadilwe, ge e le mabapi le matšatši ao di [ditho tša mmele] bopilwego ka wona, gomme go be go sešo gwa ba le setee [setho seo se lemogegago sa mmele] sa tšona.” (Psalme 139:15, 16, NW) Ga go na pelaelo gore—go sa šetšwe ge batho ba re kwešiša goba ba sa re kwešiše, Jehofa o a re kwešiša. Se se swanetše go re kgoma bjang?

17. Ge e ba re lebelela mediro ya Modimo e le e makatšago, se se re tutueletša go dira’ng?

¹⁷ Mongwadi wa Psalme 139 o dumetše gore mediro ya Modimo yeo a bego a ngwala ka yona e be e makatša. Na le wena o ikwa ka tsela yeo? Selo seo se makatšago se dira gore motho a naganišiše goba a bontšhe go ela hloko ka kgahlego. Go ka direga gore o itshware ka tsela yeo medirong e bonagalago ya Jehofa ya tlholo. (Bapiša le Psalme 8:3, 4, 9.) Na le wena o nagana ka tsela yeo mabapi le seo a se dirilego ge a hloma Mmušo wa Mesia, ka seo a se dirago tabeng ya go dira gore ditaba tše di lokilego di bolelwe lefaseng lohle le tseleng yeo ka yona Lentšu la gagwe le fetolago dimelo tša batho?—Bapiša le 1 Petro 1:10-12.

18. Ge e ba re hwetša modiro wa Modimo e le o boifišago, se se tla re kgoma bjang?

¹⁸ Na o ikwa ka mo go swanago gore go akanya ka modiro wa Modimo ke mo go boifišago, le gore go tšweletša poifo e botse, yeo e tutuetšago ka matla, yeo e nago le mafelelo a magolo semelong sa gago le tseleng yeo o dirišago bophelo bja gago ka yona? (Bapiša le Psalme 66:5.) Ge e ba go le bjalo, gona pelo ya gago e tla go tutueletša go reta Jehofa, go mo tumiša, go bula dibaka tša go botša ba bangwe ka merero ya gagwe le dilo tše di tlabago tšeo a di boloketšego bao ba mo ratago.—Psalme 145:1-3.

[Mongwalo wa tlase]

Tlhaloso ya Gago ke Efe?

◻ Go tseba ga rena gore “Jehofa ke Modimo” go re thuša bjang gore re mo hlankele ka lethabo?

◻ Maphelo a rena a swanetše go tutuetšwa bjang ke go tseba ga Modimo se sengwe le se sengwe seo re se dirago?

◻ Ke ka baka la’ng therešo ya gore le ka mohla re ka se khutele Modimo e le e kgothatšago?

◻ Ke ka baka la’ng Modimo a kgona go re kwešiša ditseleng tšeo go tšona motho a sa kgonego go re kwešiša?

◻ Ke ka baka la’ng thuto e bjalo ka ye e re dira gore re nyake go tumiša Jehofa?